Read bassa ESTA 1 Bible Online

ESTA 1 - bassa bible

ESTA 1

¹Iyi nɛ njɛ na aka Zɛksis na, gɛ Zɛksis[1] ga ubwa shɛ agwuma na 'yajɛ ụhwada we ekpeleshi cɛnjɛ dipi-yebi-nu-woshi-na-tuba-ti-cenje (127) te kwune na cɛnjɛ ti India tutu cɛnjɛ ti Itiopia.

²Na aka ata agwuma gɛ Zɛksis jɛjɛ ni idwɛtwɛ tugwama tu bwa nɛ namɛ nu Susa, na shɛ ụshɛpwụ ụ'wụtụ na hwuri a na vwɛ hwɛɛ na cɛnjɛ ti Pɛsia.

³Tu baa yɛ tugwama tu bwa, yaa namɛ shiywa shɛ tatụ, baa njɛ iyimɛyɛ unyasa i'wɛtwɛ iwɛ atwa elele na namɛ no shihwolu, ta amadanga ubwa. Ejeshi Pɛsia keeni a na Midia a ụlwatagwụ hwɛɛ, medenji egwomina keeni atwa na 'yagajɛ nzeci.

⁴Iwɛnɛ po ijitɛ dipi-tɛtu-nu-talacɛ (180) tukwugwu bee mbiseni aŋ ugombo uduciya cɛnjɛ-ta-tugwama tu bwa keeni tipilanụ tụ ụjɛrụma igɛhi ibwɛ.

⁵Aka na ti ijitɛ ɛtɛ keshici, nazhɛ agwuma peni aŋ iyimɛyɛ unyasa i'wɛtwɛ, ijitɛ icenje mudu, no tupohondo tu umwamwa ihwɛ ya agwuma. Ibɛ shɛ iwɛ atwa elele, ta atwa na gwụmwatangwụ, ta atwa na gembenji a na namɛ nu Susa ata shɛ ụshɛpwụ ata ụ'wụtụ.

⁶A njɛ umwamwa ata ihwɛ ya agwuma tisemberi no tugwuno tu na aa nɛ ni ihwehwe uduhwa wa ababa keeni inɛ icɛnjɛ tuswataga. Oo to tu ni ihwehwe uduhwa ushenje na tɛkanɛ ta azụrụfa keeni na atukpa na aa njɛ na atayɛ ogwumishi a na 'yajɛ shihwolu mbwụụ mbwụụ. A njɛ n-ndụtwụ ma bɛjɛjɛ ma azhɛnarɛya keeni azụrụfa nu umwamwa ata ihwɛ ya agwuma, ee dibeni mu, ee gbelecenji mu na atayɛ acɛnjɛ, na a na eshenje, na a na uduhwa keeni a na eshi a na a ta ngara ngara.

⁷Ee zweneni aŋ meni mụ ụlatụ maa e swe no okwopi azhɛnarɛya a na namanjɛ udenji swoswoswo. Meni mụ ụlatụ ma agwuma ta kaa mu barɛ gana na ti ikɛnyi ibwɛ ci.

⁸E leneni bugaiŋ be elele maa swa meni ma ata te teni cɛŋ nu unu na agwuma peni aŋ, nu uhwaŋna na baa jala. Iwɛnɛ po agwuma peni anjɛ-ugondu ubwa unu maa ge e peni bụtụ bụtụ mu naa na baa jala.

⁹Biyikwo ba agwuma ga Vashti du ndanɛ eyikwo iyimɛyɛ unyasa i'wɛtwɛ nu umwamwa ata ihwɛ ya agwuma gɛ Zɛksis.

¹⁰Tụ ụjita ata ucenje iyimɛyɛ unyasa i'wɛtwɛ ulwa, u'waba hiɛ agwuma Zɛksis na mayaga mu na bee swe. Bee peni nvwala mu bwa mi cenje: gɛ Mɛhuman, ne Bizta, na Habona, ne Bigta, na Abagta, ne Zita keeni Kakas unu,

¹¹maa ga a shapɛrɛganɛ bụ biyikwo bwa ga Vashti na agba ubwa, maa ge urigeni bu udara ubwa u tugwama, maa mbisono bu atwa ata keeni amadanga agwuma ụzhɛ ubwa, iwɛnɛ tu baa pilanụ igbɛtɛtɛ tebiye.

