Read bassa SHƐRỤKWỤKWỤ SHI HIIŊ 28 Bible Online

SHƐRỤKWỤKWỤ SHI HIIŊ 28 - bassa bible

SHƐRỤKWỤKWỤ SHI HIIŊ 28

¹Ge Devid suyanɛ anjɛ-ugondu a na untanganɛ shihwolu ni Isrɛl hwɛɛ keeni atwa shihwolu sha alamụ maa ga ulwa nu Jɛrusalɛm. Ibɛ po anjɛ-ugondu cɛnjɛ-ta-tugwama ta ata, te ehiu amwamwa, te ehikekeni i'wɛŋnɛ keeni iyimabiga ya agwuma, ti inɛ miaụŋ mu bwa, ta atwa na a nda ugondu nu umwamwa wa agwuma hwɛɛ, te eberezhe ejeshi igbɛɛ igbɛɛ, te eberezhe ejeshi akpakwụ akpakwụ keeni atwa na aa rɛcɛ nu ukpahiŋ keeni atwa elele na beni urishi ne eshe-hwoo nu ujasa.

²Nazhɛ agwuma Devid ishijɛ bee shikeni nu umbe wa aba, baa jɛmɛ n-ndumwa na aba, bɛɛ hiɛŋ, Shɛlaga maa ahiɛba miaụŋ-mo-bino mi keeni atwa cɛnjɛ ti mi. Ma jala la maa Ma mana Ikpɛtɛ Unu-tutwa ya AGWANGWAMA ofwo na yɛɛ zhɛ yo sho nom, keeni udusa na maa Agwatana tu na patangana ɛvwɛvwɛjɛ ubwa. N imwangwa maa ma ma uŋ.

³Ama Agwatana n hiɛŋ, Shɛ gabụ bi zhɛ bu ma mana umwono ata o, iwɛnɛ abɛ shɛ bijeshi bụ 'wụtụ na kaa dudwogwo mehieŋ ma atwa ofwugwo.

⁴Ama okwo ti yaa shɛ bwonu, AGWANGWAMA na shɛ Agwatana Isrɛl n teri keeni umwamwa bishi mi hwɛɛ maa Ma sha agwuma atwa Isrɛl unyizo-nom. Bee teri ụlamụ Juda maa ga a'yagajɛ na banɛ nu bwa. Bee teri umwamwa bishi mi na amɛ ụlamụ ata Juda. Ukwulana ubwa yaa shɛ maa ma n tala na ashashɛ miaụŋ-me-eyi me bishi mi maa ma m pana tugwama ti Isrɛl hwɛɛ.

⁵Na amɛ miaụŋ-me-eyi mu ufwugwo mu na AGWANGWAMA m peni hwɛɛ, go Sụlụmụn bee teri maa gɛga ni idwɛtwɛ cɛnjɛ-ta-tugwama tu bwa maa ba untangana atwa Isrɛl.

⁶AGWANGWAMA n hiɛŋ, Yɛu bu ye eyi go Sụlụmụn, ubwa zhɛ ma m mana umwono mu keeni okpogwu umwono ata. N teri bu maa sha yɛu mi, Ngɛɛ zhɛ du kaa ma sha bishi bwa.

⁷N zhɛ mo shikicingo cɛnjɛ-ta-tugwama tu bwa unyizo-nom ti yaa shɛ baa untanganɛ onu mi tụpana keeni andwa mi a na Ngee peni bu gana na tu baa nda hwuwayɛ.

⁸Ibɛ po Ama hiɛ tɛtagana-unu ne eshe atwa Isrɛl kpaaŋ keeni tusotulonu ta atwa AGWANGWAMA keeni tuhwuga ta Agwatana tu. N hi hiɛŋ, Na nda ma iyi elele nɛ AGWANGWAMA na shɛ Agwatana tu iti peni-unu ibɛ, iwɛ maa cɛnjɛ ti ga ti biye tɛ shɛ me ti hiŋ, maa du awaŋnɛ hiŋ na ihi 'wa ne ekwunyi a yɛ ogwu tuba ni i'ɛlɛ hiŋ unyizo-nom.

⁹Bɛɛ hiɛŋ Sụlụmụn, Ɛ-yɛu mi, bɛ shɛ ba mapa Agwatana shibi maa na ndana bụ iyi na amɛ bụ oko hwɛɛ, keeni tukwulangana ta ahaŋsa bụ. Iwɛnɛ po AGWANGWAMA ubwa ba dwalakaka iyi elele nɛ namɛ na amɛ bụtụ. Ubwa kaa mepi tuhaŋsa tu tu hwɛɛ keeni iyi nɛ utu kwụlanganɛ. Yaa shɛ ebi zhegeni bu, bi zhɛ ma bụ lashɛga, ama yaa shɛ abụ lacɛ bụ, bi zhɛ ma bụ ganga unyizo-nom.

