Read bassa SHƐRỤKWỤKWỤ SHI HIIŊ 11 Bible Online

SHƐRỤKWỤKWỤ SHI HIIŊ 11 - bassa bible

SHƐRỤKWỤKWỤ SHI HIIŊ 11

¹Atwa Isrɛl hwɛɛ zhegeni Devid ni Hibron, ɛɛ hiɛŋ bụ, Tɛ shɛ tu'waba tu ko keeni mehieŋ mu ko na bụ.

²Aka na tu go Soul ta shɛ la agwuma tu, gabụ, ba 'yagaga atwa ga Isrɛl nu ujasa, nazhɛ du kaa AGWANGWAMA na shɛ Agwatana bụ ubu shileni-unu maa gabụ bi zhɛ ba sha hwuŋ bi'iywa ba atwa ubwa; ɛbi zhɛ du kaa ba sha uhiu wa aba.

³Aka na tu n-nyarɛ mi Isrɛl hwɛɛ mu zhaganɛ Devid ni Hibron. Baa twa-unu na aba, ee dudugeni bu manɛbɛ, ibɛ po baa yɛ tugwama ti Isrɛl, gana na ta AGWANGWAMA shilwo la unu tedure na Samuɛl.

⁴Ge Devid na atwa Isrɛl hwɛɛ zhe aa sukakanɛ atwa na jɛjɛ nu Jɛrusalɛm nu ujasa. Ɛ tɛ hiɛŋ la Jɛrusalɛm maa Jɛbus na aka ata. Atwa na jɛjɛ la na cɛnjɛ ta ata hiiŋ, a ta jɛjɛ na tuba.

⁵Ɛjɛbus ata mbishi Devid, ɛɛ hiɛŋ, Bi eri shi kwukwuŋ be teni amɛ ụshɛpwụ ga. Ama ge Devid kaa eri bee leshiji Zayon, ti ikepi ibwɛ, ibɛ po ɛɛ hiɛŋ uŋ ya maa Ụshɛpwụ Devid.

⁶Ge Devid hiɛŋ, Bụtụ be elele na eri, uhwuri umbe, ụ kwụnɛ bụtụ hiiŋ na amɛ atwa ga Jɛbus, ubwa zhɛ ba sha uhiu we eberezhe ejeshi! Go Joab na ɛɛ hiɛŋ bino bwa gɛ Zɛruwia hwuri umbe, baa kwụnɛ bụtụ hiiŋ na amɛ Ɛjɛbus ata, ibɛ po baa shɛ ga uberezhe we ejeshi ata.

⁷Iwɛnɛ ti ge Devid zhe baa jɛjɛ ni ikepi ɛtɛ, ibɛ po ɛɛ hiɛŋ iŋ ya maa Ụshɛpwụ Devid.

⁸Bee keeni ụshɛpwụ ata tuhoricingo, boo rungwutwonu ikepi ɛtɛ ibwɛ na tuma. Go Joab tuba meeneni geri ata vwɛ nu ụshɛpwụ ata.

⁹Ge Devid ba kaana gu ukpahiɛŋ ti'yaga, iwɛnɛ ta AGWANGWAMA na Hwuri Kpaaŋ namɛ nu bwa.

¹⁰Nzeci me ejeshi Devid a na beni urishi a na aa rɛtanjɛ epe, medenji atwa Isrɛl a na vwɛ. E mbiyeni bu maa ya tugwama gana na ta AGWANGWAMA shilwo la unu, aa njɛ kaa maa ga cɛnjɛ-ta-tugwama tu bwa ti 'yaga ukpahiŋ.

¹¹Bụtụ bi hiiŋ i shɛ ga Jashobiam, na banɛ nu umwamwa Hakmon, ubwa shɛ Iyɛri ye ejeshi ata atatụ,[25] a na beni urishi. Ubwa jeshi atwa kpakwụ-ni-dipi-yebi, baa kwụnɛ aŋ hwɛɛ na aka ata oko ni isɛnu ibwɛ ibɛbɛ.

¹²Bụtụ na 'wa bụ na amɛ ehiu ata atatụ i shɛ gɛ Ɛleaza yɛu Dodo, na banɛ nu umwamwa Aho.

¹³Bu namba la ne Devid nu Pas-damim, na aka na ta Afilistia ụlwatagwụ iwɛ ujasa. Cɛnjɛ tu ko tu namba apata tu na iyimɛyɛ bali barɛ, apata atwa ata gezhigeni Afilistia.

¹⁴Ibɛ po bee[26] shikeni na atwa ubwa na ashashɛ itimɛ ɛtɛ dimi, ee jeshi Afilistia. AGWANGWAMA kaa lasagwụ aŋ tụlasụ tụ 'wụtụ 'wụtụ.

¹⁵Atwa atatụ na amɛ ehiu talacɛ, zhe pi Devid nu uparatayɛ ata namɛ to dongonu ụpangwụ Adulam. Na aka ata du ibɛ ejeshi Afilistia jwe ugba wa aba nu ulomu Refaim.

¹⁶Na aka ata ge Devid namɛ ni ikepi ɛtɛ 'yajɛ ikɛnyi. Urubwo wa Afilistia zhe tuba ee leshegeji Bɛtlɛhɛm.

¹⁷Ge Devid ba jala meni, bɛɛ hiɛŋ, Bụtụ bu ko kiri ga ma salanɛ meni nu u'ibwa ata namɛ no odubo Bɛtlɛhɛm, N nga swa.

¹⁸Nazhɛ ejeshi ata ikɛnyi atatụ teni ugba we ejeshi Afilistia pwaa, aa salanɛ Devid meni nu u'ibwa ata. Ama bu swe shi mu o, bee shepi mu baa 'wanjɛ AGWANGWAMA.

