Read bassa ỤBANỤ 31 Bible Online

ỤBANỤ 31 - bassa bible

ỤBANỤ 31

¹Nazhɛ AGWANGWAMA hiɛŋ Moses,

²Kwụba, N teri Bɛzalɛl yɛu Uri, bujalụ Hori na shɛ ụlamụ Juda,

³Ngee shidinji bu na mpiala mi mi,[16] ta ti'inta ti iyi ti'eshicigo, ni iyi-tumapa, nu ugondu tugwoni we elele kpaaŋ ti'yebo,

⁴iwɛ maa manganga ugondu tugwoni, maa nda ugondu wa azhɛnarɛya, na azụrụfa keeni ɛtumburɛ,

⁵keeni atayɛ tɛshaba maa e swenenji ni iyi, keeni i'wɛ'wɛ tɛshaba, iwɛ ugondu we elele kpaaŋ.

⁶Hioko, M medenji bu Oholiab, yɛu Ahisamak, na shɛ ụlamụ Dan, maa mbiyono bu. Ngee peni atwa elele na incɛ ahaŋsa tuto, maa e 'yebi ugondu tugwoni we elele na Ngee bi peni-unu ubwa tɛnda:

⁷ibɛ shɛ udulo tu'ulwa, ni Ikpɛtɛ Unu-tutwa, na bɛjɛjɛ bi inyɛmɛnyɛmɛ na patanɛ ni ibɛ, keeni i'wɛŋni'wɛŋni udulo ata kpaaŋ.

⁸Keeni uteburu ata, ti i'wɛŋni'wɛŋni ubwa, tu uteburu ụsụtụla utumburɛ, ti i'wɛŋni'wɛŋni ubwa kpaaŋ, tu utukwu-ụrụpɛ na oo hwoŋzhingo iyi ụhiụŋ ụlatụ nu ubwa,

⁹tu utukwu-ụrụpɛ tuhwoŋzhingo ti i'wɛŋni'wɛŋni ubwa kpaaŋ, tu ugbamgbam ata ụ'wụtụ, tụ ụkwụka ubwa u tupatana,

¹⁰to otogwo tijilo ugondu Aron bunongbo, keeni otogwo miaụŋ mu bwa me eyi iwɛ ma a njɛ ugondu tunongbo,

¹¹ta manɛbɛ mu tududugono, ti iturɛre ụhiụŋ ụlatụ iwɛ ohwolu tijilo. Nu gana na ti Ngee bi peni-unu ibɛ kpaaŋ, ibɛ ɛɛ zhɛ a nda uŋ.

¹²Nazhɛ AGWANGWAMA hiɛŋ Moses,

¹³Mbiso miaụŋ mi Isrɛl maa, Hiɛ shɛ hio shiyono Ijitɛ-ụhinjanụ mi eshe, ubwa shɛ useyida na namɛ na ashashɛ mi ne hiŋ tutu awaŋnɛ hiŋ na te e ci kpaaŋ, iwɛ maa hi mepi maa Gamba AGWANGWAMA na ma hi nda tijilo na.

¹⁴Hiɛ shɛ hio shiyono Ụjita-ụhinjanụ eshe, iwɛnɛ tu waa shɛ tijilo ti hiŋ. Bụtụ be elele na heshigeni uŋ, ɛ zhɛ a kwụna bụ; bụtụ be elele na kaa njɛ ugondu nu bwa, ɛ zhɛ a bacɛnga bụtụ ata na atwa ubwa.

¹⁵Ijitɛ icihiŋ ahiɛ shɛ hia nda ugondu; ama nụ ụjita ucenje ụ shɛ Ụjita-ụhinjanụ tijilo ti mi, bụtụ be elele na njɛ ugondu we elele nụ Ụjita ata Ụhinjanụ, ɛ zhɛ a kwụna bụ.

¹⁶Iwɛbɛ po miaụŋ mi Isrɛl mo shiyono Ụjita-ụhinjanụ eshe, tutu awaŋnɛ aba kpaaŋ, iwɛ maa ụ shɛ unu-tutwa unyizo-nom.

¹⁷Ubwa shɛ useyida na namɛ na ashashɛ mi na miaụŋ mi Isrɛl unyizo-nom. Ijitɛ icihiŋ Ngaa njɛ la azuba keeni cɛnjɛ tu unyizo, Ngoo to ụhinjanụ nu ụjita ucenje.

¹⁸Aka na ta Agwatana hwuwi ushaura tụdụma no Moses ni Ishɛmɛ ɛtɛ Sainai, bee peni bu atayɛ ata tiseyida namɛ patakwụ patakwụ eyebi, buvwa ba Agwatana ubwa 'nyeci aŋ.