Read bassa 2 SHƐRỤKWỤKWỤ SHI YEBI 1 Bible Online

2 SHƐRỤKWỤKWỤ SHI YEBI 1 - bassa bible

2 SHƐRỤKWỤKWỤ SHI YEBI 1

¹Yɛu Devid go Sụlụmụn shikeni dimi na cɛnjɛ-ta-tugwama tu bwa tebiye, nazhɛ AGWANGWAMA na shɛ Agwatana ubwa namɛ nu bwa, baa njɛ bụ agwuma ukpahiŋ.

²Go Sụlụmụn mbishi atwa Isrɛl kpaaŋ n-ndumwa, te eberezhe ejeshi a na untanganɛ udungbe we ejeshi igbɛɛ igbɛɛ keeni a na kpakwụ kpakwụ, ta ajɛmɛ-ụshɛrɛya, te ehwurembe Isrɛl kpaaŋ, te ehwurembe amwamwa.

³Go Sụlụmụn na atwa tu'ulwa ta ata kpaaŋ zhe ne bikpekwu ata bi Gibion, iwɛnɛ tu udulo tu'ulwatagwụ wa Agwatana na go Moses yɛu-ugondu ya AGWANGWAMA to la nụ ụshɛka u ta namba apata.

⁴(Nu Jɛrusalɛm tuba ee shi Ikpɛtɛ ɛtɛ ya Agwatana, nu udulo ata ge Devid teni iŋ la, aka na bɛɛ bwɛ iŋ ni Kiriat-jiarim.)

⁵Agwuma Sụlụmụn keeni atwa ata zhɛbɛ AGWANGWAMA nu utukwu-ụrụpɛ ata wɛ ɛtumburɛ gɛ Bɛzalɛl yɛu-ye-eyi Uri bụjalụ Hu mo la ni Gibion nu umbe udulo ata AGWANGWAMA a nama.

⁶Go Sụlụmụn munji utukwu-ụrụpɛ ata aa njɛ nɛ ɛtumburɛ, na namɛ nu umbe AGWANGWAMA na amɛ udulo ata ụ tụ'ụlwatagwụ, boo to arụpɛ tuhwoŋzhingo ni iyimabiga akpakwụ-a-ta (1,000) nu bwa.

⁷Ibɛ du Agwatana bananɛ Sụlụmụn na amɛ ụjita ata, bɛɛ hiɛŋ bụ, Imbe aba jala maa Ma bụ panaa?

⁸Go Sụlụmụn hiɛŋ Agwatana, Bu lubi bishi mi ge Devid duwa, ebi leni maa Mo tono ụtarụtụ ubwa na tugwama tiya.

⁹Oo AGWANGWAMA na shɛ Agwatana, nda iyi elele nɛ ebi shileni la bishi mi unu ibɛ. Bu m peni tugwama maa ma sha agwuma atwa na ufwugwo wa aba ụ shɛ gana upwupwutu ụ cɛnjɛ.

¹⁰Asha m peni ti'inta keeni iyi-tumapa nɛ waŋnɛ maa Ma ala atwa ga tu'untangana. Shibwonu gana na Ngɛɛ zhɛ ma ala maa Ma untangana atwa ga bụ i ci gana ga ufwugwoo?

¹¹Nazhɛ Agwatana jishijɛ Sụlụmụn; bɛɛ hiɛŋ, Taa ti yaa shɛ iyi nɛ ibu kwụlanɛ na ahaŋsa bụ ta, yaa shɛ shɛ kaa maa tɛzhɛgba, okwo uduciya, okwo urishi, kwo kaa maa atwa i'ime bu 'wi, kwo kaa maa yɛ urugbo ta njɛshɛ abụ lụpɛ. Ama gana na abụ lụpɛ ti'inta keeni iyi-tumapa maa eri atwa mi na Ngaa bɛ njɛ agwuma aba tu'untangana.

¹²N zhɛ ma bụ pana ti'inta keeni iyi-tumapa. N zhɛ ma bụ kaana ụzhɛgba, nu uduciya, bi zhɛ ba bana du urishi bo hwulo agwuma elele na yɛwa la tugwama nazhɛ abɛ yɛ bana. I zasa kaa agwuma elele na tɛ zhɛ a ya tugwama zhɛ a bana urishi gana bụ o.

¹³Go Sụlụmụn banɛ[1] nu udulo ata ụ tu'ulwatagwụ ne bikpekwu ata bi Gibion, bee gwure nu Jɛrusalɛm. Baa untanganɛ atwa Isrɛl.

¹⁴Go Sụlụmụn meme suteneni ihɛŋtu ujasa akpakwụ-ecenje (1,400) keeni idɛkwɛ ujasa igbɛɛ-icihiŋ (12,000), Bee tilegeni ike na ashɛpwụ ihɛŋtu ujasa, bee tileni inɛ vwɛ pu bwa nu Jɛrusalɛm.

¹⁵Agwuma njɛ maa ga azụrụfa na azhɛnarɛya bala nu Jɛrusalɛm gana atayɛ. Ogbogolo osobu barɛ gana odurumi na barɛ ne ehilo.

¹⁶Atwa na a ndana agwuma tihinya, ɛ sɛnjɛ bụ Idɛkwɛ ni Ijipti keeni Kue.

¹⁷Aba ɛ sɛ ihiɛŋtu ujasa ni Ijipti, ụhaŋtụ ujasa uko ụ shɛ azụrụfa arinya akpakwụ-atatụ (600), aa sanga budakwa bu ko azụrụfa arinya dipi-tɛtu (150). Gobwonu du aa sangana shɛgwuma shɛ Ɛhɛt keeni shɛgwuma sha Asiria kpaaŋ.