Read bassa 2 SHƐGWUMA SHI YEBI 3 Bible Online

2 SHƐGWUMA SHI YEBI 3 - bassa bible

2 SHƐGWUMA SHI YEBI 3

¹Ge Jehoshafat yɛ tugwama tu Juda, yaa namɛ shiywa umpwa-na-shɛba-shɛ-tụndatụ, nazhɛ go Joram[6] yɛu Ahab yɛ tugwama ti Isrɛl nu Samaria shiywa umpwa-na-shɛba-shi-yebi.

²Go Joram njɛ AGWANGWAMA iwɛwɛ, ama bɛ njɛ shɛ i ci bishi bwa no bino bwa o. Ubwa hwuŋzhi utukwu-ụrụpɛ tuwa ti Beal na bishi bwa mo la.

³Ama tuba bu 'wa ụpapụ iwɛwɛ nɛ gɛ Jɛroboam yɛu Nebat njɛ la, nɛ zeriji miaụŋ mi Isrɛl maa a njɛ du iwɛwɛ, bi genji shi iŋ kaa o.

⁴Agwuma Moab gɛ Mɛsha ba biga agwụdụ, ibɛ po baa tụpa agwuma Isrɛl ụdalụ na agwụdụ igbɛɛ-dupu (100,000) keeni tihiŋzhe ta miaụŋ-ma-agwụdụ igbɛɛ-dupu (100,000) uywa uywa.

⁵Ama aka na ti ga Ahab na shɛ agwuma Isrɛl 'wi, nazhɛ agwuma Moab gɛ Mɛsha to tigezhe baa sukakanɛ agwuma Isrɛl.

⁶Gunu ata go Joram na shɛ agwuma beni nu Samaria boo sotulonu atwa Isrɛl hwɛɛ na aka ata.

⁷Baa tumwanɛ agwuma Juda ge Jehoshafat, bɛɛ hiɛŋ bụ, agwuma Moab na ma tu sukakana. Bi zhɛ bi me n she maa tu sukakanɛ bụ nu ujasa hŋ? Ge Jehoshafat hiɛŋ bụ, N zhɛ me bi she. N shɛ gana na abɛ shɛ, atwa mi shɛ gana atwa bụ, idɛkwɛ mi shɛ gana idɛkwɛ bụ.

⁸Ama agwuma Jehoshafat heŋteni bu, bɛɛ hiɛŋ, Uhwaŋna naa ɛti zhɛ to dulo maa ti zhegeni aaŋ? Go Joram jishijɛ bụ, bɛɛ hiɛŋ, Ga shɛ uhwaŋna ụshɛka Idụm.

⁹Ibɛ po agwuma Isrɛl, na agwuma Juda keeni agwuma Idụm zhe ujasa. Gana na ta a njɛ tirinje Jitɛ icenje, meni mu zasaba maa ejeshi aba keeni iyimabiga ya aba swe o.

¹⁰Nazhɛ agwuma Isrɛl hiɛŋ, Ebe ci ma o! AGWANGWAMA suyanɛ shɛgwuma shɛ ga shɛ tatụ maa atwa Moab eri aŋ kwakwa.

¹¹Ama ge Jehoshafat hiɛŋ bụ, Bigesere ba AGWANGWAMA zasaba kwukwuŋ epe hŋ maa to hwoyigono iwɛ AGWANGWAMA nu bwa? Nazhɛ bụtụ bu ko na amɛ anjɛ-ugondu agwuma Isrɛl jishijɛ bụ, bɛɛ hiɛŋ, Ge Elaisha yɛu Shɛfat namba epe. Ubwa la shɛ yɛu-ugondu nɛ yo mbiyono Elaija.

¹²Ge Jehoshafat hiɛŋ, bɛ shɛ bigesere ba AGWANGWAMA bu tɛkana. Ibɛ po agwuma Isrɛl, ne Jehoshafat keeni agwuma Idụm zhegeni bu.

¹³Ge Elaisha hiɛŋ agwuma Isrɛl, Imbe shɛ inee mi na bụụ? Zhaga hwoyigono iwɛ ne egesere shibi keeni a na nobu! Ama agwuma Isrɛl jishijɛ bụ, bɛɛ hiɛŋ, Awo, kede i shɛ gana ata o. AGWANGWAMA suje shɛgwuma shɛ ga shɛ tatụ maa atwa Moab eri aŋ.

¹⁴Ge Elaisha hiɛŋ bụ, N to AGWANGWAMA na Hwuri Kpaaŋ, na Ama ndana iyi, maa yaa shɛ shɛ iwɛnɛ Ngaa kwụbɛ Jehoshafat agwuma Juda, N nga zha shɛ ma hiɛ mbiyanɛ okwo timbiyanɛ o.

