Read bassa 1 SHƐGWUMA SHI HIIŊ 8 Bible Online

1 SHƐGWUMA SHI HIIŊ 8 - bassa bible

1 SHƐGWUMA SHI HIIŊ 8

¹Nazhɛ agwuma Sụlụmụn suyanɛ n-nyarɛ mi Isrɛl hwɛɛ, te ehiu alamụ, ta shɛgwuma shu nhwaŋ hwɛɛ, maa a ulwa no ofwo ubwa nu Jɛrusalɛm; iwɛ maa ɛ bɛcinjɛ Ikpɛtɛ ɛtɛ Unu-tutwa ya AGWANGWAMA nu Zayon na shɛ Ụshɛpwụ Devid.

²Ibɛ po atwa Isrɛl hwɛɛ ụlwatagwụ no ofwo agwuma Sụlụmụn na aka bi isene unyasa, nu upiana Bicenje,[10] na ɛɛ hiɛŋ, Etanim.

³Aka na tu n-nyarɛ mi Isrɛl mu ulwa hwɛɛ, nazhɛ onongbo shepi Ikpɛtɛ ɛtɛ.

⁴Aa shapɛ Ikpɛtɛ ɛtɛ ya AGWANGWAMA, onongbo keeni Alivai suji du tu udulo ata tu'ulwatagwụ keeni i'wɛŋnɛ ɛtɛ tijilo ga namɛ apata hwɛɛ.

⁵Nazhɛ agwuma Sụlụmụn keeni tu'ulwa ta atwa Isrɛl a na namɛ pu bwa hwɛɛ hwuleni Ikpɛtɛ ɛtɛ ya AGWANGWAMA umbe, maa a na ta arụpɛ ni inɛ keeni agwụdụ na zasa tɛrɛta maa e mepi ufwugwo ibɛ.

⁶Nazhɛ onongbo shi Ikpɛtɛ ɛtɛ Unu-tutwa ya AGWANGWAMA no ohwolu ibɛ nu umwono wa amɛ, na Hwuri una vwɛ ne Tijilo Hwɛɛ, tuta ta apiambɛ iyi-uumwa ɛtɛ.

⁷Apiambɛ iyi-uumwa ɛtɛ ubi ikpɛtɛ ɛtɛ, apiambɛ aba urigeni Ikpɛtɛ ɛtɛ, ti imbele ɛtɛ aa 'waŋna ikpɛtɛ ɛtɛ hwɛɛ.

⁸Ama imbele Ikpɛtɛ ɛtɛ njisanjɛ harɛ yee hikekeni no ofwo ata tijilo na namɛ nu umwono ata wa amɛ. Ama i beni shi tuba no tupohondo maa bụtụ kwụbɛ iŋ o, i ta namba apata taa hwayɛ.

⁹I zasa iyi elele nɛ zweni na amɛ Ikpɛtɛ ɛtɛ Unu-tutwa o, semi atayɛ ata tụpatakwụ patakwụ eyebi, go Moses zweni la ni ibɛ ni Ishɛmɛ ɛtɛ Horɛb AGWANGWAMA twa la unu na atwa Isrɛl kiri na aka na ta a banɛ la na cɛnjɛ ti Ijipti.

¹⁰Aka na to onongbo banɛ no Ohwolu ata Tijilo, nazhɛ udomu shini umwono ata wa AGWANGWAMA.

¹¹Iwɛbɛ po onongbo eri shi o shikono apata maa a njɛ ugondu wa aba iwɛ udomu ata, iwɛnɛ tu ụjɛrụma wa AGWANGWAMA shini umwono ata wa AGWANGWAMA.

¹²Nazhɛ go Sụlụmụn hiɛŋ, AGWANGWAMA, Gabụ bi peteni uwaŋna na tụla,[11] ebi teri kaa maa nama no odomu na 'yajɛ tishi.

¹³M bi meni umwono ga ụ'wụtụ maa ụ shɛ ofwo na maa nama unyizo-nom.

¹⁴Ibɛ po agwuma jishirijɛ eshe ubwa geri na atwa ubwa namɛ, bee peni tu'ulwa ti Isrɛl hwɛɛ uwebiye na aka na tɛ ɛ ishijɛ ee shikekeni nu umbe ubwa.

¹⁵Bɛɛ hiɛŋ aŋ, Shɛtana ma AGWANGWAMA na shɛ Agwatana atwa Isrɛl, na ụrɛcɛnjɛ iyi nɛ bee shileni la Devid bishi mi unu nu unu ubwa, bɛɛ hiɛŋ.

