Read bassa SHƐRỤKWỤKWỤ SHI HIIŊ 5 Bible Online

SHƐRỤKWỤKWỤ SHI HIIŊ 5 - bassa bible

SHƐRỤKWỤKWỤ SHI HIIŊ 5

¹Umwamwa Rubɛn[13] na shɛ yɛu Isrɛl ye eyi ihiiŋ na. A bɛzhɛnjɛ tụ'wụtụ tu bwa ta tumata ti hiiŋ tu na bee ge hwure la umbe, ee peteni ya miaụŋ-me-eyi mu Josɛf na shɛ du yɛu-ye-eyi Isrɛl, iwɛnɛ ti gɛ Rubɛn heshigeni la ogodo tụmbụla te bishi bwa.

²Okwo tu go Juda 'yajɛ ukpahiŋ bee hwuri miaụŋ-mo-bino bwa hwɛɛ, okwo ta bụtụ na kaa shɛ uhiu banɛ no olugwo ubwa, ama kaa go Josɛf ubwa ee peteni waa ụhwada tumata ti hiiŋ.

³Miaụŋ-me-eyi mu Rubɛn yɛu ɛtɛ Isrɛl ihiiŋ na: ga Hanok, na Palu, nɛ Hɛzron keeni Kami.

⁴Umwamwa Joɛl na: gɛ Shɛmaya i shɛ yɛu ibwɛ, go Gog i shɛ yɛu ibwɛ, ge Shimei i shɛ yɛu ibwɛ,

⁵ga Maika i shɛ yɛu ibwɛ, ge Riyaya i shɛ yɛu ibwɛ, ge Beal i shɛ yɛu ibwɛ,

⁶keeni Bira, na shɛ uhiu nu udenji wa Agwuma Siria, na ge Tiglat-pilnɛsa 'imɛ la bee kepi. Ge Beara, ubwa shɛ buhwuri-bu-umbe ba atwa Rubɛn.

⁷Ti'nyeci ta amwamwa atwa Rubɛn na shɛ ehwurembe nụ ụlamụ Rubɛn na: gɛ Jɛiyɛl, nɛ Zɛkaria,

⁸keeni Bela yɛu Azaz na shɛ yɛu Shema na shɛ bụjalụ Joɛl. Udenji ga jɛjɛ na Aroe no tugwungwu tu tuzuba ti Nebo keeni Beal-mion.

⁹Iyimabiga ya aba ya kaana ufwugwo ni Giliad, iwɛbɛ po oo botogwu cɛnjɛ ta ata tutu i ci tuzuba tụ ụshɛka ata twa nu Urefu Yufretis.

¹⁰Na aka Agwuma Soul, ibɛ ụlamụ Rubɛn sukakanɛ udenji Hagi nu ujasa, aa lasụ aŋ, ee leshegeji ohwolu na udenji ata Hagi ga namɛ la nu ukpekpe ata uwaŋna-banụ Giliad hwɛɛ.

¹¹Umwamwa ga Gad jɛjɛ na cɛnjɛ tu Bashan tuzuba tụ ụlamụ Rubɛn uuwa i ci uwaŋna-banụ Salɛka.

¹²Go Joɛl, ubwa shɛ uhiu udenji na hwuri umbe nu Bashan, ga Shafam 'wa, ge Jenai na Shafat 'wa aŋ.

¹³Gana na ta amwamwa atwa vwɛ aba namɛ na: umwamwa Maikɛl, nu una Mɛshulam, nu una Sheba, nu una Jorai, nu una Jakan, nu una Zia keeni una Ibɛ. Hwɛɛ aba a shɛ amwamwa ecenje.

¹⁴Atwa ga aba shɛ umwamwa Abihail yɛu-ye-eyi Huri: go Huri shɛ yɛu Jaroa, ga Jaroa shɛ yɛu Giliad, ge Giliad shɛ yɛu Maikɛl, ga Maikɛl shɛ yɛu Jeshishai, ge Jeshishai shɛ yɛu Jado, ga Jado shɛ yɛu Buz,

¹⁵Ga Ahi yɛu Abdiɛl bụjalụ Guni, ubwa shɛ uhiu umwamwa wa aba.

