Read bassa NEHEMAYA 9 Bible Online

NEHEMAYA 9 - bassa bible

NEHEMAYA 9

¹Tu upiana ata uko uko namɛ ijitɛ woshi-ni-bɛneshi, nazhɛ atwa Isrɛl ụlwatagwụ, aa njɛ ezumi, ee uregeni tugwuno tụ ụcɛnjɛ tɛnda, aa dula ahwayɛ no ohiuhiu aba.

²Ama atwa Isrɛl kaa momo bogwu na atwa ata cɛnjɛ ti nya hwɛɛ, ee shikekeni oo lonongo-unu iwɛwɛ ya aba keeni tugworozwo te eshi aba.

³I shɛ gana tu usaka, ta a rɛcɛ utakada ata undwa wa AGWANGWAMA na shɛ Agwatana aba, na auwa atatụ anya, ee lenenji-unu iwɛwɛ ya aba geri bu uwaŋna tishikoko, aa zhɛbɛ AGWANGWAMA na shɛ Agwatana aba.

⁴Gɛ Jɛshua, na Bani, na Kadmiɛl, nɛ Shɛbania, no Buni, nɛ Shɛrɛbia, na Bani keeni Kanani shikekeni no ogbudu ata aa ndanɛ Alivai. Aa ugananɛ AGWANGWAMA na shɛ Agwatana aba taawụụ.

⁵Nazhɛ Alivai ata, gɛ Jɛshua, na Kadmiɛl, na Bani, na Hashabia, nɛ Shɛrɛbia, no Hodaya, nɛ Shɛbania, nɛ Pɛtahia, ɛɛ hiɛŋ, Ishijɛ ma hi zhemonjino AGWANGWAMA na shɛ Agwatana hiŋ na namɛ tutu unyizo-nom uuwa unyizo zhe gwure Zhemonjino ma izeci ɛtɛ ibwɛ ụjɛrụma, ge e gembicinji iŋ te hwuri tizhemonjino keeni ashɛtwa elele hwɛɛ.

⁶Ɛɛ hiɛŋ,[20] Gobuko bɛ shɛ AGWANGWAMA; gabụ bɛ njɛ azuba keeni mkpasu na mu namɛ na tụla. Gabụ bɛ njɛ cɛnjɛ keeni itekwu, ti iyi nɛ zweni ni bɛ hwɛɛ. Gabụ kaa ba pana iyi elele uraiŋ. Gabụ unyama wa azuba hwɛɛ wa zhɛba.

⁷Gabụ bɛ shɛ AGWANGWAMA na shɛ Agwatana, na teri Abram, ɛbi bɛcinjɛ bu nu U na namɛ nu Kaldia; gabụ kaa bi sheyingeni bu Izeci ta Abraham.

⁸Gabụ bu to ugbe maa bụ bụ shanɛ bụtụ bɛ tɛcara, abu twa-unu nu bwa. Ebi shileni bu unu maa bi zhɛ ba pana bụ cɛnjɛ te edenji Ekenan, nɛ Ɛhɛt, na A'amo, nɛ Ɛpɛrɛz, nɛ Ɛjɛbus keeni Agigash, maa tɛ shɛ cɛnjɛ tu na ajalalo ubwa zhɛ a nama. Abu untanganɛ kaa unu bu tishilo, iwɛnɛ ta abɛ shɛ bụtụ bi tiririri.

⁹Gabụ kaa bụ kwụbɛ ụbaụta wo ogwunukwoshi tu ni Ijipti, abụ hwụjɛ kaa n'ungwa mu ụhiɛŋshɛ wa aba ni Itekwu Ishenje.[21]

¹⁰Gabụ kaa bu ndanjɛ arụhwajɛ keeni iyi tudama nɛ sukakanɛ la Faro, ta atwa ubwa shihwolu hwɛɛ keeni atwa ubwa hwɛɛ, iwɛnɛ te ebi mepi maa o momo mungicingo no ofwo atwa bụ. Ibɛ po izeci bu beni urishi tutu taa hwayɛ.

¹¹Gabụ kaa bi begeni atwa bụ itekwu ɛtɛ, ee keshi iŋ na cɛnjɛ tu hwoo. Ama me'ilwo mi ibɛ mu suji atwa ata ge urigeni aŋ, ee ileji gana na tu utayɛ wo ilo ne meni mụ 'wụtụ.

¹²Gabụ kaa ba 'yagaga atwa bụ nu udomu u tuwam na aka uwaŋna, aba 'yagaga aŋ kaa nu ulwa u tuwam na aka ụjita maa u peni aŋ uhioko-uhwaŋna nu uhwaŋna we elele na ee duri.

¹³Gabụ du bi kezhe bu patanɛ ni Ishɛmɛ Sainai, abɛ jɛmɛ n-ndumwa na aba ta abụ namɛ na azuba. Ebi peni aŋ andwa ashɛrɛya a na namɛ shiriri, a na kaa teni cɛŋ keeni shikpogo keeni onu-tupana a na zhɛmanjɛ.

