Read bassa 2 SHƐGWUMA SHI YEBI 10 Bible Online

2 SHƐGWUMA SHI YEBI 10 - bassa bible

2 SHƐGWUMA SHI YEBI 10

¹Ga Ahab 'yajɛ miaụŋ-me-eyi dupu-nu-woshi nu Samaria. Ge Jehu 'nyeci atakada baa tumwanganɛ aŋ nu Samaria, no ofwo shɛgwuma shɛ ụshɛpwụ[18] ata keeni n-nyarɛ keeni atwa na 'yagajɛ miaụŋ mu Ahab, bɛɛ hiɛŋ,

²Gunu na tu utakada ga uhi ci, ahiɛba na hi 'yagajɛ miaụŋ-me-eyi ma agwuma keeni ihɛŋtu ibwɛ ujasa, ti idɛkwɛ ibwɛ hwɛɛ, ta ashɛpwụ ata aa jilanɛ na tuma keeni i'wɛŋnɛ ujasa.

³Rungo ma yɛu-ye-eyi nɛ zhɛmɛ, nɛ mama 'yajɛ tebiye na amɛ miaụŋ ma agwuma-ihwɛ hiŋ, iwɛ maa ba twa ifelu ne mi maa dundo tugwama te bishi bwa, maa hi jinji du ihwɛ ya agwuma-ihwɛ ɛtɛ hiŋ.

⁴Ama inyɛsɛ shɛ ehiu Samaria tebiye. Ɛɛ hiɛŋ, Shɛgwuma shɛ ga shi yebi shi eri shi bu o, atuba suu ti zhɛ ta ala bụ ya?

⁵Ibɛ po bụtụ na shɛ agwuma-ihwɛ, na bụtụ na shɛ agwuma ụshɛpwụ keeni angbaracɛ miaụŋ ma ata, tumwanɛ bụtụ no ofwo Jehu, ɛɛ hiɛŋ, Miaụŋ mụ bụ mu ugondu atɛ shɛ, iyi elele nɛ abɛ jɛmɛ, ibɛ ɛti zhɛ ta nda. Ti zha shɛ kaa du ta pana bụtụ be elele tugwama o, ama ɛtɛ njɛ gana elele na ụbụ kwụlanɛ.

⁶Ge Jehu 'nyeteneni utakada uyebi, bɛɛ hiɛŋ aŋ, Yaa shɛ ahiɛ namɛ ne mi gom, ɛhi zhɛ kaa hia hwuga-unu mu, asha suje ma ohiuhiu miaụŋ-me-eyi ma agwuma-ihwɛ hiŋ beyi ga aka gana go ni Jɛzrɛl. Miaụŋ ma ata ma agwuma Ahab dupu-nu-woshi kaa mu namɛ ni i'ɛlɛ n-nyarɛ mu ụshɛpwụ ata, aba kaa wɛŋnicinjɛ mụ.

⁷Aka na tu utakada ata ci aŋ, ee suji miaụŋ ma ata ma agwuma dupu-nu-woshi aa shɛrɛ mụ hwɛɛ muba, ee zweni ohiuhiu aba nu n-ngwumi, aa tumwananɛ Jehu ni Jɛzrɛl.

⁸Aka na ta butumwa ata ci bee mbishi Jehu, ɛɛ hiɛŋ, O sugwo ohiuhiu miaụŋ ma ata ma agwuma. Ge Jehu hiɛŋ, Asha sutono aŋ ma orubwo eyebi no odubo ata ụshɛpwụ uuwa i ci uvwungwa.

⁹Aka na ti iyi heri, bee zhe apata nu uvwungwa, bee shikeni, bɛɛ hiɛŋ atwa ata hwɛɛ aba, Ahiɛba n-ndumwa-zhɛmɛ. Hioko ma, N sukakanɛ agwuma-ihwɛ mi go Joram Ngaa kwụnɛ bụ, ama gaaba tuba kwụnɛ atwa ga hwɛɛɛ?

¹⁰Mapa ma maa n-ndumwa mu na AGWANGWAMA dumwa la mi zha shɛ mo ngwulo okwo mu ko. Ibɛ shɛ iwɛ ɛtɛ baa dumwa la tedure iwɛ ihwɛ Ahab. AGWANGWAMA kaa nduwa iyi nɛ baa dumwa la nu unu bigesere bwa ge Elaija.

¹¹Nazhɛ ge Jehu kwụnɛ atwa ata ihwɛ Ahab a na vwɛ hwɛɛ ni Jɛzrɛl, ta atwa Ahab a na 'yajɛ ụhwada, ta atwa ubwa a na 'yajɛ ụmatụ nu bwa kpɛm kpɛm, to onongbo ubwa, bu weŋpeni shi bụtụ okwo bu ko.

