Read bassa EZRA 4 Bible Online

EZRA 4 - bassa bible

EZRA 4

¹Aka na atwa i'ime atwa Juda keeni Bɛnjamin hwụjɛ maa atwa ala aa 'imɛ jiye, aa maanana ba umwono wa AGWANGWAMA na shɛ Agwatana Isrɛl.

²Aa zhajɛ no ofwo Zɛrubabɛl keeni ofwo shɛgwuma shu nhwaŋ me eshi, ɛɛ hiɛŋ, Lono ma maa to hi mbiyono umwono ga wa Agwatana tuma, iwɛnɛ po ta zhɛba du Agwatana ata ahia zhɛba, ata pana bụ kaa du arụpɛ te kwuni taa na aka na ti ga Isahadon na shɛ agwuma Siria utu suje maa ta nama epe.

³Ama gɛ Zɛrubabɛl, ne Jɛshua keeni atwa vwɛ a na shɛ shɛgwuma shu nhwaŋ me eshi atwa Isrɛl jishijɛ aŋ, ɛɛ hiɛŋ, I'ɛlɛ hiŋ zasaba na tuma tu umwono wa Agwatana tu o, atuba kiri ti zhɛ ta mana AGWANGWAMA na shɛ Agwatana tu umwono ga, gana na tu ga Sairos agwuma Pɛsia iti peni-unu.

⁴Nazhɛ atwa na ga jɛjɛ ya na cɛnjɛ ta ata kwụshɛ Eju u'waba, ee zweni aŋ inyɛsɛ maa kede o to tuhwulo ta tuma ta ata o.

⁵Aa njɛ atwa ụhwada ụgwụ maa ga a sukakanɛ aŋ. Aa ụranjɛ iŋ tɛnda te kwuni na aka tugwama tu Sairos agwuma Pɛsia tutu i ci aka tugwama tu Dairos agwuma Pɛsia.

⁶No tukwuno ta tugwama ti Zɛksis,[4] nazhɛ agwuma cɛnjɛ ta ata na shɛ bụtụ bi i'ime ba atwa na jɛjɛ nu Juda keeni Jɛrusalɛm 'waŋnɛ utakada ata ee 'nyeci maa a sukakanɛ aŋ.

⁷Sasana na aka Atɛzɛksis agwuma Pɛsia, ge Bishlam, ne Mitrɛdat, no Tobɛl keeni atwa vwɛ aba ụlatụ, 'nyeteni Atɛzɛksis utakada. E 'nyeci utakada ata na rɛjɛmɛ ra Aramaik iwɛ maa tuba a jɛshɛrɛjɛ uŋ na aka na aa rɛcɛ uŋ.

⁸Utakada ata ge Rehum, na shɛ bipeni-bu-unu keeni Shimshai bi'nyeci 'nyeteni agwuma Atɛzɛksis iwɛ Jɛrusalɛm na: ɛɛ hiɛŋ,

⁹U banɛ no olugwo ata Rehum, na shɛ bipeni-bu-unu, na Shimshai, bi'nyeci, na atwa aba ụlatụ, na ajɛmɛ-ụshɛrɛya keeni atwa na namɛ no shihwolu shụ 'wụtụ 'wụtụ ni Pɛsia, na atwa Babulon, na atwa Erɛk keeni Susa a na namɛ na cɛnjɛ ti Ilam,

¹⁰hwɛɛ, te edenji na vwɛ a na ga Ashubanipa bụtụ ata bụ 'wụtụ becinji nu nhwaŋ ma aba, baa gɛgɛcɛnjɛ nụ ụshɛpwụ Samaria keeni ofwo na vwɛ nu ukpeleshi cɛnjɛ tu Yufretis.

¹¹Tuzwogo tu utakada ata aa tumwananɛ agwuma Atɛzɛksis na, ti hiɛŋ: Utakada zhaga no ofwo agwuma Atɛzɛksis, u banɛ no olugwo miaụŋ mụ bụ mu ugondu a na shɛ atwa ụzalụ bu Yufretis.

