Read bassa ỤBANỤ 10 Bible Online

ỤBANỤ 10 - bassa bible

ỤBANỤ 10

¹Nazhɛ AGWANGWAMA hiɛŋ Moses, Tonono Faro, iwɛnɛ po Gamba N to bu tɛshɛshɛpana keeni anjɛ-ugondu ubwa, maa Ma ndana aŋ arụhwajɛ mi.

²Iwɛ maa mbishi yɛu bụ keeni bụjalụ bụ swɛɛ unabarɛ iyi nɛ Ngaa njɛ la Ijipti, keeni arụhwajɛ mi na Ngaa njɛ na ashashɛ aba; iwɛ maa mepi maa Gamba n shɛ AGWANGWAMA.

³Go Moses keeni Aron teneni ga Faro, ɛɛ hiɛŋ bụ, AGWANGWAMA na shɛ Agwatana Ehibru hiɛŋ, Uuwa i ci aka na ɛbi zhɛ ba laka timeme zucinje pi mii? Ganga atwa mi maa e zhe a n zhɛbɛ.

⁴Yaa shɛ abụ lacɛ atwa mi tuganga, N zhɛ mɛ 'wɛŋ ovworo na cɛnjɛ tụ bụ beyi.

⁵Ɛ zhɛ o ubono na cɛnjɛ, hi zha shɛ hia kwụba cɛnjɛ o. Iyi elele nɛ ga vwɛ nɛ atayɛ-eshilo ata njɛ shɛ la ufwu, ovworo zhɛ a ya iŋ ya kpaaŋ, ɛ zhɛ a ya i'wɛ'wɛ nɛ namɛ ni itimɛ bu.

⁶Ɛɛ zhɛ o shino no shimwono shɛ bụ kpaaŋ, to shimwono sha anjɛ-ugondu bu kpaaŋ, to shimwono she Ejipti kpaaŋ, gana na eshi bu, keeni ogwunukwoshi bu ta kwụbɛ shɛ la kwukwuŋ te kwuni aka na te e meci aŋ uuwa i ci hwayɛ ga. Nazhɛ go Moses banɛ no olugwo Faro.

⁷Ibɛ po anjɛ-ugondu Faro hiɛŋ bụ, Aka na bụtụ ga zhɛ ma tu ganga ụbaụta tupanaa? Ganga E'isrɛl ga maa e zhe a zhɛbɛ AGWANGWAMA na shɛ Agwatana aba. Bi te mepi shi waa maa Ijipti hashɛganụ hŋ?

⁸Ibɛ po ee gwuricinje Moses keeni Aron pu Faro; bɛɛ hiɛŋ aŋ, Zhaga zhɛba ma AGWANGWAMA na shɛ Agwatana hiŋ, ama ataaba tuba zhɛ a zhaa?

⁹Go Moses hiɛŋ bụ, Ti zhɛ ta zha ta miaụŋ mu tu, ta atwa na inganjɛ; ti zhɛ ta miaụŋ mu tu me eyi, ta miaụŋ mu tu mo o, ta agwụdụ tu, ti inɛ tu, keeni iyweywe tu i zhɛ. Ti zhɛ ta ndana AGWANGWAMA tu iyimɛyɛ isene tilɛɛ.

¹⁰Ga Faro hiɛŋ aŋ, Ga AGWANGWAMA nama ne hiŋ! Gamba hŋ n zhɛ ma hi ganga maa hi hwuri, ta miaụŋ mu ga mi hiŋ mi ticwɛŋ cwɛŋ? Hioko ma, iyi iwɛ tɛ namɛ nu umbe hiŋ!

¹¹Awo! Ahiɛba etwenyi zhaga ma kiri, maa hiɛ zhɛbɛ AGWANGWAMA, iwɛnɛ po iyi nɛ du ma hi dwa eshe ta. Nazhɛ ee unzhe Moses keeni Aron na agba Faro.

¹²Nazhɛ AGWANGWAMA hiɛŋ Moses, Sakana cɛnjɛ ti Ijipti u'ala bụ iwɛ maa ovworo ubono na cɛnjɛ ti Ijipti, iwɛ maa a yɛ iyi elele nɛ vwɛ na cɛnjɛ tu ga, inɛ ye elele nɛ atayɛ-eshilo ge genji la.

¹³Go Moses sekeni ga cɛnjɛ ti Ijipti bukwuto bwa, nazhɛ AGWANGWAMA 'waŋnɛ uvwugo ụzalụ bu uwaŋna-banụ na cɛnjɛ ta ata uuwa gụ ụrụmɛ, uuwa gi iyi yo holo; aka na ti iyi heri uvwugo ata 'waŋnɛ ovworo apata.

