Read bassa 2 SHƐRỤKWỤKWỤ SHI YEBI 36 Bible Online

2 SHƐRỤKWỤKWỤ SHI YEBI 36 - bassa bible

2 SHƐRỤKWỤKWỤ SHI YEBI 36

¹Nazhɛ atwa cɛnjɛ ta ata shepi yɛu Josia go Johoahaz, ee peni bu tugwama te bishi bwa nu Jɛrusalɛm.

²Go Johoahaz namɛ shiywa woshi-na-shɛba-shɛ-tatụ te e meci bu, nazhɛ bee kwuni tugwama tiya. Baa yɛ tugwama nu Jɛrusalɛm ipiɛnɛ itɛtu.

³Nazhɛ Agwuma Ijipti ge Niko 'imɛ bụ, baa njɛ bụ bujama, iwɛbɛ po ge Niko njɛ atwa Juda maa a na tụpa bụ ụdalụ azụrụfa arinya dipi-yebi nu uzhɛnarɛya urinya uko.

⁴Ibɛ po agwuma Ijipti peni yɛu-bino Johoahaz gɛ Ɛliakim tugwama tu Juda keeni Jɛrusalɛm. Bee sheyinji izeci ibwɛ ti ge Jehoiyakim. Ge Niko tuba shepi Johoahaz ni Ijipti.

⁵Ge Jehoiyakim namɛ shiywa woshi-na-shɛba-shɛ-ta te e meci bu, nazhɛ bee kwuni tugwama tiya. Baa yɛ tugwama nu Jɛrusalɛm shiywa umpwa-nu-boo-ko. Bɛ njɛ AGWANGWAMA na shɛ Agwatana ubwa iwɛwɛ.

⁶Gɛ Nɛbukadnɛza agwuma Babulon zhajɛ bee tefuleji Juda, baa 'imɛ Jehoiyakim boo to bu shigbo bee shepi bu bee hwuri Babulon.

⁷Gɛ Nɛbukadnɛza suji uduciya Umwono wa Agwatana bee tileni ni ihwɛ ibwɛ i tugwama nu Babulon.

⁸Iyi elele nɛ ge Jehoiyakim njɛ na tugwama tu bwa, ta tupwaŋ tu na baa ndanjɛ hwɛɛ, i 'nyeci nu utakada shɛrụkwụkwụ shɛ shɛgwuma shi Isrɛl keeni ma shɛ shɛ Juda. Nazhɛ yɛu ibwɛ ge Jehoiyakin yɛ tugwama no ohwolu ubwa.

⁹Ge Jehoiyakin namɛ shiywa umpwa-na-shɛba-shɛ-tụndatụ[37] te e meci bu, nazhɛ bee kwuni tugwama tiya. Baa yɛ tugwama nu Jɛrusalɛm ipiɛnɛ itɛtu ni ijitɛ umpwa. Bu ndaananɛ du AGWANGWAMA iwɛwɛ.

¹⁰Aka na tu ubwaza hiŋ, agwuma Nɛbukadnɛza 'imɛ Jehoiyakin baa njɛ bụ bujama nu Babulon, bee sugeneni du uduciya Umwono wa AGWANGWAMA. Nazhɛ gɛ Nɛbukadnɛza peni yɛu-bino Jehoiyakin gɛ Zɛdɛkia tugwama tu Juda, tu Jɛrusalɛm du.

¹¹Gɛ Zɛdɛkia namɛ shiywa woshi-nu-boo-ko te e meci bu, nazhɛ bee kwuni tugwama tiya. Baa yɛ tugwama nu Jɛrusalɛm shiywa umpwa-nu-boo-ko.

¹²Bɛ njɛ AGWANGWAMA na shɛ Agwatana ubwa iwɛwɛ, baa lacɛ maa meme zucinje maa shɛlaga n-ndumwa mu na AGWANGWAMA mbishi Jɛrɛmia na shɛ bigesere.

¹³Gɛ Zɛdɛkia to tigezhe no ofwo agwuma Nɛbukadnɛza na njɛ bụ la ni iji maa ta Agwatana maa bi zhɛ na hwuga-unu ubwa. Boo to ya tɛshɛshɛpana baa lacɛ maa jɛshɛrɛga-ahaŋsa maa gwure no ofwo AGWANGWAMA na shɛ Agwatana Isrɛl.

