Read bassa 2 SHƐGWUMA SHI YEBI 4 Bible Online

2 SHƐGWUMA SHI YEBI 4 - bassa bible

2 SHƐGWUMA SHI YEBI 4

¹Bululo bu ko na shɛ biyikwo bu usemberi uko na amɛ egesere twanɛ Elaisha u'wo jitoo ko, bɛɛ hiɛŋ bụ, Iyɛri, bwolo mi na shɛ la yɛu-ugondu bu 'wi, bi mepi du kaa gana na tu baa sụma la AGWANGWAMA inyɛsɛ. Ama bụtụ na baa yɛ la utashɛ zhajɛ maa sugo miaụŋ mi mi me eyi mi yebi maa nda mụ ajama ubwa tụlụkpashɛ tu utashɛ ata bwolo mi yɛ bụ la.

²Ge Elaisha heŋteni bu, bɛɛ hiɛŋ, Imbe aba jala maa Ma bụ ndanaa? M mbishi iyi nɛ abụ 'yajɛ ni ihwɛ bụ. Biyikwo ata jishijɛ bụ, bɛɛ hiɛŋ, yɛu gɛ bụ ugondu yo o zasa iyi elele ni ihwɛ ibwɛ o, semi manɛbɛ mu ko mu zweni ba nu ubene uko cwɛŋ bana kiri.

³Ge Elaisha hiɛŋ bụ, Zhaga lụpajɛ agaruwa ohondo no olugwo ababɛshɛ bụ, gana elele tu ufwugwo wa aba eri wo to. Tɛ lupɛ cwɛŋ o.

⁴Sugo agaruwa ata maa teni nu umwono bu, maa mama kapɛ odubo ta miaụŋ ma ata mụ bụ me eyi hwɛɛ. Shapa manɛbɛ ma ata maa zwegeni mu na agaruwa ata hwɛɛ. Una we elele ebu zweni wee shini, shapa uŋ sho nụ ụzalụ.

⁵Ibɛ po biyikwo ata teni ga nu umwono ubwa na miaụŋ mu bwa, aa kapɛ odubo. Nazhɛ miaụŋ mu bwa tuba ma shɛkakanɛ bụ agaruwa ata boo zwogono manɛbɛ ma ata.

⁶Uuwa i ci aka na agaruwa ata shinenji hwɛɛ. Bɛɛ hiɛŋ yɛu ibwɛ ike, M panɛ unya. Yɛu ɛtɛ jishijɛ bụ, yɛɛ hiɛŋ, I zasa iyi elele namba ya o. Gunu ata manɛbɛ mi genji ya du tubanɛ.

⁷Bee zhe bee mbishi bụtụ ata ba Agwatana. Nazhɛ bụtụ ata ba Agwatana hiɛŋ bụ, Zhaga sanga manɛbɛ ma ata maa cɛpɛ utashɛ ata. Mu na me elele mụ bụ vwanɛ hwayɛ, asha nda ma uhwara na mu na ata na miaụŋ mụ bụ.

⁸Jitoo ko ge Elaisha zhe nụ ụshɛpwụ uko na ɛɛ hiɛŋ, Shunem. Biyikwo bu ko namba nụ ụshɛpwụ ata ɛ shɛ bɛzhɛgba, ba shana baa uranga Elaisha maa ga ya iyimɛyɛ pu bwa. Ibɛ po aka elele ge Elaisha zhe tahaŋnụ geri ata, ba vwụla bụ, biyikwo ata kaa ba pana bụ iyimɛyɛ.

⁹Jitoo ko biyikwo ata hiɛŋ bwolo bwa, N eshiciji maa bụtụ ga bɛ vwurɛ pu tu ɛgbɛɛ bɛ shɛ bụtụ bi tijilo ba Agwatana.

¹⁰Mizha tu mo umwono na azuba ukogo umwono ga tu, maa ti shiri apata ogodo, nu uteburu, na akara keeni ụsụtụla, iwɛ maa aka elele tuba baa zhajɛ pu tu maa bu no zokwu apata.

