Read bassa 2 SHƐRỤKWỤKWỤ SHI YEBI 31 Bible Online

2 SHƐRỤKWỤKWỤ SHI YEBI 31 - bassa bible

2 SHƐRỤKWỤKWỤ SHI YEBI 31

¹Aka na ti Isene ɛtɛ hwuwowu, nazhɛ atwa Isrɛl teni nụ ụshɛpwụ we elele na namɛ nu Juda, ee bwereteji atayɛ ata ee ge shikecenji hwɛɛ, tu ntatanuwaŋ ma ata ee ge meni tuwa ta ata ɛɛ hiɛŋ Ashɛra. Ee hwuŋzetenji du otukwu-ụrụpɛ tuwa hwɛɛ, to ofwo ata aa ga zhɛba tụ. A njɛ ijɛ no ofwo elele nu Juda, ti Bɛnjamin, ti Ifrem, keeni Manasɛ; nazhɛ atwa Isrɛl jiyeji na ashɛpwụ aba, bụtụ bụtụ ji ni ihwɛ ibwɛ.

²Gɛ Hɛzɛkia nanganɛ sasana tunama to onongbo na Alivai iwɛ ugondu wa aba na aa shɛ a na nda. Ugondu ata shɛ ụrụpɛ tuhwoŋzhingo, nụ ụrụpɛ wa amɛ-olom tuta, na tɛzhɛba hwɛɛ, ta ashɛtwa tɛshɛtana keeni a'walụ no shidubo sho shimwono sha amɛ nu umwono na AGWANGWAMA a nama.

³Iyimabiga nɛ agwuma peni iwɛ ụrụpɛ tuhwoŋzhingo na aa ta uvwungwa uvwungwa tu una ụrụmɛ ụrụmɛ, ta arụpɛ na aa ta nụ Ụjita-ụhinjanụ, ta anaa na aa ta ni Isene Upiana Ufwo keeni Nsono me elele mu na mi 'nyeci nu Undwa wa AGWANGWAMA, bu vwɛ iŋ ni iyi nɛ baa 'yajɛ ni ikɛnyi ibwɛ.

⁴Nazhɛ agwuma peni atwa Jɛrusalɛm unu maa ge e suje upwaŋ ata ụ shɛ urobwo wo onongbo na Alivai, iwɛ maa e peni aka aba hwɛɛ nu ugondu tɛnda gana na ti yee 'nyeci nu Undwa wa AGWANGWAMA.

⁵Gunu na ta atwa Isrɛl hwụjɛ n-ndumwa ma ata, e suje apwaŋ aba, iyi izɛgwu nɛ zhɛmɛ, te meni mụ tụ'walụ ta afwafwa, ta manɛbɛ ma buta, ti iswɛ, keeni tụ'walụ te ehilo ti nya, e suje du iyi-a'umpwa[34] iyi elele nɛ aa 'yajɛ te gembi tebiye.

⁶Atwa Isrɛl a na gɛgajɛ na ashɛpwụ a'wụtụ a'wụtụ Juda suje iyi-a'umpwa inɛ, na agwụdụ aba, aa 'waŋnɛ du upwaŋ ụ'wụtụ ee tileneni aŋ AGWANGWAMA na shɛ Agwatana aba swooŋ, ee suteni iŋ yoo to itulu nyakpaa.

⁷E kwuni apwaŋ ata tusuje na Bụtatụ,[35] ee suje aŋ oo sutono uuwa i ci Bicenje.

⁸Aka na ti gɛ Hɛzɛkia, na anjɛ-ugondu ubwa kwụbɛ ugombo iyi nɛ ee suje, aa shɛtanɛ AGWANGWAMA, nazhɛ aa dumanga atwa ubwa Isrɛl.

⁹Gɛ Hɛzɛkia heŋteni onongbo keeni Alivai iwɛ apwaŋ ata to itulu gana ata.

¹⁰Ibɛ uhiu wo onongbo ga Azaria na shɛ bụtụ bu umwamwa Zadok jishijɛ bụ, bɛɛ hiɛŋ, Taa ta atwa ga kwuni la hwayɛ apwaŋ aba tusuje nu Umwono wa AGWANGWAMA, iyimɛyɛ namba i tu waŋnɛ tiya, yaa vwa du duwa. Iwɛnɛ ta AGWANGWAMA peni atwa ubwa uwebiye, ibɛ po atɛ 'yajɛ ijɛ hwɛɛ.

