Read bassa 2 SHƐRỤKWỤKWỤ SHI YEBI 4 Bible Online

2 SHƐRỤKWỤKWỤ SHI YEBI 4 - bassa bible

2 SHƐRỤKWỤKWỤ SHI YEBI 4

¹Baa njɛ utukwu-ụrụpɛ nɛ ɛtumburɛ, ụnjɛswa tu uholo ubwa ụ shɛ imbele i'ɛlɛ woshi, uzoto ubwa ụ shɛ imbele i'ɛlɛ umpwa.

²Bɛ njɛ du okwokwo ɛtumburɛ a na me'ilwo ma aba mɛ shɛ imbele i'ɛlɛ itɛ, uholo wa aba ụ shɛ imbele i'ɛlɛ umpwa, uhwohwo na ee menji u rungwutwonu aŋ ụ shɛ imbele i'ɛlɛ talacɛ.

³E peteni okwokwo[5] ata na aba ufwoto inɛ ye eyi nɛ aa njɛ iwɛlɛ iyebi tutu rungwutwonu, yaa shɛ imbele i'ɛlɛ talacɛ. O togwu tuma to okwokwo ata ti inɛ ɛtɛ, taa shɛ tu ko.

⁴E peteni okwokwo ata na aba inɛ ɛtɛ umpwa-ni-bɛ-yebi. Itɛtu ngbaracɛ tuzuba, itɛtu ngbaracɛ uwaŋna-twonuo, itɛtu ngbaracɛ tuta, itɛtu ngbaracɛ uwaŋna-banụ. Yoo momo pononu i'undu hwɛɛ ibɛ, okwokwo ata tuba patanɛ na ashashɛ ibɛ.

⁵Me'inswo mo okwokwo ata mu hwuri okwokwo elele na inshi i ci okwo kpalụ tatụ. Tuma ta aba tu barɛshɛgwa unu gana modwodwo mo odurungwu. Ugombo okwokwo ata eri wa la meni mu nhiŋlwo ugbaa-na-akpakwụ-a-ta (3,000).

⁶Baa njɛ du agbamgbam umpwa maa o no zwono meni mu na ɛɛ zhɛ na nyashanga i'wɛŋnɛ iyi ụrụpɛ tuhwoŋzhingo. E shi agbamgbam ata a ta tuta, ee shi a ta tuzuba. Meni ma ata mu zweni no okwokwo ata a'wụtụ mɛ shɛ iwɛ maa onongbo na nda inyɛshɛnjɛ.

⁷Baa njɛ eteburu-asụtụla umpwa na azhɛnarɛya nu gana na ta ti'imanga ti ibɛ tu ga namɛ. Bee shi eteburu ata a ta nu umwono ata wa Agwatana ugata ụ'wụtụ. Bee suji eteburu ata a ta, bee tileni tuta, bee tileni a ta tuzuba.

⁸Bɛ njɛ du eteburu anya umpwa, bee shi eteburu ata a ta tuta bee shi eteburu ata a ta avwɛ tuzuba nu umwono ata wa Agwatana. Baa njɛ du agbamgbam gwụmwatangwụ dipi-yebi (100) na azhɛnarɛya.

⁹Baa ndanɛ onongbo ukpogwu keeni ukpogwu ụ'wụtụ, aa ndanɛ okpogwu ata shidubo. Ee sweni akpa shidubo sha ata ɛtumburɛ.

¹⁰Bee shi okwokwo ata nu usugwulumi ata namɛ nu uwaŋna-banụ umwono ata namɛ no tupohondo tu umwono ata wa Agwatana.

¹¹Ge Hiram mo nkwasha, tu n-ngowo, ta agbamgbam gembenji ta a na gwụmwatangwụ. Bu hwuwi ugondu we elele na baa ga shɛ ba ndana agwuma Sụlụmụn nu umwono ata wa Agwatana:

¹²Baa njɛ atukpa eyebi keeni nkwodo mi yebi, Baa njɛ okwukwusu eyebi, bee peteni ni ihiŋhiŋ nkwodo ma ata mi yebi. Baa njɛ shɛgba shɛ tụpatakwụ patakwụ shi yebi maa shɛ njɛ nkwodo ma ata mɛ shɛ gana okwukwusu, mu gata mu patanɛ na azuba atukpa ata eyebi tisemberi.

¹³Baa njɛ apomɛgranati akpakwụ-eyebi (400) nɛ ɛtumburɛ shɛwala shi yebi iwɛ shɛgba sha ata shɛ tụpatakwụ patakwụ shi yebi, tumomo potongonu ta apomɛgranati ata ti yebi, tɛ shɛ iwɛ shɛgba sha ata shɛ tụpatakwụ patakwụ, ana ana, iwɛ maa a njɛ nkwodo mo okwukwusu ata eyebi a gata patanɛ na azuba atukpa ata tisemberi.

¹⁴Baa njɛ agbamgbam keeni iyi nɛ maa a na patangana aŋ.

¹⁵To okwokwo ata, ni inɛ ɛtɛ ye eyi umpwa-ni-bɛyebi aa njɛ maa okwokwo ata patana na azuba ibɛ.

¹⁶Tu nkwasha, tu n-ngowo, to okwoshi nsabwa keeni i'wɛŋnɛ ibwɛ kpaaŋ. Go Huram-abi na shɛ uhiu wa anjɛ-ugondu i'ɛlɛ ndanjɛ ijɛ hwɛɛ baa lụbɛ iŋ nɛ ɛtumburɛ tebiye maa a njɛ uhwara ni ibɛ nu umwono ata wa AGWANGWAMA.

¹⁷Agwuma leni maa a njɛ ijɛ hwɛɛ nu ugodo cɛnjɛ-ti-i'wɛŋnɛ na namɛ na ashashɛ Sukot nu Zaretan[6] nu udadarɛ Jodan.

¹⁸Go Sụlụmụn njɛ ijɛ te gembi ufwugwo tebiye, iwɛbɛ po ee eri shi a mapa ugombo wɛ ɛtumburɛ na njɛ ugondu ata kpaaŋ.

¹⁹Na azhɛnarɛya tụrụmbɛɛ go Sụlụmụn njɛ i'wɛŋnɛ ɛtɛ umwono wa Agwatana kpaaŋ: tu utukwu-ụrụpɛ, tu uteburu ata aa patana akara agba Agwatana;

²⁰tu uteburu-ụsụtụla, ta asụtụla ata aa njɛ na azhɛnarɛya na pilanụ, asụtụla ata shɛ o no gorogo no ohwolu ata Tijilo gana na te e sekekeni aŋ,

²¹to modwodwo ma ata aa ndanjɛ ofwo ata tisemberi maa a pilanụ, ta asụtụla, ta shɛpashɛ sha ata; na azhɛnarɛya na hwuri a na vwɛ na tụrụmbɛɛ aa njɛ iŋ hwɛɛ,

²²ta shilumekeshi sho tuzuzu ta asụtụla tuhwuŋtongono, ta agbamgbam a'wụtụ a'wụtụ, ti iyi meni tizhizhongo, ti iyi nɛ oo zwono manɛbɛ na asụtụla keeni ejejebi ulwa tutala, na azhɛnarɛya aa njɛ ijɛ ɛtɛ kpaaŋ. Ee sweni akpa tupohondo umwono ata wa Agwatana na a na ofwo ata Tijilo me Tijilo azhɛnarɛya.