Read bassa 2 SHƐGWUMA SHI YEBI 5 Bible Online

2 SHƐGWUMA SHI YEBI 5 - bassa bible

2 SHƐGWUMA SHI YEBI 5

¹Ge Neaman na shɛ uberezhe we ejeshi atwa Siria shanɛ agwuma ubwa bụtụ bụ tandụ tebiye, baa mụnɛ bu du ụjɛrụma duwa. Iwɛnɛ po tedure nu bwa AGWANGWAMA lasagwụ atwa Siria ujasa. Bɛ shɛ bugwoni nu ujasa tebiye, ama tuba ba gwuma ụngwụ-uwaŋna.

²Gana na ta a njɛ ujasa na atwa Isrɛl na aka oko, ɛɛ imɛ yɛu ike yo o ya atwa Isrɛl, baa namɛ ya ni i'ɛlɛ biyikwo Neaman baa ndana bụ iyi.

³Jitoo ko yɛu ɛtɛ yo o hiɛŋ agwuma-ihwɛ ɛtɛ ibwɛ o o, Yaa shɛ agwuma-ihwɛ gɛ mi kiri ge zhe yebe pe bigesere bu ko na namba nu Samaria! Bi gɛ zhɛ ba nɛnga bụ nụ ụngwụ ga ubwa uwaŋna.

⁴Aka na ti ge Neaman hwụjɛ iwɛ ɛtɛ, bee zhe bee mbishi agwuma ubwa, bɛɛ hiɛŋ bụ, Gana yɛu-yo-o nɛ banɛ na cɛnjɛ ti Isrɛl jɛmɛ nu.

⁵Ibɛ po agwuma Siria hiɛŋ bụ, Zhaga, N zhɛ ma bụ pana utakada maa 'waŋna maa peni agwuma Isrɛl. Ge Neman sanɛ ga, baa 'waŋnɛ azụrụfa arinya umpwa-ni-bɛ-itɛ keeni azhɛnarɛya arinya igbɛɛ-itɛtu (6,000) keeni tugwuno tu tuswoswoswo umpwa.

⁶Aka na ti bee ci, bee peni agwuma Isrɛl utakada na hiɛŋ, Aka na tu utakada ga u bi ci, asha mapa maa Gamba n tumwanɛ Neaman yɛu mi ugondu iwɛ maa nɛnjɛ bụ nụ ụngwụ ubwa uwaŋna.

⁷Aka na agwuma Isrɛl rɛcɛ utakada ata, bee dwetweji i'wɛŋnɛ ibwɛ na amɛ ubwa na hashɛganụ, bɛɛ hiɛŋ, Gamba suu n shɛ Agwatana na ma kwụna, mɛ hicinjɛ du, upo baa tumwanɛ bụtụ ga bwa bụ ụngwụ-uwaŋna, maa Ma nɛnga bụ? Kwụba ma gana na ti bɛɛ mɛ m kpɛ nu uwuru!

⁸Ama aka na ti ge Elaisha na shɛ bụtụ ata ba Agwatana hwụjɛ maa agwuma Isrɛl dwetweji i'wɛŋnɛ ibwɛ, baa tumwanɛ bụtụ bu ko no ofwo agwuma, bɛɛ hiɛŋ, Hiɛŋ, agwuma, Iwembe po ebu dwetweji i'wɛŋnɛ bụụ? Hiɛŋ bụ ga zhajɛ pi mi, nazhɛ bɛɛ zhɛ ba mapa maa bigesere namba ni Isrɛl!

⁹Ge Neaman sanɛ ga no ofwo Elaisha, ti idɛkwɛ ibwɛ keeni ihɛŋtu ibwɛ ujasa, bee shikeni no odubo umwono Elaisha.

¹⁰Ge Elaisha tumwanɛ yɛu ibwɛ ugondu, bɛɛ hiɛŋ bụ, Zhaga mbiso Neaman maa ga zha maa dụla meni nu Urefu ga Jodan kpalụ cenje, nazhɛ u'waba ubwa zhɛ wa zhɛmanana shɛshɛshɛ.

¹¹Ama iwɛ ɛtɛ gwumanɛ Neaman duwa. Baa sanɛ ujiyo ni isɛbwɛ, bɛɛ hiɛŋ, N nge heŋshi maa bi zhɛ ba banɛ tilɛɛ, maa shikono maa suyana AGWANGWAMA na shɛ Agwatana ubwa, maa ma papalanga u'ala ubwa no ofwo ga ụngwụ ga uwaŋna namanjɛ na tu'waba ti mi maa ma nɛnga.

¹²Shɛ meni mu Abana[10] keeni mu na mu Fapa na mu namɛ nu Damaskos suu mi debeji uhwuri meni ma atwa Isrɛl me elele? N nge eri shi suu ma dụla mụ maa mo fwono. Bee hwuri ujiyo ni isɛbwɛ keeni amɛ-tụhaŋtụ.

¹³Ama miaụŋ mu bwa mu ugondu mi zhegeni bu, mɛɛ hiɛŋ bụ, Ada, yaa shɛ bigesere ga gɛ bi hiɛŋ nda iyi ike gembi, bu ga zha shɛ suu ba nda iŋ? Inɛ gɛ bɛɛ bi hiɛŋ, Zhaga dụla meni kwakwa maa nama shɛshɛshɛ, ibɛ suu gwụmɛ ya?

¹⁴Iwɛbɛ po ge Neaman zhe, bee meme iricinji nu Urefu ata Jodan kpalụ cenje, nu gana na ta bụtụ ata ba Agwatana ge mbishi bu. Nazhɛ tu'waba tu bwa tɛ zhɛmananɛ gana tu'waba ti yɛu shenje, baa namananɛ shɛshɛshɛ.

