Read bassa ỤBANỤ 18 Bible Online

ỤBANỤ 18 - bassa bible

ỤBANỤ 18

¹Gɛ Jɛtro bunongbo bi Midian na shɛ binua Moses, hwụjɛ iyi elele nɛ Agwatana ndanɛ Moses keeni E'isrɛl kpaaŋ, gana na ta AGWANGWAMA bɛcinjɛ miaụŋ mi Isrɛl ni Ijipti.

²Ibɛ po baa zhajɛ pu Moses, baa shapɛ Zipora, biyikwo Moses na go Moses ge gwuricinji la ni ihwɛ binua bwa,

³na miaụŋ mu bwa me eyi mi yebi, ɛ hiɛŋ izeci inɛ ihiiŋ ge Gɛshom[10] (bi hiɛŋ, N shɛ bulashɛ na cɛnjɛ ta agaiŋ).

⁴Ɛɛ hiɛŋ izeci inɛ iyebi ge Eliɛzɛ,[11] (bi hiɛŋ, Agwatana bishi mi m mbiyeni be n leshiji nu utokwobi Faro).

⁵Gɛ Jɛtro, binua Moses sugeni Moses miaụŋ ma ata mu bwa me eyi keeni biyikwo bwa nụ ụshɛka, no ofwo na ee jwe ugba wa aba ni Ishɛmɛ ya Agwatana.

⁶Gɛ Jɛtro tumwanɛ bụtụ bu ko maa e mbishe Moses maa, Gamba gɛ Jɛtro binua bụ ta be ci pụ bụ ne biyikwo bu keeni miaụŋ mụ bụ me eyi mi yebi.

⁷Go Moses beni bee teji binua bwa uhwaŋna, bee kwuzeni bu, baa ruwanɛ bụ. Nazhɛ oo momo hoŋtongonu iwɛ ulapiya wa aba, nazhɛ ee teni nu umwono ubwa.

⁸Go Moses swegeni binua bwa iyi elele nɛ AGWANGWAMA njɛ Faro keeni Ijipti iwɛ E'isrɛl, ti ihiɛŋmɛ ye elele nɛ jitengeni aŋ nu uhwaŋna tahaŋnụ, tu gana na ta AGWANGWAMA lesheji aŋ ni ibɛ kpaaŋ.

⁹Ibɛ po gɛ Jɛtro njɛ unyasa iwɛ uwebiye nɛ AGWANGWAMA ndanɛ E'isrɛl kpaaŋ, nɛ bee lesheji aŋ ni i'ɛlɛ ye Ijipti.

¹⁰Gɛ Jɛtro hiɛŋ, Ga ashɛtwa shɛ a na AGWANGWAMA, na ihi leshiji ni i'ɛlɛ Faro keeni Ijipti, na kaa du ihi jwɛ na tijama.

¹¹Hwuwayɛ go, M mepi maa AGWANGWAMA ubwa gembi uhwuri tuwa te elele kpaaŋ, ibɛ po bee lesheji E'isrɛl ni i'ɛlɛ ye Ejipti, a na ga nda aŋ la umungwuta.

¹²Ibɛ po gɛ Jɛtro, binua Moses peni Agwatana ụrụpɛ tuhwoŋzhingo. Nazhɛ ga Aron keeni n-nyarɛ me E'isrɛl hwɛɛ mi zhajɛ iwɛ maa a yɛ iyimɛyɛ na binua Moses na agba Agwatana.

¹³Ni iyi tuholo, go Moses jɛjɛ maa duma ụshɛrɛya wa atwa, atwamwa shikekeni pu Moses te kwuni nu uvwungwa tutu ụrụmɛ.

¹⁴Aka na ta binua Moses kwụbɛ iyi nɛ baa ndana atwa ata kpaaŋ, bɛɛ hiɛŋ, Imbe nɛ aba ndana atwa gaa? Iwɛmbe po abɛ jɛjɛ gobuko, atwa kpaaŋ shikekeni pụ bụ te kwuni nu uvwungwa tutu ụrụmɛɛ?

¹⁵Go Moses mbishi binua bwa, bɛɛ hiɛŋ, Atwa a zhajɛ pi mi maa e hweyigeni iwɛ ukwulana wa Agwatana,

¹⁶Aka na ashamanjɛ pa aŋ, a zhajɛ pi mi maa Ma jajana aŋ, ta bụtụ na yaa pa nu uyebi ubwa, keeni maa Mo mbisono aŋ okpogo keeni unu-tupana wa Agwatana.

¹⁷Ibɛ po binua Moses hiɛŋ bụ, Iyi nɛ aba nda zhɛshɛ o.

¹⁸Tu gabụ, ta atwa na namɛ na bụ, hi zhɛ hia 'nyangana hwuwayɛ. Iwɛnɛ po ugondu ga ubu hwuleji, bi eri shi ba nda uŋ gobuko.

¹⁹Shɛlaga tugwo iwɛ mi; N zhɛ ma bụ pana ahaŋsa mi, Agwatana kaa zhɛ a nama na bụ! Nama na ashashɛ atwa, na Agwatana, iwɛ maa no mbiso Agwatana n-ndumwa ma aba.

²⁰No mbisogono atwa ga shikpogo sha Agwatana keeni onu-tupana ubwa, iwɛ maa no mbisono aŋ uhwaŋna na teni cɛŋ maa a na nda iyi nɛ shɛ tilɛɛ maa a njɛ.

²¹Yalaga tugwo atwa ata du maa teri etwenyi na eri iŋ tɛnda, ga a shɛ atwa na a sụma Agwatana inyɛsɛ, a na shɛ atwa tɛkana, na atwa na o imo imwere tiya bụtụ, sugo aŋ maa njɛ aŋ ehiu atwa akpakwụ-a-ta a-ta, na atwa dipi-yebi yebi, na atwa dupu dupu, keeni atwa umpwa umpwa.

²²Ga atwa ata na duma ụshɛrɛya wa atwa aka elele. Udumanga we elele na u hwuleji aŋ nazhɛ ge e suje uŋ pụ bụ, udumanga we elele na u gwumwa, ga a kwunanjɛ uŋ ni ikɛnyi aba. Gana ɛbi zhɛ ba nda maa e bi mbiyeni i'wɛŋnɛ gɛ tu'waŋna ta, nazhɛ yɛɛ zhɛ mo bu dobogono.

²³Yaa shɛ abɛ njɛ gana ga, ta Agwatana ibi peni-unu, nazhɛ ɛbi zhɛ ba ala tishikono ni iyi nɛ ma bụ manga, ibɛ du atwa ga kpaaŋ zhɛ o to ofwo na ɛɛ zhɛ nu ulapiya.

²⁴Go Moses hwụjɛ-unu binua ata bwa, baa njɛ ga gana na ti bɛɛ hiɛŋ bụ kpaaŋ.

²⁵Go Moses teri etwenyi na eri ijɛ tɛnda na ashashɛ E'isrɛl kpaaŋ, baa njɛ aŋ ehiu atwa akpakwụ-a-ta a-ta, na atwa dipi-yebi yebi na atwa dupu dupu, keeni atwa umpwa umpwa.

²⁶Atwa ata aba a duma ụshɛrɛya we elele. Udumanga we elele na u hwuri aŋ ikɛnyi nazhɛ a shapɛrɛganɛ Moses, ama udumanga we elele na u gwumwa a kwunanga abaaba.

²⁷Nazhɛ go Moses njɛ binua bwa ongbo maa hwulo, bee ji na cɛnjɛ tu bwa.