Read bassa SHƐRỤKWỤKWỤ SHI HIIŊ 15 Bible Online

SHƐRỤKWỤKWỤ SHI HIIŊ 15 - bassa bible

SHƐRỤKWỤKWỤ SHI HIIŊ 15

¹Na aba na ti ge Devid meme meni shimwono nụ ụshɛpwụ ata ụ'wụtụ, ɛɛ hiɛŋ, Ụshɛpwu Devid. Baa imanganjɛ du ofwo oko bee teni Ikpɛtɛ ɛtɛ Unu-tutwa udulo.

²Nazhɛ ge Devid hiɛŋ, I zasa bụtụ be elele i shɛ ba 'waŋnɛ Ikpɛtɛ ɛtɛ Unu-tutwa o, semi Alivai kiri. Iwɛnɛ po aba la AGWANGWAMA teri maa a na 'waŋna iŋ maa du a na ndana bụ iyi unyizo-nom.

³Ge Devid suyanɛ atwa Isrɛl kpaaŋ maa a ulwa nu Jɛrusalɛm maa a shapɛ Ikpɛtɛ ya AGWANGWAMA no ofwo ata baa imanganɛ iŋ.

⁴Nazhɛ baa tumwanɛ atwa umwamwa Aron keeni Alivai.

⁵Go Uriɛl na shɛ uhiu, na banɛ nu umwamwa Kohat zhajɛ na miaụŋ-mo-bino mu bwa atwa dipi-yebi-nu-woshi (120).

⁶Ga Asaya na shɛ uhiu du suje miaụŋ-mo-bino mu bwa atwa kpakwụ-nu-woshi (220), a na banɛ nu umwamwa Merari,

⁷Go Joɛl na shɛ uhiu, suje miaụŋ-mo-bino mu bwa atwa dipi-yebi-nu-talacɛ (130), a na banɛ nu umwamwa Gɛshom.

⁸Ge Shemaya na shɛ uhiu, suje miaụŋ-mo-bino mu bwa atwa kpakwụ (200), a na banɛ nu umwamwa Ɛlizafan.

⁹Gɛ Ɛliɛl na shɛ uhiu, suje miaụŋ-mo-bino mu bwa atwa dupu-nu-talacɛ (80), a na banɛ nu umwamwa Hibron.

¹⁰Ga Aminadab na shɛ uhiu, suje miaụŋ-mo-bino mu bwa atwa dipi-yebi-ne-eshe-umpwa-na-atwa-eyebi (112), a na banɛ nu umwamwa Uziɛl.

¹¹Ge Devid suyanɛ onongbo: ga Zadok, na Abiata keeni Alivai ecihiŋ: go Uziɛl, na Asaya, no Joɛl, ne Shemaya, nɛ Ɛliɛl keeni Aminadab.

¹²Bɛɛ hiɛŋ Alivai ata, Ahiɛba hiɛ shɛ ehwurembe amwamwa Alivai. Mama njɛ ma shɛshɛshɛ ne tijilo hwɛɛ ta anya hiŋ, iwɛ maa hiɛ shapɛ Ikpɛtɛ ya AGWANGWAMA na shɛ Agwatana Isrɛl maa i zhe no ofwo na Ngaa imanganɛ iŋ.

¹³Iwɛnɛ ahiɛ zasaba la na tɛshapɛ ti bɛ na aka ihiiŋ iwɛbɛ po isɛbwɛ ya AGWANGWAMA na shɛ Agwatana tu bwadụ pu tu, iwɛnɛ eti mepi shi gana na ga shɛ maa ta nda iwɛ ibɛ.

¹⁴Go onongbo na Alivai mama njɛ tijilo hwuwayɛ go, maa a shapɛ Ikpɛtɛ ɛtɛ ya AGWANGWAMA na shɛ Agwatana Isrɛl.

¹⁵Ni imbele Alivai 'waŋnɛ iŋ no shitutu sha aba gana na ta AGWANGWAMA peni aŋ la unu tedure no Moses.

¹⁶Ge Devid hiɛŋ ehwurembe Alivai maa ge e eni atwa vwɛ aba maa a na zunga shɛzunga, maa atwa oko 'wa iŋ ni i'nyemi 'nyemi, na shiduma, no shikoko na apalụ.

