Read bassa SHƐRỤKWỤKWỤ SHI HIIŊ 19 Bible Online

SHƐRỤKWỤKWỤ SHI HIIŊ 19 - bassa bible

SHƐRỤKWỤKWỤ SHI HIIŊ 19

¹Ti yee ci aka oko na ga Nahash agwuma A'amon 'wi, ibɛ yɛu ibwɛ ye eyi yɛ tugwama no ohwolu ubwa.

²Ge Devid hiɛŋ, N zhɛ ma nda Hanun uwebiye gana na te bishi bwa ga Nahash ma n nda la uwebiye. Ibɛ po ge Devid tumwanɛ atwa maa a 'walụ bụ no tu'wo te bishi bwa. Aka na te e ci A'amon, ee zhe no ofwo agwuma Hanun,

³Ama ehwurembe A'amon hiɛŋ Hanun, Bi heŋshi ree maa iwɛ a'walụ tu'wo te bishi bu ge Devid tumwanɛ atwa ga? Bi heŋshi shi ree maa bu tumwanɛ aŋ maa e hikekeni cɛnjɛ tu ga, maa e yeleji tu, maa lashɛga tụ?

⁴Iwɛ ecilo ata ga Hanun 'imɛ miaụŋ-mu-ugondu Devid, baa 'nyanjɛ aŋ, bee dwetweji otogwo aba ne eririri shɛpindwa sha aba, nazhɛ bee genji aŋ ee hwuri.

⁵Ibɛ po ezuye shɛ aŋ ya tebiye, e eri shi e jiye o. Aka na ta agwuma Devid hwụjɛ iyi nɛ jiteni aŋ, baa tumwanɛ atumwa maa ge mbishi aŋ, maa agwuma hiɛŋ, Kwu ma tugwo ni Jɛriko i ci aka na tizholu ti hiŋ tu sabajɛ.

⁶Aka na A'amon mepi maa o to Devid nu uwuru ni iyi nɛ aa njɛ. Ibɛ po ga Hanun na A'amon zhe ɛɛ njɛ atwa Aram a na namɛ nu Naharaim na atwa Aram Meaka keeni atwa Zoba ụgwụ atalɛnt azụrụfa akpakwụ-a-ta (1,000) maa a panɛ aŋ ihɛŋtu ujasa keeni asụcɛ ibɛ.

⁷Ihɛŋtu ɛtɛ ujasa igbɛɛ-umpwa-ni-bɛ-icihiŋ (32,000) keeni ejeshi a na agwuma Meaka panɛ aŋ ụgwụ, zhajɛ ee jwe ugba wa aba ni Mɛdiba. A'amon du bananjɛ na ashɛpwụ aba a'wụtụ, ɛɛ mɛmɛ imɛ iwɛ ujasa.

⁸Aka na ta agwuma Devid hwụjɛ ijɛ ya nda kpaaŋ, baa tumwanɛ Joab ne ejeshi ata ubwa kpaaŋ.

⁹Ibɛ po ejeshi A'amon zhe ee keri bụkpagwụ ba aba bu ujasa, no odubo Raba, ụshɛpwụ ata u'wụtụ, ubwa shɛ uhiu wa ashɛpwụ aba. Shɛgwuma shɛ na shɛ zhajɛ, shɛ mama namanjɛ no ofwo tukpataa na cɛnjɛ ta ata.

¹⁰Aka na tu go Joab kwụbɛ maa ejeshi atwa i'ime ibwɛ namɛ tu umbe ubwa, te ekwunyi ubwa, ibɛ po boo dwotwogonu ejeshi Isrɛl, bee suji anaa na mama 'yajɛ maa a na jasa ujasa na Asiria.

¹¹Bee suji ejeshi ata vwɛ, bee utegeni yɛu-bino bwa ga Abishai maa sha uberezhe wa aba maa e jeshi A'amon.

¹²Go Joab hiɛŋ bụ, Yaa shɛ abụ kwụbɛ hwayɛ maa Asiria zhɛ ma n lasụ, zhajɛ maa m mbiyeni. Yaa shɛ Ngaa kwụbɛ du kaa maa A'amon zhɛ ma bụ lasụ, N zhɛ ma zhajɛ maa Mo bu mbiyono.

¹³'Yaga ikɛnyi keeni ohwulu tishito, maa ti jeshi ujasa ne teleyi iwɛ atwa tu keeni iwɛ ashɛpwụ a'wụtụ Agwatana tu. Ga Agwatana njɛ iyi nɛ kwụlanɛ bụ.

¹⁴Go Joab na atwa ubwa keeni izhɛ ee tefuleji ejeshi Asiria, aa bwadụ ee gezhiji.

¹⁵Aka na te ejeshi A'amon kwụbɛ maa ejeshi Asiria gezheji, aa shɛdɛnjɛ du, ee gezhigeni Abishai yɛu-bino Joab, ee teni nụ ụshɛpwụ. Nazhɛ go Joab gwuri nu Jɛrusalɛm.

¹⁶Aka na ta Asiria kwụbɛ maa atwa Isrɛl lasụ aŋ, ee zhe e suje ejeshi na cɛnjɛ ta Asiria hileniye Urefu Yufretis aa njɛ Shofak na shɛ uberezhe we ejeshi Hadadɛzɛ uberezhe wa aba.

¹⁷Aka na agwuma Devid hwụjɛ iŋ, boo sotulonu ejeshi Isrɛl hwɛɛ urubwo uko, ee keshi Urefu Jodan, ee keri bụkpangwụ ba aba maa e tefuleji ejeshi Asiria. Ee kwuni ujasa tujasa,

¹⁸ibɛ ejeshi Isrɛl unzhi ejeshi Asiria. Ge Devid na atwa ubwa kwụnɛ asụcɛ ihɛntu ujasa Asiria igbɛɛ-itɛtu-na-akpakwụ-a-ta (7,000), keeni ejeshi ivwunɛ igbɛɛ-woshi (40,000). Aa kwụnɛ du uberezhe ata wa Asiria go Shofak.

¹⁹Aka na ta shɛgwuma shɛ na shɛ ga namɛ na Hadadɛzɛ shɛ kwụbɛ maa atwa Isrɛl lasụ aŋ, ee zhegeni agwuma Devid maa a kwunanjɛ iyi elele maa a shɛ yɛ atwa amɛ-olom, baa 'yajɛ aŋ ya. Asiria leni shi ya kwukwuŋ maa e mbiyeni A'amon.