¹¹Jitoo ko ge Elaisha zhe apata, boo to ụhinjanụ nu umwono ebe ee meni bu na azuba.

¹²Bɛɛ hiɛŋ yɛu ibwɛ ugondu ge Gehezai, Suyanɛ biyikwo ga bu Shunem. Baa suyanɛ bụ ga, biyikwo ata zhajɛ bee shikeni nu umbe Elaisha.

¹³Ge Elaisha hiɛŋ Gehezai, Mbiso biyikwo ga maa, N kwụbɛ maa iwe tu abɛ njɛ ụbaụta ga hwɛɛ. Imbe aba jala maa ma bụ ndanaa? Ba jala suu maa ma bụ dumangana n-ndumwa no ofwo agwuma, kwo kaa no ofwo uberezhe we ejeshi? Ama biyikwo ata jishijɛ bụ, bɛɛ hiɛŋ, No ofwo atwa mi tugom Ngaa namɛ, ukekeshi iyi elele kaa n njɛ shɛ o.

¹⁴Ge Elaisha heŋteni Gehezai, bɛɛ hiɛŋ, Asha imbe kwuŋ Ngɛɛ zhɛ ma ndana bụ yaa? Ge Gehezai jishijɛ bụ, bɛɛ hiɛŋ, Biyikwo ga zasa du kaa yɛu ye elele o, bwolo bwa kaa injɛ ya.

¹⁵Ge Elaisha hiɛŋ bụ, Suyanɛ biyikwo ata de. Aka na ti ge Gehezai suyanɛ bụ, bee zhe bee shikeni no odubo.

¹⁶Ge Elaisha hiɛŋ bụ, Aka gana ga unywanywa, bi zhɛ ba mata yɛu-ye-eyi. Biyikwo ata jishijɛ Elaisha, bɛɛ hiɛŋ, Ee! Iyɛri mi, gabụ bụtụ ba Agwatana, ta ma halakaka, Gamba yɛu gɛ bụ ugondu o!

¹⁷Ti yaa namɛ fwalaa, biyikwo ata le ga ofubo, maa waa unywanywa rinje, i ci aka gana ata ti ge Elaisha ga jɛmɛ la, biyikwo ata meci ga yɛu-ye-eyi, gana na ti ge Elaisha ge mbishi bu la.

¹⁸Aka na ti yɛu ɛtɛ waŋnɛ, jitoo ko yaa 'wa bishi ne ehilo no ofwo atwa na ogwubo iyimɛyɛ.

¹⁹Eshigiri yɛu ɛtɛ ugananɛ bishi bwa, bɛɛ hiɛŋ bụ, Ada, uhiuhiu ma n gwuma! Uhiuhiu ma n gwuma! Bishi bwa hiɛŋ yɛu ibwɛ ugondu ike, Shapa bụ jiyo no ofwo bino bwa.

²⁰Aka na te e shepi iŋ po bino bi bɛ, bino 'waŋnɛ bụ, maa waa uwaŋna shikeci, yee 'wi.

²¹Bee shepi iŋ baa patanɛ no ogodo ebe bụtụ ata ba Agwatana, baa banɛ baa kapɛ odubo.

²²Baa suyanɛ bwolo bwa, bɛɛ hiɛŋ bụ, Gɛ yɛu bụ ugondu ike zhajɛ ni izhinyɛci kakayɛ maa Ma zha pa bụtụ ata ba Agwatana maa Me gwure hwuwayɛ go.

²³Bwolo bwa hiɛŋ bụ, Imbe bwa upo ɛbi zhɛ ba zhagana bụụ? Shɛ hwayɛ kaa Upiana Ufwo banɛ. Shɛ Ụjita-ụhinjanụ kaa hwayɛ. Biyikwo bwa jishijɛ bụ, bɛɛ hiɛŋ, Shɛ iwɛ o.