¹²Ti ge Jehu beni ni Jɛzrɛl, bɛɛ zhɛ Samaria, bee zhe bee ci ofwo oko na ɛɛ hiɛŋ izeci ya aba Bɛt-eked, (Ugba wa a'iywa-agwụdụ),

¹³baa twa na atwa Ahazia agwuma Juda, bɛɛ hiɛŋ aŋ, Atwa aba bwaa ahiɛ shɛɛ? Atwa ata jishijɛ bụ, ɛɛ hiɛŋ, Tɛ shɛ atwa Ahazia. Ibɛ po etu zwe maa ta 'walụ miaụŋ ma agwuma keeni miaụŋ mo biyikwo ata ba agwuma.

¹⁴Ge Jehu hiɛŋ atwa ubwa, Ima aŋ ma buumwa buumwa, aa 'imɛ aŋ ga, aa kwụnɛ nu u'ibwa uko na namba nu ugba ata wa a'iywa-agwụdụ. A namɛ atwa buhanda-na-ba-eyebi, bi genji shi bụtụ okwo bu ko na amɛ aba o.

¹⁵Ti ge Jehu beni apata, baa twa ne Jehonadab yɛu Rekab ye eyi, ti bee ci pu bwa. Ge jehu 'walụ bụ, bɛɛ hiɛŋ, bụ, Amɛ bụ yibwa namɛ oko ne mi hŋ gana na amɛ mi namɛ oko na bụ?[19] Ge Jehonadab hiɛŋ bụ, Gobwonu yaa shɛ. Ge Jehu hiɛŋ bụ, Yaa shɛ gana ata, asha m panɛ u'ala bụ, bee peni bu ga, ge Jehu ishicinjɛ bụ, bee tecinji bu nụ ụhaŋtụ ubwa ujasa.

¹⁶Ge Jehu hiɛŋ bụ, N 'wa maa kwụbɛ uzezeri na Ngaa 'yajɛ iwɛ AGWANGWAMA. Bee shepi bu nụ ụhaŋtụ ubwa ujasa.

¹⁷Aka na ti ge Jehu ci Samaria, baa kwụnɛ atwa na ga vwanɛ Ahab hwɛɛ nu Samaria, bu weŋpeni shi bụtụ okwo bu ko. Gana na ta AGWANGWAMA ga dumwa la nu unu bigesere bwa ge Elaija.

¹⁸Ge Jehu sotulonu atwa Samaria hwɛɛ, bɛɛ hiɛŋ aŋ, Ga Ahab zhɛbɛ la tuwa ti Beal cwɛŋ, ama Gamba ge Jehu, N zhɛ tuba ma zhɛba tụ duwa.

¹⁹Iwɛ ecilo ata, suyaganɛ ma egesere tuwa ti Beal hwɛɛ, keeni atwa na a zhɛba tụ hwɛɛ, keeni onongbo tuba hwɛɛ, kede bụtụ be elele na amɛ aba vwɛ o. N zhajɛ maa ma ta ụrụpɛ uko ụ'wụtụ na tuwa ti Beal. Bụtụ be elele na zasaba hwayɛ, ɛ zhɛ a kwụna bụ. Ama ti'inta kaa ge Jehu ba nda iwɛ maa kwụna atwa elele na a zhɛba tuwa ta ata ti Beal.

²⁰Ge Jehu hiɛŋ, Ananga ma tu'ulwa tụ 'wụtụ iwɛ tuwa ti Beal tɛzhɛba hwayɛ ga. Ibɛ po ee enenji ga.

²¹Ge Jehu tumwanganɛ atwa cɛnjɛ ti Isrɛl hwɛɛ, ibɛ po atwa elele na ga zhɛba tuwa ta ata ti Beal ụlwatagwụ hwɛɛ. I zasa bụtụ vwɛ okwo bu ko na zhe shi o. Aka na ee teni ni isume ɛtɛ Beal i'wɛtwɛ, atwa shini ni isume ɛtɛ i'wɛtwɛ pwomuu i zasa ohwolu elele na vwɛ o.

²²Ge Jehu hiɛŋ bụtụ na ba ngbaraka umwono na oo zwono otogwo, Zhaga vwɛ otogwo maa atwa na a zhɛba Beal hwuŋtongono. Bụtụ ata zhe bɛɛ vwɛ ga otogwo ata.

