Read bassa EZRA 8 Bible Online

EZRA 8 - bassa bible

EZRA 8

¹Atwa ganana a shɛ shɛgwuma shu nhwaŋ me eshi aba, na amwamwa atwa na banɛ nu Babulon a na zhagajɛ ne mi e jiye, na aka agwuma Atɛzɛksis:

²Gɛ Gɛshom banɛ nu umwamwa Finihas, ga Daniɛl banɛ nu umwamwa Itama,

³ga Hatush yɛu Shɛkania banɛ nu umwamwa Devid, gɛ Zɛkaria banɛ nu umwamwa Parosh, etwenyi na aa rɛcɛ nu bwa namɛ dipi-tɛtu (150).

⁴Ge Ɛliɛhoenai yɛu Zɛrahia banɛ nu umwamwa Pahat-moab, medenji atwa kpakwụ (200) a na namɛ nu bwa

⁵gɛ Shɛkania yɛu Jahaziɛl banɛ nu umwamwa Zatu,[7] medenji atwa kpakwụ-ni-dipi-yebi (300) a na namɛ nu bwa

⁶gɛ Ɛbɛd yɛu Jonatan banɛ nu umwamwa Adin, medenji atwa dupu (50) a na namɛ nu bwa

⁷gɛ Jɛshaya yɛu Atalia banɛ nu umwamwa Ilam, medenji atwa dupu-nu-woshi (70) a na namɛ nu bwa

⁸gɛ Zɛbadia yɛu Maikɛl banɛ nu umwamwa Shɛfatia, medenji atwa dupu-nu-talacɛ (80) a na namɛ nu bwa

⁹go Obadia yɛu Jɛhiɛl banɛ nu umwamwa Joab, medenji atwa kpakwụ-ne-eshe-umpwa-na-ba-atụndatụ (218) a na namɛ nu bwa

¹⁰gɛ Shɛlomit yɛu Josifia banɛ nu umwamwa Bani,[8] medenji atwa dipi-tɛtu-ne-eshe-umpwa (160) a na namɛ nu bwa

¹¹gɛ Zɛkaria yɛu Bebai banɛ nu umwamwa Bebai, medenji atwa woshi-na-ba-atụndatụ (28) a na namɛ nu bwa

¹²go Johanan yɛu Hakatan banɛ nu umwamwa Azgad, medenji atwa dipi-yebi-ne-eshe-umpwa (110) a na namɛ nu bwa

¹³ge Ilifɛlɛt, nɛ Jɛuwɛl keeni Shɛmia, a banɛ nu umwamwa Adonikam, medenji atwa dupu-ne-eshe-umpwa (60) a na namɛ na aba, aba shɛ atwa na jiye umɛwɛɛ;

¹⁴go Utai keeni Zaku, a banɛ nu umwamwa Bigvai, medenji atwa dupu-nu-woshi (70) a na namɛ na aba.

¹⁵Ngoo sotulonu aŋ urubwo uko nu ụpalanụ uhwulwo ata wa fwunga geri bụ ụshɛpwụ Ahava. Atu namɛ apata nu ugba tu ijitɛ itɛtu. Aka na ti Ngee yelegeji atwa vwɛ keeni onongbo, Ngoo to ugbe maa Alivai zasaba na amɛ aba o.

¹⁶Iwɛbɛ po Ngaa tumwanɛ maa a suyanɛ Ɛliezɛ, na Ariɛl, na Shɛmaya, nɛ Ɛlnatan, na Natan, nɛ Jɛrib, nɛ Ɛlnatan, nɛ Zɛkaria keeni Mɛshulam, aba shɛ shɛgwuma shu nhwaŋ; keeni Joiyarib, nɛ Ɛlnatan du a na shɛ atwa na eshiciji iyi.

¹⁷Ngaa tumwanɛ aŋ no ofwo Ido na shɛ uhiu wa atwa na a twa-unu ni iyi tɛnda nu Kasifia. Ngee mbishi aŋ gana na i shɛ maa e mbishi Ido, na atwa aba ụlatụ a na shɛ anjɛ-ugondu nu umwono wa Agwatana na namɛ nu Kasifia, maa ga a tu tumwananɛ atwa na zhɛ na nda ugondu iwɛ umwono wa Agwatana tu.

¹⁸Tedure no tulubo-ti-biye ta Agwatana tu, tu na tu namɛ no tu, ibɛ po aa tu tumwananɛ Shɛrɛbia na shɛ Bulivai, na banɛ nu umwamwa Mali, yɛu Isrɛl. Bɛ shɛ bụtụ na eri iyi tɛnda, medenji miaụŋ mu bwa me eyi ta miaụŋ-mo-bino bwa umpwa-na-ba-atụndatụ (18) a na zhagajɛ nu bwa,

¹⁹keeni Hashabia, nɛ Jɛshaya na banɛ nu umwamwa Mɛrari keeni miaụŋ ma atagwụ aba no ohongwu aba woshi (20),

²⁰medenji anjɛ-ugondu umwono wa Agwatana kpakwụ-nu-woshi (220), a na ge Devid, na atwa shihwolu shikicinji la maa a na ndana Alivai ugondu. E 'nyeci nzeci ma aba hwɛɛ.

