Read bassa ỤBANỤ 2 Bible Online

ỤBANỤ 2 - bassa bible

ỤBANỤ 2

¹Butubwenyi bi Livai bu ko zhe bee zeni yɛu-yo-o nɛ shɛ ụlamụ ubwa.

²Yɛu ɛtɛ yo o le ofubo, yee meci yɛu-ye-eyi. Aka na tu baa kwụbɛ maa yɛu ɛtɛ zhɛmɛ tebiye, baa intanɛ iŋ ipiɛnɛ itɛtu.

³Gana na ti bee eri shi ba intana iŋ ya, baa njɛ igwumi no oshipwu, bee sweni iŋ tulwalwa keeni ukotolo; bee wecicinji yɛu ɛtɛ na amɛ ibɛ, bee shepi iŋ bee shiri ni itɛ nụ ụpalanụ Urefu ata.

⁴Bụngwụfwụ bwa shikeni taa dụlụ maa mapa iyi nɛ zhɛ ya nda bụ.

⁵Na aka ata ibɛ yɛu-yo-o Faro zhe maa dụla meni nu Urefu ata. Showo shɛ bwa shɛ na sha ndana bụ iyi, sho rungo nụ ụpalanụ Urefu ata. Baa kwụbɛ igwumi ɛtɛ ti yee shi ni itɛ nụ ụpalanụ Urefu ata; baa tumwanɛ owo ubwa oko maa ga shapɛ iŋ.

⁶Aka na bee ushiji iŋ, baa kwụbɛ ti yɛu ɛtɛ ye eyi shiyeni; yɛu ɛtɛ kaa ya twa-u'wo. Ibɛ po inyɛmɛnyɛmɛ ibɛ shɛ bụ, bɛɛ hiɛŋ, Yɛu-ye-eyi ye Ehibru ike nɛ ma.

⁷Nazhɛ bụngwụfwụ Moses hiɛŋ yɛu ɛtɛ yo o Faro, Ma zha suu ma suyanɛ biyikwo bu ko be Ehibru na mosubo mu bwa mu ta 'yajɛ meni maa ma bu bigaga yɛu gɛ?

⁸Yɛu-yo-o Faro hiɛŋ bụ, Zhaga. Bee zhe baa suyanɛ bino Moses gbaa.

⁹Yɛu-yo-o Faro hiɛŋ bụ, Shapa yɛu gɛ m bigajɛ, N zhɛ mu na bụ tụpa utashɛ. Gabata biyikwo ata shepi yɛu ɛtɛ baa bɛjɛ iŋ.

¹⁰Aka na ti yɛu ɛtɛ waŋnɛ, bee shepi iŋ bee peni yɛu-yo-o Faro, baa shɛ ya yɛu ibwɛ. Nazhɛ yɛu ɛtɛ yo o Faro po bu izeci tu go Moses,[1] Egini to Moses i shɛ, timbɛ. Bi hiɛŋ, Iwɛnɛ ti Ngɛɛ mbɛ bụ ne meni.

¹¹Tu go Moses waŋnɛ, bee beni jitoo ko bee zhe maa kwubɛ miaụŋ-mo-bino bwa. Baa kwụbɛ ugondu umungwuta na aa nda; baa kwụbɛ te Bijipti bu ko bo dubo yɛu Bihibru ike nɛ shɛ atwa ubwa.

¹²Baa mbiyanganɛ, bụ kwụbɛ shɛ bụtụ be elele o, baa kwụnɛ Bijipti ata, baa intanɛ bu nu upwupwutu apata.

¹³Iyi tuholo ibɛ, bee beneneni, baa kwụbɛ Ehibru eyebi ta a twa ifelu abaaba. Bee mbishi bụtụ na maa wụmɛ maa, Iwembe po obo dubo nyabụụ?

¹⁴Nazhɛ bụtụ ata jishijɛ, bɛɛ hiɛŋ, Gaaba ibi peni tugwama maa jɛmɛ ụshɛrɛya tuu? Ba jala suu maa n kwụnɛ gana na abụ kwụnɛ Bijipti ata? Ibɛ po go Moses njɛ inyɛsɛ, bɛ hiɛŋ, E mepi iwɛ gɛ.

¹⁵Aka na ga Faro hwụjɛ iwɛ ɛtɛ, bee jelekeci gana na maa kwụna Moses. Ama go Moses gezhigeni Faro, bee zhe baa jɛjɛ na cɛnjɛ ti Midian. Baa jɛjɛ no ofwo u'ibwa meni uko.

¹⁶Bunongbo bi Midian ata kaa 'yajɛ miaụŋ-mo-o mi cenje. Mee zhe maa mi cijɛ meni maa ee peni agwụdụ bishi ba aba maa e swe.

¹⁷Ibɛ a'iywa-agwụdụ oko unzhi aŋ apata; ama go Moses ishijɛ bee mbiyeni aŋ, bee peni agwụdụ aba meni ee swe.

¹⁸Aka na te e ci Ruɛl bishi ba aba, bɛɛ hiɛŋ aŋ, Gana na ahiɛ njɛ ahiɛ gbatụ hwayɛ ujiyo gana gaa?

¹⁹Ɛɛ jishijɛ bụ, ɛɛ hiɛŋ, Bijipti bu ko ubwa iti mbiyeni na a'iywa-agwụdụ, baa tɛ cɛganɛ meni duwa, nazhɛ bɛɛ piɛ agwụdụ tu meni ee swe.

²⁰Bɛɛ hiɛŋ miaụŋ ma ata mu bwa, Cee baa namɛɛ? Iwembe po ɛhi gɛnjɛ bụtụ ata ne ekwunyii? Suyanɛ bụ ma maa ya iyimɛyɛ.

²¹I kwụlanɛ kaa Moses maa gɛga na bụtụ ata; ibɛ po bụtụ ata peni Moses yɛu ibwɛ yo o ge Zipora bee zeni.

²²Bee meci yɛu-ye-eyi, boo po iŋ izeci ti gɛ Gɛshom, Bi hiɛŋ, N shɛ bulashɛ na cɛnjɛ tu na Ngee te mepi shi la.

²³Aka na ti yee ilegeji nazhɛ agwuma ata Ijipti 'wi. Miaụŋ mi Isrɛl kaa mi 'nyengenji iwɛ bɛjɛjɛ bi tijama tu na ee zweni na tuba, a uganɛ iwɛ timbiyono. Ibɛ po n'ungwa ma aba mu munji no ofwo Agwatana.

²⁴Ibɛ po Agwatana hwụjɛ i'nye ya aba, Agwatana kaa teyinje unu na baa twa la na Abraham, na Azik keeni Jekob.

²⁵Agwatana kaa kwụbɛ ụbaụta wa atwa Isrɛl, yaa gwumanɛ bụ kaa.