Read bassa 2 SHƐGWUMA SHI YEBI 1 Bible Online

2 SHƐGWUMA SHI YEBI 1 - bassa bible

2 SHƐGWUMA SHI YEBI 1

¹Na aba na ta agwuma Isrɛl ga Ahab 'wi, nazhɛ atwa Moab sukakanɛ atwa Isrɛl ne tigezhe.

²Ga Ahazia na shɛ agwuma Isrɛl, bɛzhɛrungwa nu umwono ubwa wa azuba, na namɛ nu Samaria baa layɛ, bee eri ụngwụ tebiye. Iwɛbɛ po baa tumwanɛ atumwa maa e zhe no ofwo Beal-zɛbub na shɛ tuwa ta Afilistia, tu na tu namɛ nụ ụshɛpwụ ata ɛɛ hiɛŋ Ekron, maa e hweyigeni okwo bi zhɛ ba zhɛmanana ụngwụ ubwa.

³Ama butumwa ba AGWANGWAMA ba azuba mbishi Elaija bụtụ ata bi Tishbi, bɛɛ hiɛŋ, Ishijɛ maa zhe maa twa na atumwa agwuma Samaria, maa mbishi aŋ maa, Agwatana suu zasaba ya ni Isrɛl upo ɛhi zhɛ hie hweyigeni iwɛ no ofwo Beal-zɛbub na shɛ tuwa tụ ụshɛpwụ Ekron?

⁴Iwɛ ecilo ata AGWANGWAMA hiɛŋ, Bi zha shɛ be kezhe kwukwuŋ no ogodo ata abụ patanɛ, ama bi zhɛ bo 'wo tilɛɛ! Ge Elaija hwuri ga

⁵Aka na ta atumwa gwure pu bwa, bɛɛ hiɛŋ aŋ, Nanaa ehi gwulwo yaa?

⁶Atumwa ubwa jishijɛ bụ, ɛɛ hiɛŋ, Tu twa na bụtụ bu ko, bɛɛ ti hiɛŋ, Zhaga gwulo ma pa agwuma ata ihi tumwanɛ utumwa, hiɛŋ bụ ma, Agwatana suu zasaba ya ni Isrɛl upo ɛhi zhɛ hie hweyigeni iwɛ no ofwo Beal-zɛbub na shɛ tuwa te Ekron? Iwɛ ecilo ata, bi zha shɛ be kezhe ya no ogodo ata abụ patanɛ o, ama bi zhɛ bo 'wo tilɛɛ!

⁷Agwuma heŋteni aŋ, bɛɛ hiɛŋ, Gana naa bụtụ go ihi mbishi n-ndumwa mu go shɛɛ?

⁸Ɛɛ jishijɛ agwuma, ɛɛ hiɛŋ, Bu urigeni tugwuno tu na aa nɛ ne tihiŋzhe ti iyimabiga, bee umpi embi ubwa bu'waba. Ibɛ po agwuma eshiciji, bɛɛ hiɛŋ aŋ, Bụtụ go shɛ ge Elaija bụtụ ata bi Tishbi!

⁹Nazhɛ agwuma tumwanɛ uberezhe we ejeshi na untanganɛ atwa dupu, medenji atwa ubwa dupu a na baa untanganɛ, bee zhe tuzuba no ofwo Elaija. Aka na ta a kwụbɛ Elaija tu baa jɛjɛ ni ihiŋhiŋ ishɛmɛ ɛtɛ. Uberezhe ata hiɛŋ Elaija, A-bụtụ ga ba Agwatana,[1] Agwuma hiɛŋ, Zhajɛ.

¹⁰Ge Elaija jishijɛ uberezhe ata, bɛɛ hiɛŋ, Ama yaa shɛ Ngaa shɛ bụtụ ba Agwatana gom, asha ga ulwa banɛ na azuba ubu hwoŋzhinji, ta atwa ga bụ dupu hwɛɛ! Ulwa banɛ ga na azuba gunu ata wee hwoŋzhinji bu, medenji atwa ubwa dupu.

¹¹Agwuma tumwananɛ uberezhe unya na untanganɛ ejeshi dupu, medenji atwa ubwa dupu. Bee munji bee zhe no ofwo Elaija, bɛɛ hiɛŋ bụ,[2] A-bụtụ ga ba Agwatana, agwuma hiɛŋ to kakayɛ!

¹²Ge Elaija jishijɛ bụ, bɛɛ hiɛŋ, Yaa shɛ Ngaa shɛ bụtụ ba Agwatana gom, asha ga ulwa banɛ na azuba ubu hwoŋzhinji, ta atwa ga bụ dupu hwɛɛ! Ulwa banɛ ga na azuba gunu ata wee hwoŋzhinji bu, medenji atwa ata ubwa dupu.

¹³Na aba ibɛ, agwuma tumwananɛ uberezhe unya na untanganɛ ejeshi dupu nụ ụtatụ, nazhɛ uberezhe ata ụtatụ zhe bee munji no ofwo Elaija. Aka na ti bee ci, bee kwuzeni Elaija, baa lụpɛ bụ, bɛɛ hiɛŋ, A-Bụtụ ba Agwatana, ma bụ tabwa maa kwụbɛ inyɛmɛnyɛmɛ mi keeni inɛ miaụŋ mu ga mụ bụ mu ugondu dupu, maa iti genji tụkwụna!

¹⁴Kwụba ulwa banɛ la na azuba wee hwoŋzhinji atwa eyebi a na shɛ eberezhe na untanganɛ ejeshi dupu dupu a na ga zhajɛ la pụ bụ hiin, medenji atwa aba dupu dupu. Ama hioko tuba inyɛmɛnyɛmɛ mi.

¹⁵Nazhɛ butumwa ba AGWANGWAMA ba azuba hiɛŋ Elaija, Zhagaga nu bwa maa hi zwi, ta nda inyɛsɛ o. Ge Elaija ishijɛ baa zhagajɛ ga nu bwa, ee zhe no ofwo agwuma.

¹⁶Ge Elaija hiɛŋ agwuma, AGWANGWAMA hiɛŋ, Agwatana suu zasaba ya ni Isrɛl maa hweyigeni iwɛ nu bwa upo abụ tumwanɛ atwa maa e hweyigeni iwɛ no ofwo Beal-zɛbub na shɛ tuwa tu na tu namɛ ni Ekron? Iwɛ ecilo ata bi zha shɛ ba zhɛmanana ụngwụ ga bụ o, ama bi zhɛ bo 'wo tilɛɛ!

¹⁷Agwuma Ahazia 'wi ga nu gana na ta AGWANGWAMA ga dumwa tedure ne Elaija. Nazhɛ buhongwu bwa[3] ge Jehoram[4] yɛ tugwama no ohwolu ubwa, iwɛnɛ tu ga Ahazia zasa yɛu-ye-eyi. Ti ge Jehoram yɛu Jehoshafat yɛ tugwama tu Juda, yaa namɛ shiywa shi yebi, nazhɛ go Joram yɛ ma tu bwa.

¹⁸Iyi nɛ vwɛ ni iyi elele nɛ agwuma Ahazia ndanjɛ na tugwama tu bwa hwɛɛ, i 'nyeci shi suu nu utakada shɛrụkwụkwụ shɛ shɛgwuma shi Isrɛl?