Read bassa ỤBANỤ 19 Bible Online

ỤBANỤ 19 - bassa bible

ỤBANỤ 19

¹Ti yaa namɛ ipiɛnɛ itɛtu ta miaụŋ mi Isrɛl mu banɛ na cɛnjɛ ti Ijipti, nụ ụjita ata gom ibɛ ee ci Ụshɛka Sainai.

²Ibɛ shɛ gana na ta a banɛ ni Rifidim, miaụŋ mi Isrɛl mi jwe Ugba wa aba ne embi Ishɛmɛ ɛtɛ Sainai.

³Go Moses munji Ishɛmɛ ɛtɛ, bee zhe pa Agwatana, nazhɛ AGWANGWAMA suyanɛ bụ ni Ishɛmɛ ɛtɛ, bɛɛ hiɛŋ bụ, Iyi nɛ ɛbi zhɛ bo mbiso miaụŋ mi Isrɛl mu na mɛ shɛ atwa ihwɛ Jekob na, maa;

⁴Hiɛ kwụbwa iyi nɛ Ngaa njɛ Ejipti, keeni gana na Ngaa hiɛ 'waŋnɛ gana na ugbeji wa 'waŋna oywoywo ubwa na apiambɛ ubwa, gana ta du Ngee hi suje pi Mi.

⁵Hwuwayɛ go, yaa shɛ ɛhi zhɛ hia hwuga-unu mu, maa hi untangana unu mu tutwa, asha ahiɛba hi zhɛ hia sha atwa mi na Ngaa 'yajɛ na ashashɛ atwa kpaaŋ, iwɛnɛ po Gamba n 'yajɛ cɛnjɛ tu unyizo kpaaŋ.

⁶Hi zhɛ hi ma shana cɛnjɛ-ta-tugwama, to onongbo keeni udenji tijilo. N-ndumwa mu na mɛ shɛ maa mbishi miaụŋ mi Isrɛl ta.

⁷Go Moses gwure, baa suyanɛ n-nyarɛ ma atwa ata, aa ulwa, bee swegeni aŋ n-ndumwa me elele na AGWANGWAMA peni bu unu muba.

⁸Ibɛ po atwa ata peni ajɛshɛgwa kpaaŋ aba zhiaaŋ, ɛɛ hiɛŋ, Iyi elele nɛ AGWANGWAMA jɛmɛ, ti zhɛ ta nda iŋ. Go Moses peni AGWANGWAMA ajɛshɛgwa n-ndumwa mu na atawa ata dumanjɛ.

⁹Nazhɛ AGWANGWAMA hiɛŋ Moses, Hioko, N zhɛ me teni nu udomu na inshi ma zhajɛ pụ bụ, iwɛ maa atwa ata hwụjɛ aka na Ama duma iwɛ na bụ, iwɛ maa a tɛtana n-ndumwa mụ bụ rishe aka elele. Nazhɛ go Moses mbishi AGWANGWAMA n-ndumwa mu na atwa ata jishijɛ.

¹⁰Nazhɛ AGWANGWAMA hiɛŋ Moses, Zhaga no ofwo atwa ata, iwɛ maa njɛ aŋ tijilo hwayɛ ga ni beyi, hiɛŋ aŋ maa ga a nyashɛnjɛ i'wɛŋnɛ ya aba i tu'urugono,

¹¹ga a mama 'imɛ iwɛ wanabeyiko, iwɛnɛ po nụ ụjita ata, Ngɛɛ zhɛ me kezhe ma patana ni Ishɛmɛ Sainai ne eshe atwa ata kpaaŋ.

¹²Bɛ shɛ ba kapa ishɛmɛ ɛtɛ tutu rungwutwonu, iwɛ atwa ata, mbiso aŋ maa, To mungo ma ishɛmɛ gɛ o, okwo tutumongono kede e timengeni iŋ o; bụtụ be elele na timengeni ishɛmɛ ɛtɛ, ga a kwụnɛ bụ tilɛɛ.