²³Ge Jehu teni ni isume ebe tuwa ti Beal abana Jehonadab yɛu ebe Rekab. Bɛɛ hiɛŋ atwa ata a zhɛba Beal, Mbiyangana ma hiɛ kwụbɛ, i zasa yɛu-ugondu ya AGWANGWAMA okwo ike namba na ashashɛ hiŋ epe o, semi atwa na a zhɛba Beal kiri.

²⁴Nazhɛ ee teni maa e peni ya Beal ụrụpɛ keeni ụrụpɛ tuhwoŋzhingo. Ge Jehu shikecenji atwa dupu-nu-talacɛ (80) no tupohondo a na boo go mbiswo maa, Bụtụ be elele na amɛ hiŋ na leni hwayɛ maa bụtụ be elele na amɛ atwa na Ngɛɛ zhɛ me hi sugeni benengeni, asha ubwa zhɛ bo 'wo ụlụkpashɛ bụtụ ata benengeni.

²⁵Gunu na ti ge Jehu hwuwi ụrụpɛ tuhwoŋzhingo tụpana hwɛɛ, bɛɛ hiɛŋ, a'iywa ata medenji ehiu anjɛ-ugondu, Zhaga tono ma na amɛ isume gɛ[20] maa hiɛ kwụnɛ aŋ, kede bụtụ be elele ihi benengeni o. Ibɛ po aa kwụnɛ aŋ ga no otokwobi hwɛɛ. Nazhɛ bi'iywa ata keeni anjɛ ata ugondu teni aa bwajɛ aŋ aa 'waŋtatanjɛ no tupohondo. Na aba ibɛ nazhɛ ee teni taa na amɛ isume ɛtɛ Beal,

²⁶aa bwajɛ atayɛ ata a'wụtụ a'wụtụ, a na ga shɛ atayɛ tijilo ni isume ɛtɛ, ee hwoŋzhinji aŋ.

²⁷Nazhɛ ee hwuŋzhi du utukwu-ụrụpɛ Beal keeni isume tuba, aa njɛ isume ɛtɛ u'ibwa mpiala tu'waŋ, tutu taa hwayɛ.

²⁸Gana ge Jehu iricinji tuwa ta ata ti Beal tɛzhɛba ni Isrɛl ta.

²⁹Ama tuba ge Jehu njɛ iwɛwɛ nɛ ge Jɛroboam yɛu Nebat njɛ la, nɛ zeriji du atwa Isrɛl ni iwɛwɛ tɛnda. Ibɛ shɛ ntatanuwaŋ ma azhɛnarɛya mu na bee tileni ni Bɛtɛl keeni Dan.

³⁰Nazhɛ AGWANGWAMA hiɛŋ Jehu, Gana na ta abɛ njɛ iyi nɛ teni cɛŋ ne eshe mi, abɛ njɛ kaa ihwɛ Ahab gana na Ama jala gom, ukpogwu bụ ubwa zhɛ na ya tugwama ti Isrɛl tutu uwaŋnɛ wa aba uneshi.

³¹Ama ge Jehu kaa 'wa sụ undwa wa AGWANGWAMA na shɛ Agwatana Isrɛl tu'untangana na amɛ ubwa oko hwɛɛ o. Ama bi genji shi iwɛwɛ ɛtɛ ge Jɛroboam eni la atwa Isrɛl tɛnda o.

³²Na aka ata ibɛ AGWANGWAMA kwuni cɛnjɛ ti Isrɛl tumunanana. Ibɛ du kaa ga Hazaɛl leshiji cɛnjɛ ta atwa Isrɛl hwɛɛ.

³³Te Kwuni nu uwaŋna-banụ cɛnjɛ ti Giliad hwɛɛ, tu Gad keeni atwa Rubɛn keeni atwa Manasɛ, te kwuni nu Aroe na namɛ nụ ụzalụ bu ulomu Anon, ibɛ shɛ Giliad keeni Bashan, bee leshiji hwɛɛ.

³⁴Iyi nɛ ta vwɛ ni iyi elele nɛ ge Jehu ndanganɛ na tugwama tu bwa hwɛɛ, i 'nyeci shi suu nu utakada shɛrụkwụkwụ shɛ shɛgwuma shi Isrɛl?

³⁵Ge Jehu 'wi gana eshi ubwa, ee ni bu nu Samaria. Nazhɛ ge Jehoahaz yɛu ibwɛ yɛ tugwama no ohwolu ubwa.

³⁶Ge Jehu yɛ tugwama ti Isrɛl nu Samaria shiywa woshi-na-shɛba-shɛ-tụndatụ.