¹⁴Ovworo ata ubeni na cɛnjɛ ti Ijipti kpaaŋ, ee tileni na cɛnjɛ ti Ijipti no ofwo elele, e hwuleji; ovworo gana ata ta zasaba la kwukwuŋ, a zha shɛ kaa du a nama ya gana ata kwukwuŋ.

¹⁵E ubeni no ofwo elele na cɛnjɛ ta ata, ibɛ po ofwo rimeni, aa yɛ iyi nɛ aa bɛrɛ na cɛnjɛ ta ata kpaaŋ, ta tụ'walụ ti i'wɛ'wɛ ye elele nɛ atayɛ-eshilo ge genji la, ti iyi inyɛshɛ ye elele i vwɛ shɛ ne ehilo na cɛnjɛ ti Ijipti kwukwuŋ.

¹⁶Ga Faro suyanɛ Moses keeni Aron ni izɛlɛgu, bɛɛ hiɛŋ aŋ, N njɛ AGWANGWAMA na shɛ Agwatana hiŋ iwɛwɛ, ta ahiɛba du.

¹⁷Ibɛ po Ma hi tabwa hwuwayɛ go maa hi n gengeni iwɛwɛ mi ko, maa kaa hiɛ lụpɛ AGWANGWAMA hiŋ maa ma m pashɛnga tu'wo tu ga karu ko.

¹⁸Ta ata Moses banɛ no olugwo Faro, baa tabwa AGWANGWAMA.

¹⁹Ibɛ po AGWANGWAMA leni maa uvwugo ụ'wụtụ banɛ zalụ bu uwaŋna-twonuo, wee suji ovworo ata, wee suji aŋ waa 'wɛŋ ni itekwu ishenje; uvworo we elele vwɛ shɛ ya no ogwungwu cɛnjɛ ti Ijipti kwukwuŋ.

²⁰Ama AGWANGWAMA njɛ maa ga amɛ Faro shɛshɛpanɛ, bi genji shi miaụŋ mi Isrɛl maa e hwuri o.

²¹Nazhɛ AGWANGWAMA hiɛŋ Moses, Sakana u'ala bụ na azuba iwɛ maa tishi tu na bụtụ eri bo tumongono, tu ubi cɛnjɛ ti Ijipti.

²²Go Moses sekeni ga u'ala ubwa na azuba; nazhɛ tishi tu na ti inshi tu layɛ na cɛnjɛ ti Ijipti kpaaŋ, tutu ijitɛ itɛtu.

²³A mama kwubanụ sụ o, i zasa bụtụ eri bɛ ishijɛ nu urubwo ubwa uuwa ijitɛ ɛtɛ itɛtu o. Ama E'isrɛl tuba 'yajɛ uhioko-uhwaŋna no ofwo elele na aa namɛ.

²⁴Ga Faro suyanɛ Moses, bɛɛ hiɛŋ, Zhaga zhɛba ma AGWANGWAMA hiŋ, ga miaụŋ mi hiŋ mi zhe du, te eyikwo hiŋ, ama ga agwụdụ, ni iyweywe, keeni inɛ hiŋ vwɛ epe.

²⁵Ama go Moses hiɛŋ bụ, I shɛ tilɛɛ, maa utu utegeni iyi ya arụpɛ, ti iyi ya apwaŋ tuhwoŋzhingo, iwɛ maa ta zha ta ta ụrụpɛ na AGWANGWAMA na shɛ Agwatana tu.

²⁶Iyimabiga tu shɛ ya zhagaga no tu tilɛɛ, okwo ugwogwozwo ibɛ shɛ shɛ wo kwu ne ekwunyi o. Na amɛ ibɛ ɛti zhɛ ta vwa iyi nɛ maa ta zhɛba AGWANGWAMA na shɛ Agwatana tu tilɛɛ. Aka na kaa eti ci apata, nazhɛ ɛti zhɛ ta mapa inɛɛ nɛ i shɛ maa ta vwa maa ta ta ụrụpɛ na AGWANGWAMA tu.

²⁷Ama AGWANGWAMA njɛ maa amɛ Faro shɛshɛpanɛ waa, baa lacɛ aŋ tuganga.

²⁸Ga Faro hiɛŋ Moses, Ishɛga no olugwo mi; mama 'imɛ; ta kwụba ya eshe mi kwukwuŋ; jita na abụ kwụbɛ eshe mi, bi zhɛ bo 'wo.

²⁹Go Moses hiɛŋ bụ, Iwɛ-tɛkana ta abɛ jɛmɛ! N zha shɛ ma kwụba ya ga eshe bu kwukwuŋ o.