Read bassa ESTA 7 Bible Online

ESTA 7 - bassa bible

ESTA 7

¹Agwuma sanɛ ga abana Heman no ofwo iyimɛyɛ tiya ne Esta, biyikwo ba agwuma.

²Agwuma heŋteni Esta sasana, nụ ụjita uyebi, ta a swa meni mụ tụ'walụ ta afwafwa, bɛɛ hiɛŋ, Imbe kwuuŋ aba lụpaa? Ɛ zhɛ ma bụ pana iŋ. Imbe aba jalaa? Okwo tutu ashashɛ cɛnjɛ-ta-tugwama ti mi, i zhɛ kaa mo bu tomo.

³Nazhɛ biyikwo ba agwuma, ge Esta jishijɛ, bɛɛ hiɛŋ, Oo agwuma, yaa shɛ ebi eri bo hioko inyɛmɛnyɛmɛ mi, yaa shɛ kaa yaa bụ kwụlanɛ maa uraiŋ mu nama keeni uraiŋ wa atwa mi du sasana, asha iwe mi hwuwowu.

⁴Iwɛnɛ po o tu songwo, tu Gamba, ta atwa mi, maa e ti iricinji, maa a tụ kwụnɛ, maa a tɛ njɛ ufwu. Yaa ga shɛ maa ge e ti senji maa ta sha ajama eyi keeni ajama o o kwakwa, N ngɛ zhɛ ma ima ilɛmɛ. Ama kaa bụtụ ata bi i'ime tu, bi eri shi tuba ba pana agwuma tụlụkpashɛ tu ufwu na gɛ zhɛ ma bu nda o.[13]

⁵Nazhɛ agwuma Zɛksis, heŋteni Esta biyikwo bwa, bɛɛ hiɛŋ, Gaaba taa? Ce bụtụ gonu na zhɛ ba kara maa nda ijenu namɛɛ?

⁶Ge Esta jishijɛ, bɛɛ hiɛŋ, Bụtụ ata tu bi i'ime, na ma tɛ shɛka, ubwa shɛ ge Heman, bụtụ ga bi ci'nyɛ! Nazhɛ inyɛsɛ 'imɛ Heman na agba agwuma keeni biyikwo ba agwuma.

⁷Agwuma ishijɛ, bee beni nu umwono ata aa ga ya iyimɛyɛ ni isɛbwɛ i'wɛtwɛ, bee zhe ni itimɛ ike nɛ namɛ nụ ụdatụ umwono ata ubwa. Ti ge Heman kwụbɛ iyi iwɛ nɛ agwuma zhɛ a nda bụ, bɛɛ ishijɛ, bee shikeni maa lụpa Esta biyikwo ba agwuma iwɛ uhiuhiu ubwa.

⁸Gunu na ta agwuma banɛ ni itimɛ ebe namɛ nụ ụdatụ ubwa, bee gwure nu umwono we ebe aa ga ya iyimɛyɛ. Ge Heman tuba leyi no ogodo ebe ge Esta momo mbo. Agwuma hiɛŋ, Gabụ hŋ bu sukakanɛ sasana biyikwo mi ni ifelu ne eshe mi nu umwono mu? Gunu na tu n-ndumwa ma ata mu banɛ nu unu wa agwuma, ibɛ nvwala ma agwuma mi zhajɛ mee urigeni Heman iyi ne eshe.

⁹Ga Habona na shɛ bụtụ bu ko na ashashɛ nvwala mu na ma nama na agba agwuma, hiɛŋ sasana, Hioko ụ'wụ'wụ na uzoto ubwa ụ shɛ imbele i'ɛlɛ dupu unaa na ge Heman ga shɛndwa iwɛ Modɛkai, na jɛmɛ la n-ndumwa mi biye iwɛ agwuma, u te shikeni ba ni ihwɛ ibwɛ. Nazhɛ agwuma hiɛŋ, Swata bu ma nu bwa!

¹⁰Ee sweci ga Heman nụ ụ'wụ'wụ ata baa ga shɛndwa iwɛ Modɛkai. Nazhɛ isɛbwɛ nɛ ge munje agwuma kezhi.