Read bassa 2 SHƐGWUMA SHI YEBI 20 Bible Online

2 SHƐGWUMA SHI YEBI 20 - bassa bible

2 SHƐGWUMA SHI YEBI 20

¹Aka na tụ ụngwụ na 'yajɛ ikɛnyi to Hɛzɛkia, bɛɛ zhɛ tu'wo. Ibɛ po bigesere ga Ayizaya yɛu Amoz zhe pu bwa, bɛɛ hiɛŋ bụ, AGWANGWAMA hiɛŋ, Sutongono ihwɛ bụ, iwɛnɛ ta abi zha shɛ ba zhɛmanana ụngwụ ga bụ, semi bi zhɛ bo 'wo.

²Gɛ Hɛzɛkia peni eshe ubwa geri bu ụdatụ, baa njɛ adua, bɛɛ hiɛŋ,

³Oo AGWANGWAMA, Ma bụ tabwa, maa teyinje gana na Ama bụ jala, keeni gana na Ngaa bụ ndanɛ iyi na tɛcara, na ahaŋsa oko kaa Ngaa bụ ndanɛ iyi ibiye. Nazhɛ gɛ Hɛzɛkia cwɛ-u'wo duwa duwa.

⁴Nazhɛ AGWANGWAMA mbishi Ayizaya iwɛ, tobwolo bi te ci shi ashashɛ ukpogwu ata o, bɛɛ hiɛŋ bụ,

⁵Gwulo, hiɛŋ Hɛzɛkia na shɛ agwuma atwa mi, maa AGWANGWAMA na shɛ Agwatana bishi tu ge Devid hiɛŋ, N hwụjɛ adua bụ, Ngaa kwụbɛ du kaa malaba mụ bụ, N zhɛ ma bụ nɛnga. Jita neshi hwayɛ, bi zhɛ bo gwulo nu umwono wa AGWANGWAMA sasana.

⁶N zhɛ ma bụ kaana shiywa umpwa-na-shɛba-shɛ-ta. N zhɛ kaa ma bụ lashɛga ni i'ɛlɛ ya agwuma Asiria, tụ ụshɛpwụ ga hwɛɛ. N zhɛ ma lashaga ụŋ iwɛ ụjɛrụma mu keeni iwɛ una Devid yɛu mi ugondu.

⁷Ga Ayizaya hiɛŋ, Shapɛ ma tu'unto ta tụ'walụ tu uwowo tu na oo to na manɛbɛ, maa hi ndepeni tu nu utwa ata u to bu, bi zhɛ ba zhɛmanana.

⁸Nazhɛ gɛ Hɛzɛkia hiɛŋ Ayizaya, Imbe zhɛ ya sha tusakana tu na Ngɛɛ zhɛ ma mapa maa AGWANGWAMA zhɛ ma n nɛnga, Ngɛɛ zhɛ mo mungo sasana nu umwono wa AGWANGWAMA jita neshi hwayɛɛ?

⁹Nazhɛ ga Ayizaya jishijɛ bụ, bɛɛ hiɛŋ, Iyi nɛ zhɛ ya sha tusakana tu na tu banɛ no olugwo AGWANGWAMA, maa mepi maa bi zhɛ ba nda iyi nɛ bee shiri-unu na. Ba jala suu maa go uhwunu ga keeni izhɛ geri-be-eshe ahaŋpalụ umpwa, kwo kaa maa u gwure ne ekwunyi ahaŋpalụ umpwa?

¹⁰Gɛ Hɛzɛkia jishijɛ bụ, bɛɛ hiɛŋ, I zasa iwɛ maa uhwunu keeni izhɛ geri-be-eshe ahaŋpalụ umpwa o; ama nda maa go uhwunu gwure ne ekwunyi ahaŋpalụ umpwa.

¹¹Ga Ayizaya bigesere ata keri AGWANGWAMA ụhiɛŋshɛ, nazhɛ AGWANGWAMA gwuricinji ga uhwunu ata ne ekwunyi, ahaŋpalụ umpwa, nu gana na du tu woo go hwulwo geri bi ihwɛ ya agwuma ahaŋpalụ umpwa.