¹⁶Taa na aka na ti Ngɛɛ bɛcinjɛ la atwa mi Isrɛl ni Ijipti, i zasa ụshɛpwụ we elele na Ngee teri na alamụ Isrɛl hwɛɛ maa o mo umwono mu maa izeci mi nama apata o, semi ge Devid kiri Ngee teri maa sha uhiu wa atwa mi Isrɛl hwɛɛ.

¹⁷I kwụlanɛ la bishi mi ge Devid maa mana AGWANGWAMA na shɛ Agwatana Isrɛl umwono.

¹⁸Ama AGWANGWAMA hiɛŋ bụ, I zhɛmɛ ta abu 'yajɛ ahaŋsa maa m meni umwono.

¹⁹Ama shɛ gabụ tuba bi zhɛ bu ma m mana umwono ata o! Ama yɛu bu nɛ ɛbi zhɛ ba mata ni ikɛnyi bu, ubwa zhɛ ma m mana umwono ata.

²⁰Ibɛ po Agwatana ụrɛcɛnjɛ ga n-ndumwa ma ata bee shileni la bishi mi unu. Gamba na n yɛ ya ga tugwama te bishi mi ni Isrɛl, Ngee meni ga kaa AGWANGWAMA na shɛ Agwatana Isrɛl umwono ata.

²¹Ngaa ndanɛ Ikpɛtɛ ɛtɛ Unu-tutwa ya AGWANGWAMA ohwolu na maa i sho. Ibɛ shɛ Ikpɛtɛ ɛtɛ baa twa la unu no ogwunukwoshi tu aka na ti bɛɛ bɛcinjɛ aŋ na cɛnjɛ ti Ijipti.

²²Nazhɛ go Sụlụmụn zhe bee shikeni nu utukwu-ụrụpɛ wa AGWANGWAMA, ne eshe atwa Isrɛl hwɛɛ, bee suji i'ɛlɛ ibwɛ na azuba,

²³bɛɛ hiɛŋ, Oo AGWANGWAMA na shɛ Agwatana atwa Isrɛl, i zasa Agwatana na shɛ gana bụ o, okwo na azuba, okwo nu unyizo. Gabụ ba untangana unu bu tutwa keeni tulubo tụ bụ ti tikpeke no ofwo miaụŋ-mu-ugondu bu a na ma bu 'wa na ahaŋsa aba oko hwɛɛ.

²⁴Gabụ kaa bu untanganɛ unu na ebi shileni la bishi mi ge Devid na shɛ yɛu bu ugondu nu unu bu, ni i'ɛlɛ bu kaa abɛ njɛ maa i sɛ hwayɛ ga.

²⁵Oo AGWANGWAMA na shɛ Agwatana Isrɛl, untangana kaa unu na ebi shileni la bishi mi ge Devid na shɛ yɛu ɛtɛ bu ugondu. Ibɛ shɛ unu ata ebi shileni bu la, ɛbi hiɛŋ, Bi zha shɛ ba vwunga kwukwuŋ bụtụ na zhɛ na ya tugwama ti Isrɛl nu ukpogwu bụ, ti yaa shɛ miaụŋ mụ bụ ma pana abashɛ maa a na ma ndana iyi elele gana na ta abu n ndanɛ iyi.

²⁶Oo Agwatana Isrɛl, ma bụ lụpa, lono maa go unu ata ebi shileni la yɛu ɛtɛ bu ugondu na shɛ bishi mi ge Devid u shikono dimi.

²⁷Asha Agwatana zhɛ a nama ga na cɛnjɛ tu unyizo hŋ? Kwụba azuba na gembi uhwuri iyi elele a bụ twa sụ tunama o, gana naa ya umwono ga Ngoo mo eri mo bu gombo tunamaa?

²⁸Oo AGWANGWAMA na shɛ Agwatana mi, okwo ti yaa shɛ gana ata hwuga adua yɛu-ugondu bu keeni tutabwa tu bwa, shɛlaga n'ungwa mi mi keeni adua na Ama nda hwayɛ ga.

²⁹Ge eshe bu na ngbaraka umwono ga tu ụjita tu uwaŋna, aba shɛ ofwo ata ɛbi hiɛŋ, Izeci mi zhɛ ya nama apata iwɛ maa na shɛlaga adua na yɛu gɛ bu ugondu zhɛ na nda epe.

