Read bassa ỤBANỤ 27 Bible Online

ỤBANỤ 27 - bassa bible

ỤBANỤ 27

¹Nda utukwu-ụrụpɛ nụ ụ'wụ'wụ we ekeshia; ga ụnjɛswa ubwa ụ shɛ imbele i'ɛlɛ itɛ, go uholo ubwa ụ shɛ imbele i'ɛlɛ itɛ; ge esugwulumi eneshi utukwu-ụrụpɛ ata nangwụ, go uzoto ubwa ụ shɛ imbele i'ɛlɛ itɛtu. Ga ụ shɛ ugongo.

²Ndana uŋ mahiuaŋ mi neshi ne esugwulumi ubwa eneshi; ga mahiuaŋ mu bwa mɛ shɛ iyi ike nu bwa, swana uŋ utumburɛ hwɛɛ.

³Ndana uŋ nkwasha iwɛ ma'alụ mu bwa tusugo, keeni n-ngowo mu bwa, keeni agbamgbam ubwa, keeni ekwepi ubwa, keeni ụpalụ ulwa ubwa tɛshana. Nu utumburɛ ɛbi zhɛ ba nda i'wɛŋnɛ ɛtɛ ibwɛ hwɛɛ.

⁴Bɛ shɛ kaa ba ndana uŋ agbahwụ nu utumburɛ; nazhɛ njɛ tɛkanɛ ti neshi nu utumburɛ maa hwuŋtengeni na agbahwụ ata eneshi.

⁵Patana agbahwụ ata tuta ti izhɛmi ɛtɛ utukwu-ụrụpɛ tutu ashashɛ ubwa.

⁶Nda imbele nɛ ɛɛ zhɛ na 'waŋna uŋ nụ ụ'wụ'wụ we ekeshia, swana imbele ɛtɛ utumburɛ hwɛɛ.

⁷Imbele ɛtɛ i shɛ yo hwuŋtongono na tɛkanɛ, ge imbele ɛtɛ nama zalụ hweehwe bu utukwu-ụrụpɛ ata, na aka na ta a 'waŋna uŋ.

⁸No ogbogolo na 'yajɛ a'ibwa ɛbi zhɛ ba nda ugondu ibɛ, gana ga Ngee bi mbiseni ni Ishɛmɛ gɛ, gana ata aa shɛ a nda uŋ.

⁹Bɛ shɛ ba ndana udulo ata tugwuno ukpogwu, swata tugwuno ti ihwehwe ilinɛn nɛ aa hiɛŋshɛ tanɛ tanɛ zalụ tuta tu ukpogwu ata, ga ụnjɛswa tuba zalụ bu ko ụ shɛ bimenji be esugwulumi dipi-yebi; (100)

¹⁰ga atukpa ubwa a shɛ woshi, ga akatakpa ubwa a shɛ woshi; a shɛ a sha utumburɛ, ama ga shɛ na azụrụfa aa njɛ atukpa keeni abatana ubwa na azuba.

¹¹Gabata du yaa shɛ ya sha zalụ tuzuba, ga ụnjɛswa tugwuno ta ata tu tuswata nu ukpogwu ata ụ shɛ bimenji bi imbele i'ɛlɛ dipi-yebi, ga atukpa ubwa a shɛ woshi, ga akatakpa ubwa a shɛ woshi, a shɛ a sha utumburɛ, ama ga shɛ na azụrụfa aa njɛ atukpa keeni abatana ubwa na azuba.

¹²Ga ụnjɛswa tugwuno ta ata tu tuswata geri bu uholo ukpogwu ata zalụ bu uwaŋna-twonuo ubwa ụ shɛ bimenji bi imbele i'ɛlɛ dupu, (50) ga atukpa ubwa a shɛ umpwa, ga akatakpa ubwa a shɛ umpwa.

¹³Go uholo umbe ukpogwu ata geri bu uwaŋna-banụ ụ shɛ bimenji bi imbele i'ɛlɛ dupu.

¹⁴Ga ụnjɛswa tugwuno tu tuswata nu ukpogwu ata zalụ bo odubo oko ụ shɛ bimenji bi imbele i'ɛlɛ umpwa-ni-bɛ-tɛ; ga atukpa ubwa a shɛ atatụ, ga akatakpa ubwa a shɛ atatụ.

¹⁵Go tugwuno tu tuswata nu ukpogwu ata zalụ yebi tɛ shɛ ụnjɛswa bimenji bi imbele i'ɛlɛ umpwa-ni-bɛ-tɛ; ga atukpa ubwa a shɛ atatụ, ga akatakpa ubwa a shɛ atatụ.

¹⁶Ga ụnjɛswa tugwuno tu tuswata no odubo ukpogwu ata ụ shɛ bimenji bi imbele i'ɛlɛ woshi, ga shɛ ihwehwe uduhwa wa ababa, nu uduhwa ushenje, ni inɛ ishenje howuu, keeni inɛ ilinɛn nɛ aa hiɛŋshɛ tanɛ tanɛ ɛɛ zhɛ a nda tụ, ga tɛ shɛ tugwuno tu na ee zweni irikwi; ga atukpa tuba a shɛ eneshi, ga akatakpa tuba shɛ eneshi.

¹⁷Ga shɛ na azụrụfa oo sotulongonu atukpa na rungwutwonu ukpogwu ata kpaaŋ. Ga shɛkama shɛ bwa shɛ shɛ azụrụfa, ga akatakpa ubwa a shɛ utumburɛ.

¹⁸Ga ụnjɛswa ukpogwu ata ụ shɛ imbele i'ɛlɛ dipi-yebi, go uholo ubwa ụ shɛ imbele i'ɛlɛ dupu, go uzoto ubwa ụ shɛ imbele i'ɛlɛ itɛ, go tugwuno tu bwa tu tuswata tɛ shɛ ilinɛn nɛ aa hiɛŋshɛ tanɛ tanɛ, ga akatakpa ubwa a shɛ utumburɛ.

¹⁹Ga shɛ nu utumburɛ aa njɛ i'wɛŋnɛ udulo ata kpaaŋ, tu n-ngbalụ mu bwa, tu n-ngbalụ mu ukpogwu ubwa kpaaŋ.

²⁰Bɛ shɛ kaa ba pana miaụŋ mi Isrɛl unu maa ga a bụ panɛ manɛbɛ ma buta mụ tụrụmbɛɛ mu na oo to iwɛ ụsụtụla, iwɛ maa ga ụsụtụla ata no gorogo apata oruru.

²¹Ga Aron na miaụŋ mu bwa me eyi, aba zhɛ no zwono asụtụla ata ulwa nu udulo ata tu'ulwatagwụ no tupohondo to tugwuno ta ata ti tɛjɛlanɛ, tu na tu namɛ nu umbe ikpɛtɛ ɛtɛ unu-tutwa. Asụtụla ata a shɛ o no gorogo te kwuni nụ ụrụmɛ tutu uvwungwa, nu umbe wa AGWANGWAMA. Inɛ gɛ shɛ undwa wa awaŋnɛ miaụŋ mi Isrɛl tutu unyizo-nom.