Read bassa 2 SHƐGWUMA SHI YEBI 25 Bible Online

2 SHƐGWUMA SHI YEBI 25 - bassa bible

2 SHƐGWUMA SHI YEBI 25

¹Ti gɛ Zɛdɛkia yɛ tugwama tu bwa, yaa namɛ shiywa shi cinjishi, nazhɛ gɛ Nɛbukadnɛza agwuma Babulon, keeni ejeshi ubwa hwɛɛ munji, ee zhe ee jwe ugba wa aba no tupohondo tu uba Jɛrusalɛm. Ee hweri uŋ uuwa oo rungwutwonu nụ ụjita umpwa nu upiana Bu'umpwa.[42]

²Gana ata aa uranjɛ ụshɛpwụ ata tuhwala, uuwa i ci aka na gɛ Zɛdɛkia ulwa shiywa umpwa-nu-boo-ko tu baa yɛ tugwama.

³Imunɛ i'wɛtwɛ layɛ nụ ụshɛpwụ ata tu upiana Bineshi[43] namɛ Jitɛ icinjishi, iwɛbɛ po atwa gwushiji shi ya iyimɛyɛ maa a yɛ.

⁴Ibɛ po ee bweji uba ụshɛpwụ ata, nazhɛ agwuma keeni ejeshi gezhiji[44] hwɛɛ aba nụ ụjita, ee duri odubo ata namɛ na ashashɛ ụshɛpwụ ni itimɛ ɛtɛ ya agwuma aa hwaŋ iyi tuswoswoswo. Gana na ta Akaldia rungwutwonu ụshɛpwụ ata hwɛɛ, ibɛ po ee duri uhwaŋna Araba.

⁵Ama ejeshi Babulon urigeni agwuma gɛ Zɛdɛkia, ee vwuteni bu nu udadarɛ Jɛriko, Nazhɛ ejeshi ubwa gezhiji hwɛɛ ee genji bu.

⁶Ta a 'imɛ ya agwuma, aa shapɛ bụ pa agwuma Babulon ni Ribla, nazhɛ agwuma Babulon jɛmɛ ụshɛrɛya ubwa.

⁷Nazhɛ aa kwụnɛ miaụŋ mi Zɛdɛkia me eyi ne eshe ubwa. Nazhɛ ee hwuceci eshe Zɛdɛkia, oo to bu ogbo ɛtumburɛ, aa shapɛ bụ nu Babulon.

⁸Aka na tu upiana Butana ulwa Jitɛ cenje,[45] gɛ Nɛbukadnɛza ulwa tuba shiywa umpwa-na-shɛba-shi-cinjishi tu baa yɛ tugwama tu bwa. Ge Nebuzaradan na shɛ bupeni ba agwuma ahaŋsa, keeni uhiu wa anjɛ-ugondu agwuma Babulon zhe Jɛrusalɛm.

⁹Nazhɛ bee hwoŋzhinji umwono wa AGWANGWAMA, keeni ihwɛ ya agwuma, keeni shimwono shi Jɛrusalɛm hwɛɛ, bee hwoŋzhinji du shimwono shɛ na shi gembenji hwɛɛ nu ulwa.

¹⁰Ibɛ po ejeshi Babulon kpaaŋ a na zhagajɛ nu uhiu ata wa angbaracɛ agwuma hwuŋzetenji uba ata rungwutwonu Jɛrusalɛm.

¹¹Ge Nebuzaradan na shɛ uberezhe wa atwa na shɛ angbaracɛ agwuma suji atwa na ga vwɛ nu Jɛrusalɛm, keeni atwa na go hwulwo la pa agwuma Babulon keeni atwa vwɛ hwɛɛ, bee hwuri nu Babulon na aba.

¹²Ama uhiu we ejeshi ata genji atwa oko a na tukofwo ta aba tu hwuri atwa vwɛ hwɛɛ na cɛnjɛ ta ata, maa a nama na atwa na a nangangana shifwafwa keeni ahwɛŋ itimɛ.

¹³Akaldia bwereteji atukpa ata ɛtumburɛ ge shikekeni nu umwono wa AGWANGWAMA, keeni ikɛgbɛ ɛtɛ keeni okwokwo ata ga namɛ nu ukpogwu umwono wa AGWANGWAMA rukwurukwu, nazhɛ ee suji ɛtumburɛ ata hwɛɛ ee hwuri Babulon.

¹⁴Nazhɛ ee suji nkwasha, keeni n-ngowo keeni shilumakeshi sha ata aa nda ugondu no tuzuzu ta asụtụla, keeni ekwoshi keeni agbamgbam ɛtumburɛ elele na aa nda uhwara nu umwono wa Agwatana.

¹⁵Nazhɛ uhiu wa a'iywa suji du ejejebi ata aa ga tala ulwa keeni agbamgbam ata gembenji keeni iyi nɛ aa njɛ na azhɛrnarɛya tụrụmbɛɛ keeni azụrụfa tụrụmbɛɛ.

