Read bassa EZRA 1 Bible Online

EZRA 1 - bassa bible

EZRA 1

¹Nu uywa na ti ga Sairos yɛ tugwama ti Pɛsia, ibɛ du Agwatana njɛ maa ga n-ndumwa mu na baa dumwa la tedure bigesere ga Jɛrɛmia mi sɛ. Agwatana njɛ Sairos maa ga pana-unu unya na u 'wa una uhiiŋ, maa ga 'nyata uŋ du maa tumwangana maa a rɛcɛ uŋ kpataa na cɛnjɛ-ta-tugwama tu bwa kpaaŋ.

²Iyi nɛ ga Sairos agwuma Pɛsia jɛmɛ na, bi hiɛŋ, AGWANGWAMA na shɛ Agwatana azuba, bu nduwa maa Ma sha agwuma unyizo hwɛ hwɛɛ, bee n eni maa Ma mana bụ umwono nu Jɛrusalɛm na namɛ nu Juda.

³Ga Agwatana nama ne hiŋ ahiɛba na hiɛ shɛ atwa ubwa kpaaŋ maa hi munji Jɛrusalɛm maa hi meeneni umwono ata wa AGWANGWAMA na shɛ Agwatana Isrɛl, ubwa shɛ Agwatana na aa zhɛba nu Jɛrusalɛm.

⁴Yaa shɛ ukekeshi timbiyono to atwa ubwa elele maa e ji, asha ga anya aba mbiyeni aŋ na azụrụfa, na azhɛnarɛya, ni i'wɛŋnɛ ibiye nɛ to aŋ ukekeshi, ni iyimabiga, medenji apwaŋ u tukwulangana tụpana iwɛ umwono wa Agwatana na namɛ nu Jɛrusalɛm.

⁵Nazhɛ shɛgwuma shu nhwaŋ mu Juda keeni Bɛnjamin, a na shɛ onongbo keeni Alivai, keeni bụtụ be elele na Agwatana ishicinjɛ ahaŋsa ubwa, mama 'imɛ maa e zhe e meeneni umwono wa AGWANGWAMA na namɛ nu Jɛrusalɛm.

⁶Ibɛ po anya aba kpaaŋ mbiyeni aŋ, ee penenji aŋ i'wɛŋnɛ, ta azụrụfa, ta azhɛnarɛya, ti i'wɛŋnɛ ibiye, ti iyimabiga keeni iyi inyɛ nɛ shanɛ aŋ ukekeshi, medenji apwaŋ u tukwulangana iwɛ umwono ata.

⁷Ga Sairos gwuricingeni aŋ nkwodo no nkolo mu na agwuma gɛ Nɛbukadnɛza bɛcinjɛ la nu umwono wa AGWANGWAMA nu Jɛrusalɛm bee zweni ni isume tuwa tu bwa.

⁸Ga Sairos suje mu bee utegeni Mitrɛdat na shɛ uhiu wa angbaracɛ i'wɛŋnɛ ya agwuma, baa rɛcɛ iŋ maa pana Sheshbaza na shɛ ugwomina Juda.

⁹Ufwugwo i'wɛŋnɛ ɛtɛ nɛ: agbamgbam azhɛnarɛya namɛ talacɛ (30) agbamgbam azụrụfa namɛ akpakwụ-a-ta (1,000) apalụ azụrụfa namɛ woshi-na-ba-ecinjishi (29)

¹⁰nkwodo ma azhɛnarɛya mu namɛ talacɛ (30) nkwodo ma azụrụfa mu namɛ akpakwụ-eyebi-ne-eshe-umpwa (410) iyi uhwugwa inyɛ namɛ akpakwụ-a-ta (1,000).

¹¹Iyi uhwugwa ya azhɛnarɛya keeni inɛ ya azụrụfa nɛ ge Sheshbaza 'waŋnɛ aka na tu baa zhagajɛ na atwa ata ti'ima anya a na banɛ nu Babulon e zhe Jɛrusalɛm keeni iyi uhwugwa inyɛ, kpaaŋ ibɛ namɛ igbɛɛ-iyebi-na-akpakwụ-ecenje (5,400).