Read bassa 2 SHƐRỤKWỤKWỤ SHI YEBI 6 Bible Online

2 SHƐRỤKWỤKWỤ SHI YEBI 6 - bassa bible

2 SHƐRỤKWỤKWỤ SHI YEBI 6

¹Nazhɛ go Sụlụmụn hiɛŋ, AGWANGWAMA, bi hiɛŋ, bi zhɛ ba nama ne tishi to odomu.

²M bu mwonuo kaa umwono ụjɛrụma na gembi, ubwa shɛ ofwo ata maa nama unyizo-nom.

³Nazhɛ agwuma jɛshɛrɛjɛ baa panɛ tusotulonu ta atwa Isrɛl na shikekeni apata hwɛɛ eshe, bee peni aŋ uwebiye.

⁴Nazhɛ bɛɛ hiɛŋ, Zhemonjino ma AGWANGWAMA na shɛ Agwatana atwa Isrɛl! Bɛ njɛ iyi nɛ bee shileni la bishi mi ge Devid unu nu unu ubwa, nu gana na bee mbishi bu la, bɛɛ hiɛŋ,

⁵Te kwune na aka na Ngɛɛ bɛcinjɛ la atwa mi na cɛnjɛ ti Ijipti uuwa i ci aka ga, i zasa olugwo elele na Ngee teri maa e m meni umwono, i zasa du kaa bụtụ be elele na Ngee teri maa sha b'iywa ba atwa mi Isrɛl o.

⁶Ama N teri ya Jɛrusalɛm maa ụ shɛ ofwo na izeci mi zhɛ ya nama, Ngee teri Devid maa sha agwuma atwa mi Isrɛl.

⁷I namɛ la na amɛ Bishi mi ge Devid maa ma umwono iwɛ izeci ya AGWANGWAMA na shɛ Agwatana Isrɛl.

⁸Ama AGWANGWAMA hiɛŋ bishi mi ge Devid, I zhɛmɛ ta bu 'yajɛ tukwulana na amɛ bụ maa m meni umwono,

⁹ama okwo ti yaa shɛ bwonu, shɛ gabụ bi zhɛ ba ma umwono ata o. Yɛu bu ye eyi nɛ ebi meci ni ikɛnyi bu, ubwa zhɛ ma m mana umwono ata.

¹⁰AGWANGWAMA kaa untanganɛ unu ata ubwa tishilo: Ibɛ po Ngaa yɛ ga tugwama ti Isrɛl no ohwolu bishi mi, Ngoo mwonuo kaa AGWANGWAMA na shɛ Agwatana Isrɛl umwono ata ya.

¹¹Ngoo shiwo du kaa Ikpɛtɛ ɛtɛ Unu-tutwa nɛ AGWANGWAMA twa la unu na atwa Isrɛl apata.

¹²Nazhɛ go Sụlụmụn zhe bee shikeni nu umbe utukwu ata ụrụpɛ wa AGWANGWAMA, geri-be-eshe bo tusotulonu ta ata ta atwa Isrɛl hwɛɛ, bee suji i'ɛlɛ ibwɛ na azuba na adua.

¹³Go Sụlụmụn mo ogbudu ɛtumburɛ, ụnjɛswa wa aba keeni uholo wa aba ụ shɛ avwuna ecenje na ashashɛ, uzoto wa aba ụ shɛ avwuna eneshi na ashashɛ. Bee munji ogbudu ata no ofwo ata bụtụ be elele eri ba kwụba bụ. Ogbudu ata kaa namɛ na ashashɛ ukpogwu ata u tupohondo. Bee kwuzhi no shilulo shɛ bwa, bee suji i'ɛlɛ ibwɛ na azuba, ne eshe tusotulonu ta atwa Isrɛl kpaaŋ.

¹⁴Bɛɛ hiɛŋ, Oo AGWANGWAMA na shɛ Agwatana Isrɛl, I zasa tuwa te elele tɛ shɛ gana bụ, okwo na azuba kwo kaa nu unyizo. Aka na atwa bụ a bu namanɛ na ahaŋsa oko, ba ndana aŋ iyi nɛ abu twa-unu na aba, obo lubo aŋ kaa duwa.

¹⁵Gabụ kaa bụ ụrɛcɛngwa iyi nɛ ebi shileni la yɛu bu ugondu nɛ shɛ bishi mi ge Devid unu. Abu nduwa kaa du iyi elele nɛ abɛ jɛmɛ la hwɛɛ ni i'ɛlɛ bu hwayɛ ga.

