Read bassa 2 SHƐRỤKWỤKWỤ SHI YEBI 33 Bible Online

2 SHƐRỤKWỤKWỤ SHI YEBI 33 - bassa bible

2 SHƐRỤKWỤKWỤ SHI YEBI 33

¹Ga Manasɛ namɛ shiywa umpwa-na-shɛba-shi-yebi te e meci bu, nazhɛ bee kwuni tugwama tiya. Baa yɛ tugwama nu Jɛrusalɛm Shiywa dupu-na-shɛba-shɛ-ta.

²Bɛ njɛ AGWANGWAMA iwɛwɛ, iwɛnɛ tu baa 'wa iyi-tupwaŋ nɛ edenji ata AGWANGWAMA unzenji la atwa Isrɛl a ndangana.

³Bi meeneni ofwo ata oto-ụrụpɛ a zhɛba la tuwa ta aba, anaa na bishi bwa gɛ Hɛzɛkia hwuŋzwotongwo la. Boo mo otukwu-ụrụpɛ maa a na taga itɛtɛnuwɛŋ Beal ụrụpɛ. Boo mo ntatanuwaŋ mu tuwa to o ta ata ɛɛ hiɛŋ Ashɛra, baa zhɛba tu mkpasụ.

⁴Boo mo otukwu-ụrụpɛ tuwa nu Umwono wa AGWANGWAMA, no ofwo ebe AGWANGWAMA hiɛŋ, Nu Jɛrusalɛm izeci mi zhɛ ya nama unyizo-nom.

⁵Boo mo otukwu-ụrụpɛ na ɛɛ zhɛ na taga mkpasụ arụpɛ no okpogwu Umwono wa AGWANGWAMA hwɛɛ aba eyebi.

⁶Boo to ụrụpɛ tuhwoŋzhingo na miaụŋ mu bwa me eyi nu Ulomu Hinom, ba nda tuwa te tishino hwɛɛ, baa zhagana ashɛjɛ keeni ekwupenyi, ta atwa e'uye. Iwɛwɛ nɛ baa njɛ AGWANGWAMA gembi tebiye, ibɛ po AGWANGWAMA njɛ isɛbwɛ nu bwa.

⁷Bee shepi itɛtɛnuwɛŋ nɛ baa njɛ bee shikicinji iŋ nu Umwono ata wa Agwatana na AGWANGWAMA mbishi la Devid keeni yɛu ibwɛ go Sụlụmụn, bɛɛ hiɛŋ, Nu Umwono ga namɛ nu Jɛrusalɛm ubwa Ngee teri na amɛ cɛnjɛ ta alamụ Isrɛl hwɛɛ maa apata Ngɛɛ zhɛ mo shilo izeci mi unyizo-nom.

⁸Yaa shɛ atwa Isrɛl hwụjɛ-unu mu, aa untanganɛ kaa unu mu tụpana, keeni andwa mi, to shikpogo shi mi; a na Ngee peni la ogwunukwoshi aba tedure ni yɛu mi ugondu go Moses, asha nazhɛ Ngaa zha shɛ mo lono maa e becinji aŋ ya na cɛnjɛ tu ga Ngee peni la ogwunukwoshi aba.

⁹Ga Manasɛ 'yagajɛ atwa Juda keeni atwa na jɛjɛ nu Jɛrusalɛm maa a njɛ iwɛwɛ nɛ gembi uhwuri okwo inɛɛ nɛ edenji na AGWANGWAMA unzenji la atwa Isrɛl na cɛnjɛ ta ata nazhɛ atwa ubwa ci apata a nda la.

¹⁰Okwo ta AGWANGWAMA tɛtaganɛ Manasɛ keeni atwa ubwa unu, ama a lacɛ acɛbɛ tishilo.

¹¹Ibɛ po AGWANGWAMA leneni eberezhe ejeshi agwuma Siria maa e tefuleji Juda. Aa 'imɛ Manasɛ ee shiyeni bu akama ni inyɛnu, oo to bu shigbo shɛ ɛtumburɛ, ee shepi bu ee hwuri Babulon.

¹²Aka na tu baa namɛ ne tiriri ta ata, nazhɛ bee meme zucinje tebiye, bee gwure bee leyiteni AGWANGWAMA na shɛ Agwatana ogwunukwoshi ubwa.