¹⁴Gabụ kaa bɛ njɛ maa e mepi Ụjita-ụhinjanụ bụ u tijilo, ebi peni aŋ onu bu tụpana keeni shikpogo shɛ bụ keeni andwa bụ tedure ni yɛu bu ugondu go Moses.

¹⁵Gabụ kaa bi peni aŋ iyimɛyɛ ɛtɛ banɛ na azuba na aka bi imunɛ ya aba. Ebi peni aŋ kaa meni ma ata mu banɛ nu uparatayɛ na aka bi i'uyɛ ya aba. Ebi mbishi aŋ maa ge e zhe e leshiji cɛnjɛ ta ata ebi shileni aŋ la unu maa bi zhɛ ba pana aŋ.

¹⁶Ama ogwunukwoshi tu njɛ tigezhe keeni tɛshɛshɛpana, e shiri shi acɛbɛ nu unu ata ebi peni aŋ o.

¹⁷A lacɛ unu-tuhwuga, e teyinji shi ya kaa iyi ya arụhwajɛ nɛ abu ndanjɛ na ashashɛ aba o. A shɛ atwa na hweteni, ibɛ po ee teri buhwuri-bu-umbe bu ko maa gwuricingo aŋ na tijama ta aba ti Ijipti. Gabụ kaa bɛ shɛ Agwatana na ba gangana bụtụ iwɛ, no tulubo tụ bụ ti biye, ni iwɛ bụ tumapa keeni ti'insu ni isɛbwɛ tɛnda, tulubo tụ bụ kaa ti gembi. Iwɛbɛ po ebi jineci shi aŋ.

¹⁸Okwo aka na aa mama ndanɛ la itɛtɛnuwɛŋ ɛtɛ ụsụbwa yɛu buna, ɛɛ hiɛŋ, Agwatana tu na ti bɛcinjɛ na cɛnjɛ ti Ijipti na. AGWANGWAMA, gabụ kaa aa njɛ iwɛwɛ ɛtɛ duwa.

¹⁹Iwɛ-tumapa bụ i'wɛtwɛ leni shi maa jineci aŋ nụ ụshɛka ata o. Bi peshinji shi aŋ kaa udomu bu na wo mbisono aŋ uhwaŋna tu uwaŋna tụ ụjita o.

²⁰Gabụ kaa bi peni aŋ mpiala mụ bụ mi biye maa mu no sokokono aŋ iyi. Bi becinji shi kaa mana bụ nu unu wa aba o, ebi peni aŋ meni iwɛ i'uyɛ nɛ gwụmɛ aŋ.

²¹Shiywa buhanda abu untanganɛ aŋ nụ ụshɛka, i zasa kaa iyi elele nɛ 'nyananɛ aŋ o, tugwuno ta aba kaa tɛ injɛ shɛ o, shivwɛvwɛjɛ sha aba kaa shɛ shanjɛ shɛ o.

²²Gabụ bi leni maa a lasatagwụ edenji keeni cɛnjɛ cɛnjɛ-ta-tugwama, ibɛ shɛ cɛnjɛ cɛnjɛ tu na tu to tugwungwu na ma ta aba. Ee lesheji cɛnjɛ ti Hɛshbon tu na ge Sihon shɛ agwuma tuba keeni cɛnjɛ tu Bashan tu na go Og shɛ agwuma tuba.

²³Gabụ kaa bi peni aŋ maa e meci miaụŋ mu ofwugwo gana mkpasu, ebi tecinji aŋ na cɛnjɛ ta ata ebi teji la eshi aba maa bi zhɛ ba pana aŋ, ee leshiji tu ga kaa.

²⁴Gabata miaụŋ ma aba mi zhe mee leshiji cɛnjɛ ta ata. Gabụ kaa bu lasagwụ aŋ atwa na jɛjɛ la na cɛnjɛ ta ata, aba shɛ Ekenan. Ebu utegeni aŋ kaa atwa ata medenji shɛgwuma sha aba keeni atwa cɛnjɛ ta ata, iwɛ maa a njɛ aŋ gana na kwụlanɛ aŋ.

²⁵E lesheji du kaa ashɛpwụ na 'yagajɛ ikepi keeni cɛnjɛ tu na tɛ zhɛmanjɛ iyimɛyɛ; ee lesheji shimwono shɛ na i'wɛŋnɛ ibiye shinenji keeni ɛmɛzhinjɛ na oo go hinongwo la keeni ntuma ma shifwafwa keeni ntuma mi i'wɛ'wɛ nɛ ya 'wala tebiye. Gabata aa yɛ iyi, ee shigeji, nazhɛ ee nyemenji.

²⁶Ama a hwụjɛ shɛ unu bu o, aa ma bụ tana tigezhe; aa panɛ undwa bu aba. Aa kwụnɛ egesere bu a na a tɛtagana aŋ unu maa e gwure pụ bụ, aa bụ dumangana n-ndumwa mụ wɛ duwa duwa.