³⁰Na hwuga tutabwa ti yɛu gɛ bu ugondu keeni adua atwa bụ Isrɛl. Aka elele na aa zhajɛ maa a njɛ adua, hwuga adua aba ta abụ namɛ taa na azuba ata abɛ jɛjɛ, iwɛ maa gengeni aŋ iwɛwɛ ya aba.

³¹Yaa shɛ bụtụ be elele njɛ binya bwa iwɛwɛ, aa njɛ bụ maa ga ta-tuwa, baa zhajɛ nu utukwu-ụrụpɛ ga namɛ nu Umwono ga bụ, boo to-tuwa,

³²asha hwulaga taa na azuba ata abu namɛ, maa jɛmɛ ụshɛrɛya miaụŋ mụ bụ mu ugondu. Bụtụ be elele na maa wụmɛ, pana bụ ulwapɛ na teni cɛŋ nu bwa, ama ganga bụtụ na n-ndumwa-zhɛmɛ, maa ndanɛ bụ te teni cɛŋ gana na te tiririri tu bwa tu namɛ.

³³Aka elele na ta atwa i'ime atwa bụ Isrɛl lasụ aŋ iwɛnɛ ta a bɛ njɛ iwɛwɛ, yaa shɛ ɛɛ jishirijɛ pụ bụ ee leni-unu iwɛwɛ ya aba ni izeci bu, aa bụ tabwa nu Umwono ga,

³⁴asha hwuga adua aba ta abu namɛ taa na azuba maa gengeni atwa bụ Isrɛl iwɛwɛ ya aba, maa gwuricinji aŋ sasana na cɛnjɛ tu na ebi peni la ogwunukwoshi aba.

³⁵Aka na atwa bụ bɛ njɛ iwɛwɛ, nazhɛ abɛ 'imɛ eshilo maa kede ngbo, yaa shɛ aa jɛshɛrɛjɛ shɛhaŋsa aa zhajɛ nu Umowno ga, ee meme zucinje, aa njɛ adua, iwɛnɛ abu sukakanɛ aŋ,

³⁶hwuga adua aba ta abu namɛ taa na azuba maa gengeni miaụŋ mụ bụ mu ugondu a na shɛ atwa Isrɛl iwɛwɛ ya aba. Mbisogono aŋ uhwaŋna bụ te teni cɛŋ. Pana aŋ eshilo na cɛnjɛ tụ bụ tu na ebi peni aŋ maa a yɛ-ogwu tuba.

³⁷Yaa shɛ imunɛ layɛ na cɛnjɛ tu ga, okwo ụngwụ uko ụwɛ u mburusonu, okwo ulwa kwụnɛ iyimɛyɛ, okwo ugarɛrɛ ụ 'imɛ iyimɛyɛ, okwo ovworo, okwo a'nywa, kwo kaa atwa i'ime atwa bụ Isrɛl sukakanɛ aŋ na ashɛpwụ aba, okwo tishikpe te elele, kwo kaa iyiri ụngwụ we elele layɛ na ashashɛ aba;

³⁸yaa shɛ bụtụ be elele kwo kaa atwa bụ Isrɛl hwɛ hwɛɛ njɛ adua aa bụ tabwa iwɛnɛ ti yaa gwumanɛ aŋ, ee suje i'ɛlɛ ya aba aa sakanɛ iŋ geri bu Umwono ga na adua aba,

³⁹asha hwuga adua aba taa na azuba ata abu namɛ, maa gengeni aŋ iwɛwɛ ya aba, maa mbiyeni aŋ du te teni cɛŋ nu gana na ebi mepi amɛ bụtụ bụtụ. Iwɛnɛ po gabụ gobuko kiri bi mepi shɛmɛ sha atwa kpaaŋ,

⁴⁰iwɛ maa a bụ mụnɛ ụjɛrụma na aka elele na ta a namɛ na cɛnjɛ tu ga ebi peni la eshi tu.