¹⁶Atukpa ata ɛtumburɛ eyebi keeni okwokwo ata a'wụtụ, ni ikɛgbɛ ɛtɛ go Sụlụmụn shikecenji la nu ukpogwu umwono wa AGWANGWAMA, uhwuleji tumanga.

¹⁷Uzoto utukpa ata uko ụ shɛ avwuna woshi-na-ba-e-cenje, ukwukwusu ata aa njɛ nɛ ɛtumburɛ agata ee peteni na azuba atukpa ata, uzoto ubwa ụ shɛ avwuna eneshi-na-ashashɛ. I 'yajɛ agbahwụ ụ tụpatakwụ keeni ukwukwusu apomɛgranati na aa njɛ nɛ ɛtumburɛ, ee peteni ni ihiŋhiŋ atukpa ata eyebi.

¹⁸Nazhɛ uhiu wa angbaracɛ ata, suji ata Seraya na shɛ uhiu wo onongbo keeni Zɛfania na 'wa bụ keeni ehiu a'iywa shidubo, aba tatụ, baa njɛ aŋ ajama umwono-tishi.

¹⁹Bee teri bụtụ bu ko na amɛ atwa na ga shɛwa uhiu we ejeshi cebe keeni atwa a ta, a na a pana agwuma ahaŋsa, a na aa kwụbɛ nụ ụshɛpwụ ata, keeni bi'nyeci bu uberezhe we ejeshi na bo sotulonu atwa cɛnjɛ ta ata keeni atwa cɛnjɛ ta ata dupu-ne-eshe-umpwa a na namɛ nụ ụshɛpwụ ata.

²⁰Nazhɛ ge Nebuzaradan na shɛ uhiu wa angbaracɛ, suji aŋ pa agwuma Babulon ni Ribla.

²¹Ibɛ po agwuma Babulon kwụnɛ aŋ ni Ribla ata namɛ na cɛnjɛ tu Hamat. Gana ee suji atwa Juda na cɛnjɛ ti nya ta.

²²Gɛ Nɛbukadnɛza teri Gɛdalia yɛu Ahikam, bụjalụ Shafan, maa sha ugwomina wa atwa na bɛɛ gɛnjɛ na cɛnjɛ tu Juda.

²³Aka na te eberezhe ejeshi, ta atwa vwɛ aba a na ta mama 'yajɛ nu Juda hwɛɛ, hwụjɛ maa agwuma Babulon teri Gɛdalia maa sha Ugwomina wa aba, aa zhajɛ pi Gɛdalia ni Mizpa. Atwa na zhe pu bwa na: ge Ishmɛl yɛu Netania, no Johanan yɛu Karia, ne Seraya yɛu Tanhumɛt bụtụ bu Netofa keeni Jɛzania bụtụ bu Meaka.

²⁴Nazhɛ gɛ Gɛdalia shileni atwa ata unu, bɛɛ hiɛŋ aŋ, Ta nda ma inyɛsɛ ye ehiu atwa Babulon o, nama ma na cɛnjɛ tu ga, hi na ndana agwuma Babulon iyi, iyi elele kaa zhɛ ma hiɛ zhɛmana.

²⁵Ama ge Ishmɛl yɛu Netania na shɛ bụjalụ Elishama na shɛ ụlamụ tugwama, suji atwa umpwa be zhe baa kwụnɛ Gɛdalia nu upiana Bicenje[46] keeni Eju keeni atwa na shɛ Akaldia a na namɛ no ofwo Gɛdalia ni Mizpa.

²⁶Ibɛ po atwa na ta vwɛ, ta atwa ticwɛŋ cwɛŋ, ta atwa na gembenji keeni eberezhe ejeshi gezheji hwɛɛ, ee hwuri Ijipti, iwɛnɛ inyɛsɛ ya Akaldia shɛ aŋ.

²⁷Aka na ti ge Jehoiyakin agwuma Juda ulwa shiywa talacɛ-na-shɛba-shi-cenje nu umwono-tishi, nazhɛ ge Ivil-mɛrodak agwuma Babulon hieci inyɛmɛnyɛmɛ Jehoiyakin agwuma Juda, bɛɛ bɛcinjɛ bụ nu umwono ata tishi ni Jitɛ woshi-ni-bɛ-cenje nu upiana Bu'umpwa-nu-ba-yebi.[47] Uywa gatata du ge Ivil-mɛrodak yɛ tugwama.

²⁸Ge Ivil-mɛrodak jɛmɛ n-ndumwa mi biye nu bwa, bee peni bu du idwɛtwɛ tugwama nɛ 'yajɛ ụjɛrụma uhwuri inɛ ya atwa vwɛ nu Babulon.

²⁹Nazhɛ ge Jehoiyakin vwoceji i'wɛŋnɛ ibwɛ umwono-tishi, baa ya ya iyimɛyɛ na agwuma ɛgbɛɛ tutu i ci tu'wo tu bwa.

³⁰Agwuma ata a tụpa bụ alụbashɛ ubwa keeni iyi nɛ shɛ urobwo ubwa, iyi-heri uuwa boo to 'wo.