Read bassa 2 SHƐGWUMA SHI YEBI 19 Bible Online

2 SHƐGWUMA SHI YEBI 19 - bassa bible

2 SHƐGWUMA SHI YEBI 19

¹Aka na ta agwuma gɛ Hɛzɛkia hwụjɛ iwɛ ɛtɛ, bee dwetweji tugwuno tu bwa na amɛ-tụhaŋtụ, bee urigeni tugwuno tụ ụcɛnjɛ tɛnda, bee teni nu umwono wa AGWANGWAMA.

²Baa tumwanɛ Eliakim na ba ngbaraka umwono wa agwuma keeni Shebna bi'nyeci, keeni ehiu onongbo pa Ayizaya yɛu Amoz, ee uregeni du tugwuno tụ ụcɛnjɛ tɛnda.

³Nazhɛ ɛɛ hiɛŋ Ayizaya, Agwuma Hɛzɛkia hiɛŋ, Hwayɛ ga shɛ ụjita wa amɛ-tụhaŋtụ keeni ụjita tɛtazhɛganɛ keeni ụjita ụpụrụsa, iwɛnɛ ta aka miaụŋ tumata ci, ama ukpahiŋ na maa e meci mu kaa zasaba ya o.

⁴Nekeshi AGWANGWAMA na shɛ Agwatana bụ zhɛ a hwuga utumwa na agwuma Asiria tumwanɛ Rabshakɛ, na shɛ uberezhe ata uko maa pana Agwatana na shɛ buumwa ụpụrụsa, iwɛ maa AGWANGWAMA na shɛ Agwatana tazhɛganɛ bụ, iwɛ n-ndumwa ma ata baa dumanjɛ. Iwɛ ecilo ata, nda adua iwɛ tumwata ta atwa na ta vwɛ.

⁵Aka na te ehiu anjɛ-ugondu Hɛzɛkia zhe pa Ayizaya, aa jɛmɛ utumwa ata.

⁶Ga Ayizaya hiɛŋ aŋ, Zhaga mbiso ma agwuma-ihwɛ hiŋ, maa AGWANGWAMA hiɛŋ, Ta nda inyɛsɛ n-ndumwa ma ata abụ hwụjɛ maa agwuma Asiria n twagajɛ o.

⁷Kwụba, N zhɛ ma tumwananɛ bụ mpiala mu ko mu na mi zhɛ ma nda maa hwuga ɛ hiɛŋ ɛ hiɛŋ oko na zhɛ o gwuricingo bu na cɛnjɛ tu bwa. Nazhɛ Ngɛɛ zhɛ ma nda maa a kwụnɛ bụ nu utokwobi na cɛnjɛ tu bwa.

⁸Aka na tu ga Rabshakɛ na shɛ uberezhe ata uko beni nu Jɛrusalɛm, bee gwuri nu Lakish, bi jiteni shi ya agwuma o, iwɛnɛ ta agwuma hwulwo, baa na nda ujasa ni Lebna.

⁹Aka na ee mbishi bu, ɛɛ hiɛŋ, Gɛ Tɛhaka agwuma Itiopia[38] zhɛ ba twa ifelu na bụ, baa tumwananɛ utumwa unya no ofwo Hɛzɛkia, bɛɛ hiɛŋ,

¹⁰Mbiso ma Hɛzɛkia agwuma Juda, maa Kede Agwatana na ahiɛ tɛtanɛ rishe ihi helekeci o, maa mo hi shilono-unu, maa agwuma Asiria eri shi a lashɛga Jɛrusalɛm o.

¹¹Hi hwugwa iyi nɛ shɛgwuma sha Asiria shɛ nduwa la edenji elele, gana na ta a kwụnɛ aŋ hwɛɛ. Ahiɛba suu hi zhɛ hio ngozono ya?

¹²Azhɛba ata anya edenji bishi mi kwụnɛ la, leshiji aŋ la suu, aba shɛ atwa Gozan keeni a na Haran keeni a na Rezɛf keeni miaụŋ mi Idɛn na namɛ na Atalasa?

¹³Ce agwuma Hamat, na agwuma Apad, na agwuma Sefav, na agwuma Hena keeni agwuma Ira namɛ hwuwayɛɛ?