²¹Ngee enenji iwɛ ezumi tɛnda nụ ụpalanụ uhwulwo ata Ahava, iwɛ maa ti meme zucinje na agba Agwatana tu, maa ta lụpa bụ maa ma ti 'yagaga keeni maa ma ti jilanɛ na tahaŋnụ tu tu, ta miaụŋ mu tu keeni i'wɛŋnɛ tu hwɛɛ.

²²Iwɛnɛ po i n shanɛ ezuye maa Ma lụpa agwuma maa ma tu pana emeseyi asaza keeni asụcɛ idɛkwɛ maa e ti lesheji na atwa i'ime tu nu uhwaŋna, iwɛnɛ otu mbiswo bu la, ɛti hiɛŋ, U'ala tulubo-ti-biye wa Agwatana tu wa patana bụtụ be elele na ba patana bu rishe, ama ba nda tuba isɛbwɛ i'wɛtwɛ na atwa elele na o jinoko bu.

²³Ibɛ po atɛ njɛ ezumi, atu tabwa Agwatana tu maa ma ti jilanɛ, bɛɛ jishijɛ kaa adua tu.

²⁴Nazhɛ Ngee teri Shɛrɛbia, na Hashabia na ashashɛ ehwurembe onongbo medenji anya aba, atwa umpwa.

²⁵Ngee mengengeni aŋ azụrụfa, na azhɛnarɛya keeni iyi uhwugwa inɛɛ nɛ agwuma, na ajɛmɛ-ushaura ubwa keeni atwa shihwolu keeni atwa Isrɛl peni maa a njɛ uhwara ni bɛ na amɛ umwono wa Agwatana tu, Ngee peni onongbo.

²⁶Ngee mengengeni aŋ sasana azụrụfa azhɛka akpakwụ-atatụ-nu-dupu (650) keeni iyi uhwugwa nɛ aa njɛ na azụrụfa azhɛka-dipi-yebi (100) keeni azhɛka azhɛnarɛya dipi-yebi (100).

²⁷Nkwodo mɛ shɛ bimenji ba akpakwụ-a-ta (1,000), keeni iyi uhwugwa ibiye nɛ aa njɛ nɛ ɛtumburɛ na fwoni tebiye, inɛɛ nɛ ya ta, inɛɛ nɛ kaa i shɛ inɛ yo ogwumishi tebiye gana azhɛnarɛya.

²⁸Ngee mbishi aŋ, Ngɛɛ hiɛŋ, Ta ahiɛba, ti iyi uhwugwa gɛ, hiɛ njɛ maa hi shileni iŋ AGWANGWAMA swooŋ. Azụrụfa keeni azhɛnarɛya a shɛ upwaŋ u tukwulangana na ee peni AGWANGWAMA na shɛ Agwatana eshi tu.

²⁹Untangana aŋ ma tebiye uuwa i ci aka na ee menji uzhinono wa aba na amɛ na amɛ shigongo shu umwono wa AGWANGWAMA, ne eshe ehiu onongbo keeni Alivai keeni shɛgwuma shu nhwaŋ mi Isrɛl nu Jɛrusalɛm.

³⁰Nazhɛ onongbo na Alivai suji ga azụrụfa, na azhɛnarɛya ata keeni iyi uhwugwa nɛ oo go mongwo uzhinono wa aba, ee zweni iŋ nu umwono wa Agwatana tu nu Jɛrusalɛm.

³¹Atu banɛ nụ ụpalanụ uhwulwo ata Ahava nụ ụjita umpwa-ni-bɛyebi ne Bihiiŋ maa to hwulo nu Jɛrusalɛm. Agwatana tu kaa namɛ no tu, bee ti lesheji na atwa i'ime tu, keeni atwa na ge tu gwubeji nu uhwaŋna.

³²Aka na eti ci Jɛrusalɛm, otu to ụhinjanụ ijitɛ itɛtu.

³³Nụ ụjita uneshi, nazhɛ eti menji uzhinono wa azụrụfa, na azhɛnarɛya keeni iyi uhwugwa na amɛ umwono wa Agwatana tu, ee utegeni aŋ Mɛrɛmot yɛu Uria na shɛ bunongbo. Gɛ Ɛliaza yɛu Finihas namba, Alivai na keeni aŋ a shɛ go Jozabad yɛu Jɛshua, no Noadia yɛu Binui.

³⁴A rɛcɛ ofwugwo ibɛ, te bimenji bu uzhinono ibɛ hwɛɛ, ee 'nyeci ofwugwo inɛ ye elele gunu ata.

³⁵Nazhɛ atwa na aa 'imɛ la, a na jiye peni Agwatana Isrɛl arụpɛ tuhwoŋzhingo. Inɛ ye eyi namɛ umpwa-ni-bɛyebi (12), iwɛ atwa Isrɛl hwɛɛ, na adagba dupu-na-buhanda-na-ba-ecihiŋ (96), na agwụdụ dupu-nu-woshi-na-ba-ecenje (77) ne epi umpwa-na-ba-eyebi (12) iwɛ ụrụpɛ iwɛwɛ. Ijɛ hwɛɛ i shɛ iwɛ ụrụpɛ tuhwoŋzhingo no ofwo AGWANGWAMA.

³⁶Ee suji du i'wɛŋnɛ ụhwada inɛɛ nɛ agwuma ga panɛ aŋ la, ee peni egwomina keeni atwa shihwolu shu ukpeleshi cɛnjɛ tu Yufretis, nazhɛ atwa ata o mbiyono ya atwamwa keeni umwono wa Agwatana.