Read bassa 2 SHƐRỤKWỤKWỤ SHI YEBI 16 Bible Online

2 SHƐRỤKWỤKWỤ SHI YEBI 16 - bassa bible

2 SHƐRỤKWỤKWỤ SHI YEBI 16

¹Tu ga Asa ulwa shiywa talacɛ-na-shɛba-shi-cihiŋ tu baa yɛ tugwama, nazhɛ ga Beasha agwuma Isrɛl zhajɛ baa sukakanɛ bụ nu ujasa. Bee kwuni Rama tukapa maa kede atwa na bana kwo kaa maa kede e ne teni Juda ya o.

²Ga Asa suji azụrụfa keeni azhɛnarɛya a na namɛ nu Umwono wa AGWANGWAMA keeni anaa na namɛ ni ihwɛ ibwɛ, bee peni Bɛn-hadad agwuma Siria nu Damaskos, baa tumwanɛ bụ, bɛɛ hiɛŋ,

³Mizha tu twa-unu atubana bụ, gana na ti ge shibi twa la unu ne bishi mi. Iwɛbɛ po Ngaa bụ panɛ azhɛnarɛya keeni azụrụfa ata. Zhaga hwuwayɛ go bwada unu ata abu twa na Beasha agwuma Isrɛl, iwɛ maa bacɛnga ejeshi ubwa na cɛnjɛ ti mi.

⁴Gɛ Bɛn-hadad leni iyi nɛ agwuma ga Asa hiɛŋ bụ. Baa tumwanɛ uberezhe we ejeshi ubwa maa ga zha maa sukakana ashɛpwụ Isrɛl. Ibɛ po ee leshiji Ijon, tu Dan, ti Ebɛl-bɛt, ti Meaka hwɛɛ, ta ashɛpwụ a'wụtụ a'wụtụ a na namɛ na cɛnjɛ tu Naftali a na shɛ ofwo na ee ge zwegeni i'wɛŋnɛ ya aba.

⁵Aka na ta agwuma ge Beasha hwụjɛ iyi nɛ ya nda, bee genji ya ugondu ata baa ga nda nu Rama, ti ikepi ɛtɛ baa ga ma.

⁶Nazhɛ agwuma ga Asa suje atwa Juda hwɛɛ, bee eni aŋ maa ge suje atayɛ, te ezhibi i'wɛ'wɛ ɛtɛ ga Beasha ga nda ugondu nu Rama maa o mo uba Geba keeni Mizpa.

⁷Na aka ata ibɛ bụkwụbɛ-bu-uhwaŋna ga Hanani zhe, bɛɛ hiɛŋ, agwuma ga Asa, Iwɛnɛ abụ datanɛ agwuma Siria ebi genji AGWANGWAMA na shɛ Agwatana bụ, iwɛbɛ po ejeshi Isrɛl e bi benengeni.

⁸Atwa Itiopia, na atwa Libia a zasa la suu ihɛŋtu ujasa, te ejeshi na gembi ufwugwo, ta asụcɛ idɛkwɛ? AGWANGWAMA njɛ maa lasụ aŋ la iwɛnɛ to obu to aba nu bwa.

⁹Eshe AGWANGWAMA ngbaracɛ ofwo elele na cɛnjɛ tu unyizo, ubwa kaa ba pana atwa na meme zucingeni bu ukpahiŋ. Hioko ụlagwụ na ebi tilegeni, iwɛbɛ po ɛbi zhɛ bu na jasa ya ujasa te kwuni na aka ga zhɛ ya geri-be-eshe.

¹⁰N-ndumwa ma ata mi heshigeni Asa amɛ tebiye, ibɛ po baa 'imɛ bụkwụbɛ ata bu uhwaŋna bee keri bu nu umwono-tishi. Te kwuni na aka ata ya ga Asa kwuni atwa shɛmiaụŋ tusukakana.

¹¹Iyi nɛ ga Asa ndanjɛ na tugwama tu bwa hwɛɛ 'nyeci nu utakada shɛrụkwụkwụ shɛ shɛgwuma shu Juda keeni una Isrɛl.

¹²Tu ga Asa ulwa shiywa talacɛ-na-shɛba-shi-cinjishi tu baa yɛ tugwama, nazhɛ ụngwụ uko 'imɛ bụ ni ivwunɛ. Ama okwo tụ ụngwụ ata ubwa 'yajɛ ikɛnyi, bi zhegeni shi AGWANGWAMA maa mbiyono bu o, semi awa-inibi baa zhagana.

¹³Tu ga Asa ulwa shiywa buhanda-nu-boo-ko tu baa yɛ tugwama, nazhɛ bee 'wi gana eshi ubwa.

¹⁴Ee ni bu nu u'uye na bee meme hinenji la nụ ụshɛpwụ ata Devid ụ'wụtụ. A sukwutwa ru'wo ru bwa iturɛre keeni manɛbɛ mụ ụhiụŋ maa e ni bu, nazhɛ aa shanɛ ulwa ụ'wụtụ maa o to-ụkwụla tu'wo tu bwa.