Read bassa EZRA 6 Bible Online

EZRA 6 - bassa bible

EZRA 6

¹Nazhɛ agwuma Darius eni atwa maa ge e dwelekeci ti'nyeci te titeyinje ta agwuma Sairos tu na aa intanɛ nu Babulon.

²Oo to ga utakada ata u tukwungwulo ugbe, nụ ụshɛpwụ Ecibatana, na namɛ nu ukpeleshi cɛnjɛ ti Midia. Iyi nɛ ee 'nyeci na amɛ ubwa na, ɛ hiɛŋ,

³Nu uywa uhiiŋ na ti ga Sairos yɛ tugwama, ibɛ agwuma Sairos peni unu-tɛtɛtagana iwɛ umwono ata wa Agwatana namɛ nu Jɛrusalɛm, bɛɛ hiɛŋ: Ge e meeneni umwono ata wa Agwatana na shɛ ofwo na aa pana arụpɛ keeni ofwo na ee suje arụpɛ tuhwoŋzhingo. Ga ụnjɛswa ubwa ụ shɛ ivwunɛ dupu-na-buhanda (90), go uholo ubwa ụ shɛ ivwunɛ dupu-na-buhanda du (90).

⁴Ga tusata ta tuma tụ ụdatụ ubwa tu na sha tu tatụ na atayɛ a'wụtụ, nazhɛ ga tusata tu uzhibi tu ko tu na patana na azuba tusata ta ata ta atayɛ. Gɛ ɛ vwɛ ukwuribi nu umwono uduciya wa agwuma maa a cɛpɛ utashɛ ubwa hwɛɛ.

⁵Ge e gwuricinje i'wɛŋnɛ ya azhɛnarɛya ni inɛ ya azụrụfa ɛtɛ agwuma Nɛbukadnɛza suje la nu Babulon, maa e tileni iŋ sasana no ohwolu ibɛ na amɛ umwono ata wa Agwatana namɛ nu Jɛrusalɛm. Ibɛ shɛ nu umwono wa Agwatana na bɛɛ bɛcinjɛ iŋ la.

⁶(Ibɛ po agwuma Darius tumwanɛ ajɛshɛgwa ga ubwa,) bɛɛ hiɛŋ, No ofwo Tatenai na shɛ ugwomina ukpeleshi cɛnjɛ tu Yufretis, ne Shitabozɛnai keeni atwa shihwolu shu ukpeleshi cɛnjɛ tu Yufretis. Ishɛga ma hi genji umwono ata,

⁷bwa ma i'ɛlɛ hiŋ nu ugondu umwono ata wa Agwatana Eju. Ga shɛ ugwomina we Eju keeni n-nyarɛ me Eju kiri mi meeneni umwono ata wa Agwatana nu urubwo ubwa.

⁸Ma hi pana-unu Sasana, ni iyi nɛ maa hiɛ ndanɛ n-nyarɛ ma ata me Eju iwɛ ugondu umwono ata wa Agwatana tumaanana. Bwɛ ma ukwuribi na agwuma ukwuribi ụdalụ na aa tụpa nu ukpeleshi cɛnjɛ tu Yufretis maa hiɛ cɛpɛ aŋ kakayɛ hwɛɛ, te teni cɛŋ gana na ta a njɛ ukwuribi wa aba ufwu, iwɛ maa kede iyi elele ngwuricinji ugondu ata o.

⁹Hiɛ shɛ hi na pana onongbo na namɛ nu Jɛrusalɛm iyi elele nɛ ee hi mbishi maa i 'nyananɛ aŋ. Ibɛ shɛ; inɛ ye eyi, na adagba, na agwụdụ iwɛ maa a na pana Agwatana azuba arụpɛ tuhwoŋzhingo, ti iyimɛyɛ izɛgwu nɛ ɛɛ hiɛŋ wit, ta manɛ, te meni mụ tụ'walụ ta afwafwa, keeni manɛbɛ iyi-heri iyi-heri uzawa tungwulo,

¹⁰iwɛ maa a na pana Agwatana azuba arụpɛ na a kwulana bụ tulashɛga, iwɛ maa a njɛ adua iwɛ ulapiya mu keeni iwɛ miaụŋ mi mi me eyi.

