Read bassa ỤBANỤ 29 Bible Online

ỤBANỤ 29 - bassa bible

ỤBANỤ 29

¹Iyi ɛbi zhɛ ba ndana aŋ maa njɛ aŋ tijilo iwɛ ma a na ma ndana ugondu tunongbo na. Shapa yɛu buna be eyi bu ko keeni adagba eyebi a na zasa tụsụnyasụ,

²keeni ibrɛd nɛ zasa Ifucingɛ, na akara, na agbagbada na zasa Ifucingɛ anaa na ee hiŋtetenji na manɛbɛ keeni mihiuŋ mu na mu zasa Ifucingɛ mu naa ee zweni manɛbɛ. No mihiuŋ mi izɛgwu wit mi tilee lee ɛbi zhɛ ba nda iŋ.

³Bɛ shɛ kaa bo zwono iŋ ni igwumi ike maa 'waŋnɛ iŋ ni igwumi ɛtɛ medenji buna ata be eyi, na adagba ata eyebi.

⁴Bɛ shɛ ba shapɛ Aron na miaụŋ mu bwa me eyi no odubo udulo ata tu'ulwa maa dụrɛ aŋ meni.

⁵Sugo i'wɛŋnɛ ɛtɛ tu'urugono maa hwuŋteni Aron, ti idikɛ keeni utogwo ata zhɛ wa patana na azuba efod keeni efod ni ikɛnyi ibɛ, keeni ijɛ ɛtɛ tu'ubono na agba, maa umpi bu umazhɛya efod na aa njɛ ne tugwoni ne embi ubwa.

⁶Umpo bu ureweni nu uhiuhiu maa peteni udara tijilo nu ureweni ata.

⁷Shapa manɛbɛ ma ata mu tududugono, maa dudugeni bu nu uhiuhiu maa sụkwụtwa bụ.

⁸Nazhɛ suje miaụŋ mu bwa me eyi maa hwuŋtengeni aŋ n-nduka,

⁹Umpo amazhɛya ne shimbi sha aba, ti ga Aron ta miaụŋ mu bwa me eyi, nazhɛ hwuŋtongono aŋ ofworo ebe tukwongwo kwongwo; iwɛ maa ugondu tunongbo ụ shɛ una wa aba tutu unyizo-nom. Gana ɛbi zhɛ bu mo tulonono Aron medenji miaụŋ mu bwa swooŋ ta.

¹⁰Bɛ shɛ ba 'waŋnɛ buna ata be eyi nu umbe udulo tu'ulwa. Ga ga Aron na miaụŋ mu bwa me eyi petengeni i'ɛlɛ ya aba nu uhiuhiu buna ata.

¹¹Bɛ shɛ ba kwụna buna ata be eyi nu umbe wa AGWANGWAMA, no odubo udulo ata tu'ulwa.

¹²Sala mehieŋ ma buna ata maa njɛ mụ na mahiuaŋ ma ata mu utukwu-ụrụpɛ na buvwa bụ, bɛ shɛ ba 'waŋ mehieŋ ma ata mụ vwɛ ne embi utukwu ata ụrụpɛ.

¹³Sugo manɛbɛ ma ata mu ubeni ne evwi ubwa, medenji mu na ata mu ubeni na asụbwụ ubwa, medenji nkpokpolo mu bwa mi yebi keeni manɛbɛ ma ata mu swananjɛ na muba, iwɛ maa peteni inɛ ɛtɛ nu utukwu-ụrụpɛ maa hwoŋzhinji iŋ.

¹⁴Ama hwoŋzhingo buna ata be eyi no tupohondo tu ugba tu'ulwa; tu u'waba ubwa, te tuwiŋ tu bwa, ụrụpɛ iwɛwɛ waa shɛ.

¹⁵Shapa udagba ata uko, maa ga Aron na miaụŋ mu bwa me eyi petengeni i'ɛle ya aba nu uhiuhiu udagba ata.

¹⁶Bɛ shɛ kaa ba kwụna udagba ata, maa shepi mehieŋ mu bwa maa zhizhenji mu nu utukwu-ụrụpɛ tutu rungwutwonu.

¹⁷Fwuta udagba ata, maa nyashɛnjɛ evwi ubwa, medenji akatakpa ubwa, maa suji iŋ no ofwo usunda ata ubwa ebi seshenji, medenji uhiuhiu ubwa.

¹⁸Patana udagba ata nu utukwu-ụrụpɛ maa hwoŋzhinji bu kpaaŋ. Ụrụpɛ na ee peni AGWANGWAMA no tuhwoŋzhingo ta, ụ shɛ ụhiụŋ ụlatụ na shɛ ụrụpɛ na ee peni AGWANGWAMA tedure nu ulwa.

