Read bassa 2 SHƐRỤKWỤKWỤ SHI YEBI 20 Bible Online

2 SHƐRỤKWỤKWỤ SHI YEBI 20 - bassa bible

2 SHƐRỤKWỤKWỤ SHI YEBI 20

¹Na aka oko ejeshi Amoab, ta a na A'amon keeni atwa Meun[16] zhajɛ maa a sukakanɛ Jehoshafat nu ujasa.

²Ibɛ po atwa oko zhaganɛ Jehoshafat, ee mbishi bu, ɛɛ hiɛŋ, Unyama we ejeshi ụ'wụtụ banɛ ba ni Idụm keeni hileniye Itekwu. O tuwo du Hazazon-tama, (ubwa gatata shɛ Ɛn-gɛdi).

³Ibɛ po inyɛsɛ shɛ Jehoshafat, baa mama 'imɛ maa lụpa AGWANGWAMA iwɛ maa 'yagaga bụ. Bee peni-unu maa ga atwa njɛ ezumi nu u'una ata kpaaŋ.

⁴Ibɛ po atwa bananjɛ na ashɛpwụ Juda kpaaŋ, aa zhajɛ Jɛrusalɛm maa a lụpɛ AGWANGWAMA maa mbiyono aŋ.

⁵Ibɛ po atwa Jɛrusalɛm na atwa Juda sotulonu nu ukpogwu ata ufwo umwono wa Agwatana. Ama agwuma ge Jehoshafat zhe tuba bee shikeni nu umbe wa aba kpaaŋ,

⁶baa njɛ adua gbarɛ gbarɛ, bɛɛ hiɛŋ, Oo AGWANGWAMA na shɛ Agwatana ogwunukwoshi tu, bu namɛ na azuba abu untanganɛ edenji unyizo kpaaŋ. Gabụ bɛ 'yajɛ ukpahiɛŋ, ebi gembi kaa, i zasa kaa bụtụ be elele eri ma bụ lakana iyi nɛ ebi heŋshi o.

⁷Gabụ kaa bɛ shɛ Agwatana tu. Aka na ta atwa bu Isrɛl teni la cɛnjɛ tu ga, ebu unzenji aŋ atwa na ga jɛjɛ la na tuba, ebi shepi cɛnjɛ tu ga ebi peni ajalalo biyejilo bu ga Abraham, maa tɛ shɛ cɛnjɛ ta aba tutu unyizo-nom.

⁸A namwawaŋ epe, ee bi meni ohwolu tijilo maa a na bu muna ụjɛrụma, ɛɛ hiɛŋ,

⁹Yaa shɛ iyi iwɛ ye elele iti jiteni maa iti peni ụbaụta. Okwo yaa shɛ ujasa, kwo kaa ụngwụ tishikpe na wo mburusonu kakayɛ, kwo kaa imunɛ-tiya, ti eri ta zhajɛ nu Umwono ga izeci bu shiri maa to shikono na agba bụ nu umbe Umwono ga bụ, maa ta bụ lụpa iwɛ tiriri ta ata, ɛbi zhɛ kaa ba hwuga maa iti leshiji.

¹⁰A'amon, na Amoab keeni atwa Idụm a tu sukakanɛ hwuwayɛ go. Bi leneni shi la kaa ogwunukwoshi tu maa e tefuleji aŋ na aka na ta a banɛ ni Ijipti o. Ibɛ po ee werinji aŋ la, e iricinji shi aŋ kaa o.

¹¹Hioko, gana aa tu tụpanɛ ta, a zhajɛ maa eti becinji na cɛnjɛ tu ga ebi ge ti peni maa tɛ shɛ iyi-yo-ogwu tu.

¹²Oo Agwatana tu! Tu zasa bụtụ maa mo ti mbiyono ne ejeshi ga ofwugwo ụ'wụtụ utu sukakanɛ o. Iti penenji aŋ ulwapɛ. Ti mepi shi iyi nɛ shɛ maa ta nda o, ama gabụ atɛ zhaganɛ maa iti mbiyeni.

¹³Etwenyi Juda hwɛɛ, te eyikwo aba ta miaụŋ ma aba shikekeni nu umbe Umwono ata wa Agwatana.

