Read bassa 2 SHƐRỤKWỤKWỤ SHI YEBI 23 Bible Online

2 SHƐRỤKWỤKWỤ SHI YEBI 23 - bassa bible

2 SHƐRỤKWỤKWỤ SHI YEBI 23

¹Na amɛ uywa ucenje, nazhɛ bunongbo ge Jehoiyada mbiseni ukpahiŋ ubwa. Baa twa-unu ne ehiu ejeshi kpakwụ kpakwụ: aba shɛ ga Azaria yɛu Jɛroham, ne Ishmɛl yɛu Jehohanan, na Azaria yɛu Obɛd, ne Measeiya yɛu Adaya keeni Ɛlishafat yɛu Zikri.

²Ee duleji ashɛpwụ Juda hwɛɛ, ee suje Alivai elele, ta shɛgwuma shu nhwaŋ sha amwamwa Isrɛl hwɛɛ nu Jɛrusalɛm.

³Aa ulwa nu Umwono wa Agwatana hwɛɛ aba, apata aa twa-unu na agwuma. Ge Jehoiyada hiɛŋ aŋ, Yɛu ya agwuma ga 'wi nɛ! Ubwa kaa shɛ ba ya tugwama gana na ta AGWANGWAMA shiri la unu maa gana yɛɛ zhɛ ya shana ụlamụ Devid na.

⁴Iyi nɛ ɛhi zhɛ hia nda na. Yaa shɛ onongbo na Alivai zhajɛ nu ugondu nụ Ụjita-ụhinjanụ, go tudwonu ta aba tụ tatụ tu ngbaraka odubo umwono wa Agwatana,

⁵go tudwonu ta aba tụ tatụ ti nya tu ngbaraka ihwɛ ya agwuma, ge emeseyi aba oko nama tuba no Odubo ata ɛɛ hiɛŋ, Ukoshilo. Ga atwa na vwɛ tuba ulwa nu ukpogwu umwono wa Agwatana hwɛɛ.

⁶I zasa bụtụ be elele shɛ bo tono nu umwono wa Agwatana o, semi onongbo keeni Alivai na namɛ nu ugondu jita ata kiri. E eri o tono, iwɛnɛ te e tileni aŋ swooŋ, ama atwa vwɛ shɛ a untangana unu na AGWANGWAMA peni aŋ maa a nama no tupohondo.

⁷Ga Alivai hwuceci otokwobi aba a 'waŋna maa o shikokono o rungwutwonu agwuma maa a na 'yaka bụ. A shɛ a nama na agwuma no ofwo elele na bɛɛ zhɛ. Bụtụ be elele na mekeni maa tono nu umwono ata wa Agwatana, ga a kwụnɛ bụ.

⁸Alivai na atwa Juda njɛ gana na ti ge Jehoiyada tɛtaganɛ aŋ unu. E leneni shi atwa elele na zasa nu ugondu nụ Ụjita-ụhinjanụ maa e ji ni ihwɛ o. Eberezhe ejeshi gɛgacanjɛ atwa na kwunanjɛ ugondu wa aba, ta atwa na te e ci maa e kwuni ugondu wa aba.

⁹Ge Jehoiyada utegeni ehiu ejeshi a na untanganɛ atwa dipi-yebi nsanụ, ta shabula shu ujasa shi Devid shɛ na shi ge tileni nu Umwono wa Agwatana, ta ma shɛ na shi gembenji keeni ma shɛ na shɛ gwụmwatangwụ.

¹⁰Bee shikecenji ejeshi ata hwɛɛ, bụtụ bụtụ 'waŋnɛ i'wɛŋnɛ ibwɛ ujasa ni i'ɛlɛ ibwɛ maa a na ngbaraka agwuma. Te kwuni nụ ụzalụ tuta tutu i ci tuzuba tu umwono ata tutu rungwutwonu utukwu-ụrụpɛ keeni Umwono wa Agwatana.