¹²Ama aka na tu nvwala ma agwuma mi mbishi biyikwo ba agwuma ga Vashti utumwa ata, ga Vashti biyikwo ba agwuma lacɛ tizhajɛ. Iwɛbɛ po agwuma njɛ isɛbwɛ tebiye.

¹³Agwuma kaa nyiwoŋnowuŋ tu boo go hoŋtono atwa na mepi undwa iheŋtene maa e peni bu ahaŋsa. Baa suyanɛ atwa na a pana bụ ahaŋsa, iwɛ maa mapa iyi nɛ baa shɛ ba nda.

¹⁴Atwa na kaa gwumwongonu na agwuma uhwuri atwa vwɛ hwɛɛ a shɛ: ga Kashina, ne Shita, nɛ Mɛrɛs, na Admata, na Tashish, na Masina keeni Mɛmukan. Atwa ga ecenje, aba shɛ atwa na baa shana bo hoŋtono iwɛ ɛgbɛɛ, iwɛ ma e peni bu ahaŋsa ta. Aba kaa shɛ atwa shihwolu shɛ 'wụtụ shi Pɛsia keeni Midia na cɛnjɛ-ta-tugwama ta agwuma ata.

¹⁵Bee heŋteni atwa ata, bɛɛ hiɛŋ, Gamba agwuma gɛ Zɛksis, N tumwanɛ nvwala mi mi no ofwo biyikwo mi ga Vashti, Ngee peni bu unu, ama bu lacɛ unu ata tuhwuga! Imbe tuba undwa hiɛŋ ga a njɛ bụụ?

¹⁶Gɛ Mɛmukan jishijɛ agwuma ne eshe amadanga agwuma, bɛɛ hiɛŋ, Shɛ agwuma kiri ga Vashti 'wanganɛ o, bu 'wanganɛ du amadanga agwuma hwɛɛ, keeni atwa elele na namɛ ne ekpeleshi cɛnjɛ-ta-agwuma ti Zɛksis hwɛɛ.

¹⁷Iwɛnɛ po unabarɛ iyi nɛ biyikwo ga ba agwuma njɛ, zhɛ wo tono eyikwo elele na shɛcɛbɛ, ibɛ du ɛɛ zhɛ na ngbaraka olwo aba cwɛŋ, ɛɛ zhɛ ɛ hiɛŋ, Agwuma gɛ Zɛksis peni la biyikwo bwa ga Vashti unu maa ga zhajɛ, bi zhe shi kaa.

¹⁸Nụ ụjita ga gbaa eyikwo na 'yajɛ izeci ni Pɛsia keeni Midia zhɛ a hwuga iyi nɛ biyikwo bu njɛ, ɛɛ zhɛ a nda du amadanga agwuma gana ata. Ibɛ po tungbaraka cwɛŋ keeni ụpụrụsa gana ga zha shɛ wa 'yaga uce o, nazhɛ olwo aba tuba zhɛ na nda isɛbwɛ duwa ne eyikwo aba.

¹⁹Yaa shɛ ya kwụlanɛ agwuma, asha go lono maa shikicingo unu-tupana, maa e 'nyeci uŋ na andwa Pɛsia keeni a na Midia, maa kede ga Vashti zhajɛ ya na agba agwuma Zɛksis kwukwuŋ. Ga agwuma peni biyikwo bi nya na zhɛmɛ uhwuri bu ohwolu ubwa. Kede e sheyinji ya kaa undwa ata kwukwuŋ.

²⁰Aka na te e enenji ụshɛrɛya na agwuma kwunanjɛ no ofwo na cɛnjɛ cɛnjɛ-ta-tugwama tụ bụ ti teje hwɛɛ, nazhɛ eyikwo elele zhɛ na muna olwo aba ụjɛrụma, ta atwa na gembenji, ta atwa na gwụmwatangwụ.

²¹Ahaŋsa ata tụpana kaa kwụlanɛ agwuma keeni amadanga ubwa, nazhɛ agwuma njɛ gana na ti gɛ Mɛmukan shire.

²²Iwɛbɛ po baa tumwanganɛ utakada ata ne ekpeleshi cɛnjɛ-ta-tugwama tu bwa hwɛɛ. Ti'nyeci tu bwa tɛ shɛ gana na te ti'nyeci ta cɛnjɛ te elele tu namɛ keeni rɛjɛmɛ re elele. Ti'nyeci ta ata ti hiɛŋ, Butubwenyi be elele na shɛ agwuma-ihwɛ ibwɛ, ga shɛ ubwa du ba kwunanga iwɛ ye elele nụ ụhwada ubwa.