¹³I zasa u'ala bụtụ be elele zhɛ kaa wo tumongono bu o, ama atayɛ ɛɛ zhɛ a tagana bụ, kwo kaa a'inla; okwo yaa shɛ iyimabiga, kwo kaa bụtụ, bi zha shɛ bo bino. Aka na tu ukakacɛ dumanɛ iwɛ pụụŋ, te ilegeji, nazhɛ ge e munje ya ishɛmɛ ɛtɛ.

¹⁴Go Moses zwi ishɛmɛ ɛtɛ, bee zhe no ofwo atwa ata baa njɛ aŋ tijilo; aa nyashanjɛ i'wɛŋnɛ ya aba i tu'urugono.

¹⁵Go Moses hiɛŋ atwa ata, Mama 'imɛ ma iwɛ wanabeyiko, to togwu ma ne eyikwo hiŋ o.

¹⁶Tụ ụjita ata ụtatụ ci, oto kwuni tukala keeni ɛbɛrɛ, udomu na inshi, ubi ihiŋhiŋ ishɛmɛ ɛtɛ, nazhɛ ukakacɛ kwuni tuhwulo na rụhwụŋ rụ 'wụtụ. Iwɛbɛ po inyɛsɛ shɛ atwa elele na namɛ nu ugba ata kpaaŋ, aa zhɛgɛdaga.

¹⁷Go Moses bɛcinjɛ atwa ata nu ugba ata, iwɛ maa e zhe pa Agwatana, ee zhe ee shikekeni ne embi ishɛmɛ ɛtɛ.

¹⁸Nazhɛ nshikwo mu urigeni Ishɛmɛ Sainai kpaaŋ, iwɛnɛ ta AGWANGWAMA kezhe baa patanɛ ni ibɛ na amɛ ulwa. Nazhɛ nshikwo ma ata mu munji tuu gana nshikwo mu ulwa ujigo, ibɛ po Ishɛmɛ ɛtɛ yo zhingotu duwa duwa.

¹⁹Nazhɛ rụhwụnŋ ru ukakacɛ ata ra kaana gu ugombo duwa. Go Moses dumanɛ iwɛ, nazhɛ AGWANGWAMA jishijɛ bụ nu uto.

²⁰Nazhɛ AGWANGWAMA kezhe baa patanɛ ni ihiŋhiŋ Ishɛmɛ ɛtɛ Sainai, baa suyanɛ Moses, go Moses munji ni ihiŋhiŋ Ishɛmɛ ɛtɛ.

²¹Nazhɛ AGWANGWAMA hiɛŋ Moses, Zhaga zwo maa tɛtaganɛ atwa ata unu maa kede ɛ kɛshicɛ ikepi ɛtɛ maa a n zhajɛ igbɛtɛtɛ o, iwɛ aka na atwa ufwugwo aba zhɛ e ilono hwayɛ.

²²Okwo onongbo na zhɛ o gwumwonu na AGWANGWAMA, i shɛ tilɛɛ maa a mama nyashɛnjɛ shɛshɛshɛ, shibwonu AGWANGWAMA zhɛ a sukakana aŋ.

²³Go Moses hiɛŋ AGWANGWAMA, Atwa ata eri shi e munje Ishɛmɛ Sainai o, iwɛnɛ po gabụ du ni ikɛnyi bụ, bu tu tutwagwanua-unu, ɛbi hiɛŋ, Ge kepi iyi o rungwutwonu ishɛmɛ ɛtɛ, maa a njɛ iŋ tijilo.

²⁴Ibɛ po AGWANGWAMA hiɛŋ bụ, Zhaga zwo, maa zhagajɛ na Aron maa hi munje nu bwa; ama to lono maa onongbo keeni atwa ata o hwuŋzwo maa a zhajɛ no ofwo mi o, iwɛ aka na Ngɛɛ zhɛ ma sukakana aŋ.

²⁵Go Moses zwi ga no ofwo atwa ata, bee mbishi aŋ iwɛ nɛ AGWANGWAMA jɛmɛ.