¹⁴Gɛ Hɛzɛkia leshiji utakada ata atumwa agwuma Asiria 'waŋnɛ, baa rɛcɛ, bee teni nu umwono wa Agwatana, bee berishiji uŋ na agba AGWANGWAMA.

¹⁵Gɛ Hɛzɛkia njɛ adua no ofwo AGWANGWAMA, bɛɛ hiɛŋ, Oo AGWANGWAMA na shɛ Agwatana atwa Isrɛl, gabụ na idwɛtwɛ bụ namɛ taa na azuba iyi-uumwa ɛtɛ 'yajɛ apiambɛ, gobuko kiri bɛ shɛ Agwatana cɛnjɛ-ta-tugwama tu unyizo ga hwɛɛ. Gabụ bɛ njɛ azuba, tu unyizo.

¹⁶AGWANGWAMA, shilo acɛbɛ bụ maa hwụjɛ adua mi, Oo AGWANGWAMA, m mbiyanɛ, maa n kwụbɛ. Hwuga de n-ndumwa mu na gɛ Sɛnakɛrib tumwanɛ, maa ma bụ pana ụpụrụsa, gabụ na bɛ shɛ Agwatana uumwa.

¹⁷Oo AGWANGWAMA, iwɛ-tɛkana ga, maa shɛgwuma sha Asiria shi hwuŋzwotongwo edenji ufwugwo keeni cɛnjɛ ta aba,

¹⁸oo hwuŋzwotongwo du azhɛba aba. Iwɛnɛ po azhɛba aa shɛ, iyi nɛ i'ɛlɛ bụtụ njɛ, na atayɛ keeni i'wɛ'wɛ tɛ, iwɛbɛ po aa njɛ iŋ ufwu.

¹⁹Oo AGWANGWAMA na shɛ Agwatana tu, ma bụ tabwa hwuwayɛ go, iti leshiji ni i'ɛlɛ ibwɛ, iwɛ maa shɛgwuma shi unyizo ga hwɛɛ shi mepi maa gabụ kiri bɛ shɛ AGWANGWAMA na shɛ Agwatana.

²⁰Nazhɛ ga Ayizaya yɛu Amoz tumwananɛ agwuma Hɛzɛkia utumwa, bɛɛ hiɛŋ bụ, AGWANGWAMA na shɛ Agwatana Isrɛl hiɛŋ, N hwụjɛ adua na abɛ njɛ iwɛ Sɛnakɛrib, agwuma Asiria.

²¹AGWANGWAMA dumwa n-ndumwa mu bwa, bɛɛ hiɛŋ, Gabụ gɛ Sɛnakɛrib, atwa Jɛrusalɛm a bụ ngbaracɛ cwɛŋ bana. Atwa ata Jɛrusalɛm, o zhingoto ohiuhiu aba to bo gozhigono aŋ iwɛ uhiuhiu bu.

²²Gaaba kwuuŋ aba twagaga, aba nda sasana ụpụrụsaa? Gaaba kwuuŋ aba dumangana n-ndumwa ma tubusa, aba baranganɛ eshee? Ubwa shɛ Bụtụ ata bi Tijilo bi Isrɛl!

²³Abụ tumwanɛ atumwa bụ maa a twagajɛ AGWANGWAMA, Nazhɛ ɛbi hiɛŋ, Ni ihɛŋtu ujasa ifwugwo Ngaa lasụ Ishɛmɛ Lebanon tutuu. Ngoo logwo ihiŋhiŋ yo osobu na njɛsanjɛ uhwuri inɛ vwɛ hwɛɛ, keeni orokwo na zhɛmanjɛ uhwuri a na vwɛ hwɛɛ, Ngoo twonuo amɛ uwapa Lebanon na inshi uhwuri ofwo vwɛ hwɛɛ, aba shɛ ofwo ata zhɛmɛ uhwuri ofwo vwɛɛ nu uwapa ata Lebanon.

²⁴Ngoo hinuo a'ibwa meni, Ngee swe meni ma cɛnjɛ ti nya, Ngoo tonongwo ohwulwo Ijipti nɛ ɛvwɛvwɛwjɛ mi, ibɛ po meni ma aba mu hwanganɛ.