¹¹Gɛ Hɛzɛkia peni aŋ unu maa ga imanganjɛ shimwono shɛ na maa e zweni iyimɛyɛ ɛtɛ na amɛ shigongo shi Umwono wa AGWANGWAMA.

¹²Na amɛ oko ee suje apalajɛma ata, ti iyi-a'umpwa keeni apwaŋ tishilo swooŋ. Ee zweni iyimɛyɛ ɛtɛ upwaŋ, ti iyi-a'umpwa maa kede iyi elele njɛ iŋ o. Ee jeri Bulivai bu ko na ɛɛ hiɛŋ go Konania maa bu na ngbaraka iŋ, ee jeri yɛu-bino bwa ge Shimei maa sha uyebi ubwa.

¹³Nazhɛ agwuma Hɛzɛkia keeni Azaria na shɛ uhiu wo onongbo nu umwono wa Agwatana teri atwa umpwa: gɛ Jɛhiɛl, na Azazia, na Nahat, na Asahɛl, ne Jɛrɛmot, no Jozabad, nɛ Ɛliɛl, ne Ismakia, na Mahat ti gɛ Bɛnaya, maa o no hikokono ugondu Konania keeni yɛu-bino bwa ge Shimei.

¹⁴Go Korɛ yɛu Imna na shɛ, Bulivai na shɛ uhiu wa angbaracɛ Odubo Uwaŋna-banụ Umwono wa Agwatana, ubwa ee peni ugondu wa apwaŋ tukwulangana a na ee sugeni Agwatana tɛlashaga keeni tuhwoŋso ti iyi nɛ aa palaganɛ AGWANGWAMA, keeni apwaŋ tijilo na hwuri kpaaŋ.

¹⁵Alivai na o mbiyono bu ugondu ata na ashɛpwụ anya na onongbo namanjɛ na: ge Idɛn, ne Miniamin, nɛ Jɛshua, ne Shimaiya, na Amaria, tu ga Shɛkania. A pana anya aba Alivai du ta nangwụ gana na tu ugondu wa aba namanjɛ, ta atwa angwụshɛ keeni atwa ufwo.

¹⁶Ama shɛ gana na ta amwamwa aba namanjɛ o. A pana etwenyi elele na ulwa shiywa shɛ tatụ te e meci aŋ kwo kaa uhwuri, anaa na nzeci ma aba mi 'nyeci nu utakada wo ogwunukwoshi aba, a na du kaa 'yajɛ ugondu na aa untanganɛ nu Umwono wa Agwatana gana na to shihwolu sha aba shɛ namanjɛ.

¹⁷E peni onongbo na nzeci ma aba mi 'nyeci nu utakada wo ogwunukwoshi aba ugondu nu gana na ta amwamwa aba namanjɛ. Inɛ ya Alivai i shɛ bụtụ be elele na tuwo shiywa woshi kwo kaa hwuri te e meci bu, aba ee peni ugondu no orubwo orubwo aba.

¹⁸E 'nyeci nzeci ma aba hwɛɛ te eyikwo aba ta miaụŋ ma aba me eyi ta mu na mo o, tu ufwugwo wa atwa na namɛ na aba. Iwɛnɛ po a shɛ atwa na mama 'imɛ maa e meme tileni swooŋ na tɛcara aka elele.

¹⁹Onongbo na namɛ na ashɛpwụ a'wụtụ a'wụtụ, aba ee peni umwamwa Aron, keeni ashɛpwụ na namɛ ne shihilo sha aba. Apata du ee 'nyeci nzeci ma amwamwa etwenyi na ee eni ugondu iyimɛyɛ ɛtɛ tuhwoŋso etwenyi na namɛ na amwamwa onongbo ta a na Alivai hwɛɛ.

²⁰Gɛ Hɛzɛkia njɛ iyi nɛ zhɛmɛ, nɛ teni cɛŋ, nɛ kaa shɛ iyi tɛcara ne eshe AGWANGWAMA na shɛ Agwatana ubwa tutu rungwutwonu Juda hwɛɛ.

²¹Iyi elele 'yaganɛ bu eshe, iwɛnɛ tu baa njɛ iyi elele nu ugondu umwono wa Agwatana ubwa tedure nu unu undwa tuhwuga keeni onu-tupana. Baa 'wa kaa Agwatana ubwa na amɛ oko hwɛɛ.