Read bassa 1 SHƐGWUMA SHI HIIŊ 9 Bible Online

1 SHƐGWUMA SHI HIIŊ 9 - bassa bible

1 SHƐGWUMA SHI HIIŊ 9

¹Aka na tu go Sụlụmụn hwuwi Umwono wa AGWANGWAMA tuma hwɛɛ, ti ihwɛ ya agwuma keeni iyi elele nɛ baa jala tuma hwɛɛ.

²Nazhɛ AGWANGWAMA bananɛ bụ sasana caakwụ na aka yebi gana na baa bananɛ bụ la na aka hiiŋ ni Gibion.

³AGWANGWAMA hiɛŋ bụ, N hwụjɛ adua bụ keeni tutabwa ta ata abu n tabwa. N nduwa Umwono ga obu mo tijilo, Ngee shiri kaa izeci mi nu bwa unyizo-nom. Eshe mi keeni amɛ mi zhɛ a nama apata aka elele.

⁴Inɛɛ bụ i shɛ, yaa shɛ abu ma ndana iyi na tɛkana keeni ne tiririri ta ahaŋsa, gana na bishi bu ge Devid njɛ la, aba nda kaa iyi te teni cɛŋ, aba nda kaa iyi elele nɛ Ngee bi peni-unu, aba untangana kaa shikpogo shi mi keeni onu mi tɛtɛtagana hwɛɛ,

⁵nazhɛ Ngɛɛ zhɛ mo shikicingo idwɛtwɛ tugwama tụ bụ ni Isrɛl unyizo-nom, gana na Ngee shileni la bishi bu ge Devid unu, Ngɛɛ hiɛŋ bụ, Bụtụ na zhɛ na ya tugwama ti Isrɛl zha shɛ ba vwunga ni ihwɛ bu kwukwuŋ.

⁶Ama yaa shɛ ahiɛ jɛshɛrɛjɛ ehi n genji tu'wa, ta ahiɛba ta miaụŋ mi hiŋ, ahiɛ untanganɛ shɛ unu na Ngee hi peni keeni unu na Ngaa hiɛ tɛtaganɛ keeni andwa mi hwɛɛ, ehi zhe maa hi na zhɛba tuwa,

⁷asha N zhɛ ma bacɛnga atwa mi Isrɛl na cɛnjɛ ta ata Ngee peni aŋ la. Ngɛɛ zhɛ du kaa ma laka Umwono ga Ngaa njɛ tijilo ni izeci mi. Aka ata iwɛ atwa Isrɛl zhɛ ya shana atwa ushwa keeni iyi ya azunga.

⁸Umwono ga zhɛ wo hwuŋzwo wa sha uzagwuma;[13] u zhɛ wa dama atwa elele na kwụbɛ uŋ tɛ ɛ zhɛ tɛkashɛka. Ɛ zhɛ na ta uŋ ashɛshɛrụwụŋ, ɛ hiɛŋ, Iwembe po AGWANGWAMA njɛ cɛnjɛ tu ga keeni Umwono ga gana gaa?

⁹Nazhɛ atwa ata zhɛ ɛ jishijɛ, ɛ hiɛŋ, Iwɛnɛ ta a lacɛ AGWANGWAMA na shɛ Agwatana aba, na bɛcinjɛ la eshi aba na cɛnjɛ ti Ijipti, aa 'imɛ tuwa ta aba u'ala, aa zhɛba tụ, iwɛbɛ po AGWANGWAMA shapɛrɛganɛ aŋ abara ga ne ebe.

¹⁰Nu ukwunanga shiywa woshi shɛ na go Sụlụmụn ba ma shimwono shɛ ga shi yebi. Umwono ata wa AGWANGWAMA keeni ihwɛ ya agwuma.

¹¹Ge Hiram na shɛ agwuma Taya panɛ Sụlụmụn i'wɛ'wɛ yo osobu keeni inɛ yo orokwo, ta azhɛnarɛya i ci gana na tu ukekeshi ibɛ ga nda bụ. Iwɛbɛ po agwuma Sụlụmụn peni bu ashɛpwụ a'wụtụ a'wụtụ woshi na cɛnjɛ ti Galili.

¹²Ama aka na ge Hiram banɛ nu Taya baa kwụbɛ ashɛpwụ ata go Sụlụmụn peni bu, i kwụlanɛ shɛ bụ o.

¹³Bɛɛ hiɛŋ bụ, Ɛ-yɛu-bino mi, ashɛpwụ imbe nɛ bwaa ebi m penii? Iwɛbɛ po aa ta suyana ashɛpwụ ata maa cɛnjɛ tu Kabul[14] taa hwayɛ.

