Read bassa 2 SHƐGWUMA SHI YEBI 7 Bible Online

2 SHƐGWUMA SHI YEBI 7 - bassa bible

2 SHƐGWUMA SHI YEBI 7

¹Ge Elaisha jishijɛ bụ, bɛɛ hiɛŋ, Shɛlaga iwɛ nɛ AGWANGWAMA jɛmɛ. AGWANGWAMA hiɛŋ, Beyi ga aka gana ga, ɛ zhɛ a sanga bimenji bi inɛmɛ ibiye bi ikele ike uzụrụfa urinya uko, ɛɛ zhɛ a sanga timenji ti iyimɛyɛ bali tu nkolo mi yebi uzụrụfa urinya uko no odubo tutono tu Samaria.

²Nazhɛ umadanga wa agwuma jishijɛ bụtụ ata ba Agwatana, bɛɛ hiɛŋ, Kwụba, Okwo yaa shɛ AGWANGWAMA kepishinji azuba maa eshilo ngbi, i eri ya sha gana ata abụ jɛmɛ hŋ? Ge Elaisha jishijɛ bụ, bɛɛ hiɛŋ, Bi zhɛ ba kwụba iŋ ti yɛɛ zhɛ ya nda ne eshe bu, ama bi zha shɛ tuba ba ya iyimɛyɛ ɛtɛ okwo cwɛn o.

³Atwa Samaria oko eneshi namba a gwumanga ụngwụ-uwaŋna, aa gɛgajɛ no odubo tutono tu Samaria. Aa mama hiaŋnụ, Epe hŋ ɛti zhɛ ta nama uuwa i ci aka na ɛti zhɛ to 'wo?

⁴Yaa shɛ ɛti hiɛŋ hwayɛ, Ti zhe ma na amɛ ụshɛpwụ, imunɛ zhɛ ma tu kwụna. Yaa shɛ atɛ jɛjɛ kaa epe, ti zhɛ to 'wo waa. Yaa shɛ gana ata asha hwure ma ti zhe ma nu ugba wa atwa Siria. Ee ti genji hwayɛ tụkwụna, ta nama, aa tu kwụnɛ kaa hwayɛ, to 'wo ya.

⁵Ɛɛ ishijɛ ga tobwolo iyi te rimeni shi o, maa e zhe nu ugba wa atwa Siria. Aka na te e ci ipɛlu ugba wa atwa ata Siria, i zasa bụtụ namba apata okwo bu ko.

⁶AGWANGWAMA nduwa maa ge ejeshi atwa Siria hwụjɛ rundu ri ihɛntu ujasa keeni e'inji idɛkwɛ ujasa keeni a na ejeshi na gembi ufwugwo. Iwɛbɛ po aa mama hiaŋnụ, Agwuma Isrɛl nu utu sugeni shɛgwuma she Ehit keeni shɛgwuma shi Ijipti maa a tu sukakanɛ nu ujasa.

⁷Iwɛ ecilo ata atwa Siria gezhiji tu uwaŋna zhɛ utwonuo, ee genji shidulo sha aba, ti idɛkwɛ ya aba, tu nzhinyacɛ ma aba, ee genji kwakwa ugba wa aba gana ata, ee gezheji iwɛ ohiuhiu aba.

⁸Aka na ta agwumashɛ ata ụngwụ-uwaŋna eneshi ci ipɛlu ugba wa atwa Siria, ee teni nu udulo uko, aa yɛ iyimɛyɛ, ee swe meni. Ee suji azụrụfa, na azhɛnarɛya, keeni otogwo, ee zhe ee sweci. Ee teni sasana udulo unya, aa 'wananjɛ sasana i'wɛŋnɛ gana ebe, ee zhe ee sweci iŋ.

⁹Nazhɛ aa mama hiaŋnụ, Ijɛ ata nda zhɛshɛ o. Hwayɛ ga shɛ ụjita unabarɛ ubiye, atu namɛ tuba saiin. Yaa shɛ eti genji iŋ gana ga uuwa iyi heri, ebe zhɛ ma tu mana. Iwɛ ecilo ata hwure ma ti jimɛ ma nu ukpogwu wa agwuma.