¹²Aka ata gɛ Mɛrodak-baladan yɛu Baladan, na shɛ agwuma Babulon 'nyeci utakada, baa tumwananɛ Hɛzɛkia upwaŋ tedure na atumwa ata ubwa, iwɛnɛ tu baa hwụjɛ maa gɛ Hɛzɛkia baa gwuma.

¹³Gɛ Hɛzɛkia leshiji aŋ, bee mbiseni aŋ iyi nɛ baa 'yajɛ nu umwono ubwa hwɛɛ, ta azụrụfa, ta azhɛnarɛya keeni iyi nɛ 'yajɛ ụhiụŋ ụlatụ keeni manɛbɛ mi biye keeni umwono na boo tulono i'wɛŋnɛ ibwɛ ujasa, keeni iyi elele nɛ namɛ nu umwono uduciya ubwa. I zasa iyi nɛ vwɛ ni ihwɛ ya agwuma kwo kaa na cɛnjɛ-ta-tugwama tu bwa, bee mbiseni shi aŋ o.

¹⁴Ga Ayizaya bigesere ata zhe pa agwuma Hɛzɛkia, bɛɛ hiɛŋ bụ, Imbe bwaa atwa ata ibi hiɛɛŋ? Ce bwa aa banɛ aa zhajɛ pụ bụụ? Gɛ Hɛzɛkia jishijɛ bụ, bɛɛ hiɛŋ, A banɛ nu Babulon, ofwo ata kaa dụlụmɛ.

¹⁵Ga Ayizaya hiɛŋ bụ, Imbe bwaa aa kwụbɛ nu umwono buu? Gɛ Hɛzɛkia jishijɛ bụ bɛɛ hiɛŋ, M mbiseni aŋ iyi elele nɛ namɛ nu umwono mu. I zasa iyi ibiye ye elele nɛ namɛ nu umwono mu Ngee mbiseni shi aŋ o.

¹⁶Ga Ayizaya hiɛŋ Hɛzɛkia, Shɛlaga n-ndumwa mu na AGWANGWAMA jɛmɛ.

¹⁷Bi hiɛŋ, Kwụba, aka zhɛ o to ta atwa Babulon zhɛ o sugo iyi elele nɛ namɛ nu umwono bu hwɛɛ keeni iyi nɛ eshi bu swekeci la uuwa i ci hwayɛ ga. I zasa inɛɛ nɛ zhɛ ya vwa o, AGWANGWAMA dumwa.

¹⁸Nazhɛ ɛɛ zhɛ o sugo ta miaụŋ mụ bụ me eyi, mu na ee bi metenji, ɛ zhɛ a nda mụ nvwala maa a shɛ ehiu anjɛ-ugondu nu ukpogwu wa agwuma Babulon.

¹⁹Gɛ Hɛzɛkia hiɛŋ Ayizaya, n-ndumwa ma AGWANGWAMA mu na abɛ jɛmɛ mɛ zhɛmɛ. Iwɛnɛ po gɛ Hɛzɛkia heŋshi na ahaŋsa ubwa bɛɛ hiɛŋ, Iwɛmbe po amɛ-olom keeni tunama suu ti zha shɛ ta nama na aka ubwaa?

²⁰Iyi elele nɛ ta vwɛ, na amɛ iyi nɛ gɛ Hɛzɛkia ndanjɛ na tugwama tu bwa hwɛɛ, tu ukpahiŋ ubwa, tu gana na boo mo ukwokwo meni keeni ulomu na wo shidingo ukwokwo ata ne meni, nazhɛ bee peni atwa ụshɛpwụ ata meni. I 'nyeci shi suu nu utakada shɛrụkwụkwụ shɛ shɛgwuma shu Juda?

²¹Gɛ Hɛzɛkia 'wi gana eshi ubwa, nazhɛ ga Manasɛ yɛu ibwɛ yɛ tugwama no ohwolu ubwa.