Read bassa SHƐRỤKWỤKWỤ SHI HIIŊ 29 Bible Online

SHƐRỤKWỤKWỤ SHI HIIŊ 29 - bassa bible

SHƐRỤKWỤKWỤ SHI HIIŊ 29

¹Nazhɛ agwuma Devid mbishi tu'ulwa ta ata hwɛɛ, bɛɛ hiɛŋ, Yɛu mi go Sụlụmụn, ubwa Agwatana teri, ama bu ta shɛ kaa yɛu nɛ ahaŋsa te ci shi. Ugondu ga u shiri kaa ụ shɛ ugondu ụ'wụtụ 'wụtụ, iwɛnɛ po umwono ga shɛ shɛ umwono bụtụ o, ama una wa AGWANGWAMA na shɛ Agwatana waa shɛ.

²N nduwa gana na Ngee eri Ngee peni azhɛnarɛya, iwɛ ugondu wa azhɛnarɛya, na azụrụfa, iwɛ ugondu wa azụrụfa tɛ ɛtumburɛ, iwɛ ugondu wɛ ɛtumburɛ, ta ashɛmbɛrɛ, iwɛ ugondu wa ashɛmbɛrɛ, ti i'wɛ'wɛ, iwɛ ugondu i'wɛ'wɛ, ta atayɛ onɛkis iwɛ tɛta na agba, na atayɛ ogwumishi keeni atayɛ meni mi iyiri swoswoswo, tɛ ɛzhɛtɛ a na gembi iwɛ umwono wa Agwatana mi.

³Na aba inɛ ɛtɛ hwɛɛ, M peni du azụrụfa na azhɛnarɛya na Ngaa 'yajɛ te gembi ni ikɛnyi mi duwa iwɛ tulubo tu na Ngee lubi Umwono wa Agwatana mi, ibɛ po Ngee peni iŋ iwɛ umwono tijilo wa Agwatana mi.

⁴M pwonuo atalɛnt azhɛnarɛya a na Ofi ugbaa-na-akpakwụ-a-ta, (3,000) ta azụrụfa na aa nyashɛnjɛ rụmbɛɛ, atalɛnt igbɛɛ-itɛtu-na-akpakwụ-a-ta (7,000) iwɛ maa e sweni ụdatụ umwono ata,

⁵tu ugondu wa azhɛnarɛya, tu ugondu wa azụrụfa keeni iyi elele nɛ egwoni ugondu i'ɛlɛ zhɛ a nda. Gaaba yaa kwụlanɛ hwuwayɛ go maa mama pana AGWANGWAMA keeni iyi nɛ baa 'yajɛ hwɛɛɛ?

⁶Nazhɛ atwa na shɛ ehiu amwamwa, na atwa na untanganɛ shihwolu na alamụ Isrɛl, ne eberezhe ejeshi igbɛɛ igbɛɛ ne eberezhe ejeshi akpakwụ akpakwụ, keeni anjɛ-ugondu a na a ngbaraka i'wɛŋnɛ ya agwuma, e leni maa e peni iyi nɛ aa 'yajɛ na tukwulangana.

⁷Iyi nɛ ee peni iwɛ ugondu Umwono ata wa Agwatana na: atalɛnt azhɛnarɛya igbɛɛ-itɛ (10,000), na atalɛnt azụrụfa igbɛɛ-itɛ (10,000), na atalɛnt ɛtumburɛ igbɛɛ-icinjishi (18,000), keeni atalɛnt ashɛmbɛrɛ igbɛɛ-dupu (100,000).

⁸Atwa na 'yajɛ atayɛ ogwumishi peni aŋ iwɛ uduciya Umwono ata wa Agwatana. Ge Jehiɛl Bilivai na banɛ nu umwamwa Gɛshom, ubwa ee utegeni iŋ hwɛɛ ibɛ.

⁹Atwa ga peni AGWANGWAMA iyi na tukwulangana tu na tu banɛ na shɛmɛ sha aba hwɛɛ. Shɛmɛ sha atwamwa shi lemi iwɛ upwaŋ ụ'wụtụ 'wụtụ na ee peni. Amɛ agwuma Devid du kaa lemi hwɛ hwɛɛ.

¹⁰Agwuma Devid shɛtanɛ AGWANGWAMA nu umbe tu'ulwa ta atwa ata kpaaŋ kpaaŋ, bɛɛ hiɛŋ, Oo AGWANGWAMA na shɛ Agwatana ugwunukwoshi tu ge Isrɛl, ga a na bụ shɛtana unyizo-nom, uuwa unyizo zhe gwure!

¹¹Gabụ bi gembi tebiye, gabụ kaa bi 'yajɛ ikɛnyi, gabụ kaa bi shini nụ ụjɛrụma keeni urishi, keeni igɛhi. Iyi elele nɛ namɛ na azuba, tu unyizo hwɛɛ, i shɛ inɛɛ bu, Gabụ kaa bɛ shɛ agwuma na hwuri hwɛɛ.

¹²No olugwo bu aduciya elele kpaaŋ a banɛ, ni ikɛnyi bu keeni ukpahiɛŋ bụ abụ untanganɛ iyi elele kpaaŋ. Gabụ kaa du bi eri bo gombicingo bụtụ, aba nda du kaa maa bụtụ ata 'yaga ikɛnyi.

¹³Agwatana tu, hwuwayɛ go, ta bụ 'walụ, ata shɛtana izeci ɛtɛ bu ụjɛrụma.

¹⁴Gaaba Ngaa shɛɛ, ataaba atwa mi shɛ maa ta ala tụpana iyi elele na tukwulangana gana gaa? Iyi elele kaa shɛ upwaŋ na banɛ no olugwo bu. Iyi nɛ shɛ inɛɛ bu, ibɛ eti bu gwuricingeni kwakwa sasana.