¹¹Ma kaana unu ata tɛtɛtagana maa, Bụtụ be elele na lacɛ unu-tɛtɛtagana ga, ge e hwucice uzhibi ụ'wụ'wụ nu umwono ubwa maa e sepi bu, gɛ ihwɛ ibwɛ i shɛ ubizo.

¹²Ga Agwatana na teri apata maa izeci ibwɛ shilo, njɛ agwuma kwo kaa atwa elele na zhɛ a hashɛgana unu-tɛtɛtagana ga, na kaa zhɛ ba makana maa hwuŋzo umwono ata wa Agwatana ufwu. Gamba ga Darius, N shiri unu-tɛtɛtagana ga. I shɛ kaa tilɛɛ maa ga a hwụjɛ-unu ubwa tutu uce.

¹³Nazhɛ ga Tatenai na shɛ ugwomina, ne Shitabozɛnai keeni atwa vwɛ aba a na namɛ no shihwolu, njɛ te teni cɛŋ nu gana na ta agwuma Darius shikicinji unu ata tɛtɛtagana.

¹⁴Ibɛ po n-nyarɛ me Eju mu mo tuma ta ata, yaa zhɛmanɛ aŋ kaa, tedure ne tigesere tu na ga Hagai keeni Zɛkaria yɛu Ido jɛmɛ. E hwuwi umwono ata wa Agwatana tuma tedure nu unu-tupana wa Agwatana Isrɛl keeni nu unu-tɛtɛtagana Sairos, na Darius keeni Atɛzɛksis a na shɛ ehiu cɛnjɛ ti Pɛsia.

¹⁵Tu ga Darius yɛ tugwama, yaa namɛ shiywa shi cihiŋ, nụ ụjita ụtatụ nu upiana Ada, ibɛ Umwono ata hwuwowu tuma.

¹⁶Nazhɛ atwa Isrɛl a na shɛ onongbo, na Alivai keeni atwa vwɛ aba elele a na jiye na ti'ima, a njɛ umwono ata wa Agwatana tijilo nu unyasa tubwada.

¹⁷Iyi nɛ ee peni iwɛ tijilo tu umwono wa Agwatana tɛnda, i shɛ inɛ ye eyi dipi-yebi (100), na adagba kpakwụ (200), na agwụdụ akpakwụ-eyebi (400), iwɛ apwaŋ atwa Isrɛl kpaaŋ, ne epi umpwa-na-ba-eyebi (12) iwɛ ụrụpɛ iwɛwɛ ya alamụ Isrɛl umpwa-na-ba-eyebi (12).

¹⁸A imanganjɛ edingbe edingbe onongbo, no orubwo orubwo Alivai iwɛ ugondu tɛnda nu umwono wa Agwatana na namɛ nu Jɛrusalɛm gana na ti yee 'nyeci nu utakada Moses.

¹⁹Atwa ti'ima a na jiye, a njɛ titeyinje ti iyimɛyɛ tɛkashɛka nụ ụjita umpwa-ni-bɛneshi ne Bihiiŋ.

²⁰Onongbo, na Alivai, a mama njɛ shɛshɛshɛ hwɛɛ aba tebiye. Alivai kwụnɛ agwụdụ nụ ụrụpɛ iyimɛyɛ ɛtɛ tɛkashɛka iwɛ atwa elele na banɛ na ti'ima jiye, ti iwɛ onongbo keeni iwɛ ikɛnyi aba hwɛɛ.

²¹Atwa na yɛ iyimɛyɛ ɛtɛ tɛkashɛka, aba shɛ atwa Isrɛl elele na banɛ na ti'ima jiye keeni atwa elele na lacɛ maa o momo togwu na atwa na a zhɛba tuwa, a na kaa namɛ na cɛnjɛ ta ata. Ibɛ po aa zhajɛ maa a zhɛbɛ AGWANGWAMA na shɛ Agwatana Isrɛl.

²²Aa untanganɛ du isene iyimɛyɛ uzawa Ifucingɛ tiya ijitɛ icenje nu unyasa tubwada. Iwɛnɛ po AGWANGWAMA pwonuo aŋ unyasa tubwada, iwɛnɛ baa jɛshɛrɛganɛ aŋ amɛ agwuma Asiria maa pana i'ɛlɛ ya aba ukpahiŋ nu ugondu tuma tu umwono wa Agwatana Isrɛl.