Read bassa ỤBANỤ 13 Bible Online

ỤBANỤ 13 - bassa bible

ỤBANỤ 13

¹Nazhɛ AGWANGWAMA hiɛŋ Moses,

²N tileneni miaụŋ-me-eyi mu umbe swooŋ; iyi elele nɛ bajɛ a'aŋbụ bino bi ibɛ hiiŋ na ashashɛ miaụŋ mi Isrɛl, ta bụtụ, ti iyimabiga, Gamba n 'yajɛ.

³Go Moses hiɛŋ atwa ata, Ne teyinje ma ụjita ga uhwayɛ, na ahiɛ banɛ ni Ijipti, na ahi ga shɛ la ajama. Iwɛnɛ po tedure nu ukpahiŋ ụ'wụtụ ibɛ AGWANGWAMA ihi bɛcinjɛ no olugwo ga; ta ya ma iyi elele nɛ Ifucingɛ namɛ na amɛ ibɛ o.

⁴Bana ma hwayɛ ga, na amɛ upiana bu Abib.[6]

⁵Aka na ta AGWANGWAMA ihi suji hwuŋ bee ci cɛnjɛ te Ekenan, na Ɛhit, na A'amo, na Ahiv, keeni Ɛjɛbus, ibɛ shɛ ma tu na bee meme teji la ogwunukwoshi hiŋ maa bi zhɛ ba pana aŋ. Tuba tɛ shɛ cɛnjɛ ta ata tɛ 'yajɛ ugwungwu, tuwebiye kaa ta fwunga, ehi ci hwuŋ apata, untangana ma ugondu ga nu upiana ga uhiiŋ.

⁶Ya ma iyimɛyɛ nɛ zasa Ifucingɛ tutu ijitɛ ɛtɛ icenje, ụjita ata ucenje ụ shɛ isene ya AGWANGWAMA.

⁷Iyimɛyɛ nɛ zasa Ifucingɛ ibɛ ehi zhɛ hia ya tutu ijitɛ ɛtɛ icenje, kede a kwụbɛ iyi nɛ 'yajɛ Ifucingɛ no ofwo hiŋ o, kede ahiɛ kwụbɛtanɛ Ifucingɛ tutu ukwunanga cɛnjɛ ti hiŋ kpaaŋ o.

⁸Mbiso kaa du yɛu bụ ye eyi nụ ụjita ata maa, Ma nda inɛ gɛ iwɛ iyi nɛ AGWANGWAMA n ndanɛ la aka na tu Ngaa banɛ ni Ijipti.

⁹I zhɛ ma bụ shana useyida na namɛ nu u'ala bụ, yɛɛ zhɛ kaa ma bụ shana ti teyinje ni itune bu, iwɛ maa undwa wa AGWANGWAMA na nama nu unu bu. Iwɛnɛ po tedure nu ukpahiŋ ụ'wụtụ nazhɛ AGWANGWAMA ubu bɛcinjɛ ni Ijipti.

¹⁰Ibɛ po ahiɛ shɛ hi na untangana okpogo ga uywa uywa na aka ibɛ nɛ ee shiri.

¹¹Aka na ta AGWANGWAMA ubu tecinji hwuŋ na cɛnjɛ te Ekenan tu na bee bi shileni la unu ụ'wụtụ keeni ogwunukwoshi bu, maa bi zhɛ ma bụ pana tụ,

¹²bɛ shɛ ba pana AGWANGWAMA iyi elele nɛ bajɛ a'aŋbụ bino bi ibɛ. Yɛu umbe iyimabiga bu ye elele nɛ shɛ inɛ ye eyi, i shɛ inɛ ya AGWANGWAMA.

¹³Nụ ụgwụdụ ɛbi zhɛ ba sa yɛu umbe izhinyɛci ye elele, yaa shɛ kaa yaa bụ kwụlanɛ shɛ maa so, asha kwusa bụ i'ilu. Tusa ɛbi zhɛ ba sa miaụŋ-me-eyi ma atwa me elele mu na mu namɛ pụ bụ.

¹⁴Aka na yɛu bụ ye eyi ibi heŋteni hwuŋ geri-be-eshe, bɛɛ hiɛŋ, Imbe kwuŋ shɛ ecilo ijɛɛ? Mbiso bu maa, Nu ukpahiŋ ụ'wụtụ la AGWANGWAMA iti bɛcinjɛ na tijama ti Ijipti.

¹⁵Aka na tu ga Faro to la tɛshɛshɛpana, baa lacɛ maa ma tu ganga, ibɛ po AGWANGWAMA kwụnɛ miaụŋ mu umbe ma cɛnjɛ ti Ijipti kpaaŋ, ti yɛu umbe bụtụ, ti yɛu umbe iyimabiga. Iwɛbɛ po Omo sugo iyi ye eyi ye elele nɛ bajɛ a'aŋbụ bino bi ibɛ maa Ma ta ụrụpɛ na AGWANGWAMA. Ama tusa ata sa miaụŋ mu tu me eyi mu umbe.

¹⁶I zhɛ ya sha useyida nu u'ala bụ keeni iyi titeyinje na ashashɛ okwusokwuso bu. Iwɛnɛ po tedure nu ukpahiŋ ụ'wụtụ ibɛ AGWANGWAMA iti bɛcinjɛ la ni Ijipti.

¹⁷Aka na ti ga Faro genji atwa ata maa e hwuri, Agwatana zeriji shi aŋ nu uhwaŋna cɛnjɛ ta Afilistia o, okwo tu uhwaŋna ata gwumwonu o. Iwɛnɛ po Agwatana hiɛŋ, Yaa shɛ atwa ga kwụbɛ hwayɛ ujasa, ahaŋsa aba zhɛ a jɛshɛrɛgwa maa o gwulo ni Ijipti.

¹⁸Ama Agwatana suji atwa ata nu uhwaŋna tirinje nụ ụshɛka itekwu ishenje. Miaụŋ mi Isrɛl mu umpi i'wɛŋnɛ ujasa ta a banɛ ni Ijipti.

¹⁹Go Moses suji o'umpwo Josɛf; iwɛnɛ tu go Josɛf leni la maa miaụŋ mi Isrɛl mi shiri-unu iwɛ ibɛ tebiye, iwɛnɛ ti bɛɛ hiɛŋ aŋ, Agwatana zhɛ me hi hikeni tilɛɛ; aka ata sugo ma o'umpwo mi hi beni epe.

²⁰Aka na tɛ ɛ ishijɛ nu Sukot, oo zokwu ni Itam, na namɛ ni ipɛlu ụshɛka ata.

²¹AGWANGWAMA kaa hwuri umbe na aba nu udomu u tuwam maa mbisono aŋ uhwaŋna nu uwaŋna, baa namɛ nu ulwa tuwam maa bu na pana aŋ uhioko-uhwaŋna nụ ụjita, iwɛ maa e eri tahaŋnụ tizha tu uwaŋna tụ ụjita.

²²Udomu ata u tuwam keeni ulwa ata u tuwam kaa beni shi nu umbe wa atwa ata tu uwaŋna tụ ụjita o.