¹⁴Shɛ ubwa kiri o, Ehiu onongbo kpaaŋ, keeni atwa vwɛ, a zasa cara sasana o, aa 'wananụ iyi-tupwaŋ nɛ anya edenji ata a nda, aa zhɛba tuwa ta aba. Ee heshigeni Umwono wa Agwatana, na AGWANGWAMA ga nduwa la tijilo ni ikɛnyi ibwɛ nu Jɛrusalɛm.

¹⁵AGWANGWAMA na shɛ Agwatana ogwunukwoshi aba ụranjɛ aŋ egesere ubwa tutumwananɛ maa a na tɛtagana atwa ubwa unu, iwɛnɛ tu baa 'yajɛ uwanyi wa aba keeni uwanyi Umwono ubwa.

¹⁶Ama a nda atumwa ata Agwatana asada, aa hinga egesere ubwa ilɛtu, aa ngbaracɛ n-ndumwa mu bwa cwɛŋ, uuwa i ci aka na AGWANGWAMA 'yajɛ isɛbwɛ na atwa ata tebiye. E eri shi kaa a banangana ya o.

¹⁷Ibɛ po AGWANGWAMA suyananɛ aŋ agwuma Babulon, baa sukakanɛ aŋ. Agwuma ata kwụnɛ esemberi Juda, ta anaa na zweni taa na amɛ ohwolu tijilo na namɛ nu umwono wa Agwatana. Bɛ njɛ shɛ inyɛmɛnyɛmɛ bụtụ be elele o, te esemberi, to showo, tu n-nyarɛ tu n-ndawuŋ. Agwatana suji aŋ hwɛɛ bee utegeni Nɛbukadnɛza.

¹⁸Agwuma ata Babulon suji i'wɛŋni'wɛŋni umwono wa Agwatana, tu uduciya Umwono wa AGWANGWAMA, keeni uduciya ihwɛ ya agwuma ti inɛ ya anjɛ-ugondu ubwa, bee hwuri nu Babulon.

¹⁹Ee hwoŋzhinji Umwono wa Agwatana, tụ ụshɛpwụ ata ụ'wụtụ, tu nhwaŋ ma shɛgwuma hwɛɛ, ta aduciya ibɛ, ee bweji uba Jɛrusalɛm. Aa njɛ du iyi elele nɛ ga 'yajɛ ụjɛrụma ufwu kpaaŋ.

²⁰Bee suji atwa elele na ge benengeni tụkwụna ta ata, bee hwuri Babulon, baa njɛ aŋ miaụŋ mu bwa mu ugondu hwɛɛ, ta atwa umwamwa ubwa, uuwa i ci aka na agwuma Pɛsia ishijɛ.

²¹I teni iwɛ maa iyi nɛ AGWANGWAMA jɛmɛ tedure ne bigesere gɛ Jɛrɛmia i sɛ. Bi hiɛŋ, Cɛnjɛ tu ga ti zhɛ ta sha osombo shiywa dupu-nu-woshi, maa tu to ụhinjanụ, iwɛ shiywa sha ata shɛ ụhinjanụ aa ga untanganɛ shɛ.

²²Nu uywa ata ga Sairos agwuma Pɛsia yɛ tugwama, nazhɛ AGWANGWAMA njɛ maa ge iyi nɛ baa dumwa la tedure nu unu Jɛrɛmia bigesere i sɛ. Ubwa njɛ maa ga Sairos peni-unu ata, maa 'nyata uŋ du nu utakada, maa tumwangana uŋ no ofwo elele maa a rɛcɛ uŋ, maa atwa elele hwụjɛ maa:

²³Agwuma Pɛsia, ga Sairos, ubwa peni ga unu gana ata. Bɛɛ hiɛŋ AGWANGWAMA na shɛ Agwatana azuba, ubwa m peni cɛnjɛ-ta-tugwama tu unyizo kpaaŋ, nazhɛ bee n eni maa ma mana bụ umwono nu Jɛrusalɛm na namɛ na cɛnjɛ tu Juda. Ahiɛba na hiɛ shɛ atwa ubwa kpaaŋ, zhaga ma apata. Ga AGWANGWAMA na shɛ Agwatana hiŋ nama ne hiŋ.