¹⁵Tɛ shɛ alashɛ keeni agaiŋ ne eshe bu, gana na ogwunukwoshi tu shɛ la. Ti eri shi ta banangana tu'wo, iwɛnɛ po ijitɛ tu i tunama na cɛnjɛ tu ga i shɛ ya gana uzhizhi na wa kashɛka.

¹⁶Oo AGWANGWAMA na shɛ Agwatana tu, iwɛ maa ta ma umwono maa ta muna izeci ɛtɛ bu tijilo ụjɛrụma upo etu suje uduciya ga. No olugwo bu kaa yaa banɛ kpaaŋ, gabụ du kaa bɛ 'yajɛ iŋ hwɛɛ.

¹⁷Agwatana mi, M mepi maa, gabụ ba manga ahaŋsa bụtụ be elele, amɛ bụ kaa o lomo na atwa tɛcara. Na tɛcara keeni tukwulangana na ahaŋsa oko Ngee bi peni ijɛ hwɛɛ, Ngaa kwụbɛ du kaa gana na ta atwa ga bụ a ulwa epe, ee bi peni apwaŋ nu unyasa.

¹⁸Oo AGWANGWAMA na shɛ Agwatana ogwunukwoshi tu, ga Abraham, na Azik keeni Isrɛl. Gabụ kaa bɛ njɛ maa tumama pana tu ga ti ikɛnyi tu nama na shɛmɛ sha atwa ga bụ; gabụ du kaa bɛ njɛ maa a shɛ atwa tɛcara aka elele.

¹⁹Pana yɛu mi go Sụlụmụn uzezeri na ahaŋsa ubwa hwɛɛ maa nda iyi elele nɛ ebi peni-unu ibɛ, na andwa bụ keeni tiseyida tụ bụ, maa ma bụ mana umwono ga na Ngaa imwangwangwa hwɛɛ.

²⁰Nazhɛ ge Devid hiɛŋ atwa tu'ulwa ta ata kpaaŋ, Shɛtana ma AGWANGWAMA na shɛ Agwatana hiŋ! Nazhɛ tu'ulwa ta ata kpaaŋ tɛ shɛtanɛ ga AGWANGWAMA na shɛ Agwatana ogwunukwoshi aba. Ee kwuzenji, ee peni AGWANGWAMA ụjɛrụma keeni agwuma.

²¹Ni iyi-tuholo, ee peni AGWANGWAMA arụpɛ, ee peni bu du arụpɛ tuhwoŋzhingo: ni inɛ ye eyi akpakaụ-a-ta, (1,000) oo to na adagba akpakwụ-a-ta, oo to du na agwụdụ o o akpakwụ-a-ta, medenji arụpɛ aba tuswa, keeni arụpɛ anya te gembi iwɛ atwa Isrɛl kpaaŋ.

²²A 'yajɛ unyasa ụ'wụtụ jita ata, gana na ta a yɛ ee swe na agba AGWANGWAMA. Aa dumananɛ na aka yebi maa go Sụlụmụn yɛu Devid, ubwa shɛ agwuma. Ee dudugeni bu manɛbɛ ni izeci ya AGWANGWAMA maa ubwa shɛ agwuma aba, ga Zadok tuba ubwa shɛ bunongbo.

²³Gana go Sụlụmụn teni unu bishi bwa ge Devid, bee munji idwɛtwɛ ɛtɛ AGWANGWAMA shikicinji ta. Bɛ shɛ agwuma na yaa zhɛmanɛ tebiye, alamụ Isrɛl kpaaŋ a hwụjɛ-unu ubwa.

²⁴Anjɛ-ugondu a na untanganɛ shihwolu hwɛɛ, te ejeshi keeni miaụŋ-me-eyi ma Agwuma Devid mu vwɛ kpaaŋ shiri-unu maa ɛ zhɛ a namana agwuma Sụlụmụn na tɛcara keeni ne timeme zucinje.

²⁵AGWANGWAMA gembicinji Sụlụmụn ne eshe atwa Isrɛl hwɛɛ, baa njɛ maa ga ụjɛrụma ubwa uhwuri una wa agwuma elele na yɛwa la tugwama ni Isrɛl.

²⁶Gana ge Devid yɛu Jɛsi yɛ tugwama ta atwa Isrɛl hwɛɛ ta.

²⁷Bɛ yɛ tugwama tu bwa shiywa buhanda. Bɛ yɛ tugwama ni Hibron shiywa shi cenje, baa yɛ nu Jɛrusalɛm shiywa talacɛ-na-shɛba-shɛ-tatụ.

²⁸Bɛ injɛ, shiywa shɛ bwa shɛ ulwa nazhɛ bee 'wi. Bɛ shɛ bɛzhɛgba, baa shɛ bụtụ na atwa mụnɛ ụjɛrụma. Yɛu ibwɛ go Sụlụmụn, ubwa yɛ tugwama tu bwa.

²⁹Iyi nɛ Agwuma Devid ndanjɛ na tugwama tu bwa, te kwuni nu umozhigo tutu ukwunanga, i 'nyeci na Shɛrụkwụkwụ sha bụkwụbɛ-bu-uhwaŋna ga Samuɛl, keeni Shɛrụkwụkwụ she bigesere ga Natan, keeni Shɛrụkwụkwụ sha bụkwụbɛ-bu-uhwaŋna ga Gad,

³⁰medenji tugwama tu bwa kpaaŋ, nu ukpahiɛŋ na baa 'yajɛ keeni iyi elele nɛ vwutengeni bu kpaaŋ, ta atwa Isrɛl keeni cɛnjɛ-ta-tugwama tu na tu rungwutwonu aŋ kpaaŋ.