Read bassa 2 SHƐGWUMA SHI YEBI 11 Bible Online

2 SHƐGWUMA SHI YEBI 11 - bassa bible

2 SHƐGWUMA SHI YEBI 11

¹Aka na ga Atalia na shɛ bino Ahazia kwụbɛ maa a kwụnɛ yɛu ibwɛ, bɛɛ ishijɛ baa kwụnɛ du atwa ihwɛ agwuma hwɛɛ.

²Ama ge Jehosheba, yɛu-yo-o ya agwuma Joram na shɛ bụngwụfwụ Ahazia becinji Joash yɛu Ahazia na ashashɛ miaụŋ-me-eyi ma agwuma mu na ɛɛ zhɛ a kwụna, baa intanɛ bụ nu umwono ubwa buweci keeni bụtụ na zhɛ na ngbaraka bụ. Ibɛ po ga Atalia kwụbɛ shɛ bụ maa a kwụnɛ bụ.

³Ge Jehosheba intanɛ bụ nu umwono ata wa Agwatana shiywa shi cihiŋ, na aka ata tuba ibɛ ga Atalia shɛ agwuma cɛnjɛ ta ata hwɛɛ.

⁴Ti yaa namɛ shiywa shi cenje, ge Jehoiyada na shɛ bunongbo tumwanɛ bụtụ bu ko na atwa na a 'yaka agwuma keeni atwa na a 'yaka umwono wa agwuma, bɛɛ hiɛŋ aŋ, Zhajɛ ma hwayɛ nu Umwono wa AGWANGWAMA. Baa twa-unu na aba nu umwono ata wa AGWANGWAMA, nazhɛ bee mbiseni aŋ yɛu ɛtɛ ya agwuma.

⁵Baa tɛtaganɛ aŋ unu, bɛɛ hiɛŋ, Iyi nɛ ɛhi zhɛ hia nda na: Aka na ahiɛ zhajɛ ugondu nụ Ụjita-ụhinjanụ, go udungbe hiŋ uko 'yaka ukpogwu wa agwuma.

⁶Go udungbe uyebi 'yaka odubo ata ɛɛ hiɛŋ Su, nazhɛ go udungbe hiŋ ụtatụ 'yaka odubo ata namɛ na aba a'iywa ata.

⁷Okwo udungbe uyebi na ga zasa nu ugondu nụ Ụjita-ụhinjanụ anaa na aa njɛ ni iji maa a zhajɛ, ɛ zhɛ du a 'yaka umwono wa AGWANGWAMA iwɛ agwuma ata.

⁸Rungwutwonu ma agwuma Joash, bụtụ bụtụ ge hwucice utokwobi ubwa maa 'waŋna ni i'ɛlɛ ibwɛ. Bụtụ be elele na zhajɛ hwayɛ pi hiŋ, kwụna bụ ma. Na 'wa ma agwuma ti bɛɛ zhɛ ụbanụ keeni ti bee ci utwonuo.

⁹Gabata eberezhe ata ejeshi njɛ ga gana na ge Jehoiyada bunongbo ata tɛtaganɛ aŋ unu. Nazhɛ ee suje ga atwa aba hwɛɛ, ta atwa na namɛ nu ugondu nụ Ụjita-ụhinjanụ, ta atwa na zasa nu ugondu nụ Ụjita-ụhinjanụ, aa zhajɛ pi Jehoiyada bunongbo ata.

¹⁰Nazhɛ bunongbo ata hweŋshi eberezhe ata ejeshi nsanụ[21] keeni shabula shu ujasa shɛ na agwuma Devid 'yajɛ la, shɛ na shi ge tileni nu Umwono wa AGWANGWAMA.

¹¹Ibɛ po a'iywa ata shikekeni ya bụtụ bụtụ 'waŋnɛ i'wɛŋnɛ ibwɛ ujasa. Ee shikekeni oo rungwutwonu agwuma, te kwune nụ ụzalụ tuta tu umwono ata tutu ụzalụ tuzuba, tutu utukwu-ụrụpɛ ata namɛ nu umwono wa Agwatana.