¹⁶Gabụ AGWANGWAMA na shɛ Agwatana Isrɛl, ụrɛcɛnga sasana unu ata ebi shileni la yɛu bu ugondu nɛ shɛ bishi mi, ɛbi hiɛŋ bụ, Bi zha shɛ ba vwunga kwukwuŋ bụtụ na zhɛ na ya tugwama ti Isrɛl nu ukpogwu bụ, ti yaa shɛ miaụŋ mụ bụ me eyi mi zhɛ ma untangana undwa mu we elele ne eshe mi gana na ta abụ untanganɛ la.

¹⁷Hwuwayɛ go, oo AGWANGWAMA na shɛ Agwatana Isrɛl, ge iyi elele nɛ ebi shileni la yɛu-ugondu bu ge Devid unu i sɛ gana ata.

¹⁸Oo Agwatana, bi eri ga tuba ba nama hŋ na ashashɛ atwa nu unyizo ga? Azuba hwɛ hwɛɛ a bu twa sụ maa nama o, ce tuba umwono ga Ngee bi meni eri ma bu twa yaa?

¹⁹Oo AGWANGWAMA na shɛ Agwatana mi, hwulaga waa adua na yɛu gɛ bu ugondu ya nda no ofwo bu maa peni abashɛ n'ungwa mi mi maa n ndanɛ iyi nɛ Ama bụ tabwa iwɛ ibɛ na adua mi.

²⁰Ge eshe bu na ngbaraka umwono ga, tụ ụjita tu uwaŋna, aba shɛ ofwo ata ebi teri maa izeci bu nama. Na shɛlaga iwe mi Gamba yɛu gɛ bu ugondu aka na Ngaa panɛ eshe mi geri bu uwmono ga, ta Ama nda adua.

²¹Na hwuga tutabwa ti yɛu gɛ bu ugondu keeni ma tu tu atwa bu Isrɛl na aka na atu panɛ eshe tu geri bwa, ata nda adua. Na hwuga adua tu ni ihwɛ ɛtɛ bu ya azuba maa na tu gangana.

²²Yaa shɛ bụtụ bu ko njɛ binya bwa iwɛwɛ, aa shapɛ bụ nu utukwu-ụrụpɛ bụ na namɛ nu umwono ga maa ta-tuwa,

²³asha shɛlaga ta abu namɛ na azuba maa dumanganɛ miaụŋ mụ bụ mu ugondu ụshɛrɛya ata. Pana bụtụ be elele na n-ndumwa mụ wụmɛ ulwapɛ te teni cɛŋ ni iyi nɛ baa njɛ, maa peni bụtụ na n-ndumwa mɛ zhɛmɛ ụzhɛ ubwa.

²⁴Yaa shɛ atwa i'ime lasụ atwa bụ Isrɛl, iwɛnɛ ta a bɛ njɛ iwɛwɛ, yaa shɛ kaa aa jɛshɛrɛjɛ aa bu zhaganɛ nu umwono ga, ne timeme zucinje, aa bụ tabwa na adua maa gengeni aŋ,

²⁵asha shɛlaga iwɛ ya aba ta abu namɛ na azuba. Gangana atwa bụ iwɛwɛ ya aba maa gwuricinje aŋ na cɛnjɛ tu na ebi peni aŋ la te kwune no ogwunukwoshi aba.

²⁶Aka na abu nyashɛ atwa bụ eshilo, iwɛnɛ ta a bɛ njɛ iwɛwɛ, yaa shɛ aa jɛshɛrɛjɛ-ahaŋsa, aa zhajɛ ee peni eshe geri bu umwono ga, aa nda adua ni izeci bu, iwɛnɛ ebi peni aŋ ụbaụta,

²⁷asha shɛlaga iwɛ ya aba taa na azuba maa gengeni miaụŋ mụ bụ mu ugondu iwɛwɛ ya aba, aba shɛ atwa ga Isrɛl, maa mbisegeni aŋ maa a na nda iyi nɛ teni cɛŋ. Nazhɛ lono maa eshilo ngbeni aŋ na cɛnjɛ tu ga tụ bụ ebi peni aŋ maa tɛ shɛ ma ta ba tutuu.