¹¹Nazhɛ ge Jehoiyada bɛcinjɛ yɛu ɛtɛ ya agwuma nu ukpogwu, bee peteni bu udara tugwama nu uhiuhiu. Nazhɛ bee peni bu utakada undwa gana na agwuma shɛ a untangana ofwo. Gana ata ee peni bu tugwama. Nazhɛ ge Jehoiyada na shɛ bunongbo na miaụŋ mu bwa mu dudugeni bu manɛbɛ nu uhiuhiu, ee zweni n'ungwa, ɛɛ hiɛŋ, Agwuma ya urugbo tutuu!

¹²Aka na ga Atalia hwụjɛ ta atwa a kalana agwuma n'ungwa, bee zhe kakayɛ no ofwo na atwa ata ulwa nu Umwono wa Agwatana.

¹³Ga Atalia kwụbɛ agwuma ata ti bee shikeni no odubo umwono wa Agwatana, no ohwolu ata aa njɛ iwɛ shɛgwuma, tu n-nyarɛ me ejeshi mu rungwutwonu bu keeni ehwuri akakacɛ. Atwa ata hwɛɛ a ugaga n'ungwa mu unyasa, oo hwulo akakacɛ, azụnjɛ umwono wa Agwatana, aba hwuleni atwa umbe ni i'nyemi na tɛshɛtangana ta ata. Ibɛ po biyikwo ata dwetweji tugwuno tu bwa na amɛ-tụhaŋtụ, baa uganɛ, bɛɛ hiɛŋ, Tigezhe ma o! Tigezhe ma o!

¹⁴Ge Jehoiyada bunongbo ata bɛcinjɛ eberezhe ejeshi dipi-yebi, a na untanganɛ ufwugwo ata, bɛɛ hiɛŋ aŋ, Bacɛnga bu ma na ashashɛ iwɛlɛ gɛ, bụtụ be elele na mekeni hwayɛ maa lashaga bụ, kwụna bụ ma. Iwɛnɛ po onongbo dumwa, ɛɛ hiɛŋ, Ta kwụna bụ ma na amɛ umwono wa AGWANGWAMA o.

¹⁵Aa 'imɛ bụ, ee shepi bu ni ihwɛ ya agwuma, aa kwụnɛ bụ no Odubo Budakwa na namɛ ni ihwɛ ɛtɛ ya agwuma.

¹⁶Ge Jehoiyada hiɛŋ agwuma keeni atwa ata kpaaŋ, go o togwu nu bwa nu unu-tutwa maa ɛ zhɛ a sha atwa AGWANGWAMA.

¹⁷Ee zhe ni isume tuwa ta ata ɛɛ hiɛŋ Beal, ee hwuŋzhi iŋ, ee bwereteji otukwu-ụrụpɛ tuba, tu ntatanuwaŋ mu tuba, oo togwu, tu ga Matan ata shɛ bunongbo bi Beal aa kwụnɛ nu umbe otukwu ata ụrụpɛ.

¹⁸Ge Jehoiyada tileni onongbo na Alivai maa a untangana ugondu Umwono wa Agwatana. A shɛ a na nda ugondu wa aba gana na agwuma Devid eni aŋ la, maa o no hwoŋzhingono AGWANGWAMA iyi ya arụpɛ gana na tu Undwa na go Moses peni aŋ la namɛ. Aba untanganɛ shɛzunga nu unyasa tubwada keeni iyi elele nɛ namɛ nu umwono ata wa Agwatana.

¹⁹Ge Jehoiyada tileni angbaracɛ no shidubo shu umwono wa AGWANGWAMA maa kede bụtụ be elele na zasa shɛshɛshɛ teni gana elele kwakwa o.

²⁰Bee suji ehiu na untanganɛ ejeshi kpakwụ kpakwụ, na atwa na 'yajɛ izeci, ne egwomina atwa ata, keeni atwa cɛnjɛ ta ata kpaaŋ, ee she agwuma tu baa banɛ nu Umwono ata wa AGWANGWAMA. Ee teni no odubo ata namɛ na azuba, tutu ihwɛ ya agwuma, aa gɛgɛcɛnjɛ agwuma ni idwɛtwɛ ibwɛ i tugwama.

²¹Atwa ata kpaaŋ a bwada unyasa, ụshɛpwụ ata namɛ suu, iwɛnɛ ta a kwụnɛ Atalia nu utokwobi.