¹⁰Ee zhe aa suyanɛ a'yacɛ odubo ụshɛpwụ ata, ee mbishi aŋ, ɛɛ hiɛŋ, Ti ge zhe nu ugba wa atwa Siria, tụ kwụbɛ shɛ bụtụ be elele o, okwo rụhwụŋ ra bụtụ bu ko gba tụ hwụjɛ shɛ o. Idɛkwɛ nu nzhinyacɛ kiri mu umpenji ba, shidulo sha ba shi tileni ba bohondo.

¹¹Nazhɛ a'iywa ata ụshɛpwụ zhe, ɛɛ jimɛ nu ukpogwu wa agwuma.

¹²Nazhɛ agwuma ishijɛ nụ ụjita ata, bee zhe pa anjɛ-ugondu ubwa, bɛɛ hiɛŋ aŋ, N zhɛ mo hi mbiso iyi nɛ atwa Siria iti heŋseni. E mepi maa ta ya-imunɛ, ibɛ po ee benenji no shidulo sha aba aa swakacɛ na ambɛ, ɛɛ hiɛŋ, Aa banɛ hwayɛ nụ ụshɛpwụ maa e rinji iwɛ iyimɛyɛ, ti zhɛ ta ima aŋ ni i'ɛlɛ buumwa buumwa, nazhɛ to tono ya nụ ụshɛpwụ wa aba.

¹³Ibɛ po bɛnjɛ-bu-ugondu bu ko hiɛŋ bụ, Ebe kaa mwonuo atwa na namɛ nụ ụshɛpwụ ga, gana maa o uwo. Iwɛ ecilo ata ga tumwanɛ atwa oko a ta maa e suji idɛkwɛ itɛ nɛ ta vwɛ nụ ụshɛpwụ maa tuba e hweyigeni iyi nɛ namba apata. E'inji aba zhɛ a sụba e'inji atwa na imunɛ ya kwụna.

¹⁴Nazhɛ ee zenji ihɛntu ujasa iyebi keeni idɛkwɛ, ibɛ agwuma tumwanɛ atwa ata no ofwo ugba we ejeshi atwa Siria, maa mapa iwɛ nɛ namba apata. Bɛɛ hiɛŋ aŋ, Zhaga Kwubɛ ma iyi nɛ teneni ejeshi ata.

¹⁵Aa sanɛ ga tutu Jodan, aa kwụbɛ to tugwuno keeni i'wɛŋnɛ swoswoswo, ti yaa barɛ nu uhwaŋna. Ibɛ shɛ i'wɛŋnɛ ɛtɛ atwa Siria 'waŋtatanjɛ nu uhwaŋna to o gozhogo. Nazhɛ atumwa ata gwure aa jɛmɛ utumwa pa agwuma.

¹⁶Nazhɛ atwa Isrɛl beni ee zhe ee suje i'wɛŋnɛ ya Asiria. Ee senji bimenji bi inɛmɛ ibiye bi ikele ike uzụrụfa urinya uko, ee senji timenji ti iyimɛyɛ Bali tu nkolo mi yebi uzụrụfa urinya uko, gana na ta AGWANGWAMA ga dumwa la.

¹⁷Nazhɛ agwuma teri umadanga ubwa uko maa ngbaraka odubo ụshɛpwụ, ama atwamwa rikeci bu, bee 'wi, nu gana na ta bụtụ ata ba Agwatana ga dumwa la, na aka na ta agwuma zhajɛ pu bwa.

¹⁸I teni ga gom gana na ti ge Elaisha ge mbishi la agwuma, bɛɛ hiɛŋ, Beyi aka gana ga, ɛ zhɛ a sanga inɛmɛ bimenji bi ikele ike uzụrụfa urinya uko, ɛɛ zhɛ a sanga timenji iyimɛyɛ bali tu nkolo mi yebi uzụrụfa urinya uko no odubo tutono tu Samaria.

¹⁹Nazhɛ umadanga wa agwuma jishijɛ la agwuma na aka ata, bɛɛ hiɛŋ, Okwo AGWANGWAMA kepishinji azuba maa eshilo ngbi, i eri ya sha gana ata hŋ? Ge Elaisha hiɛŋ bụ, Bi zhɛ ba kwụba iŋ ne eshe bu, ama tuba bi zha shɛ ba ya iŋ o.

²⁰Gana ata ga kaa yaa njɛ bụ. Atwa ụshɛpwụ ata rikeci bu no odubo tutono tụ ụshɛpwụ ata, bee 'wi ga.