Read bassa NEHEMAYA 5 Bible Online

NEHEMAYA 5 - bassa bible

NEHEMAYA 5

¹Na aka ga ibɛ etwenyi ne eyikwo aba a uganana miaụŋ-mo-bino ma aba a na shɛ Eju n'ungwa mụ 'wụtụ.

²Atwa oko na amɛ aba hiɛŋ, Atuba na miaụŋ mu tu me eyi keeni mu na mo o ti gembi ofwugwo, ti zhɛ ta jalakaka iyimɛyɛ izɛgwu maa ta ya maa ta nama uraiŋ.

³Anya atwa hiɛŋ, Ti zhɛ to shiyono cɛnjɛ tu ntuma mu tu keeni ntuma mu tu ma shifwafwa keeni shimwono shi tu ufwafwa, iwɛ maa ta 'yaga iyimɛyɛ, iwɛ imunɛ-tiya nɛ namɛ.

⁴Anya atwa ta namba waa, a na hiɛŋ, Tu unua ukwuribi maa ta tụpa ụdalụ wa agwuma ne shihilo shi tu keeni ntuma mu tu ma shifwafwa.

⁵Okwo ta tu'waba tu tu ne mehieŋ mu tu mɛ shɛ mu ko na atwa vwɛ tu a na shɛ Eju, okwo ta miaụŋ mu tu me eyi mɛ zhɛmanjɛ gana mu na ma aba. Ama kaa tu to zwono miaụŋ mu tu me eyi na mu na mo o na tijama waa. Miaụŋ mu tu mo o mu ko kaa mu ga shɛwa ajama cebe, tu zasa kaa ukpahiŋ we elele o, iwɛnɛ to tu pwonuo anya atwa cɛnjɛ tu ntuma mu tu keeni ntuma ma shifwafwa mu tu.

⁶Aka na tu Ngaa hwụjɛ n'ungwa mu ga keeni n-ndumwa mu ga mụ wɛ hwɛɛ. Ngaa njɛ isɛbwɛ tebiye.

⁷Ngee heŋshi iwɛ aba Ngooko Ngooko, Ngoo to atwa aba ụjɛrụma, keeni atwa shihwolu, Ngɛɛ hiɛŋ aŋ, Ahiɛba hia nda miaụŋ-mo-bino hiŋ umungwuta. Ngee dweji aŋ tu'ulwa tụ 'wụtụ maa a njɛ iyi ike iwɛ ibɛ.

⁸Ngɛɛ hiɛŋ aŋ, Tu nduwa gana elele na eti eri, otu sowonuonuo miaụŋ-mo-bino tu a na shɛ Eju anaa na ee ge sengeni anya edenji. Ahiɛba hia nda miaụŋ-mo-bino hiŋ a na shɛ Eju maa e meme senji pi hiŋ ni iji. Ibɛ po ehwurembe ata namɛ shiru, iwɛnɛ te e gwushiji shi iwɛ maa a jɛmɛ.

⁹Ngoo to tuhwulo, Ngɛɛ hiɛŋ aŋ, Iyi nɛ ahia nda teni shi cɛŋ o. Hi ga shɛ shɛ suu hia muna Agwatana ụjɛrụma maa hi becinji tutwa ta anya edenji a na shɛ atwa i'ime tu?

¹⁰Gamba, na miaụŋ-mo-bino mi keeni anjɛ-ugondu mu, ta unanga du atwa ata ukwuribi keeni iyimɛyɛ izɛgwu. Ma hi tabwa maa ti genji ma ukwuribi ata aa patanana bụtụ tulashɛga!

¹¹Gwurocongono aŋ ma ntuma ma aba, tu ntuma ma aba ma afwafwa, tu ntuma ma aba ma buta keeni shimwono sha aba, tu ukwuribi ata ahiɛ mụnɛ aŋ dipi-yebi yebi,[11] te shihiu, te meni mụ tụ'walụ ta afwafwa mu ufwo, keeni manɛbɛ hwuwayɛ hwuwayɛ go.

¹²Ɛɛ jishijɛ, ɛɛ hiɛŋ, Ti zhɛ to gwurocongono aŋ, ti zha shɛ du kaa ta jala iyi elele no olugwo aba ya o. Ti zhɛ kaa ta nda gana ga abɛ jɛmɛ. Nazhɛ Ngaa suyanɛ onongbo keeni atwa shihwolu, maa o to-tuwa, maa aba zhɛ a nda gana na te e shiri-unu ata.

¹³Ngee bibizhi du i'ɛlɛ keeni ɛvwɛvwɛjɛ[12] mi, Ngɛɛ hiɛŋ, Gana ga du Agwatana zhɛ a nda ihwɛ keeni uduciya ụ bụtụ be elele na njɛ shɛ gana ga ti bee shiri-unu ga. Ge e bibizhi bụtụ gana ata maa nama ni i'ɛlɛ yo ohondo! Nazhɛ atwa tu'ulwa ta ata hwɛɛ hiɛŋ, Ami! Aa shɛtanɛ AGWANGWAMA. Nazhɛ atwa ata njɛ ga gana ata ee ge shiri-unu ata.

¹⁴Shɛ inɛ ɛtɛ kiri o, te kwuni nu uywa woshi i ci uywa talacɛ na ga Atɛzɛksis yɛ tugwama, te e n teri maa ma sha ugwomina Juda, na amɛ shiywa shɛ ga umpwa-na-shɛba-shi-yebi, N ta yɛ shɛ kwukwuŋ iyimɛyɛ nɛ ugwomina wa ya na miaụŋ-mo-bino mi o.

¹⁵Ogwomina na a yɛ hiiŋ ne mi a njɛ la atwa aba umungwuta, ee lesheji iyimɛyɛ ya aba, te meni mụ tụ'walụ ta afwafwa, keeni shizụrụfa buhanda.[13] Okwo miaụŋ ma aba mu ugondu du mi 'yagananɛ ụhwada wa atwa ata. Ama N njɛ shɛ gana ata o, iwɛnɛ Ama sụma Agwatana inyɛsɛ.

¹⁶Iwɛ-tɛkana, M meme peni ugondu uba ga tɛnda, miaụŋ-mu-ugondu mu kaa ma ụlwatagwụ no ofwo ugondu hwɛɛ aba. Ti se shi kaa cɛnjɛ te elele o.

¹⁷Shɛ inɛ ɛtɛ kiri waa o, Eju keeni atwa shihwolu dipi-tɛtu a ya iyimɛyɛ ni ihwɛ mi. Atwa ga kaa namɛ swooŋ na anya edenji a na utu rungwutwonu.

¹⁸Iyi nɛ aa ma tu kwunanga iyi-heri i shɛ, buna bu ko na agwụdụ na nyemenji ecihiŋ keeni shalụma shi ofwugwo, ijitɛ umpwa elele kaa ee me n sugeni meni mụ tụ'walụ ta afwafwa. Ama okwo ti yee gembi gana ata, N leshiji shi waa kaa iyi nɛ ugwomina ga shɛ wa 'yaga o, iwɛnɛ ti i'wɛŋnɛ nɛ atwa ata 'waŋnɛ hwuleji aŋ duwa.

¹⁹Oo Agwatana mi, ne teyinje iwɛ nɛ Ngee mepeni atwa ga hwɛɛ.