Read bassa ESTA 3 Bible Online

ESTA 3 - bassa bible

ESTA 3

¹Na aba inɛ gɛ, ibɛ agwuma Zɛksis gembicinji Heman yɛu Hamɛdata na udenji ubwa ụ shɛ Agag.[5] Bee keeni ohwolu ubwa ugombo uhwuri a na bụtụ be elele na anjɛ-ugondu ubwa.

²Agwuma kaa peni atwa ubwa shihwolu elele unu maa go no kwuzono Heman maa a na muna bụ ụjɛrụma, aa nda ga kaa gana ata, semi go Modɛkai kiri kwuzeni shi bu maa pana bụ ụjɛrụma.

³Nazhɛ atwa shihwolu shu ugondu wa agwuma, a na namɛ no odubo ata agwuma, heŋteni Modɛkai, ɛɛ hiɛŋ bụ, Iwembe po abu hwụjɛ shɛ unu na agwuma penii?

⁴Ama gana na ta a duma iwɛ nu bwa iyi-heri, bɛ njɛ shɛ kaa iyi nɛ oo mbiso bu o. Bee mbishi aŋ, bɛɛ hiɛŋ, Biju Ngaa shɛ, N sha shɛ mo kwuzono Heman o. Ee zhe ee mbishi Heman, iwɛ maa a kwụbɛ okwo n-ndumwa mu Modɛkai mi zhɛ ma 'yagana bụ eshe.

⁵Aka na ti ge Heman kwụbɛ maa go Modɛkai kwuzeni shi bu ga o, bi peni shi bu kaa ụjɛrụma o, ibɛ po isɛbwɛ Heman ishijɛ.

⁶Aka na ti bee mepi ya maa go Modɛkai shɛ Biju, bee heŋshi maa shɛ go Modɛkai kiri bɛɛ zhɛ ba kwụna ya o. Ama ge Heman dwelekeci uhwaŋna na maa iricingo Eju elele na namɛ na cɛnjɛ-ta-tugwama ti Zɛksis, a na shɛ atwa Modɛkai.

⁷Ta agwuma Zɛksis yɛ tugwama tu bwa yaa namɛ shiywa umpwa-na-shɛba-shi-yebi, nu upiana Nisan,[6] na shɛ Bihiiŋ. Aa shɛjɛ ụshɛga na ɛɛ hiɛŋ Pụ, na agba Heman iyi-heri iyi-heri maa e teri upiana keeni ụjita uko. Ibɛ icɛcɛ[7] ɛtɛ 'imɛ upiana Ada.[8]

⁸Ge Heman mbishi agwuma Zɛksis, bɛɛ hiɛŋ, Atwa oko namba a na mburusonu ba nu ukpeleshi cɛnjɛ-ta-tugwama tụ bụ no ofwo elele. Andwa aba namɛ swooŋ na atwa kpaaŋ, a hwụjɛ shɛ unu wa andwa bu o, to tumo iwɛ aba o.

⁹Ama yaa shɛ yaa bụ kwụlanɛ gabụ agwuma, asha lono maa e 'nyeci utakada uko iwɛ maa e iricinji aŋ hwɛɛ. N zhɛ mo zwono ukwuribi wa azụrụfa arinya igbɛɛ-itɛ (10,000) nu umwono ukwuribi wa agwuma maa a cɛpɛ atwa na zhɛ a untangana ugondu ata tɛnda.

¹⁰Nazhɛ agwuma hwucice bukanɛ ba buvwa bwa bu gata aa nda ti'nyeci tu na ti beni ni i'ɛlɛ ya agwuma useyida bee peni Heman yɛu Hamɛdata na shɛ Bu'agag, na shɛ bụtụ bi i'ime be Eju.

¹¹Nazhɛ agwuma hiɛŋ Heman, untangana ukwuribi ata bụ, ama tuba nda atwa ata gana na ụbụ kwụlanɛ.

¹²Ge Heman suyanɛ e'nyeci iyi agwuma nụ ụjita umpwa-ni-bɛ-tɛtu ne Bihiiŋ, bee peni azhɛgba agwuma, ne egwomina keeni atwa shihwolu a na untanganɛ ụhwada ukpeleshi cɛnjɛ te elele unu gana na i shɛ maa e 'nyeci ti'nyeci ta ata na rɛjɛmɛ ru udenji we elele na namɛ nu ukpeleshi cɛnjɛ te elele hwɛɛ. E 'nyeci tu ni izeci ya agwuma Zɛksis, aa njɛ tụ kaa useyida na bukanɛ ba agwuma.

¹³Aa tumwanganɛ utakada ata tedure na atumwa agwuma a na o sugo aŋ maa ge zhe ne ekpeleshi cɛnjɛ te elele, maa ge iricinji Eju hwɛɛ; ta miaụŋ, ta atwa na inganjɛ, ta miaụŋ mi shenje, te eyikwo, nu uwaŋna ụjita uko gba. Ibɛ shɛ nụ ụjita umpwa-ni-bɛ-tɛtu na bụvwụvwụ bi yebi, maa e suji du i'wɛŋnɛ ya aba a yɛ.

¹⁴E shiri tuzwogo te ti'nyeci ta ata maa ga shɛ unu-tupana nu ukpeleshi cɛnjɛ te elele. Ee enenji no ofwo atwa elele maa ga mama 'imɛ a 'yaka ụjita ata.

¹⁵Atwa na 'waŋnɛ aŋ sanɛ no ofwo elele ni izɛlɛgwu; tedure nu unu-tupana wa agwuma. Ɛɛ bɛcinjɛ unu ata tụpana nụ ụshɛpwụ ata ụ'wụtụ, ɛɛ hiɛŋ, Susa. Nazhɛ agwuma ne Heman jɛjɛ maa e swe mayaga. Ama shihaŋsa sha atwa na jɛjɛ nụ ụshɛpwụ ata Susa tuba shi sukwutogonu aŋ.