¹⁹Shapa udagba ata uyebi; ga ga Aron na miaụŋ mu bwa me eyi petengeni i'ɛlɛ ya aba nu uhiuhiu udagba ata.

²⁰Kwụna udagba ata maa seri mehieŋ mu bwa maa njɛ mụ nu ukwunanga ụcɛbɛ Aron u'ala ubiye, medenji akwunanga acɛbɛ miaụŋ mu bwa nu u'ala ubiye keeni ivwɛ ya aba i'wɛtwɛ u'ala ubiye, keeni ivwɛ ya aba i'wɛtwɛ ivwunɛ u'ala ubiye, 'waŋ mehieŋ ma ata mu bwa mụ vwɛ kpaaŋ nu utukwu-ụrụpɛ tutu rungwutwonu.

²¹Nazhɛ sala mehieŋ ma ata mu patanɛ nu utukwu-ụrụpɛ, medenji manɛbɛ mu tududugono maa zhizhenji mu na tu'waba ta Aron keeni i'wɛŋnɛ ibwɛ i tu'urugono; medenji tu'waba ta miaụŋ mu bwa keeni i'wɛŋnɛ ya aba i tu'urugono, nazhɛ tu bwa, ta miaụŋ mu bwa medenji i'wɛŋnɛ ya aba zhɛ ya sha iyi tijilo.

²²Shapa manɛbɛ mu udagba ata, na manɛbɛ mo bungwu-bu-utwonyi ubwa, na manɛbɛ me evwi ubwa, na mu na ata mu ubeni na azuba asụbwụ ubwa keeni nkpokpolo mu bwa mi yebi keeni manɛbɛ ma muba, ti i'unte ibwɛ u'ala ubiye (iwɛnɛ tu baa shɛ udagba na ee shiri swooŋ),

²³vwɛ tu'unto ti ibrɛd tu ko, keeni ukara uko na 'yajɛ manɛbɛ keeni mihiuŋ mu ko mi tilee lee ni igwumi ɛtɛ ibrɛd ɛtɛ zasa Ifucingɛ zweni, igɛtɛ i shi nu umbe mu.

²⁴Zwono ijɛ kpaaŋ ni i'ɛlɛ Aron keeni i'ɛlɛ miaụŋ mu bwa, maa vwurenji iŋ, maa i shɛ ụrụpɛ tuvwurongo nu umbe mu.

²⁵Nazhɛ lashɛga iŋ ni i'ɛlɛ ya aba maa hwoŋzhinji iŋ ni ihiŋhiŋ iyi ụrụpɛ ata tuhwoŋzhingo nu utukwu-ụrụpɛ ata, iyi ụhiụŋ ụlatụ ta. Ụ shɛ ụrụpɛ na kaa ee m peni tedure nu ulwa.

²⁶Shapa ukosobu udagba ata Aron ee shiri swooŋ, maa vwurenji uŋ nu umbe mu maa ụ shɛ ụrụpɛ tuvwurongo, una ata ubwa ụ shɛ urobwo bu.

²⁷Shapa ukosobu udagba ata ụrụpɛ tuvwurongo, keeni i'unte ɛtɛ ibwɛ i shɛ urobwo wo onongbo, iwɛ maa njɛ iŋ tijilo, ibɛ shɛ inɛɛ nɛ ee vwurenji na azuba ee shiri swooŋ, inɛ ɛtɛ ibɛ shɛ iwɛ Aron, keeni iwɛ miaụŋ mu bwa.

²⁸Inɛ ɛtɛ i shɛ inɛ Aron keeni miaụŋ mu bwa, okpogo miaụŋ mi Isrɛl aa shɛ tutu unyizo-nom. Iwɛnɛ po onongbo aba 'yajɛ ukosobu, keeni i'wɛŋnɛ nɛ banɛ na arụpɛ amɛ-olom nɛ E'isrɛl ma m pana.

²⁹Go otogwo ata tijilo ga Aron ba nda tunongbo a shɛ a na miaụŋ mu bwa mu na me ci na aba ubwa ti bee 'wi hwuŋ, ɛ zhɛ o hwuŋtongono aŋ maa e dudugeni aŋ manɛbɛ maa o hwuŋtono aŋ aka na tɛ ɛ zhɛ o tulono aŋ swooŋ.

³⁰Yɛu Aron nɛ shɛ bunongbo ụtarụtụ ubwa, ubwa zhɛ bo hwuŋtono aŋ ijitɛ icenje, na aka na ti bee ci nu udulo tu'ulwa maa nda ugondu no ohwolu ata tijilo.

³¹Shapa usunda udagba ata maa shiteji uŋ no ohwolu ata tijilo.

