Read bassa ESTA 5 Bible Online

ESTA 5 - bassa bible

ESTA 5

¹Ti yaa namɛ ijitɛ itɛtu, ge Esta urigeni i'wɛŋnɛ ibwɛ i tugwama, bee zhe bee shikeni nu umwamwa wa agwuma, ne eririri umwono na agwuma a gɛga ni idwɛtwɛ ibwɛ. Agwuma ta kaa jɛjɛ ga ni idwɛtwɛ i tugwama tu bwa, ne eririri odubo umwono ubwa.

²Aka na ta agwuma kwụbɛ Esta biyikwo bwa, ti bee shikeni nu umwamwa ata, amɛ agwuma lemi nu bwa; baa sakanɛ bụ bukwuto ata ba azhɛnarɛya baa ga 'waŋnɛ nu u'ala ubwa. Nazhɛ ge Esta keeni izhɛ bee timengeni ihiŋhiŋ bukwuto ata.

³Nazhɛ agwuma heŋteni bu, bɛɛ hiɛŋ, E-biyikwo mi, ge Esta, imbe ụbụ kwụlanɛɛ? Imbe aba jala tụlụpaa? M mbishi, okwo yaa shɛ tutu ashashɛ cɛnjɛ-ta-tugwama ti mi, i zhɛ mo bu tomo.

⁴Ge Esta jishijɛ, bɛɛ hiɛŋ, Yaa shɛ yaa ga kwulana agwuma, maa yebe hiɛ zhajɛ hwayɛ ga ahiɛbana Heman no ofwo iyimɛyɛ unyasa nɛ Ngaa bụ ndanɛ.

⁵Nazhɛ agwuma peni Heman unu maa ga zhajɛ kakayɛ, iwɛ maa e zhe no ofwo Esta gana na ti ge Esta ba jala. Agwuma ne Heman zhe ga no ofwo iyimɛyɛ ɛtɛ ge Esta imanganjɛ.

⁶Nazhɛ agwuma heŋteni Esta sasana no ofwo iyimɛyɛ ɛtɛ, bɛɛ hiɛŋ, Imbe kwuuŋ aba jalaa? Ɛ zhɛ ma bụ pana iŋ. N zhɛ ma bụ pana iyi elele nɛ aba lụpa, okwo yaa shɛ tutu ashashɛ cɛnjɛ-ta-tugwama ti mi, ɛ zhɛ ma bụ pana iŋ.

⁷Ge Esta jishijɛ, bɛɛ hiɛŋ, Iyi nɛ Ama lụpa na.

⁸Agwuma, yaa shɛ ɛbi zhɛ bu ma m mapana iwɛ, yaa shɛ yaa bụ kwụlanɛ kaa maa m peni iyi nɛ Ama bụ lụpa, asha lono maa hi gwure beyi ga ahiɛbana Heman no ofwo iyimɛyɛ nɛ Ngɛɛ zhɛ ma hi[11] imangana, nazhɛ Ngɛɛ zhɛ mo bu mbiso iyi nɛ Ama jala.

⁹Nazhɛ ge Heman beni apata jita ata nu unyasa keeni amɛ-olom a'wụtụ. Ama aka na tu baa kwụbɛ ya Modɛkai no odubo umwamwa wa agwuma, tu go Modɛkai ishɛjɛ shɛ maa pana bụ ụjɛrụma, nazhɛ isɛbwɛ ibwɛ ishijɛ no ofwo Modɛkai tebiye.

¹⁰Okwo ti yaa shɛ gana ata, ge Heman 'imɛ-isɛbwɛ baa sanɛ ujiyo ni ihwɛ ibwɛ. Nazhɛ baa suyanɛ eyejilo ubwa keeni biyikwo bwa gɛ Zɛrɛsh maa o sotulonu urubwo uko.

¹¹Ge Heman swegeni aŋ iwɛ uduciya ubwa, tụ ụjɛrụma ubwa, ti iwɛ miaụŋ mu ufwugwo mu na baa 'yajɛ keeni gana na ta agwuma gembicinji bu uhwuri bụtụ be elele na atwa shihwolu shu ugondu wa agwuma.

¹²Ge Heman teji shi apata o, boo to tuhwulo, bɛɛ hiɛŋ, Gamba kiri biyikwo ba agwuma ge Esta leneni maa Ma zhagajɛ na agwuma maa ta zha no ofwo iyimɛyɛ nɛ baa imanganjɛ. Bu ta ma n suyanɛ du sasana maa ta zha na agwuma beyi ga.

¹³Ama ijɛ hwɛɛ i n tatụlanụ sụ, tu Ngaa kwụbɛ tu go Modɛkai Biju ata ta jɛjɛ no odubo umwamwa wa agwuma o.

¹⁴Nazhɛ biyikwo bwa gɛ Zɛrɛsh keeni eyejilo ubwa hwɛɛ, hiɛŋ bụ, Lono maa gɛ ɛ jwɛ ụ'wụ'wụ a shɛnjɛ, go uzoto ubwa ụ shɛ imbele i'ɛlɛ dupu,[12] maa mbishi agwuma beyi nu uvwungwa maa ge sweci Modɛkai nu bwa. Nazhɛ hwuri tuba maa 'wa agwuma no ofwo iyimɛyɛ ɛtɛ na amɛ-olom. N-ndumwa ma ata kaa mu kwụlanɛ Heman, bee eni aŋ ga ụ'wụ'wụ ata tɛshɛnda.