²⁸Yaa shɛ imunɛ layɛ na cɛnjɛ tu ga, okwo yaa shɛ ụngwụ na wo mburusonu, kwo kaa ovworo, kwo kaa a'nywa, kwo kaa ugarɛrɛ, kwo kaa yaa shɛ atwa i'ime ya aba sukakanɛ aŋ na ashɛpwụ aba, okwo yaa shɛ igwumɛgwumɛ i namanɛ atwa bu, kwo kaa tishikpe te elele;

²⁹Yaa shɛ bụtụ be elele na amɛ atwa ga bụ kwo kaa atwa bụ Isrɛl hwɛɛ sakanɛ i'ɛlɛ ibwɛ geri bu umwono ga bụ na adua na banɛ na amɛ ubwa oko na tugwumana tụ ụbaụta wa aba,

³⁰asha hwuga adua aba, shɛlaga iwɛ ya aba ta abu namɛ ni ihwɛ ɛtɛ bu taa na azuba maa gengeni aŋ. Ndana bụtụ bụtụ te teni cɛŋ ni iyi elele nɛ baa njɛ, iwɛnɛ po gobuko gba bi mepi shɛmɛ sha atwa kpaaŋ,

³¹iwɛ maa atwa bụ na bụ sụma inyɛsɛ maa a na hwuga-unu bu aka elele ta a namɛ na cɛnjɛ tu na ebi peni ogwunukwoshi tu.

³²Yaa shɛ bụtụ na namɛ nyapadụ taa dụlụ na kaa shɛ shɛ bụtụ bụ bi Isrɛl hwụjɛ iwɛ izeci gɛ bu i'wɛtwɛ keeni ugondu ukpahiɛŋ na aba ndangana nu u'ala ga bụ ukpahiŋ, baa zhajɛ maa nda shidua nu umwono ga,

³³asha shɛlaga adua ubwa na azuba no ofwo ata abu namɛ, hwuga adua ubwa maa ndanɛ bụ iyi nɛ baa bụ lụpa. Iwɛ maa atwa unyizo hwɛɛ e mepi izeci bu, maa a na bu sụma inyɛsɛ gana atwa bụ Isrɛl. Nazhɛ ɛɛ zhɛ a mapa maa nu umwono ga Ngoo mo aa shɛ a na suyana izeci bu.

³⁴Aka na abu tumwanɛ atwa bụ maa e zhe e jeshi atwa i'ime ya aba, yaa shɛ aa njɛ adua aa bu tabwa, no ofwo elele na aa namɛ, aa panɛ eshe aba geri bụ ụshɛpwụ ga ebi teri, na kaa umwono ga Ngee bi meni shikeni,

³⁵asha na shɛlaga shidua sha aba keeni tutabwa ta aba, na azuba maa na pana aŋ iyi nɛ aa bụ lụpɛ.

³⁶Yaa shɛ kaa aa bɛ njɛ iwɛwɛ, iwɛnɛ ti yaa zasa bụtụ be elele na njɛ shɛ iwɛwɛ. Nazhɛ ebi leni maa atwa i'ime ya aba lasụ aŋ na amɛ bụ tuhashɛganụ, maa a 'imɛ aŋ a shɛ ajama na cɛnjɛ ti nya, okwo ta a dụlụmɛ kwo kaa to o gwumwonu,

³⁷yaa shɛ aa jɛshɛrɛjɛ-ahaŋsa na cɛnjɛ ta ata aa shɛ ajama, aa njɛ adua no ofwo bu, aa bụ tabwa, ee leni-unu iwɛwɛ ya aba, ɛɛ hiɛŋ, Tɛ njɛ iwɛwɛ, atu 'wanjɛ, atɛ njɛ iyi tugworozwo.

³⁸Yaa shɛ aa jɛshɛrɛjɛ-ahaŋsa na shɛmɛ sha aba gom na cɛnjɛ ta ata ee suji aŋ aa njɛ ajama, aa njɛ adua no ofwo bu, aa panɛ eshe aba geri ba cɛnjɛ tu ga ebi peni la eshi aba keeni ụshɛpwụ ga ebi teri maa ge izeci bu nama, u ga Ngee bi meni umwono ga,

³⁹asha shɛlaga adua aba, keeni tutabwa ta aba taa ni ihwɛ ɛtɛ bu ya azuba, maa du hieci inyɛmɛnyɛmɛ ya aba maa gengeni atwa bụ iwɛwɛ ɛtɛ ya aba aa ga bɛ njɛ.

⁴⁰Oo Agwatana mi, ge eshe bu kwụbɛ, maa acɛbɛ bụ du hwụjɛ adua na ata nda epe.

⁴¹Oo AGWANGWAMA na shɛ Agwatana, ishijɛ hwuwayɛ go maa teni no ofwo ata bụ ụhinjanụ, ahiɛbana ni Ikpɛtɛ gɛ bu ukpahiŋ. Oo AGWANGWAMA na shɛ Agwatana, no urugono onongbo bu ubino, ga atwa bu tijilo na bwada unyasa iwɛ iyi ibiye bu.

⁴²Oo AGWANGWAMA na shɛ Agwatana, to jinoko bụtụ bụ na ebi dudugeni manɛbɛ mu tugwama tiya o. Ne teyinje tulubo ta ata tụ bụ tụ 'wụtụ ebu lubi yɛu bu ugondu ge Devid.