³²Ga ga Aron na miaụŋ mu bwa me eyi a yɛ usunda udagba ata keeni ibrɛd ɛtɛ ga vwɛ ni igwumi no odubo udulo ata tu'ulwa.

³³Ga a yɛ ijɛ ɛtɛ oo go to ụrụpɛ iwɛwɛ tu'urugono, maa e tileni aŋ swooŋ, maa a njɛ aŋ tijilo. I zasa bụtụ bu tupohondo na zhɛ ba ya iŋ o, iwɛnɛ ti yaa shɛ iyi tijilo.

³⁴Yaa shɛ kaa iyi heleni usunda ata ee shiri swooŋ keeni ibrɛd ɛtɛ vwɛ tutu uvungwa, asha bɛ shɛ bo hwoŋzhingo inɛ ɛtɛ vwɛ, i shɛ shɛ a ya ya o, iwɛnɛ ti yaa shɛ iyi tijilo.

³⁵Gana na Ngee bi peni unu kpaaŋ, gabata abɛ shɛ ba ndana Aron na miaụŋ mu bwa me eyi, ibɛ shɛ maa, ijitɛ icenje ɛbi zhɛ bo tulono aŋ swooŋ

³⁶Iyi-heri abɛ shɛ bu na ta ụrụpɛ iwɛwɛ tu'urugono na buna be eyi. Bɛ shɛ ba pana sasana ụrụpɛ iwɛ maa njɛ utukwu-ụrụpɛ shɛshɛshɛ, dudugono uŋ manɛbɛ ma njɛ uŋ tijilo.

³⁷Ijitɛ icenje abɛ shɛ ba nda ugondu ata iwɛwɛ tu'urugono iwɛ utukwu-ụrụpɛ maa njɛ uŋ tijilo ụjijita, nazhɛ utukwu-ụrụpɛ zhɛ wa sha tijilo me tijilo. Iyi elele nɛ timengeni utukwu ata ụrụpɛ, asha i shɛ ya iyi tijilo.

³⁸Iyi nɛ abɛ shɛ bu na ta ụrụpɛ nu utukwu-ụrụpɛ iyi-heri iyi-heri tutu na: miaụŋ-ma-agwụdụ mi yebi mu na mɛ shɛ tɛzhɛla tu uywa uko te e meci bu.

³⁹Bɛ shɛ ba ta ụrụpɛ nu ụgwụdụ uko nu uvungwa, abɛ shɛ ba ta ụrụpɛ nu ụgwụdụ uyebi nụ ụrụmɛ;

⁴⁰iyi nɛ shɛ maa medenji nụ ụgwụdụ uko na, bimenji bo mihiuŋ mi tilee lee mi ikwureni bugongo bu ko mu na mi hiŋtetenji na manɛbɛ ma buta me bimenji bu ubene uko nu ukangasụ mu na oo to keeni bimenji be meni mu tụ'walụ ta afwafwa mu ubene uko nu ukangasụ iwɛ ụrụpɛ tuswa.

⁴¹Ta ụrụpɛ nụ ụgwụdụ ata uyebi maa medenji bimenji bo mihiuŋ ba manɛbɛ keeni bimenji be meni mu tụ'walụ ta afwafwa gana ebe abu ga njɛ nu uvungwa gbaa. Ụ shɛ ụrụpɛ tuswa na ee m peni tedure nu ulwa, na kaa n shanɛ ụhiụ ụlatụ.

⁴²I zhɛ ya sha ụrụpɛ tuhwoŋzhingo na ɛɛ zhɛ na uranga tuta no odubo udulo tu'ulwa nu umbe mu na awaŋnɛ hiŋ kpaaŋ, no ofwo na Ngɛɛ zhɛ mu na twa na bụ maa mu na duma iwɛ na bụ apata.

⁴³Apata Ngɛɛ zhɛ mu na twa na miaụŋ mi Isrɛl. Ụjɛrụma mu zhɛ wa nda maa apata shɛ ofwo tijilo;

⁴⁴N zhɛ ma nda udulo ata u tu'ulwa keeni utukwu ata ụrụpɛ tijilo. Ngɛɛ zhɛ ma nda du Aron keeni miaụŋ mu bwa tijilo, iwɛ maa a n ndanɛ ugondu tunongbo.

⁴⁵Nazhɛ Ngɛɛ zhɛ ma nama na ashashɛ miaụŋ mi Isrɛl maa ma sha Agwatana aba.

⁴⁶Nazhɛ ɛɛ zhɛ a mapa ma Gamba n shɛ AGWANGWAMA na shɛ Agwatana aba na bɛcinjɛ aŋ na cɛnjɛ ti Ijipti; maa ma gɛga na ashashɛ aba. Gamba AGWANGWAMA na shɛ Agwatana aba na.