²⁷Iwɛbɛ po ebu utegeni aŋ atwa i'ime ya aba, aa njɛ aŋ umungwuta. Ama aka na ta a nda aŋ umungwuta; ee bi keri ụhiɛŋshɛ maa mbiyeni aŋ, abụ hwụjɛ kaa ta abụ namɛ na azuba. Inyɛmɛnyɛmɛ bu i'wɛtwɛ leni maa peni aŋ ehwurembe a na leshiji aŋ ni i'ɛlɛ ya atwa i'ime ya aba.

²⁸Ama gunu na ta a hwungwa, aa bụ ndaananɛ iwɛwɛ. Iwɛbɛ po ebu zweni aŋ ni i'ɛlɛ ya atwa i'ime ya aba maa a 'yaga ụhwada wa aba. Ama aka na te e bi keri ụhiɛŋshɛ maa mbiyeni aŋ, abụ hwụjɛ kaa waa ta abụ namɛ na azuba, ebi leshiji aŋ heŋni heŋni iwɛ inyɛmɛnyɛmɛ bu.

²⁹Gabụ kaa ba tɛtagana aŋ unu iwɛ maa e gwure no ofwo undwa bụ, ama a mama sata, aa lacɛ maa a hwụjɛ-unu bu. A lacɛ shikpogo shɛ bụ, ma shɛ na bụtụ ga shɛ ba ya uraiŋ tu baa ga untanganɛ shụ. No tuhwotono ta aba, aa bu panɛ shɛba, aa lacɛ maa a hwụjɛ-unu bu.

³⁰Iwɛnɛ po shiywa shu ofwugwo aba tɛtagana aŋ unu ni isɛbwɛ ti'ima. Ebi peni egesere bu mpiala mụ bụ maa e mbishi aŋ. Ama e shiri shi waa acɛbɛ o, iwɛbɛ po ebi leni maa ga atwa cɛnjɛ ti nya eri aŋ.

³¹Okwo ti yaa shɛ gana ata, bi iricinji shi aŋ o, iwɛnɛ ti inyɛmɛnyɛmɛ bu hwuleji; ibɛ po ebi jineci shi aŋ. Iwɛnɛ po gabụ bɛ shɛ Agwatana tulubo-ti-biye na bo hioko inyɛmɛnyɛmɛ.

³²Oo Agwatana tu, gabụ bɛ shɛ Agwatana a'wụtụ, na kaa 'yajɛ ikɛnyi, keeni bu na bi igɛhi, na kaa ba untangana unu bu tutwa keeni tulubo tụ bụ ti biye. To lono maa umungwuta keeni ụbaụta na shɛgwuma sha Asiria shɛ ma tu pana, ta shɛgwuma shi tu, te ehiu tu, to onongbo tu, te egesere tu, te eshi tu keeni atwa ga bu hwɛɛ, ụbụ shanɛ iyi ticwɛŋ, te kwuni na aka ata uuwa i ci hwayɛ ga o.

³³Gabụ kaa bi teni cɛŋ ni iyi elele nɛ ebi leni maa iti jitengeni hwɛɛ. Gabụ bɛ shɛ bụtụ bɛ tɛcara okwo aka na atɛ njɛ iwɛwɛ.

³⁴Shɛgwuma shi tu, te ehiu tu, to onongbo tu keeni eshi tu, a untanganɛ shɛ undwa bụ o, e shiri shi kaa acɛbɛ nu unu-tupana bụ keeni unu na aba tɛtagana aŋ o.

³⁵Okwo ta a namɛ na cɛnjɛ-ta-tugwama ta aba, aa ya tuwebiye na cɛnjɛ ta ata ti 'yajɛ ugwungwu, tu na ti gembi, tu na ebi peni aŋ, ama e genji shi waa iwɛwɛ ya aba maa a na bụ zhɛba o.

³⁶Hioko, ajama atɛ shɛ hwayɛ ga, na cɛnjɛ tu na ebi peni la eshi tu maa a yɛ tụ'walụ ta tuba keeni tuwebiye ta tuba. Hioko, ajama kaa atɛ shɛ ya.

³⁷Shɛgwuma shɛ na ebi ti peni maa shɛ 'yaga ụhwada tu, shɛba sho sugo ya iyimɛyɛ nɛ banɛ ne shihilo shi tu, iwɛnɛ atɛ njɛ iwɛwɛ. Aba kaa 'yagananɛ ụhwada iyimabiga tu, aa ma tɛ nda gana na kwụlanɛ aŋ. Tu namɛ ne tiriri tụ 'wụtụ.

³⁸Iwɛ iyi nɛ teni hwɛɛ, ibɛ po atɛ njɛ unu-tutwa na 'yajɛ ikɛnyi, eti 'nyeci uŋ. Ibɛ du po ehiu tu, na Alivai tu keeni onongbo tu shiyeni i'ɛlɛ ya aba na tuba.