Read bassa 2 SHƐRỤKWỤKWỤ SHI YEBI 3 Bible Online

2 SHƐRỤKWỤKWỤ SHI YEBI 3 - bassa bible

2 SHƐRỤKWỤKWỤ SHI YEBI 3

¹Bishi ba agwuma Sụlụmụn ge Devid jolwo la ofwo na shɛ maa o mo umwono ata wa AGWANGWAMA. Ofwo ata shɛ ni Ishɛmɛ Moria, nɛ namɛ nu Jɛrusalɛm, no ofwo ata AGWANGWAMA bananɛ la bishi bwa ge Devid, na akpakpata Arauna, na shɛ Bijɛbus. Apata agwuma Sụlụmụn kwuni tuma.

²Tu baa yɛ tugwama, yaa namɛ shiywa shi neshi ni ipiɛnɛ iyebi ni ijitɛ iyebi nu upiana ata, nazhɛ bee kwuni tuma ta ata.

³Ụnjɛswa Umwono ata wa Agwatana go Sụlụmụn mo namɛ gana avwuna dupu-na-buhanda (90), uholo ubwa ụ shɛ gana avwuna talacɛ (30). Ibɛ shɛ bimenji bụ ngwụshɛ.

⁴Angba umwono ata namɛ gana na tu uholo ubwa namɛ, ibɛ shɛ avwuna talacɛ (30), uzoto wa angba ata ụ shɛ gana imbele i'ɛlɛ dipi-yebi-nu-woshi (120). E sweni amɛ umwono ata azhɛnarɛya tụrụmbɛɛ.

⁵E sweni amɛ umwono ata ụ'wụtụ ogbogolo agwugwa tutu rungwutwonu, nazhɛ ee sweni uŋ du azhɛnarɛya tụrụmbɛɛ, aa njɛ uŋ tisemberi ni i'nyɛtɛ ụsụbwa ishiwɛ keeni shɛgba.

⁶Agwuma njɛ umwono ata tisemberi na atayɛ ogwumishi, a na kaa pilanụ keeni azhɛnarɛya na ee suje na cɛnjɛ tu Pavaim.

⁷Azhɛnarɛya bee sweni adatụ umwono ata, ti i'wɛ'wɛ tuhada, ti i'wɛ'wɛ yo odubo hwɛɛ ta akpa. Anjɛ-ugondu i'ɛlɛ njɛ iyi-uumwa nɛ 'yajɛ apiambɛ.

⁸Ụnjɛswa Umwono ata wa amɛ na ɛɛ hiɛŋ ofwo Tijilo na Hwuri ofwo vwɛ hwɛɛ namɛ avwuna talacɛ (30), uholo ubwa namɛ avwuna talacɛ (30), gana na tu ụnjɛswa umwono ata namɛ hwɛ hwɛɛ ta. Bee sweni amɛ Umwono ata Tijilo na Hwuri ofwo vwɛ hwɛɛ azhɛnarɛya tụrụmbɛɛ atalɛnt arinya akpakwụ-atatụ (600).

⁹Azhɛnarɛya na kaa aa njɛ okoto a shɛ ɛshɛkɛl arinya dupu (50). E sweni du shimwono sha ata sha azuba azhɛnarɛya hwɛɛ.

¹⁰Baa njɛ iyi-uumwa nɛ 'yajɛ apiambɛ iyebi, e sweni iŋ azhɛnarɛya maa e tileni iŋ no ohwolu ata Tijilo na Hwuri ofwo vwɛ hwɛɛ,

¹¹Tutogotogwu tu ụnjɛswa wa apiambɛ iyi-uumwa ɛtɛ hwɛɛ tɛ shɛ imbele i'ɛlɛ woshi. Upiambɛ uko ụ shɛ imbele i'ɛlɛ itɛ, wee timengeni ụdatụ umwono ata, upiambɛ uyebi namɛ imbele i'ɛlɛ itɛ, wee timengeni upiambɛ iyi-uumwa iyebi, gabata yo momo pononu eshe.

¹²Gobwonu du upiambɛ bu na bi yebi ụ shɛ imbele i'ɛlɛ itɛ, wee timengeni ụdatụ umwono ata. Upiambɛ uyebi namɛ du imbele i'ɛlɛ itɛ, wee timengeni du upiambɛ iyi-uumwa ebe ihiiŋ.

¹³Apiambɛ iyi-uumwa gɛ namɛ imbele i'ɛlɛ woshi, yee shikekeni nɛ ɛvwɛvwɛjɛ ibɛ, yaa ngbaracɛ geri ba amɛ umwono ata ụ'wụtụ.

¹⁴A njɛ ibɛgɛlɛ umwono ata wa Agwatana no tugwuno ti ilinɛn tu na aa nɛ tanɛ tanɛ keeni iyi inyɛ nɛ ee shiyeni ushi uduhwa wa ababa, keeni uduhwa ushenje keeni una ushenje howu. Aa njɛ tụ du tisemberi ni iyi-uumwa ɛtɛ 'yajɛ apiambɛ.

¹⁵Bu mo atukpa eyebi nu umbe umwono ata wa Agwatana, uzoto wa aba ụ shɛ imbele i'ɛlɛ talacɛ-ni-bɛ-tɛ, uzoto ukwukwusu na oo to uhiuhiu una una ụ shɛ imbele i'ɛlɛ itɛ.

¹⁶Baa njɛ ihiŋhiŋ ya atukpa ata tisemberi na shɛgba shɛ na oo to na tụ'walụ ta Apomɛgranati[2] dipi-yebi.

¹⁷Bee shikecenji atukpa ata na azalụ odubo umwono ata wa Agwatana, uko namɛ nu u'ala ubiye. Una uyebi namɛ nu u'ala ugwulwo. Boo po atukpa ata nzeci. Una ata namɛ nu u'ala ubiye, ubwa boo po ta Jakin,[3] boo po una ata shikeni nu u'ala ugwulwo to Boaz.[4]