Read bassa 2 SHƐRỤKWỤKWỤ SHI YEBI 30 Bible Online

2 SHƐRỤKWỤKWỤ SHI YEBI 30 - bassa bible

2 SHƐRỤKWỤKWỤ SHI YEBI 30

¹Gɛ Hɛzɛkia tumwanɛ butumwa no ofwo atwa Isrɛl hwɛɛ keeni atwa Juda, bee 'nyeteni du atwa Ifrem keeni atwa Manasɛ atakada maa ga zhajɛ nu Umwono wa AGWANGWAMA na namɛ nu Jɛrusalɛm, maa a ndanɛ AGWANGWAMA na shɛ Agwatana Isrɛl Isene tɛkashɛka.

²Iwɛnɛ po Agwuma, na anjɛ-ugondu ubwa keeni atwa elele na ulwa nu Jɛrusalɛm, njɛ ushaura maa ga njɛ Isene Tɛkashɛka ne Biyebi.[33]

³Iwɛnɛ po e eri shi a nda Isene ɛtɛ na aka na ga shɛ aka ibɛ o, iwɛnɛ to onongbo na mama njɛ shɛshɛshɛ twa sụ ufwugwo, atwa na kaa du ulwa nu Jɛrusalɛm twa sụ ufwugwo.

⁴Tuhaŋsa ta ata tu kwụlanɛ agwuma keeni atwa tu'ulwa ta ata hwɛɛ.

⁵Ibɛ po aa tumwanganɛ atwa te kwuni nu Dan tutu i ci Biɛ-shiba maa ga ulwa ya te gembi ufwugwo nu Jɛrusalɛm uhwuri gana na aa shana a ulwa ma a njɛ Isene ɛtɛ Tɛkashɛka gana na tu undwa jɛmɛ iwɛ ibɛ.

⁶Nazhɛ Agwuma na anjɛ-ugondu ubwa tumwanganɛ atwa elele, maa ga atumwa ata zhe nu Juda, ti Isrɛl hwɛɛ maa a suyanɛ atwa, ge mbishi aŋ du maa: Ahiɛba atwa Isrɛl, a na bananganɛ na ti'ima ta atwa Siria. Gwure ma ya no ofwo AGWANGWAMA na shɛ Agwatana Abraham. Na Azik, ne Isrɛl, nazhɛ bɛɛ zhɛ du be gwure pi hiŋ.

⁷Ta sha ma ya gana ogwunukwoshi hiŋ keeni atwa Isrɛl a na shanɛ shɛ AGWANGWAMA na shɛ Agwatana ogwunukwoshi aba atwa tɛcara o. Hiɛ kwụbɛ du gana na ti bee peni aŋ ulwapɛ.

⁸Ta shɛshɛpana ma ya gana eshi hiŋ o, ama na hwuga ma unu wa AGWANGWAMA, maa hiɛ zhajɛ nu Umwono ubwa na baa njɛ tijilo tu unyizo-nom nu Jɛrusalɛm, maa hiɛ zhɛbɛ bụ iwɛ maa kede bu na 'yaga ya isɛbwɛ ne hiŋ o.

⁹Yaa shɛ ehi gwure pa AGWANGWAMA, nazhɛ atwa na 'imɛ miaụŋ-mo-bino hiŋ maa a shɛ ajama, zhɛ a mapana aŋ iwɛ maa ɛ gɛnjɛ aŋ maa e jiye na cɛnjɛ tu ga. Iwɛnɛ po AGWANGWAMA na shɛ Agwatana hiŋ mepi iwɛ, baa 'yajɛ kaa inyɛmɛnyɛmɛ. Yaa shɛ ehi gwure pu bwa bi zhɛ ma hi lashɛganana.

¹⁰Atumwa ata tenenji ga ashɛpwụ elele na cɛnjɛ ti Ifrem hwɛɛ, ta ma tu Manasɛ, ee zhe tutu ụlamụ Zɛbulon. Ama atwa ata hiɛnjɛ aŋ ilɛtu aa njɛ aŋ asada.

¹¹Okwo ti yaa shɛ gana ata wa atwa oko a na namɛ nụ ụlamụ Ashɛ, nu una Manasɛ, keeni una Zɛbulon e meme zucinje aa zhajɛ Jɛrusalɛm.

¹²Ukpahiŋ wa Agwatana namɛ na atwa Juda, ibɛ po boo togwu shihaŋsa sha aba, nazhɛ ee leni maa a njɛ iyi nɛ agwuma na anjɛ-ugondu ubwa peni aŋ unu ibɛ tedure nu n-ndumwa ma AGWANGWAMA.

¹³Atwa ufwugwo ụ'wụtụ ulwa nu Jɛrusalɛm ne Biyebi maa a njɛ Isene iyimɛyɛ nɛ zasa Ifucingɛ.

¹⁴Ee mushenji tugwo otukwu-ụrụpɛ ata wa atwa ata go hwoŋzhingo la iturɛre keeni iyi ya arụpɛ aba nu Jɛrusalɛm, ɛɛ 'wɛŋ nu Ulomu Kidron.