¹⁶A Jɛjɛ na ashɛpwụ a'wụtụ a na namɛ no tugwungwu tu Bashan ni Giliad, keeni cɛnjɛ ta tiyaga tu Sharon.

¹⁷Ti'nyeci tɛ ga hwɛɛ tɛ njɛ tedure na atwa na shɛ eshishi aba, na aka Agwuma Juda go Jotam keeni na aka Agwuma Isrɛl ge Jeroboam.

¹⁸Ụlamụ Rubɛn, nu una Gad keeni ashashɛ ụlamụ Manasɛ, a na namɛ nu uwaŋna-banụ a 'yajɛ ejeshi Igbɛɛ-woshi-ni-bɛ-yebi-na-akpakwụ-atatụ-ni-dipi-tɛtu-ne-eshe-umpwa (44,760) a na ee mbisegeni gana na taa 'waŋna shabula shɛ ujasa, no otokwobi keeni itɛ tebiye tebiye.

¹⁹E sugeni edenji Hagi, nu una Jɛtu, nu una Nafishi keeni una Nodab ujasa.

²⁰A patanɛ Agwatana rishe, aa lụpɛ bụ maa mbiyono aŋ. Agwatana kaa jishijɛ ga ilipwɛ ya aba, baa njɛ aŋ maa a lasụ udenji ata Hagi keeni edenji elele na ga twa-unu na aba maa e mbiyeni aŋ.

²¹Nruhondo ma atwa i'ime ya aba mu na ee suje, mu namɛ igbɛɛ-woshi-ni-bɛ-tɛ (50,000). Agwụdụ aba shɛ igbɛɛ-dipi-yebi-nu-woshi-ni-bɛ-tɛ (250,000). Nzhinyacɛ ma aba mu namɛ ugbaa-uko (2,000). Ɛ imɛ du atwa Igbɛɛ-dupu (100,000) buumwa buumwa nu ujasa ata.

²²A kwụnɛ atwa i'ime ya aba te gembi ufwugwo, iwɛnɛ tu ujasa ata shɛ ujasa wa Agwatana. A namɛ apata uuwa i ci aka na aa 'imɛ aŋ ya du na tijama.

²³Atwa na shɛ ashashɛ ụlamụ Manasɛ a na jɛjɛ nu uwaŋna-banụ, a jɛjɛ no tugwungwu tu Bashan uuwa i ci tuzuba tu Beal-hɛmon, ti Sɛni keeni Ishɛmɛ Hɛmon. Ufwugwo wa aba wa kaana ugombo tebiye.

²⁴Atwa na shɛ ehiu amwamwa aba na: ge Ifɛ, ne Ishi, ne Iliɛl, na Aziriɛl, nɛ Jɛrɛmia, no Hodavia, keeni Jadiɛl. Atwa ga, hwɛɛ aba shɛ etwenyi na eri a nda teleyi nu ujasa, a na du kaa beni urishi na ashashɛ amwamwa aba.

²⁵Atwa ga zasana Agwatana eshi aba cara o, e jineci bu, aa zhɛba ya tuwa ta anya denji tu na Agwatana bocingwonuo aŋ la na cɛnjɛ ta ata.

²⁶Ibɛ po Agwatana ishicinjɛ Pul, agwuma Siria na du aa hiaaŋnanɛ ge Tiglat-pilnɛsɛ bee lesheji a'una aba, bee becinji ụlamụ Rubɛn, nu una Gad keeni ashashɛ ụlamụ Manasɛ a na namɛ tuzuba, baa gɛgɛcɛnjɛ aŋ nu Hala, tu Habo, tu Hara, keeni ụpalanụ Urefu Gozan tutu taa hwayɛ.