¹⁷Ibɛ po Alivai teri Heman yɛu Joɛl, na miaụŋ-mo-bino mu bwa, ga Asaf yɛu Bɛrɛkia keeni Ɛtan yɛu Kushaya na shɛ udenji umwamwa Merari,

¹⁸ee medenji aŋ miaụŋ-mo-bino ma aba mu na mu 'wa aŋ no shihwolu ti'yaga, aba shɛ: gɛ Zɛkaria, ne Jeaziɛl, ne Shemiramot, ne Jehiɛl, no Uni, nɛ Ɛliab, nɛ Bɛnaya, ne Measeiya, na Matitia, nɛ Ɛlifɛlɛhu, ne Mikneiya, no Obɛd-idụm keeni Jeiyɛl na shɛ bi'iywa bo odubo.

¹⁹Azụnjɛ na a 'nyama i'nyemi 'nyemi na: ge Heman, na Asaf keeni Itan, aba a 'nyama apalụ ata ɛtumburɛ.

²⁰Gɛ Zɛkaria, na Aziɛl, nɛ emiramot, nɛ Jɛhiɛl, no Uni, nɛ Ɛliab, ne Measeiya keeni Bɛnaya, aba a 'nyama shiduma sha ata u'wo shɛba namɛ dumo dumo,

²¹ga Matitia, nɛ Ɛlifɛlɛhu, ne Miknɛiya, na Azazaya no Obɛd-idụm, ne Jeiyɛl keeni Azazai, aba a 'yagaga e'nyemi itɛ, nu gana na ti ge Sheminit bo sokokono aŋ.

²²Ee teri Kenania maa ngbaraka azụnjɛ Alivai, iwɛnɛ tu baa shɛ bizhɛ ba azunga.

²³Ee teri ata Ɛlkana abana Bɛrɛkia maa a shɛ angbaracɛ odubo ata Ikpɛtɛ ɛtɛ Unu-tutwa shi.

²⁴Ee teri onongbo: ge Shebania, no Joshafat, ne Nitanɛl, na Amasai, nɛ Zɛkaria, nɛ Bɛnaya, keeni Ɛliɛzɛ, maa o no hwulo akakacɛ no ofwo ata Ikpɛtɛ ya Agwatana shi. Go Obɛd-idụm, nɛ Jɛhia, a shɛ du angbaracɛ odubo ata Ikpɛtɛ ɛtɛ shi.

²⁵Ibɛ po ge Devid nu n-nyarɛ mi Isrɛl keeni eberezhe ejeshi igbɛɛ igbɛɛ zhe ni ihwɛ Obɛd-idụm maa a shapɛ Ikpɛtɛ ɛtɛ Unu-tutwa ya AGWANGWAMA, nu unyasa ụ'wụtụ tubwada.

²⁶Iwɛnɛ ta Agwatana o mbiyono Alivai na 'waŋnɛ Ikpɛtɛ ɛtɛ Unu-tutwa ya AGWANGWAMA, ibɛ po oo to ụrụpɛ ni inɛ ye eyi icenje keeni adagba ecenje.

²⁷Ge Devid urigeni utogwo ilinɛn ɛtɛ aa nɛ tanɛ tanɛ, ta Alivai ata 'waŋnɛ Ikpɛtɛ ɛtɛ, ta azụnjɛ keeni e'nyemi hwɛɛ, ti ge Kenania na shɛ buhwuri ba aba bu umbe na azunga. Ge Devid hwuŋteni du idikɛ ɛtɛ tikpɛngbɛ aa patana na agba, ɛɛ hiɛŋ Efod.

²⁸Gana atwa Isrɛl kpaaŋ shapɛ Ikpɛtɛ ɛtɛ Unu-tutwa ya AGWANGWAMA nu n'ungwa mu unyasa keeni ihwure hwure ya akakacɛ, na shihiụaŋ sha adagba, na apalụ ti'nyama, na shiduma keeni itɛ ti'nyama ta.

²⁹Gana na ti Ikpɛtɛ ɛtɛ Unu-tutwa ya AGWANGWAMA ci ụshɛpwụ ata Devid. Ga Maikal yɛu-yo-o Soul hikeni ụgbahwụ, baa kwụbɛ ta agwuma Devid a bwada unyasa, baa hiɛba tɛhiɛba. Biyikwo ata ngbaracɛ bụ cwɛŋ bana na amɛ ubwa.