¹²Ga agwuma mepi maa, Eju ata banɛ no olugwo bu a na zhajɛ pu tu, a jɛjɛ nu Jɛrusalɛm, a maanana ba ụshɛpwụ ata wa aba u tigezhe keeni tugworozwo. A hwaŋzhɛnga ba uba ubwa tuma, aa nangangana ba okoshilo ubwa.

¹³Ga agwuma mepi hwuwayɛ go maa, yaa shɛ ee meeneni ụshɛpwụ ata keeni uba ubwa, a zha shɛ o lono maa a cɛpɛ ukwuribi ụdalụ keeni ukwuribi ụhwada cɛnjɛ o. Inɛ ɛtɛ zhɛ ya nda maa ukwuribi ugondu cɛnjɛ-ta-agwuma salananụ.

¹⁴Hwuwayɛ go, gana na ati namɛ tɛta ti igɛhi bu, i zha shɛ ma tu kwulana maa ta kwụba tụ ụpụrụsa munji agwuma o. Iwɛbɛ po atụ bụ tumwananɛ utumwa ga maa to bu mbiso gabụ agwuma,

¹⁵iwɛ maa jelekeci utakada ata eshi bu a 'nyata la iyi cala. Bi zhɛ ba ta ugbe nu utakada ata gana na tụ ụshɛpwụ ata shɛ ụshɛpwụ tigezhe, waa pana kaa shɛgwuma keeni ekpeleshi cɛnjɛ amɛ-tụhaŋtụ. Atwa ubwa gwụmɛ tu'untangana aka elele. Ecilo ga po aa njɛ la ụshɛpwụ ata ufwu ta.

¹⁶Iwɛbɛ po oto bu mbiso gabụ agwuma maa, Yaa shɛ ee meeneni ga ụshɛpwụ ata, ee shikecenji uba ubwa sasana, ukpahiŋ bụ zha shɛ wa ala maa untangana ukpeleshi cɛnjɛ tu Yufretis o.

¹⁷Ajɛshɛgwa na agwuma tumwanɛ na, bi hiɛŋ: No ofwo Rehum, na shɛ bipeni-bu-unu, ne Shimshai, bi'nyeci, keeni atwa aba ụlatụ a na jɛjɛ nu Samaria keeni atwa vwɛ aba a na namɛ zalụ bu Yufretis, okwu ma yoo.

¹⁸A n rɛtanjɛ utakada ata ahiɛ n tumwananɛ, aa jɛshɛrɛjɛ uŋ du.

¹⁹M pwonuo-unu maa e dwelekeci uŋ, oo to ga ugbe maa ụshɛpwụ ata ishɛgwa la na tusukakana ta shɛgwuma na aka cala, maa ụshɛpwụ ata 'yajɛ la tigezhe tu na tu karɛ amɛ-tụhaŋtụ.

²⁰Shɛgwuma shɛ na shɛ 'yajɛ ukpahiŋ ụ'wụtụ shɛba la shɛ untanganɛ Jɛrusalɛm, shɛba la shɛ untanganɛ ukpeleshi cɛnjɛ tu Yufretis hwɛɛ. Shi lesheji la ukwuribi ụdalụ keeni ukwuribi ụhwada cɛnjɛ.

²¹Ibɛ po ahiɛ shɛ hia pana atwa ata unu maa ge genji ụshɛpwụ ata tumaanana uuwa i ci aka na Ngee peni aŋ unu unya.

²²Nda iŋ ma kakayɛ iwɛ maa kede e zucinje ụhwada na Ngaa untanganɛ o.

²³Gunu na ta a rɛtanjɛ Rehum, ne Shimshai keeni atwa aba ụlatụ utakada ata banɛ no olugwo Atɛzɛksis, aa sanɛ Jɛrusalɛm gunu ata, aa njɛ Eju ni iji maa ge genji ụshɛpwụ ata tumaanana.

²⁴Ibɛ po ugondu umwono wa Agwatana na namɛ nu Jɛrusalɛm ngwuri tuma uuwa i ci uywa uyebi na ga Darius yɛ tugwama ti Pɛsia.