¹⁹Bɛɛ hiɛŋ, Kede Agwatana leni maa Ma swa mu o! I zhɛ ya sha gana maa mehieŋ me etwenyi ga teni tu'wo Ngee swe! Iwɛnɛ te e teni tu'wo nazhɛ aa sarɛ mụ. Ibɛ po bee genji mu tuswa. Teleyi tu na ejeshi ata urishi atatụ njɛ ta.

²⁰Yɛu-bino Joab ga Abishai, ubwa shɛ uhiu we ejeshi ata talacɛ a na beni du urishi. Ubwa jeshi atwa kpakwụ-ni-dipi-yebi ni isɛnu ibwɛ, baa kwụnɛ aŋ hwɛɛ, ibɛ po bee beni ya urishi na amɛ ejeshi ata talacɛ.

²¹Ubwa beni urishi uhwuri atwa vwɛ na amɛ ejeshi ata urishi talacɛ. Ibɛ po baa shɛ uhiu wa aba, ama tuba bi te ci shi ejeshi ata atatụ nu urishi tubana o.

²²Gɛ Bɛnaya yɛu Jehoiyada na banɛ nu Kabziɛl, bɛ shɛ du bijeshi bu urishi. Bu ndanjɛ teleyi tụ 'wụtụ tu ufwugwo, ta tụkwụna tu na baa kwụnɛ ejeshi oko a'wụtụ eyebi a na shɛ Amoab. Bi zhe la du nu ugodo, bɛɛ kwunɛ bizeci nụ ụjita na ofwo lemi cwii.

²³Ubwa du kwụnɛ butubwenyi bu ko bi Ijipti na gembi tebiye, ụnjɛswa ubwa ụ shɛ agba bụtụ oko na ashashɛ, na 'waŋnɛ du kaa isɛnu ike nɛ i ci ga uzhibi ụ'wụ'wụ na oo zwono tugwuno. Gɛ Bɛnaya sukakanɛ bụ ne bidingbengbere, bee leshiji isɛnu bụtụ ata bi Ijipti ni i'ɛlɛ ibwɛ, baa kwụnɛ bụ ni isɛnu ikɛnyi ibwɛ.

²⁴Teleyi tu na gɛ Bɛnaya yɛu Jehoiyada njɛ upo baa shɛ bụtụ bu ko na amɛ atwa ata urishi atatụ ta.

²⁵Bi beni urishi ne ejeshi ata talacɛ, ama tuba a rɛcɛ shɛ bụ na atwa ata atatụ o. Ibɛ po ge Devid njɛ bụ uhiu wa atwa na a 'yaka bụ.

²⁶Ejeshi oko a na beni swooŋ ni iyi tɛnda na: Ga Asahɛl yɛu-bino Joab, gɛ Ɛlhanan yɛu Dodo, na banɛ Bɛtlɛhɛm,

²⁷ga Shamot na banɛ nu Haro, ne Helɛz na banɛ ni Pelon,

²⁸ge Ira yɛu Ikɛsh na banɛ ni Tekoa, na Abiɛzɛ na banɛ nu Anatot,

²⁹ge Sibekai na banɛ nu Husha, ne Ilai na banɛ nu Aho.

³⁰Ga Maharai na banɛ ni Netofa, ne Helɛd yɛu Bɛana na banɛ du ni Netofa,

³¹ge Itai yɛu Ribai na banɛ ni Gibia na ashɛpwụ Bɛnjamin, nɛ Bɛnaya na banɛ ni Piraton,

³²go Hurai na banɛ nu ulomu na dongonu Geash, na Abiel na banɛ na Abat,

³³ga Azmavɛt na banɛ nu Baharum, nɛ Ɛliaba na banɛ nu Shabon,

³⁴Miaụŋ-me-eyi mu Hashɛm na banɛ ni Gizon, no Jonatan yɛu Shagi na banɛ nu Hara,

³⁵ga Ahiam yɛu Saka na banɛ nu Hara nɛ Ɛlifal yɛu U,

³⁶ge Hifɛ na banɛ ni Mɛkɛrat, na Ahija na banɛ ni Pilon,

³⁷ge Hezro na banɛ nu Kamɛl, ne Nearai yɛu Ɛzbai,

³⁸go Joɛl yɛu-bino Natan, ne Mibha yɛu Hagri,

³⁹gɛ Zɛlɛk na shɛ Bu'amon ne Neharai na banɛ ni Birot, ubwa ba 'waŋnana Joab yɛu Zɛruwia i'wɛŋnɛ ujasa,

⁴⁰ge Ira na banɛ ni Itra, ne Gerɛb na banɛ ni It,

⁴¹go Uria na shɛ Bihɛt ne Zebad yɛu Alai,

⁴²ga Adina yɛu Shiza na shɛ udenji Rubɛn, ubwa du shɛ uhiu udenji wa ata Rubɛn. Bi 'yajɛ du ejeshi talacɛ a na baa untanganɛ,

⁴³ga Hanan yɛu Meaka, no Joshafat na banɛ ni Mitin,

⁴⁴go Uzia na banɛ na Ashitera, na Shama keeni Jeiyɛl miaụŋ mu Hotam a na banɛ na Aroe,

⁴⁵ge Jediayɛl yɛu Shimri, ni yɛu-bino bwa go Joha na banɛ ni Tiza,

⁴⁶gɛ Ɛliel na banɛ nu Mahav, ne Jeribai keeni Joshavia miaụŋ mi Ɛlineam, ne Itima na banɛ nu Moab.

⁴⁷Gɛ Ɛliel no Obɛd keeni Jasiɛl na banɛ ni Mezoba.