⁴¹Gobwonu du, yaa shɛ bụtụ na shɛ shɛ bụtụ bụ bi Isrɛl na namɛ na cɛnjɛ ta ata tu namɛ taa dụlụ, zhajɛ iwɛ izeci bu,

⁴²iwɛnɛ ɛɛ zhɛ a hwuga iwɛ izeci ɛtɛ bu i'wɛtwɛ, keeni iwɛ ugondu bu ukpahiŋ ụ'wụtụ na abu ndanɛ atwa bụ. Yaa shɛ kaa baa zhajɛ baa njɛ adua ni zeci bu nu Umwono ga,

⁴³hwuga du adua ubwa taa na azuba ata abu namɛ, maa ndanɛ bụ du iyi elele nɛ baa bụ lụpɛ, iwɛ maa atwa unyizo ga kpaaŋ mepi izeci bu maa a bụ mụnɛ du ụjɛrụma gana na ta atwa bụ Isrɛl ma bụ muna ụjɛrụma; iwɛ maa e mepi maa Umwono ga Ngoo mo ụ shɛ iwɛ maa a na bu zhɛba nu bwa.

⁴⁴Yaa shɛ kaa atwa bụ beni maa a njɛ ujasa na atwa i'ime ya aba geri elele na abụ tumwanɛ aŋ. Yaa shɛ aa panɛ eshe aba geri bụ ụshɛpwụ ga bụ ebi teri keeni geri bu Umwono ga Ngee bi meni aa njɛ adua,

⁴⁵asha hwuga adua aba keeni tutabwa ta aba taa na azuba ata abu namɛ, maa ndanɛ aŋ iyi elele nɛ aa bụ lụpɛ.

⁴⁶Yaa shɛ aa bɛ njɛ iwɛwɛ, iwɛnɛ ti yaa zasa bụtụ na njɛ shɛ iwɛwɛ, amɛ bụ kaa hashɛganụ na aba, ebi leni maa atwa i'ime ya aba eri aŋ maa e suji aŋ na cɛnjɛ ta aba, okwo ta a dụlụmɛ, kwo kaa to o gwumwonu,

⁴⁷yaa shɛ ee teyinje na cɛnjɛ ta ata ta atwa i'ime ya aba a na aa shɛ ajama aba, yaa shɛ aa jɛshɛrɛjɛ-shihaŋsa sha aba aa bu tabwa okwo na cɛnjɛ ta ata ta atwa i'ime ya aba a na 'imɛ aŋ. Ɛɛ hiɛŋ, Tɛ njɛ iwɛwɛ, i'wɛtwɛ keeni tugworozwo.

⁴⁸Yaa shɛ aa jɛshɛrɛjɛ-shihaŋsa sha aba na tɛkana no tugom na cɛnjɛ ta ata ta atwa i'ime ya aba a na 'imɛ aŋ, aa panɛ eshe aba geri ba cɛnjɛ tu ga ta aba ebi peni la ogwunukwoshi aba. Aa njɛ adua no ofwo bu, ibɛ shɛ ụshɛpwụ ata ebi teri keeni Umwono ga Ngee bi meni,

⁴⁹asha hwuga adua aba keeni tutabwa ta aba ta abu namɛ taa na azuba, maa ndanɛ aŋ iyi elele nɛ aa bụ lụpɛ.

⁵⁰Gangana atwa bụ iwɛwɛ keeni tipindo tu na ee bi pindeni, maa hieci inyɛmɛnyɛmɛ ya aba ne eshe atwa i'ime ya aba a na 'imɛ aŋ a na njɛ aŋ ajama aba, maa a njɛ uwanyi wa aba.

⁵¹Iwɛnɛ po atwa bụ aa shɛ, aba shɛ atwa na ɛbi bɛcinjɛ na cɛnjɛ ta ata ti Ijipti, tɛ shɛ gana ukwokwo ulwa ụshɛmbɛrɛ.

⁵²Ge eshe bu kwụbɛ tutabwa tu na yɛu bu ugondu ma bu tabwa keeni tutabwa ta atwa bụ Isrɛl, maa no shilo acɛbɛ na aka elele na aa bụ suyanɛ.

⁵³Iwɛnɛ po aba kiri ebi teri na amɛ edenji elele na namɛ nu unyizo ga maa a shɛ atwa bụ. Gana na ta abɛ jɛmɛ la nu unu yɛu bu ugondu go Moses. Oo AGWANGWAMA na Hwuri Kpaaŋ, gabụ kaa bu bɛcinjɛ la ogwunukwoshi tu na cɛnjɛ ti Ijipti.

⁵⁴Aka na tu go Sụlụmụn hwuwi adua keeni AGWANGWAMA tutabwa hwɛɛ, bɛɛ ishijɛ bee genji utukwu-ụrụpɛ ata wa AGWANGWAMA bee ge kwuzhi, bee suji i'ɛlɛ ibwɛ na azuba.