¹⁰Bɛ shɛ ba mapa maa AGWANGWAMA ubu twolwo maa meni bu umwono na shɛ ohwolu tijilo. Hwuwayɛ go, nda ahaŋsa bụ oko maa shanɛ ikɛnyi maa njɛ ugondu ata.

¹¹Nazhɛ ge Devid peni yɛu ibwɛ go Sụlụmụn ti'imanganga ta tuma to shimwono sha ata hwɛɛ. To shimwono shi i'wɛŋnɛ tuzwono, ta ma shɛ shɛ azuba, to shigongo sha amɛ, keeni ofwo ata oo urugono iwɛwɛ ya atwa.

¹²Bee peni bu du ti'imanganga te elele tu na Mpiala mu zweni na ahaŋsa ubwa iwɛ okpogwu shimwono sha ata, to shimwono shɛ na shi rungwutwonu aŋ hwɛɛ, ta a na shimwono shi i'wɛŋnɛ umwono ata tuzwono, to shimwono sha aduciya umwono ata wa Agwatana, keeni shimwono sha aduciya iyi nɛ ee tileneni AGWANGWAMA swooŋ.

¹³Ge Devid du sekekeni bu gana na shɛ maa imanganga onongbo keeni Alivai keeni ugondu we elele na shɛ wa nda nu umwono ata wa AGWANGWAMA keeni i'wɛŋnɛ ye elele nɛ aa shɛ a nda uhwara ni ibɛ nu umwono ata.

¹⁴Bee peni aŋ ulumo wa azhɛnarɛya keeni azụrụfa na aa shɛ o sugo maa a njɛ i'wɛŋnɛ ɛtɛ tuswoswoswo iwɛ ugondu we elele na ụ shɛ wa nda ni iyi uhwugwa ya azhɛnarɛya keeni inɛ ya azụrụfa,

¹⁵tu ulumo wa azhɛnarɛya na ɛɛ zhɛ a nda eteburu-ụsụtụla keeni asụtụla aba azhɛnarɛya, tu ulumo wa azụrụfa na ɛɛ zhɛ a nda eteburu-ụsụtụla keeni asụtụla aba azụrụfa nu gana na tɛ ɛ zhɛ a nda uhwara nu uteburu ata ụsụtụla una una,

¹⁶tu ulumo wa azhɛnarɛya na ɛɛ zhɛ a nda uteburu we elele keeni una wa azụrụfa iwɛ maa a na patangana akara ata tijilo,

¹⁷tu ulumo wa azhɛnarɛya tụrụmbɛɛ a na aa shɛ o sugo maa a njɛ nkwoshi mu nsabwa, ta agbangbam keeni nkwodo, keeni nkwasha, keeni ulumo wa azụrụfa na aa shɛ a nda agbangbam azụrụfa elele,

¹⁸ta azhɛnarɛya na aa nyashɛnjɛ rụmbɛɛ a na aa shɛ o sugo maa a njɛ utukwu-ụrụpɛ na ɛɛ zhɛ no hwoŋzhingo iturɛre keeni anaa na ɛɛ zhɛ o sugo maa a njɛ ụhaŋtụ iwɛ iyi-uumwa ɛtɛ berishiji apiambɛ i urigeni Ikpɛtɛ ɛtɛ Unu-tutwa ya AGWANGWAMA.

¹⁹Ge Devid hiɛŋ, N 'nyeci ijɛ hwɛɛ gana na ti yaa banɛ ni i'ɛlɛ ya AGWANGWAMA ni ikɛnyi ibwɛ yee n ci maa Ma nda uŋ gana na ta ti'imanganga tu bwa tu namɛ hwɛɛ.

²⁰Nazhɛ ge Devid hiɛŋ yɛu ibwɛ go Sụlụmụn, Mama 'imɛ maa njɛ ahaŋsa bu oko. Kwuno ya ugondu ga, to lono maa iyi elele ubu ngwuricinji uŋ o. AGWANGWAMA na shɛ Agwatana mi zhɛ a nama na bụ. Bi zha shɛ ma bụ ganga o, ama dee bi zhɛ ba nama na bụ uuwa i ci aka na ebu hwuwi ugondu umwono ga u tɛzhɛba tu bwa tuma.

²¹Edingbe edingbe onongbo na Alivai a mama imwa iwɛ ugondu we elele na oo onuo aŋ nu umwono ata wa Agwatana. Egwoni ugondu i'ɛlɛ iyiri iyiri a mama 'imɛ maa e bi mbiyeni. Atwa ga kpaaŋ te ehwuri aba umbe ɛ zhɛ na hwuga-unu we elele na aba pana aŋ.