¹⁵Ama zhaga n ringenje ma bi'nyemi bu ko ba aduma hwuwayɛ go. Aka na te bi'nyemi ata ba aduma zhajɛ, bee kwuni aduma ti'nyama, nazhɛ ukpahiɛŋ wa AGWANGWAMA zwe nu uhiuhiu Elaisha.

¹⁶Bɛɛ hiɛŋ, AGWANGWAMA hiɛŋ, N zhɛ mo shidingo isese gɛ ihwoo no okwokwo meni.

¹⁷AGWANGWAMA hiɛŋ, Okwo uvwugo njɛ shɛ, okwo eshilo ngbi shi kaa, ama meni kaa mi zhɛ mo shino ni isese ɛtɛ waa, maa hi swe ti iyimabiga hiŋ keeni inɛ hiŋ hwɛɛ.

¹⁸Inɛ ɛtɛ kaa shanɛ AGWANGWAMA iyi ticwɛŋ, Bi zhɛ du kaa bo lono maa hi eri Amoab.

¹⁹Hi zhɛ hia ala ashɛpwụ elele na ee kepenji keeni anaa na zhɛmanjɛ tụlasụ. Logo ma i'wɛ'wɛ ya aba i tụ'walụ ti biye ye elele hwɛɛ, sukokono ma ɛmɛzhinjɛ aba hwɛɛ, nazhɛ hi ubeni atayɛ na cɛnjɛ ta aba ti biye hwɛɛ.

²⁰Ti iyi heri na aka bụ ụrụpɛ uvwungwa tuta, meni mu banɛ zalụ bi Idụm, mɛɛ fwunjɛ mee shini cɛnjɛ ta ata hwɛɛ.

²¹Aka na ta Amoab hwɛɛ hwụjɛ maa shɛgwuma sha ata shɛ tatụ she ci ba maa shɛ njɛ ujasa na aba, oo sotulonu atwa elele na olwo i'wɛŋnɛ ujasa tu'urugono. Ta atwa na gembenji, ta atwa na gwụmwatangwụ, ee shikekeni no tugwungwu ta cɛnjɛ ta aba.

²²Ta Amoab gbatụ ti'ishijɛ nu uvwungwa dididi, aa kwụbɛ tu uwaŋna wa ta meni maa ata mu namɛ nu umbe wa aba, maa shanɛ aŋ gana mehieŋ, iwɛnɛ ti mee shenjemi.

²³Ɛɛ hiɛŋ, Mehieŋ na, shɛgwuma shɛ ga shɛ tatụ shɛ mama kwụnanụ feye caakwụ nu ujasa. Ahiɛba Amoab, hwure ma tu suje ma i'wɛŋnɛ ya aba nɛ ujasa yɛ kwakwa!

²⁴Ama aka na te e ci ugba wa atwa Isrɛl, atwa Isrɛl ishajɛ, aa kwụnɛ Amoab. Amoab gezhigeni aŋ, nazhɛ atwa Isrɛl tefuleji[7] cɛnjɛ ta aba aa kwụnɛ aŋ.

²⁵Gabata ee hwuŋzetenji ashɛpwụ ata hwɛɛ. Aka elele atwa Isrɛl ci hwayɛ cɛnjɛ ta Amoab te elele tu na tɛ zhɛmɛ, bụtụ bụtụ na amɛ atwa Isrɛl ba kala utayɛ uko na tuba. Ibɛ po atayɛ ubeni ya na cɛnjɛ ta ata hwɛɛ. Nazhɛ ee sukekeni ɛmɛzhinjɛ aba hwɛɛ, ee leji i'wɛ'wɛ ya aba i tụ'walụ ti biye hwɛɛ. Semi ụshɛpwụ ata wa aba na shɛ uhiu wa ashɛpwụ cɛnjɛ ta aba, ugata ɛɛ hiɛŋ izeci ubwa, Ki-hɛrɛs kiri ee gengeni atayɛ ubwa. Ama tuba ejeshi aba a na shɛ ekeri nkwolo zhe apata ee hweri uŋ, ee leshiji.

²⁶Aka na ta agwuma Moab kwụbɛ maa ujasa ata vwengengeni bu eshe duwa, bee zenji atwa na 'waŋnɛ otokwobi, atwa akpakwụ-atatụ-ni-dipi-yebi (700) maa e bweji ne eririri agwuma Idụm[8] maa tuba e duri apata, ama e eri shi o.

²⁷Bee shepi ya yɛu ibwɛ ye eyi ihiiŋ nɛ gɛ zhɛ ya ya hwuŋ tugwama tu bwa, boo to ụrụpɛ tuhwoŋzhingo nu uba ụshɛpwụ ata. Ibɛ po inyɛsɛ i'wɛtwɛ[9] i shɛ ya atwa Isrɛl, ee genji bu ee gwuri na cɛnjɛ ta aba.