Read bassa 2 SHƐRỤKWỤKWỤ SHI YEBI 7 Bible Online

2 SHƐRỤKWỤKWỤ SHI YEBI 7 - bassa bible

2 SHƐRỤKWỤKWỤ SHI YEBI 7

¹Aka na tu go Sụlụmụn hwuwi adua ubwa tɛnda, nazhɛ ulwa banɛ na azuba woo hwoŋzhinji ijɛ ɛtɛ oo go to ụrụpɛ tuhwoŋzhingo keeni arụpɛ vwɛ hwɛɛ. Nazhɛ ụjɛrụma wa AGWANGWAMA shini nu umwono ata wa Agwatana.

²Onongbo eri shi o tono ya nu umwono ata wa AGWANGWAMA o, iwɛnɛ tụ ụjɛrụma wa AGWANGWAMA shini nu bwa.

³Aka na ta atwa Isrɛl kwụbɛ tu ulwa ata banɛ na azuba wee kezhe, ụjɛrụma wa AGWANGWAMA kaa wa ta nu umwono ata wa Agwatana. Aa 'waŋtatangwụ no tudubono ta angba umwono ata wa Agwatana, aa zhɛbɛ AGWANGWAMA, aa shɛtangana bụ, ɛɛ hiɛŋ, Ubwa zhɛmɛ, tulubo tu bwa kaa tu namɛ unyizo-nom.

⁴Nazhɛ agwuma keeni atwa ata hwɛɛ peni AGWANGWAMA ụrụpɛ.

⁵Nazhɛ agwuma Sụlụmụn to ụrụpɛ ni inɛ igbɛɛ-umpwa-nu-boo-ko (22,000) keeni agwụdụ igbɛɛ-dupu-ne-eshe-umpwa (120,000). Gana go Sụlụmụn, na atwa ata hwɛɛ shileni AGWANGWAMA umwono ata maa ụ shɛ tijilo ta.

⁶Onongbo shikekeni no ofwo na ee eni aŋ maa o shikokono, Alivai du shikekeni ee peni eshe geri aba, aa shɛtana Agwatana ni i'wɛŋnɛ ya azunga nɛ agwuma Devid njɛ la, bee tileni. Aa zunga azunga, ɛɛ hiɛŋ, Tulubo tu bwa tɛ shɛ unyizo-nom! Gana na ti ge Devid peni aŋ la unu. Nazhɛ onongbo hwuri akakacɛ aba, nazhɛ atwa Isrɛl kpaaŋ ishijɛ ee shikekeni.

⁷Go Sụlụmụn njɛ ukpogwu ata namɛ nu umbe umwono ata wa Agwatana tijilo. Boo to apata ụrụpɛ tuhwoŋzhingo, apata du bee hwoŋzhinji manɛbɛ mụ ụrụpɛ wa amɛ-olom.[9] Bu to arụpɛ ata iwɛnɛ tu utukwu-ụrụpɛ ala boo mo nɛ ɛtumburɛ eri shi wa la ụrụpɛ tuhwoŋzhingo, na arụpɛ tiya hwɛɛ, ta manɛbɛ ma ata.

⁸Go Sụlụmụn na atwa ata kpaaŋ njɛ Isene ɛtɛ ijitɛ icenje. Unyama wa atwa na bananjɛ taa dụlụ te keshici tuzuba tu Hamat, ta tuta ti Ijipti ulwa kpirim.

⁹Nụ ụjita ụtụndatụ oo sotulonu tusotulonu ti ikɛnyi, iwɛnɛ ta a njɛ utukwu-ụrụpɛ tijilo, ijitɛ icenje du aa njɛ isene ɛtɛ.

¹⁰Ni iyi-tuholo na shɛ ụjita woshi-ni-bɛ-tɛtu nu upiana Bicenje, go Sụlụmụn jicenji atwa ata hwɛɛ nu nhwaŋ ma aba. Amɛ aba lemi, aa nda unyasa tebiye iwɛ uwebiye nɛ AGWANGWAMA peni atwa ubwa Isrɛl, ne Devid keeni Sụlụmụn.

