Read bassa ỤBANỤ 34 Bible Online

ỤBANỤ 34 - bassa bible

ỤBANỤ 34

¹Nazhɛ AGWANGWAMA hiɛŋ Moses, Shaba atayɛ eyebi patakwụ patakwụ gana a na ala ehiiŋ. N zhɛ ma 'nyata n-ndumwa ma atayɛ ala ehiiŋ ebu bweji la na aba.

²Mama imanjɛ maa munje Ishɛmɛ gɛ Sainai beyi nu uvwungwa, maa twa ne mi ni ihiŋhiŋ ishɛmɛ gɛ.

³Kede bụtụ be elele munje na bụ o, to lono maa a kwụbɛ bụtụ be elele ni ishɛmɛ gɛ no ofwo elele o. To lonono agwụdụ, ni inɛ maa a na yaga ne mbi Ishɛmɛ gɛ o.

⁴Go Moses shebi ga atayɛ ata tụpatakwụ patakwụ eyebi gana a na ala ehiiŋ; bee suji aŋ baa gbatụ ti'ishijɛ nu uvwungwa dididi, bee munji ni Ishɛmɛ Sainai gana na ta AGWANGWAMA ge peni bu unu.

⁵Nazhɛ AGWANGWAMA kezhe nu udomu, bee shikeni nu bwa apata, bee enenji izeci ibwɛ tijilo maa, AGWANGWAMA.[17]

⁶Nazhɛ AGWANGWAMA keshici nu umbe Moses, baa ananga, bɛɛ hiɛŋ, Gamba AGWANGWAMA, AGWANGWAMA, na shɛ Agwatana inyɛmɛnyɛmɛ tihioko keeni tulubo ti biye, bɛ njɛ shɛ izɛlɛgwu ni isɛbwɛ tɛnda o, tulubo ti biye keeni tɛcara ti gembi no ofwo mi.

⁷Ba untangana tulubo tu bwa ti biye iwɛ atwa igbɛɛ igbɛɛ, baa gangana kaa atwa iyi iwɛ ya aba keeni andwa aba tubwada keeni iwɛwɛ ya aba, ama bi zha shɛ ba ganga kaa bụtụ na n-ndumwa-wụmɛ gadaga o. Bi zhɛ ba pana miaụŋ, ta ajalụ, ta ajalalo keeni anyabɛshɛ ulwapɛ iyi iwɛ nɛ eshi aba njɛ.

⁸Ibɛ po go Moses njɛ kakayɛ bee ubi eshe ubwa na cɛnjɛ, baa zhɛbɛ bụ.

⁹Bɛɛ hiɛŋ, Oo AGWANGWAMA, yaa shɛ iwe mi ubu kwụlanɛ gom, asha ma bụ tabwa, maa zhagaga no tu; okwo ta a shɛ atwa na hweteni; iti gengeni iyi iwɛ tu keeni iwɛwɛ tu, maa iti leshiji maa ta sha atwa bụ.

¹⁰Nazhɛ AGWANGWAMA hiɛŋ Moses, Hioko unu Ama twa ne E'isrɛl. N zhɛ ma nda iyi tudama ne eshe atwa bụ kpaaŋ, inɛɛ nɛ usara ibɛ ta njɛ shɛ la kwukwuŋ nu unyizo, kwo kaa na ashashɛ anya edenji. Atwa elele zhɛ a kwụba iyi i'wɛtwɛ nɛ Ngɛɛ zhɛ ma nda, Gamba AGWANGWAMA, iwɛnɛ ti iyi nɛ Ngɛɛ zhɛ ma nda na bụ i shɛ iyi inyɛsɛ tụsụma i'wɛtwɛ 'wɛtwɛ.

¹¹No shiyono ahaŋsa bụ nu unu na Ama bụ pana hwayɛ ga. Hioko, N zhɛ mo hi unzongo A'amo, ne Ekenan, nɛ Ɛhit, nɛ Ɛpɛrɛz, nɛ Ɛhiv keeni Ɛjɛbus nu umbe bu.

¹²Ta na twa-unu na atwa na jɛjɛ na cɛnjɛ ta ata ɛbi zhɛ o, iwɛ aka na ɛɛ zhɛ ma bu shana hwuŋ ugwuru na zhɛ ma bụ ima.

¹³Hiɛ shɛ hio hwuŋzotongo otukwu-ụrụpɛ aba, bwarataga ma ntatanuwaŋ ma aba kpaaŋ, keeni ashɛra na shɛ tuwa ta aba to o.

¹⁴Iwɛnɛ po bɛ shɛ shɛ ba zhɛba tuwa te elele o, AGWANGWAMA na ɛɛ hiɛŋ izeci ibwɛ, Gɛ-isɛbwɛngwɛ, ubwa shɛ Agwatana isɛbwɛngwɛ.

¹⁵Ta na twa-unu we elele na atwa na jɛjɛ na cɛnjɛ ta ata o, iwɛ aka na ɛɛ zhɛ ma hi suyana hwuŋ na tɛzhɛba tatuwa ta aba maa hi zhe hiɛ yɛ iyi nɛ oo to ụrụpɛ,

¹⁶Nazhɛ miaụŋ mụ bụ me eyi mi zhɛ ma zana miaụŋ ma aba mo o, maa e zeriji miauụ mụ bụ me eyi maa a na zhɛba tuwa ta anya edenji.

¹⁷Bɛ shɛ shɛ bu mama ndana itɛtɛnuwɛŋ ye elele o.