¹³AGWANGWAMA hwụjɛ adua Manasɛ, bee peni bu ajɛshɛgwa adua ubwa no tulono tu na bee leneni bu maa gwulo nu Jɛrusalɛm maa yanana tugwama tu bwa. Inɛ ɛtɛ leni maa ga Manasɛ kwụbɛ maa AGWANGWAMA ubwa shɛ Agwatana gom.

¹⁴Ga Manasɛ keeni tuma tu uba ata u tupohondo namɛ nụ ụshɛpwụ ata Devid uzoto geri bu uwaŋna-twonuo Gihon. Te kwuni nu ulomu ata dongonu umɛzhinjɛ ata namɛ tuzuba to Odubo Bijana uuwa i ci ụshɛpwụ ata ɛɛ hiɛŋ Ofɛl. Bee tilegeni eberezhe ejeshi a na untanganɛ orubwo ejeshi na ashɛpwụ ata Juda ee kepenji nu uba.

¹⁵Bee becenji tuwa ta anya edenji keeni ntatanuwaŋ ma ata bee tecenji la nu Umwono wa AGWANGWAMA. Bee hwuŋzetenji otukwu-ụrụpɛ ata aa taga la tuwa arụpɛ, a na ee mengeni ni ishɛmɛ ɛtɛ oo mo Umwono wa Agwatana nu Jɛrusalɛm. Bee becenji ijɛ ɛtɛ hwɛɛ baa 'wɛŋ iŋ no tupohondo tụ ụshɛpwụ ata.

¹⁶Bee gwuricinje utukwu-ụrụpɛ ata aa taga la AGWANGWAMA ụrụpɛ, boo to ụrụpɛ wa amɛ-olom tụ ụrụpɛ wa a'walụ nu bwa. Bee peni atwa ata Juda unu hwɛɛ aba maa ga a na zhɛba ya AGWANGWAMA na shɛ Agwatana Isrɛl.

¹⁷Okwo ta atwa ata ta ta arụpɛ no ofwo ata zeteji, ama tuba AGWANGWAMA kiri aa taga aŋ.

¹⁸Iyi inyɛ nɛ ga Manasɛ ndanjɛ kpaaŋ, ta shidua shɛ na baa njɛ no ofwo Agwatana ubwa, te tigesere tu na akwụbɛ-uhwaŋna dumanganɛ bụ ni izeci ya AGWANGWAMA na shɛ Agwatana Isrɛl. E 'nyeci iŋ hwɛɛ nu utakada shɛrụkwụkwụ shɛ shɛgwuma shi Isrɛl.

¹⁹E 'nyeci adua na baa njɛ, na ajɛshɛgwa na Agwatana peni bu hwɛɛ, ti iwɛwɛ nɛ baa ndanjɛ nazhɛ baa jɛshɛrɛjɛ, to ofwo tuwa tɛzhɛba na bee mengeni, tu ntatanuwaŋ mu Ashɛra mu na boo mo, ta-tuwa ta ata baa zhɛbɛ. E 'nyeci iŋ hwɛɛ nu utakada shɛrụkwụkwụ sha akwụbɛ-uhwaŋna.[36]

²⁰Ga Manasɛ 'wi gana eshi ubwa, ee ni bu ni ihwɛ ya agwuma, nazhɛ yɛu ibwɛ ga Amon yɛ tugwama no ohwolu ubwa.

²¹Ga Amon namɛ shiywa woshi-na-shɛba-shi-yebi te e meci bu, nazhɛ bee kwuni tugwama tiya. Baa yɛ tugwama nu Jɛrusalɛm shiywa shi yebi.

²²Bɛ njɛ AGWANGWAMA iwɛwɛ gana bishi bwa ga Manasɛ, baa zhɛbɛ du tuwa ta ata bishi bwa zhɛbɛ la.

²³Ama bi meme zucinji shi maa gwure pa AGWANGWAMA gana bishi bwa o; bɛ njɛ kaa iwɛwɛ duwa uhwuri bishi bwa.

²⁴Anjɛ-ugondu Amon aba heŋshi maa ga kwụnɛ bụ, aa kwụnɛ bụ ga ni ihwɛ ibwɛ.

²⁵Atwa cɛnjɛ ta ata aba kwụnɛ atwa elele na kwụnɛ la agwuma Amon, nazhɛ ee peni yɛu ibwɛ go Josia tugwama tu bwa.