¹²Nazhɛ ge Jehoiyada bɛcinjɛ yɛu ɛtɛ ya agwuma, bee peteni bu udara, bee utegeni bu utakada ata unu-tutwa, aa njɛ bụ agwuma, nazhɛ ee dudugeni bu manɛbɛ. Ee pushi i'ɛlɛ, ɛɛ hiɛŋ, Agwuma Zaacɛ, ya urugbo tutu!

¹³Aka na ga Atalia hwụjɛ rundu ra a'iywa keeni rundu ra atwa ata hwɛɛ, baa zhaganɛ aŋ nu umwono ata wa AGWANGWAMA.

¹⁴Baa mbiyanɛ, baa kwụbɛ ta agwuma shikeni no ofwo ogbudu, gana na ti yaa ga shɛ iyi uvwovwu wa aba. Eberezhe ejeshi, ne ehwuri akakacɛ holongonu agwuma. Atwa cɛnjɛ ta ata hwɛɛ a bwada unyasa, oo hwulo akakacɛ. Ga Atalia dwetweji i'wɛŋnɛ ibwɛ na amɛ-tụhwaŋtụ, baa uganɛ, bɛɛ hiɛŋ, Tigezhe ma o! Tigezhe ma o!

¹⁵Ge Jehoiyada bunongbo ata mbishi eberezhe ejeshi, a na a ngbaracɛ ejeshi, bɛɛ hiɛŋ aŋ, Bacɛnga bụ ma na ashashɛ hiŋ. Bụtụ be elele ba jala maa lashɛga bụ hwayɛ, kwụna bụ ma nu utokwobi! Bunongbo ata hiɛŋ aŋ, Ta kwụna bụ ma na amɛ Umwono wa AGWANGWAMA o.

¹⁶Aa 'imɛ bụ ga, ee ci ofwo ata idɛkwɛ yo tono ukpogwu wa agwuma, apata aa kwụnɛ bụ.

¹⁷Nazhɛ ge Jehoiyada shiri unu-tutwa na AGWANGWAMA keeni agwuma keeni atwa ata, maa ga a shɛ atwa AGWANGWAMA. Bee shileni du agwuma unu na atwa ata.

¹⁸Ibɛ po atwa cɛnjɛ ta ata hwɛɛ zhe ni isume tuwa ti Beal, ee hwuŋzhi iŋ, ee bwereteji utukwu-ụrụpɛ tuba keeni ntatanuwaŋ mu tuba rukwurukwu. Nazhɛ aa kwụnɛ Matan na ga shɛ bunongbo bu tuba nu umbe utukwu-ụrụpɛ ata tuba. Nazhɛ ge Jehoiyada bunongbo ata teri angbaracɛ oko iwɛ maa a na ngbaraka umwono wa AGWANGWAMA.

¹⁹Ge Jehioyada suji ehiu atwa ata, ta a'iywa agwuma, ta a'iywa ihwɛ ya agwuma, ee she agwuma tu baa banɛ nu Umwono ata wa AGWANGWAMA tutu ee ci umwono wa agwuma, atwa ata vwɛ hwɛɛ 'wa bụ. Agwuma teni no odubo a'iywa bee ci ihwɛ ibwɛ. Nazhɛ baa jɛjɛ ya ni idwɛtwɛ tugwama tu bwa.

²⁰Nazhɛ atwa ata hwɛɛ bweji unyasa, ama ụshɛpwụ ata tuba namɛ saiiŋ iwɛnɛ ta a kwụnɛ Atalia ni ihwɛ ya agwuma.

²¹Go Joash[22] namɛ shiywa shi cenje te e meci bu, nazhɛ bee kwuni tugwama tiya.