¹⁸Untangana isene ibrɛd nɛ zasa Ifucingɛ, na amɛ ijitɛ icenje, ɛbi zhɛ ba ya ibrɛd ɛtɛ zasa Ifucingɛ, gana na ti Ngee bi peni-unu, na aka na ee shiri iwɛ ibɛ nu upiana Abib;[18] iwɛnɛ po nu upiana ata abu banɛ la ni Ijipti.

¹⁹Iyi elele nɛ bajɛ a'aŋbụ bino bi ibɛ i shɛ inee mi, keeni miaụŋ mi iyimabiga kpaaŋ, inɛ ye elele i shɛ ye eyi, ti yɛu umbe buna keeni ụgwụdụ.

²⁰Ama nụ ụgwụdụ ɛbi zhɛ ba sa yɛu umbe izhinyɛci, yaa shɛ kaa ya bụ kwụlanɛ shɛ maa so, asha bɛ shɛ ba kwụsa i'ilu ibwɛ. Bɛ shɛ ba sa miaụŋ mụ bụ me eyi mu umbe kpaaŋ. Kede bụtụ be elele zhajɛ na agba mi ni i'ɛlɛ yo hondo.

²¹Ijitɛ icihiŋ abɛ shɛ ba nda ugondu, ama bɛ shɛ ba ta ụhinjanụ nụ ụjita ucenje; bɛ shɛ ba ta ụhinjanụ na aka tubwada keeni aka iyimɛyɛ tugwubo.

²²Bɛ shɛ bo shiyono isene ijitɛ icenje eshe, tụ ụjita tụ'walụ ti hiiŋ ti iyimɛyɛ wit tugwubo, ti isene iyimɛyɛ tijicinje nu ukwunanga uywa.

²³Kpalụ tatụ etwenyi bụ kpaaŋ shɛ a ulwa nu umbe mu nu uywa we elele, Gamba n shɛ AGWANGWAMA na shɛ Agwatana Isrɛl.

²⁴N zhɛ ma bacɛnga anya edenji nu umbe bu, maa ma kaana tugwungwu tụ bụ ugombo. I zasa bụtụ be elele cɛnjɛ tụ bụ ti zhɛ ta kwulana maa 'yaga tụ na aba bụ, na aka na abụ zhajɛ maa mɛmɛ bɛcinjɛ nu umbe mu na shɛ AGWANGWAMA na shɛ Agwatana bụ karɛ tatụ nu uywa uywa ata o.

²⁵Bɛ shɛ shɛ bo hiŋtotongo mehieŋ mi iyi ụrụpɛ mu ni Ifucingɛ o. Kede iyi ụrụpɛ isene tɛkashɛka kaa vwɛ maa iyi heleni iŋ o.

²⁶Bɛ shɛ be tecinje iyi tụ'walụ ti hiiŋ ta cɛnjɛ tụ bụ nu umwono mu, Gamba AGWANGWAMA na shɛ Agwatana bụ na. To shitogo yɛu biywoywo no mosubo me bino bwa o.

²⁷Nazhɛ AGWANGWAMA hiɛŋ Moses 'nyata n-ndumwa mu ga kpaaŋ; iwɛnɛ po unu na Ngaa twa na bụ keeni miaụŋ mi Isrɛl, ubwa 'yajɛ n-ndumwa mu ga hwɛɛ.

²⁸Go Moses namɛ kaa apata na AGWANGWAMA iwɛŋnɛ buhanda keeni ijitɛ buhanda. Bɛ yɛ shɛ iyimɛyɛ, bu swe shi kaa meni o. Nazhɛ bee 'nyeci n-ndumwa mu unu ata tutwa na atayɛ ata tụpatakwụ patakwụ, ibɛ shɛ onu-tupana ata umpwa.

²⁹Aka na tu go Moses kezhe ni Ishɛmɛ Sainai, baa 'waŋnɛ atayɛ ata tiseyida u tụpatakwụ patakwụ eyebi ni i'ɛle ibwɛ. Go Moses mepi shi kaa maa ụpɛshɛka ubwa wa ta ba, iwɛnɛ ti bɛɛ jimɛ n-ndumwa na Agwatana o.

³⁰Aka na ti ga Aron keeni E'isrɛl kpaaŋ kwụbɛ tụ ụpɛshɛka Moses wa ta, ibɛ po inyɛsɛ shɛ aŋ maa o dongonu bu.

³¹Ama tuba go Moses suyanɛ aŋ; nazhɛ ga Aron keeni ehiu tu'ulwatagwụ ta ata kpaaŋ gwure pu bwa, go Moses jɛmɛ n-ndumwa na aba.

³²Na aba ibɛ, nazhɛ E'isrɛl kpaaŋ dongonu bu, bee peni aŋ unu-tupana ata kpaaŋ, u gata AGWANGWAMA jimɛ nu bwa ni Ishɛmɛ Sainai.

³³Aka na tu go Moses hwuweni aŋ n-ndumwa timbiso kpaaŋ, bee urigeni ụpɛshɛka ubwa owowo.

³⁴Ama aka elele tu go Moses zhɛ bo tono pa AGWANGWAMA maa dumanga n-ndumwa nu bwa, bo ushigo owowo ata nụ ụpɛshɛka ubwa, uuwa i ci aka na tu baa banɛ. Aka baa banɛ hwayɛ, bo mbiso atwa Isrɛl iyi elele nɛ Agwatana panɛ bụ unu ibɛ.

³⁵Aka E'isrɛl kwụbɛ ụpɛshɛka Moses, tu'waba tụ ụpɛshɛka ubwa ta ta; go Moses bo urugono ụpɛshɛka ubwa owowo sasana, uuwa i ci aka na ti bee teni na amɛ maa dumanga n-ndumwa na AGWANGWAMA.