¹⁴Na aka ata ibɛ Mpiala ma AGWANGWAMA mu zhaganɛ Bulivai bu ko na, ɛɛ hiɛŋ izeci ibwɛ, ga Jahaziɛl yɛu-ye-eyi Zɛkaria na shɛ bụtụ bu umwamwa Asaf na shɛ udenji wa ata Matania, nɛ Jɛiyɛl keeni Bɛnaya, ti bee shikeni na ashashɛ tusotulonu ta ata.

¹⁵Ga Jahaziɛl hiɛŋ, Ahiɛba atwa Juda keeni Jɛrusalɛm, AGWANGWAMA hiɛŋ, Kede u'waba ihi kwuswa o, ta nda ma kaa okwo inyɛsɛ maa hi sukakanɛ ejeshi ga ufwugwo ụ'wụtụ o. Iwɛnɛ po ujasa ga shɛ shɛ unee hiŋ o, ama una wa Agwatana.

¹⁶Beyi ga ɛ zhɛ e munje nu ulomu Ziz. Sukakana aŋ ma ta ahiɛ twa na aba nu ukwunanga ulomu ụshɛka ata dongonu Jɛruɛl.

¹⁷Oo ahiɛba atwa Juda keeni atwa Jɛrusalɛm, shɛ ahiɛba hi zhɛ hia jasa ujasa ga o. Shikokono ma kwakwa no oluji hiŋ dimi maa hiɛ kwụbɛ ta AGWANGWAMA zhɛ ma hi lashaga. Ta nda ma inyɛsɛ o, kede ohwulu ihi horukono. Beyi ga bana ma maa hi sukakanɛ aŋ, AGWANGWAMA kaa zhɛ a nama ne hiŋ!

¹⁸Iwɛbɛ po agwuma Jehoshafat kwuzhi mɛkɛɛ harɛ boo to itune na cɛnjɛ, gobwonu du atwa ata kpaaŋ kwuzenji gana bwa aa zhɛbɛ AGWANGWAMA.

¹⁹Alivai amwamwa Kohat, no Kora ishijɛ, aa uganɛ taawụụ, aa shɛtanɛ AGWANGWAMA na shɛ Agwatana Isrɛl.

²⁰Ti iyi heri, atwa ata ishijɛ nu uvwungwa dididi maa e teni nụ ụshɛka ata dongonu Tɛkoa. Gana na ta a jala maa e kwuni tahaŋnụ ta aba, ge Jehoshafat mbishi aŋ, bɛɛ hiɛŋ, Ahiɛba etwenyi Juda keeni a na Jɛrusalɛm! Patana ma AGWANGWAMA na shɛ Agwatana hiŋ rishe, nazhɛ ɛhi zhɛ hia ala maa hi shikono dimi. Tɛtana ma iyi nɛ egesere ubwa ge hi mbishi rishe, nazhɛ yɛɛ zhɛ ma hi 'yagana eshe.

²¹Aka na ta agwuma hwuwi ushaura tụdụma na atwa ata hwɛɛ, nazhɛ bee teri atwa na zhɛ o hwulono ejeshi ata umbe maa a na zungangana AGWANGWAMA azunga, maa a na shɛtangana bụ iwɛ tijilo tu bwa, ɛɛ hiɛŋ, Shɛtana ma AGWANGWAMA! Iwɛnɛ po tulubo tu bwa tu namɛ unyizo-nom!

²²Aka na te e kwuni azunga ashɛtwa tuzunga, nazhɛ AGWANGWAMA shikecenji ejeshi tusweci a na gwubegeji maa e tefuleji ejeshi A'amon, na a na Amoab keeni a na Ishɛmɛ Sei anaa na ga zhajɛ maa a sukakanɛ atwa Juda, aa kwụnɛ aŋ.

²³Ejeshi A'amon, na a na Moab sukakanɛ ejeshi Sei, aa kwụnɛ aŋ hwɛɛ. Nazhɛ ɛɛ jishirijɛ aa mama kwụnanụ abaaba tebiye.

²⁴Aka na te ejeshi Juda ci ashɛkpa ata namɛ nụ ụshɛka ata, aa mbiyanɛ unyama ata, aa kwụbɛ ta atwa i'ime ya aba tilegeni, tobwolo o uwo hwɛɛ aba, okwo bu ko gba benengeni shi o.