¹⁵Ti yaa namɛ ijitɛ umpwa-ni-bɛ-neshi ne Biyebi, nazhɛ oo to arụpɛ Isene Tɛkashɛka na miaụŋ-ma-agwụdụ. Ezuye shɛ onongbo na Alivai a na ta zasa shɛshɛshɛ, nazhɛ aa mama njɛ ya shɛshɛshɛ, nazhɛ ee eri maa o to ụrụpɛ tuhwoŋzhingo nu Umwono wa AGWANGWAMA.

¹⁶A namɛ no shihwolu sha aba gana na tu unu-tupana ibɛ namɛ nu Undwa Moses bụtụ ata ba Agwatana. Alivai shepi mehieŋ mi ijɛ ɛtɛ ya arụpɛ ee peni onongbo, ee zhizhenji mu nu utukwu-ụrụpɛ.

¹⁷Gana na tu ufwugwo wa atwa ata zasa rụmbɛɛ, ibɛ po ee eri shi a kwụna miaụŋ-ma-agwụdụ ni Isene ɛtɛ Tɛkashɛka, ibɛ po Alivai kwunanjɛ aŋ, maa e tileneni AGWANGWAMA agwụdụ ata.

¹⁸Unyama wa atwa na bananjɛ nụ ụlamụ Ifrem, nu una Manasɛ, nu una Isaka, keeni una Zɛbulon, a ta mama njɛ shɛ shɛshɛshɛ o, ama kaa a yɛ waa Isene ɛtɛ Tɛkashɛka. Ama gɛ Hɛzɛkia njɛ adua iwɛ aba, bɛɛ hiɛŋ, ga AGWANGWAMA na zhɛmɛ gengeni bụtụ be elele

¹⁹na shikicinji ahaŋsa ubwa maa 'wa Agwatana, ubwa shɛ AGWANGWAMA na shɛ Agwatana ogwunukwoshi ubwa, okwo ta a zasa bana shɛshɛshɛ te teni cɛŋ nu undwa wo ohwolu ata tijilo, aya gangana aŋ waa tedure ni iwɛ bu tumapa.

²⁰AGWANGWAMA hwụjɛ adua Hɛzɛkia, bee gengeni aŋ ga.

²¹Atwa Isrɛl a na ulwa nu Jɛrusalɛm yɛ iyimɛyɛ ɛtɛ Isene nɛ zasa Ifucingɛ ijitɛ icenje nu unyasa ụ'wụtụ, ibɛ po Alivai, no onongbo a shɛtana AGWANGWAMA na shɛzunga iyi-heri gana na tu ukpahiŋ wa aba namɛ hwɛɛ.

²²Gɛ Hɛzɛkia dumanga Alivai elele na 'yebi tɛzhɛba ta AGWANGWAMA tu'untangana. Iwɛnɛ po ijitɛ icenje ibɛ atwa ata yɛ iyimɛyɛ ɛtɛ ga shɛ urobwo wa aba nɛ ee ge shileni aŋ, ibɛ po ee peni arụpɛ amɛ-olom, oo zhemonjino AGWANGWAMA na shɛ Agwatana ogwunukwoshi aba.

²³Nazhɛ atwa tu'ulwa ta ata leni hwɛɛ aba maa ɛ tɛ zhɛ a yaanana isene ɛtɛ ijitɛ inyɛ icenje, aa yaananɛ iŋ ga ijitɛ ɛtɛ icenje nu unyasa.

²⁴Gɛ Hɛzɛkia agwuma Juda vwɛ inɛ ye eyi akpakwụ-a-ta (1,000), na agwụdụ igbɛɛ-itɛtu-na-akpakwụ-a-ta (7,000) maa ga atwa ata kwụnɛ a yɛ. Nazhɛ anjɛ-ugondu ubwa bwaananɛ inɛ ye eyi akpakwụ-a-ta (1,000) na agwụdụ igbɛɛ-itɛ (10,000) ee keeni aŋ. Onongbo ufwugwo mama njɛ shɛshɛshɛ.

²⁵Atwa elele na banɛ nu Juda, to onongbo, ta Alivai, ta atwa elele na banɛ ni Isrɛl, ta agaiŋ na banɛ na cɛnjɛ ti Isrɛl, ta agaiŋ na jɛjɛ nu Juda, kpaaŋ aba bweji unyasa ụ'wụtụ.

²⁶Atwa na namɛ nu Jɛrusalɛm bweji unyasa ụ'wụtụ, iwɛnɛ po te kwune na aka agwuma Sụlụmụn yɛu Devid agwuma Isrɛl, uuwa i ci aka ata, iyi gɛnɛ ɛtɛ ta njɛ shɛ la ya kwukwuŋ.

²⁷Nazhɛ onongbo na Alivai ishajɛ ee shikekeni, aa lụpɛ AGWANGWAMA maa pana atwa ata uwebiye ubwa. Agwatana kaa hwụjɛ adua aba taa ni ihwɛ ɛtɛ ibwɛ tijilo ya azuba.