²⁴Nazhɛ biyikwo ata peteni izhinyɛci ibwɛ ufiridi, bɛɛ hiɛŋ yɛu ibwe ugondu, Ta suka bu pece iwe mi o, semi ti Ngɛɛ bi hiɛŋ, ga nda pece.

²⁵Ibɛ po baa shɛdɛnjɛ tahaŋnụ tu bwa bee ci ishɛmɛ Kamɛl no ofwo ata ge Elaisha namɛ. Gana na ti ge Elaisha kwụbɛ bụ ti bee ci taa dụlụ, bɛɛ hiɛŋ yɛu ibwɛ ugondu ge Gehezai, Kwụba, biyikwo ata bu Shunem ye be ci peye!

²⁶Sukwu, Gozhigo maa teji bu uhwaŋna, hoŋtono bu hwayɛ okwo i te lemi. Hiɛŋ bụ, Bwolo bu tubaa? Yɛu bụ tubaa? Biyikwo ata jishijɛ Gehezai, bɛɛ hiɛŋ, I te lemi suu.

²⁷Aka na ti bee ci ishɛmɛ ɛtɛ, no ofwo na ge Elaisha namɛ. Baa 'imɛ ɛvwɛvwɛjɛ Elaisha dimi. Ge Gehezai zhe maa shishingono bu beye. Ge Elaisha hiɛŋ bụ, Ganga bụ saiin amɛ ubwa hashɛganụ tebiye. AGWANGWAMA kaa te me swekeni iŋ, Bi te me mbiseni shi iŋ o.

²⁸Biyikwo ata hiɛŋ Elaisha, Iyɛri mi, M bu lụpɛ la suu yɛu? M bụ hiaŋ shɛ la, Ta ma halakaka hŋ?

²⁹Ge Elaisha hiɛŋ Gehezai, Urugono tugwuno tụ bụ hwungbɛ, maa shepi bukwuto mi, maa zhe apata kakayɛ. Okwo abụ twa hwayɛ na bụtụ be elele nu uhwaŋna, ta 'walụ bụ o, okwo bụtụ be elele du kaa ụbụ 'walụ, to lono bu o. Ebi ci hwayɛ apata, patana bukwuto ga mi nụ ụpɛshɛka yɛu ɛtɛ.

³⁰Ama biyikwo ata hiɛŋ Elaisha, N to AGWANGWAMA, Ngoo bu to du, maa N zha shɛ ma bụ ganga o. Nazhɛ bɛɛ ishijɛ baa 'wa biyikwo ata.

³¹Ge Gehezai hwuleni aŋ, bee ci bee peteni bukwuto ata nụ ụpɛshɛka yɛu ɛtɛ. Ama yɛu ɛtɛ hwungwa sụ o, i njɛ shɛ okwo bulama o. Bee gwuri baa twa nu bwa, bɛɛ hiɛŋ bụ, Yɛu ɛtɛ ta hiɛ shɛ o.

³²Aka na ti ge Elaisha ci apata, bee teni nu umwono ata, baa kwụbɛ to ru'wo ri yɛu ɛtɛ ri shiri no ogodo ubwa.

³³Ee teni ebeyebi, nazhɛ bee kepi odubo. Baa tabwa AGWANGWAMA.

³⁴Bee zhe baa patanɛ yɛu ɛtɛ, bee meme nderishinji, bee kwutenji unu ubwa nu una yɛu ɛtɛ, bee kwutenji eshe ubwa na a na yɛu ɛtɛ, bee petengeni i'ɛlɛ ibwɛ ni inɛ yɛu ɛtɛ, Nazhɛ tu'waba ti yɛu ɛtɛ tu kwuni tuvwongongo.