²⁵Ge Jehoshafat ne ejeshi ubwa teni ugba wa aba maa e suji ufwa ujasa, e gwushiji iyimabiga ifwugwo, ti i'wɛŋnɛ iyiri iyiri, to tugwuno, keeni iyi yo ogwumishi swoswoswo. A namɛ nu ufwa ata ujasa tusutono ijitɛ itɛtu mudu, ama gana na ti yee gembi ufwugwo e eri shi o sugo iŋ hwɛɛ o.

²⁶Nụ ụjita uneshi, aa ulwa nu Ulomu Bɛraka,[17] aa shɛtanɛ AGWANGWAMA iwɛ iyi nɛ baa njɛ. Iwɛbɛ po ɛɛ hiɛŋ Ulomu ata maa, Bɛraka taa hwayɛ.

²⁷Nazhɛ ge Jehoshafat 'yagajɛ atwa Juda keeni atwa Jɛrusalɛm hwɛɛ, ee gwuri nu Jɛrusalɛm, nu unyasa ụ'wụtụ tubwada, iwɛnɛ ta AGWANGWAMA lasagwụ aŋ atwa i'ime ya aba.

²⁸Aka na ee ci ụshɛpwụ ata, a shamanɛ ee zhe nu Umwono wa AGWANGWAMA na shɛzunga, ti i'nyemi 'nyemi shiduma, ne egweje keeni akakacɛ.

²⁹Nazhɛ inyɛsɛ ya Agwatana shɛ cɛnjɛ-ta-tugwama te elele tu na tụ hwụjɛ gana na ta AGWANGWAMA lasagwụ atwa Isrɛl atwa i'ime ya aba.

³⁰Ge Jehoshafat yɛ tugwama tu bwa na amɛ-olom, iwɛnɛ ta Agwatana peni bu ụhinjanụ nu uhwaŋna we elele.

³¹Ge Jehoshafat namɛ shiywa talacɛ-na-shɛba-shɛ-ta, te e meci bu, nazhɛ baa yɛ tugwama tu Juda. Baa yɛ tugwama tu Jɛrusalɛm shiywa woshi-na-shɛba-shɛ-ta. Ɛ hiɛŋ izeci bino bwa ga Azuba yɛu Shihi.

³²Bu 'wa uhwaŋna bishi bwa, bụ vwụrɛ shɛ maa ganga uŋ o. Bɛ njɛ iyi nɛ teni cɛŋ ne eshe AGWANGWAMA gana na te bishi bwa ga Asa njɛ la.

³³Ama okwo ti yaa shɛ gana ata, e hwuŋzetenji shi ofwo ata zeteji atwa a zhɛba tuwa ta aba hwɛɛ o. Atwa ata zhɛbɛ shɛ Agwatana ogwunukwoshi aba na amɛ aba oko hwɛɛ o.

³⁴E 'nyeci iyi elele nɛ ge Jehoshafat agwuma Juda ndanjɛ no tukwuno ta tugwama tu bwa uuwa i ci tukwunanga ta tuba nu utakada shɛrụkwụkwụ shi Jehu yɛu-ye-eyi Hanani. Shɛrụkwụkwụ sha ata shɛ shɛ emeseyi iyi nɛ shɛgwuma shi Isrɛl shi ndanjɛ la.

³⁵Na aba inɛ gɛ, nazhɛ agwuma ge Jehoshafat twa-unu na Ahazia agwuma Isrɛl na ndanjɛ iyi tugworozwo ifwugwo.

³⁶Abana nu bwa shebi ihɛŋtu tinyakpa nyakpa maa i zhe ni Itekwu Tashish, ee shebi ihɛŋtu tinyakpa nyakpa inyɛ na akpata Ezion-gɛbɛ.

³⁷Ama gɛ Ɛliɛzɛ yɛu-ye-eyi Dodavahu na banɛ nu Mɛrisha dumanganɛ Jehoshafat tigesere, bɛɛ hiɛŋ, AGWANGWAMA zhɛ a bwada ihɛŋtu ɛtɛ ehi shebi, iwɛnɛ abu twa-unu na Ahazia. Ibɛ po Ihɛŋtu ɛtɛ bwadụ ga, i zhe shi ya tahaŋnụ maa i ci Tashish kwukwuŋ.