Read bassa SHƐRỤKWỤKWỤ SHI HIIŊ 10 Bible Online

SHƐRỤKWỤKWỤ SHI HIIŊ 10 - bassa bible

SHƐRỤKWỤKWỤ SHI HIIŊ 10

¹Na aka ga ibɛ Afilistia sukakanɛ atwa Isrɛl nu ujasa; ama atwa Isrɛl gezhigeni aŋ. Aa kwụnɛ atwa Isrɛl duwa ni Ishɛmɛ Gilboa.

²Ejeshi Afilistia urigeni aŋ tebiye, ee jiteni Soul keeni miaụŋ mu bwa me eyi, aa kwụnɛ Jonatan, na Abinadab keeni Malkishua

³Ujasa ata vwengengeni Soul eshe tebiye, ibɛ po ekeri a'inla gwụcanjɛ bụ tebiye na a'inla.

⁴Go Soul hiɛŋ bụtụ na 'waŋnanɛ bụ i'wɛŋnɛ ujasa, Hwucice utokwobi bu ma n kwụnɛ, iwɛ maa kede Afilistia ga jeji shi teleyi e n jiteni maa a n njɛ hwayɛ ụpụrụsa o. Ama inyɛsɛ shɛ bu'waŋnɛ ata bi i'wɛŋnɛ ibwɛ tebiye, ibɛ po baa lacɛ. Nazhɛ go Soul shɛnjɛ utokwobi ubwa ukanyi ubwa, bee leyiteni uŋ.

⁵Aka na ta bu'waŋnɛ-bi-i'wɛŋnɛ ibwɛ kwụbɛ maa go Soul 'wi, bee leyiteni du utokwobi ubwa, bee 'wi.

⁶Gabata go Soul na miaụŋ mu bwa me eyi mu tatụ e 'wi. Ibɛ du po atwa ihwɛ ibwɛ hwɛɛ e 'wi.

⁷Aka na ta atwa Isrɛl elele a na jɛjɛ nu ulomu[24] kwụbɛ maa ejeshi Isrɛl gezhiji, aa kwụnɛ du kaa Soul na miaụŋ mu bwa, ee gezheji du ee genji ashɛpwụ ata aba. Nazhɛ Afilistia zhajɛ ee leshiji aŋ, aa gɛgajɛ.

⁸Ni iyi tuholo ujasa ata, nazhɛ Afilistia zhe maa e hwuceci i'wɛŋnɛ ya atwa ata ujasa yɛ, ee zhe tu n'wo ma ata Soul keeni miaụŋ mu bwa mi tilegeni ni Ishɛmɛ ɛtɛ Gilboa.

⁹Ee mwi uhiuhiu Soul, ee hwuceci i'wɛŋnɛ ibwɛ ujasa, Afilistia tumwanganɛ tutumwa nụ ụshɛpwụ maa e mbishe tatuwa ta aba, ta atwa aba, unabarɛ ata ubiye.

¹⁰Ee tileni i'wɛŋnɛ ibwɛ ujasa ni isume tuwa ta aba ike, ee sweci uhiuhiu ubwa ni isume tuwa ta aba, tu gata ɛɛ hiɛŋ, Dagon.

¹¹Aka na ta atwa na jɛjɛ ni Jabɛsh na namɛ ni Giliad hwụjɛ iyi nɛ Afilistia njɛ Soul,

¹²ibɛ po etwenyi na eri a nda teleyi na amɛ aba zhe ee suje n'wo ma ata Soul na miaụŋ mu bwa mu tatụ, ee jiye nu Jabɛsh. Ee ni aŋ apata nu ucilo ukpekpeshi, aa njɛ ezumi ijitɛ icenje.

¹³Go Soul 'wi iwɛnɛ baa shanɛ shɛ AGWANGWAMA bụtụ bɛ tɛcara, bu untanganɛ shɛ unu na AGWANGWAMA peni bu o. Bi zhegeni la atwa e'uye maa o sokono bu uhwaŋna,

¹⁴bee genji AGWANGWAMA tizhagana. Ibɛ po AGWANGWAMA kwụnɛ bụ, bee shepi cɛnjɛ-ta-tugwama tu bwa bee utegeni Devid yɛu Jɛsi.