⁵⁵Ti bɛɛ ishijɛ bee shikeni, bee peni tusotulonu ta atwa Isrɛl hwɛɛ uwebiye na rụhwụŋ rụ 'wụtụ, bɛɛ hiɛŋ,

⁵⁶Zhemonjino ma AGWANGWAMA na peni atwa ubwa Isrɛl ụhinjanụ gana na ti bee shiri la unu ibɛ. Iyi ibiye ye elele nɛ bee shiri la unu tedure ni yɛu ibwɛ ugondu go Moses, okwo ike ibɛ ngwuri shi o.

⁵⁷AGWANGWAMA na shɛ Agwatana tu namɛ no tu gana na tu baa namɛ la ne eshi tu. Kede ma tu ganga kwo kaa maa mo ti jinoko kwukwuŋ.

⁵⁸Ama gɛ jishirijɛ shɛhaŋsa shi tu maa shi gwure pu bwa, maa ta 'wa ihwɛŋnɛ ibwɛ, maa ta untangana du unu ubwa tụpana keeni andwa ubwa hwɛɛ, to onu ubwa tɛtɛtagana keeni iyi elele nɛ bee peni la eshi tu unu ibɛ hwɛɛ.

⁵⁹Ga AGWANGWAMA na shɛ Agwatana hwụjɛ tutabwa tu na Ngaa tabwa bụ tụ ụjita tu uwaŋna. Ga untangana iyi nɛ Gamba na n shɛ yɛu ibwɛ ugondu keeni atwa ubwa Isrɛl a jala nu gana na tu utakashɛ na wa ta aŋ namɛ iyi-heri.

⁶⁰Ga atwa elele na namɛ nu unyizo ga mepi maa AGWANGWAMA ubwa kiri shɛ Agwatana, i zasa binya ta namba ya o.

⁶¹Ama ga shihaŋsa shi hiŋ shi namana AGWANGWAMA na shɛ Agwatana tu hwɛɛ, maa hi 'wa andwa ubwa, maa du hi untangana onu na bee hi peni gana na ta ahia nda tutu i ci aka ga.

⁶²Nazhɛ agwuma, na atwa Isrɛl elele na namɛ pu bwa peni AGWANGWAMA arụpɛ.

⁶³Go Sụlụmụn peni AGWANGWAMA ụrụpɛ wa amɛ-olom ni inɛ yo o igbɛɛ-umwpa-nu-boo-ko (22,000) keeni agwụdụ igbɛɛ-dupu-ne-eshe-umpwa (120,000). Nazhɛ agwuma, na atwa ata hwɛɛ shileni AGWANGWAMA Umwono ubwa, aa njɛ uŋ tijilo.

⁶⁴Nụ ụjita ata gbaa ibɛ agwuma Sụlụmụn njɛ ashashɛ ukpogwu ata namɛ nu umbe Umwono wa AGWANGWAMA shɛshɛshɛ ne tijilo tɛnda uŋ. Apata boo to ụrụpɛ tuhwoŋzhingo keeni ụrụpɛ tiya, keeni arụpɛ manɛbɛ mu usunda ata oo to ụrụpɛ wa amɛ-olom. Iwɛnɛ po utukwu ata ụrụpɛ utumburɛ na namɛ nu umbe AGWANGWAMA twa sụ maa u leshiji ụrụpɛ tuhwoŋzhingo, nu una tiya keeni manɛbɛ mụ ụrụpɛ ata wa amɛ-olom hwɛɛ o.

⁶⁵Go Sụlụmụn na atwa Isrɛl kpaaŋ njɛ isene umwono wa Agwatana tishilono bu na aka ata. Ufwugwo ụ'wụtụ zhajɛ aa ụlwataganụ AGWANGWAMA na shɛ Agwatana tu apata Jitɛ icenje icenje iyebi, ibɛ shɛ Jitɛ umpwa-ni-bɛ-neshi.[12] A bananjɛ te kwune no tutono tu Hamat, tutu i ci isese Ijipti.

⁶⁶Tụ ụjita ụtụndatụ u ci, nazhɛ agwuma genji atwa ata maa e hwuri ujiyo, ibɛ po atwa ata zhemonjino agwuma nazhɛ ee hwuri ujiyo. Unyasa shini na shɛmɛ sha aba keeni amɛ-olom iwɛ iyi ibiye nɛ AGWANGWAMA ndanɛ yɛu ibwɛ ugondu ge Devid keeni atwa ubwa Isrɛl.