¹⁵Aka na ti ge Neaman gwure no ofwo bụtụ ata ba Agwatana, medenji atwa na ga 'wa bụ hwɛɛ. Bee shikeni ya no ofwo Elaisha, bɛɛ hiɛŋ bụ, M mepi ya maa Agwatana anya zasaba no ofwo elele nu unyizo, semi ni Isrɛl kiri. Iwɛ ecilo ata ma bụ tabwa maa leshiji upwaŋ ga yɛu gɛ bụ ugondu ubu 'waŋnanɛ.

¹⁶Ama bigesere ata jishijɛ, bɛɛ hiɛŋ bụ, N to AGWANGWAMA na Ama ndana iyi maa, N zha shɛ ma lashɛga iyi bu ye elele o. Baa uranjɛ bụ maa lashɛga iŋ, ama ge Elaisha lacɛ kaa.

¹⁷Ge Neaman hiɛŋ bụ, Asha lono maa idɛkwɛ gɛ iyebi 'waŋnana yɛu-ugondu gɛ bụ cɛnjɛ[11] to ofwo na maa mu na zhɛba AGWANGWAMA. Yɛu gɛ bu ugondu zha shɛ ya pana ya tuwa ụrụpɛ tuhwoŋzhingo kwo kaa ụrụpɛ unya we elele o, semi AGWANGWAMA kiri.

¹⁸Iwɛ ecilo ata, ga AGWANGWAMA n gengeni Gamba yɛu gɛ bụ ugondu na aka na Ngee zhe pa agwuma-ihwɛ mi, ti bɛɛ zhɛ ni isume tuwa ti Rimon maa ba zhɛba tuwa ta ata, Ngee zhe du maa Ma zhɛba tụ nu bwa. Aka na Ngee kwuzhi ni isume ɛtɛ Rimon, ga AGWANGWAMA n gengeni inɛ ɛtɛ hwɛɛ!

¹⁹Ge Elaisha hiɛŋ bụ, Zhaga hwulo na amɛ-olom. Ge Neaman hwuri ga. Aka na ti ge Neaman sanɛ, baa dụlụmɛ nu bwa fwalaa,

²⁰ge Gehezai yɛu-ugondu bụtụ ata ba Agwatana ge Elaisha, heŋshi na amɛ ubwa, bɛɛ hiɛŋ, Kwụba, agwuma-ihwɛ mi genji Neaman bụtụ ga bi Siria, bi leshiji shi i'wɛŋnɛ elele ni i'ɛlɛ ibwɛ o. N to AGWANGWAMA, N zhɛ mo urugono bu nụ usumwa maa mɛ lɛshijɛ imeseyi i'wɛŋnɛ ike nu bwa.

²¹Ge Gehezai 'wa Neaman. Aka na ti ge Neaman kwụbɛ bụ tu baa 'wa bụ nụ usumwa, bee kezhe kakayɛ nụ ụhaŋtụ ubwa, bee teji bu uhwaŋna, bɛɛ hiɛŋ bụ, I te lemi hiŋ?

²²Ge Gehezai jishijɛ bụ, bɛɛ hiɛŋ, I te lemi suu. Ama agwuma-ihwɛ mi n tumwanɛ utumwa no ofwo bu, bɛɛ hiɛŋ, Esemberi egesere oko eyebi ye banɛ ni ishɛmɛ Ifrem, a zhaganɛ bụ hwuwayɛ go. Sukwu, m panɛ azụrụfa arinya ugbaa-uko-na-akpakwụ-a-ta keeni otogwo tuswoswoswo eyebi.

²³Ge Neaman uranjɛ bụ maa ga lashɛga arinya igbɛɛ-itɛtu, ge Neaman umpeni bu azụrụfa arinya ata igbɛɛ-itɛtu na alapa eyebi keeni otogwo tuswoswoswo eyebi. Ge Neaman peteni miaụŋ mu bwa mu ugondu mi yebi, aa 'waŋnanɛ Gehezai, ee hwuleni bu umbe.

²⁴Aka na te e ci ishɛmɛ ɛtɛ ge Gehezai namɛ, bee leshiji ya i'wɛŋnɛ ɛtɛ, bee zweni iŋ nu umwono ubwa, bɛɛ hiɛŋ aŋ ge gwuri, ee gwuri ga.

²⁵Bee hwuri bee shikeni pa agwuma-ihwɛ ibwɛ. Ge Elaisha heŋteni bu, bɛɛ hiɛŋ, E-Gehezai, cee ebi ge zhee? Ge Gehezai jishijɛ bụ, bɛɛ hiɛŋ, Iyɛri mi, yɛu gɛ bụ ugondu kaa zhe shi ofwo elele.

²⁶Ama ge Elaisha hiɛŋ bụ, Ahaŋsa mi suu zhagajɛ shɛ na bụ tutu ofwo ata bụtụ ata kezhe nụ ụhantụ ubwa, bɛɛ bi tɛjɛ uhwaŋna? Aka na lanɛ maa bụtụ leshiji ukwuribi, no tugwuno, nu ntuma ma buta, nu ntuma ma shifwafwa, na agwụdụ, ni inɛ, na miaụŋ-mu-ugondu me eyi keeni miaụŋ-mu-ugondu mo o na suu?

²⁷Iwɛ ecilo ata, ụngwụ-uwaŋna Neaman zhɛ ma bu zala tutu ukpogwu bụ unyizo-nom. Aka na ti ge Gehezai ishɛjɛ apata, ụngwụ ata uwaŋna zeri bu, baa cɛnjɛmɛ kwurwaa.