¹⁴Ge Hiram kaa tumwananɛ agwuma Sụlụmụn azhɛnarɛya arinya dipi-yebi-nu-woshi (120).

¹⁵Inɛ gɛ ibɛ shɛ ecilo no po agwuma Sụlụmụn njɛ atwa ni iji boo mo Umwono wa AGWANGWAMA keeni una ubwa umwono, keeni Milo, keeni uba na rungwutwonu ụshɛpwụ Jɛrusalɛm. Ni ibɛ du boo mo ashɛpwụ ata ɛɛ hiɛŋ Hazo, keeni Migido, keeni Gɛzɛ sasana.

¹⁶Agwuma Ijipti ga Faro leshiji ụshɛpwụ ata Gɛzɛ, bee sepi uŋ ulwa, baa kwụnɛ atwa Kenan a na ga jɛjɛ nu bwa. Bee peni uŋ yɛu ɛtɛ ibwɛ yo o go Sụlụmụn zeni gana upwaŋ na ti bɛɛ zhɛ tụmbụla.

¹⁷Ama go Sụlụmụn meeneni Gɛzɛ ata keeni Bɛt-horon ata namɛ tuta tu bwa,

¹⁸keeni Bealat keeni Tama ata namɛ nụ ụshɛka ata namɛ na cɛnjɛ tu Juda.[15]

¹⁹Boo mo du ashɛpwụ i'wɛŋnɛ tuswaka, ta ashɛpwụ ata baa swaka ihɛntu ibwɛ ujasa, ta ashɛpwụ asụcɛ idɛkwɛ ibwɛ, to ofwo elele na baa jala maa ma nu Jɛrusalɛm, ti Lebanon keeni cɛnjɛ tu na baa untanganɛ nu ụhwada ubwa hwɛɛ.

²⁰Atwa elele na shɛ A'amo, nɛ Ɛhit, nɛ Ɛpɛrɛz, na Ahiv keeni Ɛjɛbus, a na shɛ shɛ amamata Isrɛl a na ta vwɛ la na cɛnjɛ ta ata,

²¹miaụŋ ma aba tuba go Sụlụmụn njɛ ajama maa a na ndana bụ ugondu iji taa hwayɛ, iwɛnɛ ta atwa Isrɛl kwụnɛ shɛ aŋ la hwɛɛ na aka na te e leshiji cɛnjɛ ta ata na aba.

²²Ama go Sụlụmụn tuba njɛ shɛ miaụŋ mi Isrɛl ajama ubwa o. Ama aba tuba shɛ ejeshi ubwa, nu n-nyarɛ ma anjɛ-ugondu ubwa, ne eberezhe ejeshi ubwa keeni ehiu ejeshi ubwa. Aba du untanganɛ ihɛŋtu ibwɛ ujasa keeni asụcɛ idɛkwɛ ibwɛ.

²³Atwa na shɛ ehiu anjɛ-ugondu Sụlụmụn namɛ atwa akpakwụ-eyebi-ni-dipi-tɛtu (550).

²⁴Na aba na ti yɛu Faro yo o nɛ shɛ biyikwo ba agwuma Sụlụmụn beni nụ ụshɛpwụ ata Devid ụ'wụtụ bee zhe nu umwono ata go Sụlụmụn meni bu, nazhɛ go Sụlụmụn mo Milo.

²⁵Kpalụ tatụ go Sụlụmụn ba ta ụrụpɛ tuhwoŋzhingo, tu ụrụpɛ wa amɛ-olom na amɛ uywa uko, nu utukwu-ụrụpɛ ata bee meni AGWANGWAMA. Bo hwoŋzhingo du iturɛre nu utukwu-ụrụpɛ ata wa AGWANGWAMA. Gana baa hwaŋzhɛnjɛ ugondu umwono ata tɛnda ta.

²⁶Agwuma Sụlụmụn njɛ ihɛŋtu tinyakpa nyakpa te gembi ufwugwo ni Ɛzion-gɛbɛ na dongonu Ɛlat na cɛnjɛ ti Idụm, na namɛ nụ ụpalanụ Itekwu Ishenje.

²⁷Ge Hiram tumwanɛ atwa ubwa a na nyiwoŋnowuŋ ni itekwu maa a njɛ ugondu ata na anjɛ-ugondu Sụlụmụn.

²⁸Ibɛ po ee zhe Ofi ni ihɛŋtu, ee suje azhɛnarɛya a na ulumo wa aba ụ shɛ gana arinya akpakwụ-eyebi-nu-woshi, (420) apata ee suje aŋ ee peni agwuma Sụlụmụn.