²⁵Bu ta hwụjɛ shɛ suu iwɛ maa N hoŋswo iwɛ ibɛ cala cala, Ngaa imwangwa iŋ cala cala? Hwuwayɛ Ngaa njɛ iŋ, maa hwuŋzetenji ya ashɛpwụ na 'yagajɛ ikepi maa njɛ aŋ obizo.

²⁶Atwa na namɛ la apata zasa ukpahiŋ o, inyɛsɛ keeni ezuye 'imɛ aŋ. A shɛ gana ambɛ na unshɛ ni itimɛ, gana tusaba ta ambɛ olom, gana ambɛ na unshɛ no osokwu, uvwugo pushe wee mushenji aŋ.

²⁷Ama M mepi ofwo na abụ namɛ, ta tubana tụ bụ, te titeni tụ bụ, keeni gana na abu ma n sukakana ni isɛbwɛ bụ ti'ishijɛ.

²⁸Bu ma n sukakana, Ngaa hwụjɛ du tutwa tu na abu ma n twaga. N zhɛ mo bu shiyono akama ni inyɛnu, Mo bu shiyono uhiuhiu tɛga nu unu, nazhɛ Mo bu gwuricingo geri na abụ ga banɛ la.

²⁹Nazhɛ ga Ayizaya hiɛŋ Hɛzɛkia, Tusakana ti iyi nɛ zhɛ ya nda na, tu uywa ga, keeni unywanywa, iyi nɛ mɛmɛ unsɛnjɛ na ambɛ ɛbi zhɛ ba ya. Ama nu uywa ụtatụ na zhɛ wa 'wa una ata, bila iyimɛyɛ bụ, jwɛ iŋ du. Bi zhɛ ba bila afwafwa bụ, ba ya du tụ'walụ ta aba.

³⁰Ama atwa na benengeni nu Juda, zhɛ a zhɛmanga tu'waba gana ụ'wụ'wụ na tini tu bwa ti iri cɛnjɛ tebiye, na kaa wa 'wala tụ'walụ ti biye.

³¹Iwɛnɛ po nu Jɛrusalɛm, apata atwa tumwata zhɛ a banɛ, Nu Juda kaa udungbe na benengeni zhɛ wa banɛ. Ukwulana wa AGWANGWAMA na Hwuri Kpaaŋ, ubwa kaa zhɛ wa ụrɛcɛnga ijɛ hwɛɛ.

³²AGWANGWAMA jɛmɛ iwɛ agwuma Asiria, bɛɛ hiɛŋ, Bi zha shɛ be teni ụshɛpwụ ga kwukwuŋ, bi zha shɛ kaa ba karɛ okwo i'ilɛ mokondo nụ ụshɛpwụ ga kwukwuŋ. Bi zha shɛ kaa be teni na abula ubwa ujasa du o, okwo tuhwala, bi zha shɛ du ba hwala uŋ o.

³³Uhwaŋna ata bee ge dure, ubwa du bɛɛ zhɛ bo gwulo, bi zha shɛ bo tono ụshɛpwụ ga o, AGWANGWAMA dumwa.

³⁴N zhɛ ma lashaga ụshɛpwụ ga maa Ma jilanɛ ụŋ iwɛ ụjɛrụma mu keeni iwɛ ụjɛrụma yɛu mi ugondu ge Devid.

³⁵Nazhɛ butumwa ba AGWANGWAMA ba azuba beni nụ ụjita ata, baa kwụnɛ atwa igbɛɛ-dupu-na-buhanda-ni-bɛyebi-na-akpakwụ-a-ta (185,000) nu ugba we ejeshi atwa Asiria. Aka na ti iyi heri, atwa ata zhinjɛ, aa kwụbɛ tobwolo a shɛwa n'wo hwɛɛ.

³⁶Ibɛ po gɛ Sɛnakɛrib agwuma Asiria beni apata bee ji, baa namɛ ni Ninivɛ.

³⁷Ti yee ci jitoo ko, ti gɛ Sɛnakɛrib ba zhɛba Nisrok na shɛ tuwa tu bwa ni isume, ibɛ miaụŋ mu bwa me eyi, ga Adramɛlɛk keeni Sharɛzɛ kwụnɛ bụ nu utokwobi, ee gezhiji ee zhe Ararat. Nazhɛ ga Asahadon yɛu ibwɛ yɛ tugwama tu bwa.