³⁵Nazhɛ baa pashɛngwa, bee rinji umwono ata, bee zhe mabaaba, ba zha mesheeshe. Bee gwuri baa patanɛ yɛu ɛtɛ sasana, nazhɛ yɛu ɛtɛ njɛ ejishi kpalụ cenje, yɛɛ kɛpishinjɛ eshe ibɛ.

³⁶Nazhɛ Ge Elaishi suyanɛ Gehezai, bɛɛ hiɛŋ bụ, Suyanɛ biyikwo ata bu Shunem. Ge Gehezai suyanɛ bụ ga. Aka na te biyikwo ata teni nu umwono ata, ge Elaisha hiɛŋ bụ, Shapa yɛu bụ.

³⁷Nazhɛ biyikwo ata leyi na cɛnjɛ nɛ ɛvwɛvwɛjɛ Elaisha, nazhɛ bee shepi yɛu ibwɛ bee beni.

³⁸Aka na ti ge Elaisha gwuleneni ni Gilgal, atwa a ya-imunɛ tebiye na aka ata. Gana na te esemberi ata a na shɛ egesere gɛgajɛ nu umbe ubwa. Bɛ hiɛŋ yɛu ibwɛ ugondu, Patana ikwɛshɛ gembi nu ulwa maa nɛ shɛpa iwɛ esemberi ga a na shɛ egesere.

³⁹Nazhɛ bụtụ bu ko na amɛ aba zhe na ambɛ maa salajɛ abụba, bɛɛ kwubɛ ụkparɛ uko ni ishɛmɛ ɛtɛ, bee cwe tụ'walụ ti ikpɛri ɛtɛ zhutuu, boo togwu na abụba ebe. Aka na ti bee ci ihwɛ baa hwụŋshɛ aŋ hwɛɛ, ta tụ'walụ ta ata, bee zweni ni ikwɛshɛ ebe i shɛpa, ama e mepi shi kaa iyi nɛ yaa shɛ o.

⁴⁰Aka na te e seleji shɛpa sha ata, ee suji shu ee kwuni tuswa. Aa uganɛ, ɛɛ hiɛŋ, A-Bụtụ ba Agwatana, iyi tu'wo namɛ na amɛ ikwɛshɛ gɛ shɛpa. E eri shi a swa shụ ya o.

⁴¹Ge Elaisha hiɛŋ aŋ, M panɛ ma ishɛbɛ ike. Aka na aa panɛ bụ iŋ, bee suji iŋ bee zweni ni ikwɛshɛ ɛtɛ, bɛɛ hiɛŋ, Salaga ma shɛpa maa atwa ga swe. Nazhɛ mangayɛ ma ata mu hwuwowu ya.

⁴²Na aka anya, bụtụ bu ko banɛ nụ ụshɛpwụ uko na ɛɛ hiɛŋ izeci ubwa, Beal-shalisha, baa 'waŋnanɛ Elaisha tumbara tu umbrad woshi, a na aa njɛ ni izɛgwu Bali inɛɛ nɛ i nɛ hiiŋ, keeni asuswa iyimɛyɛ lom, bee zweni aŋ nu ụzhɛka ubwa. Ge Elaisha hiɛŋ yɛu ibwɛ ugondu, Pana atwa ga iyimɛyɛ gɛ maa a yɛ.

⁴³Ge Gehezai Heŋteni bu, bɛɛ hiɛŋ, Gana naa Ngee eri ma nda hwayɛ maa iyimɛyɛ gɛ botogwu atwa ga dipi-yebii? Ama ge Elaisha jishijɛ bụ, bɛɛ hiɛŋ, Pana atwa ata iyimɛyɛ ɛtɛ maa a yɛ. AGWANGWAMA hiɛŋ, Ɛ zhɛ a ya iŋ harɛ ya vwana aŋ.

⁴⁴Yɛu ibwɛ ugondu sheni ga atwa ata iyimɛyɛ ɛtɛ nu umbe wa aba, aa yɛ ga, harɛ yaa vwanɛ aŋ, nu gana na ta AGWANGWAMA ga dumwa.