¹¹Na aba na tu go Sụlụmụn hwuwi Umwono ata wa Agwatana keeni una ubwa tuma hwɛɛ, keeni iyi elele nɛ baa imanganjɛ na ahaŋsa ubwa iwɛ Umwono ata wa AGWANGWAMA keeni ihwɛ ibwɛ, ti yaa 'yaganɛ bu eshe kpaaŋ.

¹²Nazhɛ AGWANGWAMA bananɛ bụ caakwụ nụ ụjita. Bɛɛ hiɛŋ bụ, N hwụjɛ adua bụ, Ngee leshiji kaa du Umwono ga maa ụ shɛ ofwo na ɛɛ zhɛ na ma pana arụpɛ.

¹³Aka elele Ngaa lacɛ maa eshilo ngbi kwo kaa Ngaa tumwanɛ ovworo maa a yɛ iyimɛyɛ hiŋ, kwo kaa Ngee leni maa ụngwụ uko tishikpe mburusonu na ashashɛ atwa mi,

¹⁴yaa shɛ atwa mi a na aa suyana ni izeci mi meme zucinje, aa njɛ adua no ofwo mi, aa jɛshɛrɛjɛ ee genji tugworozwo tu na aa ga nda, nazhɛ Ngɛɛ zhɛ ma hwuga iwɛ ya aba tu Ngaa namɛ na azuba, maa Ma gangana aŋ iwɛwɛ ya aba. Nazhɛ du Ngɛɛ zhɛ ma nɛnga sasana cɛnjɛ ta aba.

¹⁵N zhɛ ma mbiyanɛ Umwono ga, maa mu na hwuga shidua she elele shɛ na aa nda nu bwa.

¹⁶Iwɛnɛ po Gamba n teri uŋ nazhɛ Ngaa njɛ uŋ tijilo maa ụ shɛ ofwo na izeci mi zhɛ ya nama unyizo-nom. N zhɛ ma ngbaraka uŋ, acɛbɛ mi kaa zhɛ a nama apata aka elele.

¹⁷Yaa shɛ abu ma n ndana iyi na tɛcara gana na bishi bu ge Devid n ndanɛ la, abu untanganɛ kaa andwa mi keeni unu na Ama bụ pana, no onu mi tɛtɛtagana kpaaŋ.

¹⁸Nazhɛ Ngɛɛ zhɛ mo shikicingo idwɛtwɛ tugwama tụ bụ dimi, nu gana na tu Ngaa twa la unu ne bishi bu ge Devid, Ngɛɛ hiɛŋ, Bi zha shɛ ba vwunga kwukwuŋ bụtụ na zhɛ na ya tugwama ti Isrɛl aka elele.

¹⁹Ama yaa shɛ ehi bweji undwa mu keeni iyi elele nɛ Ngee hi peni-unu ibɛ, ahia zhɛba ya tuwa,

²⁰asha N zhɛ ma hiɛ bacɛnga na cɛnjɛ tu ga, Mo jinoko du Umwono ga Ngaa njɛ tijilo maa ụ shɛ yebe ofwo na izeci mi zhɛ ya nama. Atwa na namɛ no ofwo elele zhɛ na nda uŋ asada, u zha shɛ kaa du wa 'yaga ya ụjɛrụma o.

²¹Umwono ga wa Agwatana na 'yajɛ hwayɛ ụjɛrụma gana ga, zhɛ wa dama hwuŋ atwa elele na a kashɛka epe, harɛ ɛɛ zhɛ ɛ hiɛŋ, Iwembe po AGWANGWAMA njɛ cɛnjɛ tu ga keeni Umwono ga gana gaa?

²²Nazhɛ atwa ata zhɛ ɛ jishijɛ, ɛ hiɛŋ, Iwɛnɛ te e jineci AGWANGWAMA na shɛ Agwatana aba, na bɛcinjɛ la ogwunukwoshi aba ni Ijipti. Hwuwayɛ bwonu tuwa ya aa twa-unu na tuba, tuba du kaa aa zhɛba. Iwɛbɛ po AGWANGWAMA leni maa abara ga ne ebe jiteni aŋ.